Tocandu en San Martín

El pasáu martis, 11 de noviembri, era el día de San Martín de Tours, o sea, San Martín de tóa la vía. Ya sabéis el reflán: a tó cerdu le llega'l su San Martín. Además de sel una fecha señalá pa los cerdus, tamién es el patrón d'unu de los pueblus vecinus d'El Rebollal: San Martín de Treveju. Y, al sel al patrón del lugal, me llamarun pa tocal allí.

De siempri me ha gustáu muchu bajal a San Martín. Es unu de los mis pueblus preferíus. Anque esi día bajé a "trabajal", peru es un trabaju d'esus que, de verdá, jadin disfrutal abondu a tó el que tieni amol pola cultura tradicional.

Lo primeru que m'encontré al llegal allí a las 7 de la mañana a tocal la alborá jué al "señol de los cohetis" ("foguetis" ena palra mañega), y que qu'aniantis d'apencipial yo a tocal el tamboril ya estaban sonandu los cohetis. Dispués me pusi a tocal la alborá polas callis del lugal. A esas horas, y cona arquitectura tradicional de San Martín (casas altas con entramáu en callis estrechinas), la música tieni un soníu mú güenu o, comu idin los músicus, tieni mú güena "acústica". O sea, se me oyía "que te cagas" por tó'l lugal. Peru no sólu esu. acostumbráu comu estoy a il tocandu sólu polas callis, en San Martín tenía una compaña de ¡15 presonas! O sea, qu'ibamus jadiendu l'alborá lo menus una compaña de 16, con castañuelas y botella d'anís d'acompañamientu. Y la genti salía a ofrecelmus aguardienti pa que no se mos ensecasi'l gañoti.

Comu no pué sel menus, el tema de la lengua propia del lugal, el mañegu, jue otra cosa que me gustó muchu (siempri me gustó). Allí, del grupu qu'estaba conmigu, lo palraba el 90 por cientu de la genti. Y lo qu'es más emportanti: estaban orgullosus de palralu y de tenel esu nel su pueblu. Porque tienin mú presenti que la su lengua es algu que les jadi especialis. Y porque tienin mú presenti qu'es algu que han recebíu d'herencia de los sus padris y agüelus. ¡Y qué orgullosus estaban! "cuasi" comu ena nuestra tierra que, menus un grupinu de amantis d'esta tierra, los demás tienin vergüenza de palral la nuestra lengua, y jasta hai angunus vendíus que lo que quierin es acabal con ella...

Peru es qu'allí el tema de la lengua lo tienin mú presenti en tó: los nombris de las callis (lo mesmu que hogañu en Robrea, peru dendi jadi muchu más tiempu); los demás cartelis del lugal (los que te idin p'andi está el ayuntamientu, el conventu, la farmacia,...); los nombris de los negocius (por ejempru, el "bar Ángil", la "Boiga de cumías",...); el pregón del ayuntamientu lo mesmu en cstellanu qu'en mañegu; y lo que más me llamó l'atención: ena mesma misa el cura diju la homilía en mañegu. ¡Impensabri en cualisquiera de los nuestrus pueblus! Del tema de la lengua podría estal palrandu muchu más largu, peru dejaremus un poquinu pa otrus días.

Otra cosa que me llamó muchísimu la atención: la procesión. Primeru porque ¡la jidun antis de jadel la misa! No lo había vistu ena vía. Y dispués porque, abriendu pasu a "San Martiño" (comu lo llaman allí, mientris qu'aquí le cambian el nombri a Santu Ferinu y a San Silveriu) polas callis del lugal iban, además de la crús y los cirius, un montonáu de pendonis con imáginis de santus, cristus y vírginis. ¡Qué políu de vel, dagalis! Esty sí lo había vistu una vés nel pueblu de La Alberca el 15 d'agostu.

A lo que ya no me quedé jué a la otra procesión, la que lleva a la genti de "boiga en boiga" a probal el vinu nuevu del añu. Y es que dispués tenía de conducil. Ya se sabi, si bebis no conduzcas...

Pos asina jué el mi día de San Martín nel pueblu que, con más orgullu, lleva el nombri del santu: San Martín de Treveju. Estamus acostumbráus a qu'en los nuestrus pueblus se presumi muchu de la cultura tradicional y cómu se conserva. Peru ¡cuánt mos quéa por aprendel!

Palra d'El Rebollal
¡¡RESPETU Y OFICIALIDÁ!!

Otra dagala más

Pos sí, paisanus. N'El Rebollal estamus de noragüena, pos eti mes mos ha nacíu otra dagala más.

Esta dagala tieni de nombri Alicia, y es metá payenga (por parti de madri) y metá peñapardera (por parti de padri), asina que somus dos pueblus de la comarca los qu'estamus contentus.

Que sepáis que la dagala nació'l 2 de noviembri, lo que pasa es que no me hi enteráu jasta esta mañana. Peru güenu, la alegría ha síu la mesma.

Dendi esti rinconinu de la redi, la mi noragüena a los padris, y la mi bienvenía a la dagala.

Esperamus dis quí a pocu dal la bienvenía a más dagalis ena nuestra tierra, pos hi oyíu que hai angunu más en caminu.

Peru, polu prontu, dal la bienvenía a los que ya están aquí. Esta vés, la reina eris tú, Alicia: BIENVENÍA.

Palra d'El Rebollal.
¡¡RESPETU Y OFICIALIDÁ!!

Castañas y froris

Ya prontu jadi una semana dendi que en la nuestra tierra (y tamién juera d'ella) se celebró la "fiesta" de Tólus Santus.

Estus días de siempri juerun especialis, un tiempu pa acordalsi de los que ya nu están con nusotrus, de los que mos dejarun, de los que murierun.

Hogañu los cristianus celebran esta "fiesta" yendu a misa y jadiendu vesita a los muertus enos ciminterius. Estus lugaris, en algu que puedi parecel comu'n cuentu, s'enllenan de vía más que nunca, pos quien más quien menus le va a lleval a los sus familiaris froris pa que la su tumba esté polía. Y, anque mucha genti no pisa nel ciminteriu en tó'l añu, esi día va a recordal a los que ya nu están con nusotrus.

Anque no sólu de frotis vivi el hombri n'esti tiempu, anque bien verdá es que los que vendin froris es justu esti tiempu nel que más vendin en tó'l añu. Esti tiempu es tamién el tiempu las castañas. Y la fiesta de las castañas sí qu'es una fiesta de verdá, porque no es una fiesta tristi comu la de Tólus Santus, sinu una fiesta alegri de dal gracias polus frutus arrecogíus ena cosecha, de fiesta pola llegá el tardíu, d'alegría por uñilsi toa la genti alreol de la lumbri a comel castañas asás, cantal, bailal, contal hestorias,...

A esta fiesta se la conoci con muchus nombris: magostu, amagüestu, calbochá,... Y lo prencipal es siempri lo mesmu: pasalu bien comiendu castañas. ¿Que es una fiesta menus religiosa? Los cristianus dirían que sí. Anque a las vecis pasa comu los romanus: que pa ellus eran bárbarus tólus que nu eran romanus. Pos pa los cristianus lo mesmu: son profanus tólus ritus que no son cristianus. Anque es natural que tóas las religionis piensin que la su religión es la verdaéra.

Esu nu quieri idil que los ritus "profanus" sean menus religiosus que los que tienin de vel con los curas y las misas. El il a los ciminterius es un ritu de recordal y honral a los muertus. El comel castañas es un ritu de dal gracias polus frutus arrecogíus nel veranu y nel tardíu.

Y un ritu que tamién se jadi por esti tiempu es el que tóas las vísperas de Los Santus jadi Ángel Rufino de Haro, "El Mariquelo", a la Catedral de Salamanca pa dal gracias por qu'el terremotu de Lisboa del añu 1755 no jidu ningún mal en Salamanca.

Se jadin muchas más cosas n'esti tiempu. Angunas, que trujun de juera, s'están poniendu de móa hogañu. Anque, dendi esti rinconinu de la redi, apostamus por defendel lo nuestru. ¡Viva la fiesta de Tólus Santus! ¡Viva'l magostu! ¡Y viva'l Mariquelu!

El cambiu la hora

Esti fin de semana, comu dendi jadi ya unus 30 añus, se ha jechu en tóa Uropa esu del cambiu de hora del tardíu, asina que a las 3 horas de la madrugá del domingu golvierun a sel las 2.

¿Por qué se jadi éstu? Idin que pol mé de qu'asina s'ajorra energía. Peru ¿quién y cómu s'ajorra energía?

Pos no sé. Polu prontu, enos nuestrus pueblus escureci aniantis, asina que tenemus d'arcendel las lucis aniantis pa no estal a escuras. Asina qu'esi "ajorru" no puedi sel pa la genti normal, que al escurecel una hora antis tieni d'arcendel las lucis una hora antis. Pa mi qu'esu no es ajorral, sinu tólu contrariu. Y aquí, n'El Rebollal, entovía tenemus suerti, porque escureci un cuartu d'hora más tardi que, pol ejempru, en Madrís, y de seguru que media hora más tardi qu'en Barcelona.

Enos pueblus tampocu se ajorrará muchu porque las lucis, anque s'apagan una hora antis a la mañana, hai qu'arcendelas tamién una hora antis a la nochi. Las horas de lús son las mesmas, anque cambien la hora.

Asina que no ajorramus lús en cassa, no s'ajorra lús nel alumbráu púbricu de los pueblus, ni enos ayuntamientus,... ¿Dóndi s'ajorra antoncis?

Nel mi parecel, no s'ajorra en ningún láu, polu menus la genti de la calli. Y, además de no ajorral, no tenemus más qu'afrontus y mal cuerpu pol mé del cambiu la hora. De seguru que ná más ganan con éstu cuatru, los cuatru de siempri que ganan con tólus cambius.

Y lo peol es qu'encima mos quierin jadel creel que es güenu. Pos señoris, no créu que el gastal más lús por tenel que arcendela una hora antis sea ná güenu. Ni los trastornus del sueñu y las comías que tenemus tós pol mé del cambiu la hora. Me da a mi qu'estu del cambiu la hora es otru cuentu y otra mentira comu tantas y tantas que mos cuentan cá día pa justificalsi ellus, y pa atontal a la genti y así podel manipulala mejol.

Que se dejin de tantus cuentus y dejin a la genti tranquila.

Palra d'El Rebollal
¡¡RESPETU Y OFICIALIDÁ!!

Moras

Una de las cosas de las que más m'acuerdu de cuandu era un dagal es el salil a moras. Cogía un cubinu, o anguna cosa asina y me iba por el barriu El Jornitu de Peñaparda, andi antoncis había muchus zarzalis que daban güenas moras, y lo enllenaba.

Bien es verdá que hai que tenel cudiáu con las parés qu'estaban mediu esbarrungás, con los zarzalis,... ¡Peru qué güenas estaban las moras! No jadía más que llegal a cassa y polu menus un pratu de moras con azucal me jincaba. Y con las demás se jadía confitura, una confitura qu'es de lo más güenu que eníamus antoncis, y que me llevaba en tarrus pa merendal cuandu vivía en Madrís.

Hogañu ni vivu en Madrís ni soi un dagal, polu menus pol el tiempu que tengu. Peru me sigui gustandu esu de il a moras, anque ná más sea una vés, polu menus pa catalas. Asina qu'el otru día cogí un cubu y me recorrí toa Peñaparda pa cogel unas cuantas moras, dendi las Majaíllas, jasta'l Caminu Payu, pasandu polus Cotorrus y El Jornitu. La verdá es que no cogí muchas (este añu ha habíu pocas moras, y malatas), peru sí hi cogíu moras abondu pa golvel a sentilmi comu cuandu era un dagal.

Cuandu llegué a cassa, ¿que pensáis que jidi lo primeru? Cogel un pratu de moras, echali azúcal pol cima,.. ¡y p'adentru! Otras cuantas las metí en almíbal, pa tenel moras pa cuandu no las haiga. Y otras las himus jechu confitura. No es el ganal dineru, anque tólus añus las compran (polu menus en Villarrubias) y m'acuerdu que de dagal tamién cogiamus pa vendelas y sacal unas perras. Tampocu es enllenal la despensa, porque hogañu quien más quien menus tieni la cassa acomolgaíta de cosas pa comel, más de lo que tuvun nunca los nuestrus padris y agüelus.

Pa mi lo mejol de salil a moras es recordal viejus tiempus, golvel a sentil comu cuandu eramus unus dagalis. Y tamién el paseal por el campu y vel los zarzalis, los bruñus,... toas las prantas de las que tenemus bien abondu ena nuestra tierra. Y oyel a los pájarus, los burrus, las vaquis,...

La verdá, es algu que dendi aquí recomiendu a toa la genti. No dejéis moril al dagal que tós tenemus drentru. Quiciás, salil a moras puedi ayual a mantenelu vivu.

Virgin del Rosariu

Ayel domingu, primel domingu d'otubri, jué la Virgin del Rosariu. No es que yo sea mú religiosu ni ná d'esu, peru esti día estaba antaú acomolgaítu de tradicionis.

La Virgin del Rosariu era ena nuestra tierra una fiesta con mayordomus y madrinas. Comu fiesta religiosa, se jadía misa (ayel hubu misa pol mé de qu'era domingu, que si no ná de ná). Peru lo mejol venía dispués de la misa.

Enos nustrus pueblus se jadía el Ofretoriu. Ya sé que se jadi en muchus pueblus de la comarca (no hai más que leel los periódicus del fin de semana). Lo que tienin d'especial los nuestrus ofretorius, tocáus con gaita y tamboril, que no tienin los d'otrus lugaris es que los ofretorius de los nuestrus pueblus se bailaban, polu menus los de Peñaparda, Robrea y Villarrubias, anque de seguru que el de Payu tamién. Con el baili las madrinas le ofrecían a la Virgin unas velas y unos rosconis. Dispués, los rosconis se subastaban y los que tenían "la obrigación" de compralus eran los novius de las madrinas.

Peru, ¿qué mos ha queáu de tó esu? Pos poca cosa. Hogaú ya no se jadi ni ofretoriu, ni misa, ni procesion, ni se subastan los rosconis ni ná de ná. El casu es que cuandu vinun de nuevus los curas que tenemus agora quitarun tó estu de los ofretorius en lo que yo piensu que es una mala manera d'entendel la "puerza religiosa" (´¿a qué me suena a mi estu de la pureza religiosa?). Asina, toas estas cosas que de siempri se jidun ena nuestra tierra las quitarun, y mos dejarun a velas venil. Angún día tendríamus que palral bien abondu de tóas las nuestras tradicionis que mos han quitáu "nel nombri de Dius"...

Por suerti, grupus comu "El Fandangu" de Robrea y el grupu de Peñaparda han conseguíu que nu se olví el baili del ofretoriu, y entovía se baila enas actuacionis que se tienin nel veranu anque, por desgracia, ya no se baila nel tiempu que se tenía de bailal, qu'es esti día de la Virgin del Rosariu.

Y agora vieni lo más curiosu. Pueblus que de siempri han síu menus ricus que los nuestrus en tradicionis resulta que conservan el Ofretoriu el día que siempri se ha jechu. Y los nuestrus pueblus, que de siempri han presumíu de guardal las tradicionis (en angunus pueblus se presumi d'estu más qu'en otrus), jadi 20 añus que no se jadi y lo qu'es peol, ni cuenta con ellu.

Idi el reflán esu de "dimi de qué presumis, y te diré de qué carecis". ¡Y qué verdá es! Vas mos vali que mos dejemus e tantu presumil y mos pongamus de verdá a defendel las tradicionis, TOAS LAS TRADICIONIS.

Al vel cuál es el primel pueblu d'El Rebollal en jadel el Ofretoriu el día que siempri jue: el día de la Virgin del Rosariu.

Bienvenía al lugal

¡Güenas, paisanus!

Ya jadia tiempu que no escribía ná nel mi blog, y es que no me ha vagáu pol mé el trabaju. Peru en llegandu setiembri por aquí ya mos himus queáu los poquinus de siempri (por desgracia, porque siempri gusta más el vel los pueblus llenus de genti), asina que agora vaga más escribil.

Y p'apencipial con algu alegri, ná más idilvus qu'en Peñaparda somus unu más. El pasáu 20 d'agostu nació una dagala, Silvia, la única dagala que ha nacíu esti añu nel lugal. El añu pasáu nació un dagal, Rubén, peru se jue a vivil a Guinaldu, asina que Silvia está solina de los dagalis del su tiempu.

Dendi esti rinconinu del mundu quería dal la noragüena a los sus padris, agüelus y demás familia. Y dali la bienvenía a la dagalina.

Bienvenía al lugal, Silvia.

P.D. Noragüena tamién a Pablu y Tomás, de Robrea, que me paici que han teníu tamién dagalis esti añu. Me paici qu'esti añu ha nacíu otru angún dagal n'El Rebollal, peru no lo hi dichu aquí por que nu hi teníu noticia d'ellu. Si anguién sabi qué más dagalis han nacíu, que deji un comentariu a esti escritu. Por si se me olvía anguién, noragüena tamién.

Palra d'El Rebollal.
¡¡RESPETU Y OFICIALIDÁ!!

La nochi de San Juan

Siempri se ha teníu a San Juan comu la nochi más corta y más mágica del añu. Anque no es verdá que sea la más corta (la más corta es la del 21 de juniu, justu cuandu entra el veranu) si que es verdá que es una nochi "mágica".

Los Sanjuanis, y la Nochi de San Juan, es una fiesta acomolgaíta de ritus religiosus. No me refieru a los ritus católicus, sinu a los que esta religión llama "paganus" (lo mesmu que los romanus llamaban "bárbarus" a los que nu eran romanus). Esus ritus "paganus" son restus de la religión más antigua de la Humanidá, la que amaba a la Madri Naturaleza, con tó'l conocimientu de qu'era la Madri la que les daba la vía, la que les daba de comel,... Y por esu los nuestrus antepasáus le daban las gracias al agua (jadiendu sagráus regatus, ríus y juentis), le daban gracias al sol (jadiendu sagráus los solsticius y equinocius),...

Peru güenu, agora no voi a chalral d'esta religión antigua, pos es largu y da pa escribil un libru. Lo que sí vamus a vel qué ritus de dal gracias a la Madri se jadin ena nuestra tierra. Ritus uñíus al solstitiu de veranu, el tiempu nel que la nochi es más corta de tó'l añu.

Por si angunu no se ha dáu cuenta, lo mesmu los Sanjuanis que San Silveriu son la misma fiesta, pos dambas dos se jadin pa celebral el solsticiu, na más qu'en días diferentis. Y en estas fiestas tenemus ritus muchu más antigus de lo que pensamus, que vienin dendi tiempus d'antis de Cristu y d'antis de los romanus. Vamus a vel angunus:

1. EL PINU. No estoi seguru de si se poni en Navafrías, peru sí es seguru de que los quintus de Peñaparda, Payu y Robrea ponin en linu en esti tiempu. En Villarrubias lo dejan pa finalis d'agostu, pa Santu Ferinu. ¿Y qués éstu del pinu? Pos es dos cosas a la vés. La primera, un ritu de fertilidá, pa que los campus, qu'en esti tiempu apencipian a dal los sus frutus, los den abondu pa que naidi pasi necesidá. Lo segundu, un ritu d'iniciación, del pasu de dagal a hombri.

2. EL CAPAZU. En Payu y en Navafrías entovía se jadi el Capazu, una foguera que, en metá la plaza, quieri dal un homenaji al Sol ena nochi más corta del añu. ¿Cómu? Pos jadiendu del capazu un trocinu del Sol ena Tierra, comu muestra de qu'el Sol (no olviemus, el que tieni que jadel que maduri el frutu) ha ganáu a la nochi. Es tamién un ritu de purifical. Lo malu y lo vieju se echa al fuegu.

3. EL AGUA. Hai un tercel ritu menus conocía: el ritu el agua. Mi madri siempri me contó que la mi agüela Benita siempri les tenía el agua de sieti juentis pa lavalsi antis del alba. Asina, idía, se quitaban los malis y no te queabas dormíu en tó'l añu. O sea, comu un ritu de purificación pol mé del agua.

Güenu, estus son los oríginis de los Sanjuanis y San Silveru. No hai que olvidal lo que de verdá se celebra: el solstitiu de veranu, el tiempu nel qu'el sol gana la batalla a la nochi, el tiempu nel que la nochi es más corta.

Jasta aquí lo religiosu. Pa'l que quiera vesital los nuestrus pueblus y venil de fiesta, vos digu que lo mesmu en Robrea qu'en Payu han atrasáu tó (menus la misa) jasta los días 27, 28 y 29 de juniu. Asina, vamus a tenel:

VIERNIS 27
A la tardi, el pinu (alreol de las 8)
A la nochi, verbena (alreol de las 11)

SÁBADU 28 y DOMINGU 29
A la mañana, incierru (alreol de las 12:30)
A la tarde, capea (lreol de las 6 y media)
El sábadu a la nochi, verbena

No pongu los programas de los dos pueblus porque son cuasi los mesmus. Ná más cambian dos cosinas:
El viernis a la nochi, antis de la verbena, se jadi el Capazu en Payu.
El viernis de madrugá (alreol de las 4) sueltan una vaquilla en Robrea (y dispués, chocolati nel bar "El Rebollar").

Pos ná, dagalis, a disfrutal de los Sanjuanis.

NOTA: la afotu es del Capazu de los sanjuanis de Payu del añu 2006

Palra d'El Rebollal ¡¡RESPETU Y OFICIALIDÁ!!

San Silveriu 208

Güenu, dagalis, ya tenemus encima las fiestas de los nuestrus pueblus.

Las primeras que vienin son las de San Silveriu, en Peñaparda, que van a sel dendi'l juevis 19 jasta'l domingu 22 de juniu. Los programas están jechus y repartíus por ahí, y anque el programa ná más poni dendi'l 20, tamién hai cosas el 19. Vos pongu el programa aquí.

JUEVIS 19 DE JUNIU
19:30 Se poni el pinu
22:30 Baili ena praza con gaita y tamboril pol José Benito, tamborileru del lugal

VIERNIS 20 DE JUNIU
8:30 Alborá con gaita y tamboril jecha pol José Benito, tamborileru del lugal
12:00 Misa a San Silveriu
13:00 Incieru
18:30 Capea
23:00 Verbena cona orquesta MARENGA

SÁBADU 21 DE JUNIU
13:00 Incierru
18:30 Capea
23:00 Verbena cona orquesta PREFIJO

DOMINGU 22 DE JUNIU
Día los dagalis, con tren, castillu y Fiesta la Espuma

Pos ná, dagalis, que sepáis qu'estáis tós envitáus a venil a Peñaparda, y los que vengáis esperu que lo paséis mú bien. ¡VIVA SAN SILVERIU!

¿Cuándu va a paral éstu?

¡Mú güenas, paisanus!

Ya estaríais idiendu que había dejáu d'escribil nel blog. La verdá es que lo hi eniu derrotáu muchus días y, jasta que nu ha güeltu a furrulal, no me hi puestu a escribil otra vés. Peru hi güeltu con más juerza que nunca a chalral alreol de la nuestra tierra, de la nuestra cultura y, comu no pué sel menus, a defendel la nuestra lengua y el nuestru patrimoñu.

Y alreol del nuestru patrimoñu es esti escritu de hoi lunis.

Áina si ha pasáu un mes dendi que pasó, peru a mi entovía me dueli comu si juesi d'ayel. Vos cuentu. El pasáu lunis, 12 de mayu de 2008, jadi agora 4 semanas, el nuestru patrimoñu tuvu una pérdida que es difícil que se puea recuperal angún día, más pol mé de la genti que tenía de movelsi pa recuperau que de lo que puedi costal recuperalu.

Ya estaréis idiendu: ¡deja de dali güeltas, dagal. ¡Dilu ya! Güenu, allá va. Resulta que esi tristi día, un día de lutu pa tólus que quierin, anque ná más sea un poquinu el nuestru patrimoñu, quitarun el retabru de la ilesia de Peñaparda. No es que lo robasin, sinu que tenían de quitalu pol mé la carcoma.

Jasta ahí pos güenu, si no había más remediu que quitalu, qué le vamus a jadel. Peru esi no es el problema. Lo malu es que van a dejal la ilesia asina, sin retablu ni ná. Yo ya las tuvi esi día con el cura, y le dije a las craras lo que piensu: que una ilesia sin retabru no es una ilesia, sinu una navi industrial. Pareci que quierin dejal la navi lo mesmu que la de Villarrubias.

A mi me dueli nel alma el idilu peru hogañu, dendi que la "arregrarun" (anque habría qu'idil que la DERROTARUN), la ilesia de Villarrubias tieni de sel la más fea de toa la provincia de Salamanca. Y hogañu, han jechu de la de Peñaparda si no la segunda más fea, quiciás la tercera. ¡Una ilesia sin retabru! ¡Esu ni es ilesia ni es ná!

Peru güenu, sigún el parecel del cura, los retabrus son cosa del pasáu, de otrus tiempus. O sea, qu'el retabru de la ilesia de Peñaparda, el de la ilesia de Villarrubias, los ofretorius de Robrea, Peñaparda y Villarrubias... estorbaban.

Y lo que es peol, naidi ha movíu un déu pa no perdel lo que tenemus. Mú al contrariu, arriman el hombru a echal una manu pa vel si lo perdemus más ligierus...

Güenu, lo voi a dejal aquí porque estoi apencipiandu a afrontalmi, y lo mesmu acabu insultandu a anguién, y esu tampocu puedi sel.

Peru esi día, el 12 de mayu de 2008, quedará ena mi mimoria comu un día de lutu, un día tristi, un día que tólus que queremus la nuestra tierra teníamus de recordal con vergüenza. Porque es una vergüenza cómu s'está tratandu el nuestru patrimoñu, lo mesmu el de las ilesias qu'el cultural. ¿Cuándu va a paral éstu? ¿Cuandu se va a respetal y defendel, de verdá, el nuestru patrimoñu?

Palra d'El Rebollal. ¡¡RESPETU Y OFICIALIDÁ!!

NOTA: afotu de cómu quea la navi industr... digu la ilesia de Peñaparda

Qué bonita está la sierra...

Asina es comu apencipia unu de los nuestrus cantaris de boa.

Qué bonita está la sierra
con el beredu froríu
más bonita está la novia
al láu del su maríu...

Y es que la nuestra sierra está mú polía nesti tiempu. El agua, bendita agua, que ha caíu la última semana ha jechu que tó esté verdi... y de tólas coloris, pos agora con los caloris de la primavera toas las prantas estan echandu hojas y froris, y las nuestras sierras, cotorrus y demás s'enllenan de coloris lo mesmu qu'un arcu del señol.

El miércolis que pasó mucha genti de Peñaparda se jue d'escursión a Gata pola calzá, y lo que más vinun ididendu es esu, que qué bonita estaba la sierra. Y es que pocas cosas hai más polías que la sierra en primavera, con los beredus, las jaras, los chagüarzus, las escobas,... y las milis y milis de froris que salin estus días. A cualisquiel láu que miris se te van los ojus y se t'enllena el espíritu de belleza y alegría.

Asina, dagalis, pa esti fin de semana vos doi un conseju. Dispués de comel, id a dal un paséu pol el campu. Cogel un caminu, o una veréa y ponelvus a andal. Sin prisa, sin afrontus, disfrutandu de la naturaleza. Es la mejol medecina.

P.D. Consejus cuandu se va a paseal: siempri que se puea, paseal en compaña en vés de sólu; cuandu vayáis pol un caminu no vos salgáis de lo conocíu; dejal dichu a anguién p'andi se va a paseal; lleval un teléfonu pol si pasa algu; lleval algu pa bebel; lleval un gorru pa no cogel una insolación

Palra d'El Rebollal ¡¡RESPETU Y OFICIALIDÁ!!

En abril, aguas mil

Polu menus, esu idi el reflán. Y esti añu paici que se va a cumpril lo que idi, pos ya hai añus que no llovía tantu comu n'esti mes d'abril. ¡Y no creáis que cuatru gotinas de ná! Unas güenas aguarrás. No es d'estrañal que los regatus güelvan a correl, las juentis a manal, los ríus s'enllenin de vía...

Peru craru, siempri vienin anguién a idil esu de "estamus jartus de tanta agua, ¡ya puía paral de llovel!". U otra genti qu'idi esu de que "los ganaerus estarán contentus". ¡Cómu puedi estal la genti tan equivocá!

Vamus a dejal las cosas bien craras, a vel si a la genti l'entra de una vés ena cabeza que el llovel tamién es "güen tiempu".
- El agua no es sólu pa los ganaerus: es pa tós, porque tós bebemus, mos lavamus y cocinamus con ella
- El llovel limpia el airi, y jadi que los microbius se vayan, y mos libra de muchus andancius
- El llovel jadi que tó esté verdi. Ná sería más tristi que vel la nuestra tierra sin esi verdi qu'es una de las sus señas d'identidá
- Si no lluevi y sigue le sequeá, no se puedin enllenal las piscinas, ni llevarán agua los ríus. Y dambas dos cosas jadin de los nuestrus pueblus unus lugaris mú interesantis nel veranu

El agua es la vía. A los que piensan que ná más el sol es "güen tiempu" les digu que del sol no se puedi bebel. Vivimus en un país con mucha sequeá, y pocas cosas son más emportantis qu'el agua. Y con esu del cambiu del tiempu, los añus van a sel cá vés más secus. Que se lo piensis dos vecis aniantis de deseal qu deji de llovel, porque quiciás nel futuru, y no mú lejotis, lo vamus a echal de menus.

P'acabal, otru reflán, que oyí un día a una mujel en Peñaparda: si el tiempu es nel su tiempu, no es mal tiempu. Y ya lo idi el reflán del títulu del escritu: "En abril, aguas mil". Disfrutemus del agua hogañu que podemus, sabi Dios pol cuántu tiempu podremus disfrutal d'ella.

Palra d'El RebollaL ¡¡RESPETU Y OFICIALIDÁ!!

Comel el jornazu

Enos periódicus de Salamanca esti lunis van a palral de muchas cosas. Primeru, de la mujel que han matáu d'un tiru cona espingarda en Ciarrodrigu. Y pa los de Salamanca, de qu'es el día de comel el jornazu. Y es qu'esti lunis jadin en Salamanca lo que llaman el "Lunes de Aguas" (Lunis d'Aguas), y la genti se va al campu (el pocu que quea ena capital de la provincia) a pasa un día de fiesta y comel el jornazu (esa riquísima "empaná charra" rellena de choridu, jamón, panceta,...).

Peru craru, las modas son las modas, y anguna genti que tieni menus personalidá qu'una charra de vinu saldrán enos nuestrus pueblus a comel el jornazu esti lunis porque comu en Salamanca lo comin esti día... Pos no señoris, el Lunis d'Aguas sólu es típicu de la ciudá de salamanca, no de la provincia.

Enos nuestrus pueblus siempri himus teníu pol costumbri comelu otrus días. Pol ejempru, en Villarrubias siempri se ha comíu el jornazu el Domingu de Resurreción. En Peñaparda, el día de la Crús de Mayu. Enos demás pueblus d'El Rebollal no sé, peru de seguru que se jadi tamién esus días.

Asina que podemus escogel. O tenemus un pocu de personalidá y jademus la tradición de comel el jornazu enos nuestrus pueblus el día que se ha jechu de siempri, o le pegamus otra patá (una más) a las nuestras tradicionis y, mientris dejamus moril las nuestras, aplaudimus las de los demás.

Ya sé que lo digu siempri, peru son las nuestras tradicionis las que jadin de los nuestrus pueblus algu especial. Si las dejamus moril, si dejamus que los nuestrus pueblus pierdan la su personalidá lo habremus perdíu tó.

Porque no sólu son tradicionis los bailis y el panderu. Tamién lo es la nuestra lengua. Tamién lo son los nuestrus juegus. Y tamién lo es comel el jornazu el día que se ha comíu toa la vía.

Palra d'El Rebollal. ¡¡RESPETU Y OFICIALIDÁ!!

El Fandangu de Robrea

Esti sábadu que pasó se jidu en Ciarrodrigu la Charrá, una Fiesta de folclori que tólus añus, el Sábadu Santu, se jadi ena ciudá.

Esti añu, pola parti d'El Rebollal, han estáu los del grupu "El Fandangu" de Robrea. Y lo jidun comu siempri, mú bien. Primeru, bailarun el Ofretoriu, dispués la Jota de dos Pasus, y pa acabal el Son. "El Fandangu" es un grupu que, a tólus lugaris que va, siempri cumpri y siempri deja a la nuestra tierra, al nuestru Rebollal, mú altu.

La verdá es que el grupu de Robrea mereci toas las alabancias y cumpríus que se le puedan dal.

Primeru, pol sacal p'alantri un grupu en esta tierra andi tan difícil es sacal p'alantri cualisquiera cosa. El grupu tieni ya muchus añus, y la genti qu'está en él de seguru que jadi las cosas cona mesma ilusión qu'el primel día.

Segundu, pol recuperal bailis que áina si estaban ya perdíus, comu pasa con El Son (que a mi es de los que más me gustan pol esi sabol a auténticu y esi señoríu que tienin los bailaoris al bailalu).

Terceru, pol lleval el nombri d'El Rebollal pol tólus rinconis de la provincia, cona cabeza bien alta y con tan güen arti.

Cuartu, pol defendel la nuestra lengua dendi el principiu. Ya dendi el mesmu nombri se ve esta defensa, pos está puestu ena palra d'El Rebollal: "El Fandangu". Además, hai ya unus añus (nel añu 2002) sacarun un discu con el nombri tamién ena nuestra palra: "Cantaris antigus de Roblea". Y, pol si juera pocu, nel discu cantan 3 cantaris ena nuestra lengua: "Que rompan la Jesa Arriba", "La Charrascona" y "La Joya los Caballus". Y entovía hai más. Otrus dos sonis del discu tienin el su nombri puestu ena palra d'El Rebollal: "El Fandangu" y "Pasacallis".

Asina es "El Fandangu". Siempri cona cabeza bien alta, siempri orgullosus de los nuestrus pueblus, los nuestrus bailis y la nuestra cultura. Y siempri teniendu mú craru que en drentru la nuestra cultura está la nuestra lengua. ¡Ay, cuantu tieni d'aprendel otra genti!

Noragüena, robreanus. No cambiéis nunca.

Palra d'El Rebollal. ¡¡RESPETU Y OFICIALIDÁ!!

¡Himus güeltu!

Dispués d'esti líu de los votus, aquí estamus otra vés.

Esti mes que pasó hi estáu de campaña. Pos sí, amigus, yo tamién hi estáu de camapaña. Y es que, comu diji en otrus escritu, estaba pa'l Senáu por el PREPAL (Partíu Regionalista del País Leonés) y, anque era seguru que no iba a salil, a tó'l que se presenta le gusta que le votin, asina que hai que jadel un poquinu de campaña. Pa'l que tenga curiosidá, hi sacáu 534 votus (más los que haiga teníu nel votu emigranti, qu'entovía no lo sé).

Peru aquí estamus otra vés a lo que interesa: a defendel la nuestra tierra, a defendel la nuestra cultura y a defendel la nuestra lengua.

Asina que me váis a vel pol esti rinconinu de la redi muchu más de continu que estas últimas semanas. Y esperu velvus a vusotrus tamién.

Palra d'El Rebollal: RESPETU Y OFICIALIDÁ

Los votus

¡Güenas, paisanus!

Como créu que tós sabéis, esti domingu es el día los votus.

Comu héis vistu, ya hai días que nu escribía ná n'esti rinconinu de la redi, y es que estu de los votus mos trai a tós locus. Y a los que estamus puestus comu candidatus pa angún partíu, más.

Pos sí, paisanus, yo tamién estoi enas eleicionis. No salgu pola teli, no salgu enos periódicus, peru soi candidatu al Senáu pol el PREPAL (Partido Regionalista del País Leonés).

No hi queríu escribil ná d'estu aniantis porque esti "blog" quieri sel, más que ná, dedicáu a la cultura y al Rebollal, no a la política. Peru comu cai que una persona d'El Rebollal, es esti casu yo, está de candidatu pa las eleicionis,´es de recibu dalu a conocel.

No quieru jadel estu más largu. Tengu otru "blog" ena redi, dedicáu ná más a estu de la política, y la su direición es: http://candidatojb.blogspot.com

Tamién, si anquién quieri vel la güeb del PREPAL, vos deju la sud ireición: http://www.gratisweb.com/prepal

Y ya sabéis, si queréis votal a anguién de la comarca, podéis ponel una crucina al láu el mi nombri. La verdá, a mi me jadi mucha ilusión que la genti de la mi tierra me dé el su votu.

Güenu, estu es tó lo que voi a palral de las eleicions nel "blog". Güenu, quiciás ponga los resultáus el lunis. Peru no más.

Lo dichu, que podéis votalmi, si anguién quieri.

Un saludu.

Tiempu de moruja

En los nuestrus pueblus, en esti tiempu es cuandu apencipia a salil la moruja. Y angunu dirá, ¿y qué es esu de la moruja? Pos, pa'l que no lo sepa, es una yerbina que sali enos regatus, cona que se jadi una ensalá riquísima que se llama regaju.

Anque paici que hogañu tó está prohibíu, jasta il a cogel moruja, ena nuestra tierra siempri se ha íu a arrecogel a los regatus, y con esti aprovechamientu tradicional nunca se ha acabáu. Esu tenía de servil de lección pa aprendel aquellus que piensan que pa protegel hai que prohibil. Pos no: si de verdá entovía quea algu que protegel es porque duranti sigrus se ha aprovecháu lo que mos daba la naturaleza del mó y manera tradicional. Nunca de prohibil.

Esu sí, cuandu se va a moruja (o a jongus, o a moras, o a lo que sea) lo que no hai que jadel nunca es cogelu tó nel mesmu lugal y dejalu "limpiu". Porque asina es comu desaparecin las cosas. Hai que il y cogel un poquinu d'aquí, otru poquinu d'allí, dejandu siempri pa'l que venga detrás y pa que se recuperin las especies. Imaginalvus que salin los cazaoris a jabalinis y loa cazan tós el mesmu añu. ¿Qué iban a cazal al sotru añu? Pos con la moruja lo mesmu, hai que dejal enos lugaris andi hai pa que, al sotru añu, güelva a salil.

El mó y manera de cogala es con unas estijeras, pa que quedin las raícis nel regatu. Lo mesmu que cuandu se cogi toóa, si se cogi mal tampocu nu güelvi a salil. Asina que ya sabéis, hai que cogel poquinu de cá láu, y cuartala con unas estijeras. Si se arranca, no güelvi a salil. Y sería una pena quedalmus sin moruja pol no sbel cogela o pola avaricia d'anguna genti.

Lo mejol de la moruja, craru está, es jadel el regaju y comelu. Pa esu se jadi comu una ensalá normal: moruja, adeiti, vinagri, aju y sal. ¡Y güen provechu!

Los nombris de las callis

Unu de los pueblus de la Sierra de Gata que más me gusta está juera d'El Rebollal. Es San Martín de Treveju, ena provincia de Cáciris. Los mañegus han sabíu conserval tres cosas mú emportantis:

Lo primeru, el regatu que pasa pol metá el lugal, que llama la atención sigún pisas nel centru del pueblu. Agua fría, agua crara, siempri corriendu. En otrus pueblus (comu en Peñaparda) enterrarun esi regatu que pasa pol metá. Lo qu'en San Martín es un orgullu aquí... güenu algu pa escuendel y tiral basura.

Lo segundu, la arquitectura tradicional. Las callis de San Martín están llenitas de cassas jechas al mó y manera tradicional. La genti que se pusu a arregral las sus cassas respetarun las tradicionis, y respetarun la jorma y los materialis de las qu'estaban jechas las cassas. Lo mesmu que en La Alberca. Asina, dambus dos pueblus puedin presumil d'arquitectura tradicional, y de tenel muchas vesitas pa vel las sus cassas. N'El Rebollal, se derrotan las cassas pa jadelas nuevas d'arriba a abaju, sin respetal las piedras, sin respetal los tejáus, sin respetal ná. Es que, lo mesmu que de los regatus, paici que tamién mos avergonzamus de las nuestras cassas...

Y lo terceru, quiciás lo más emportanti, es que las gentis de San Martín han sabíu guardal unu de los mayoris tesorus de la Península: la su lengua. Pos sí, lo mesmu que n'El Rebollal, en San Martín, Eljas y Valverdi tienin una lengua propia. En San Martín lo llaman mañegu; en Eljas, lagarteiru; en Valverdi, valverdeiru. Peru es la mesma lengua. Lo mesmu que cuandu n'El Rebollal en Robrea idin que palran "robreanu", en Villarrubias "mangurrinu" y en Peñaparda "peñaparderu", siendu la mesma lengua leonesa.

Peru lo mejol es vel la querencia que le tienin a la su lengua. Los dagalis la apriendin ena escuela, mientris que aquí jidun tólu posibri pa que no le aprendiesi la palra d'El Rebollal a los nuestrus dagalis. Los negocius tienin nombres en "la fala" mientris que los nuestrus (menus la "tahona El Tamborileru", en Peñaparda) ajuyin de la nuestra lengua comu de la pesti. Y lo más políu s il dandu un paséu polus pueblus y vel los nombris de las callis escritus lo mesmu ena palra del lugal comu ena lengua oficial del Estáu. Asina, comu ena afotu, se puedi leel "Calli a Fonti / Calle la Fuente". Igualitu que enos nuestrus pueblus. ¿Pa cuandu vamus a podel leel enos nuestrus pueblus nombris comu "Calli el Cristu", "Calli el Jornitu", "Calli la Juenti",...?

Esa es la gran diferencia entri esus lugaris y los nuestrus pueblus. Nel láu de Cáciris, la su cultura tradicional, incluída la lengua es un orgullu pa toas las gentis de esus pueblus. En pasandu a esti láu de la Sierra, vemus que enos nuestrus pueblus la genti se avergüenza de la su lengua.

Los tres pueblus del "Val de Xálima" son especialis. Los nuestrus cincu pueblus d'El Rebollal tamién. La diferencia es qu'ellus están orgullosus de lo ue les jadi especialis, y por esu serán especialis siempri. Y nusotrus mos avergonzamus de lo que mos jadi especialis, y cuandu éstu desapareza, dejaremus de sel especialis y seremus comu los demás. O peoris, pol dejal moril lo que mos jadía especialis.

A los señoris que mandan n'El Rebollal. No se puedi presumil de defendel la cultura tradicional estandu en contra d'una parti d'ella, quiciás de la parti más emportanti de la nuestra cultura: LA NUESTRA LENGUA. Si de verdá defiendin la cultura tradicional, es tiempu d'apencipial a dal pasus pa defendel la palra d'El Rebollal. Si no, no güelvan a presumil de defendel la cultura, porque será mentira.

Palra d'El Rebollal. ¡¡RESPETU Y OFICIALIDÁ!!

Escritus nel "blog"

Güenas, paisanus.

Comu héis podíu vel, nu escribu tólus días nel blog. No es que se me haiga acabáu las ideas, que las tengu a cientus.

Lo que pasa es que me paici a mi que es poca la genti qu'entra tólus días a leel lo qu'escribu y, quiciás, esa genti que entra cá 2 ó 3 días se puedi dejal de leel cosas emportantis porque, si s'escribi tólus días, los escritus enseguía se quean m'atrás.

Por esu hi pensáu en no escribil tólus días, sinu cá 2 ó 3 días. Asina los que vesitáis esti pequeñu lugal de la redi qu'es el mi blog podéis leel las cosa con más tranquilidá, y tamién yo puéu escogel mejol los temas de los que chalral.

Créu que con esti cambiu salimus ganandu dambus dos: el qu'estu escribi y tú, qu'estás al otru láu del ordenaol leyendu lo qu'escribu.

Asina qu'es sotru esquitu va a sel pa'l viernis o el sábadu. Comu idin en angunus programas de la teli... ¡No faltéis, que pasu lista!

Recuperandu tradicionis

Anque nu es comu pa tiral cohetis paici que, poquinu a pocu, se va recuperandu anguna tradición n'El Rebollal. Y es que ya iba siendu hora de que, en vés de jadel pol derrotal lo que tenemus, se jidiesi anguna cosa pa recuperal lo que s'está perdiendu.

Güenu, esta vés la alegría mos la han dáu los Carnavalis de Peñaparda. Y es que himus teníu tres días de Carnavalis nel lugal.

El Domingu de Carnaval, la asociación "El pandero cuadrado" (el panderu cuadráu) organizó una comía nel restauranti "El Castillo", seguía d'un pasacallis vestíus de jorramachi polas callis del lugal (que no se pudu jadel porque esi día llovió con muchu jostigu) y dispués, enas Escuelas Viejas, un baili al son del panderu y el tamboril, y un chocolati con biscochus.

El Martis de Carnaval, un grupu de vecinus de Peñaparda, sin estal organizáu pol ninguna asociación, salí a correl las callis del lugal cona música del tamboril. Comu no pué sel menus, toa la genti iba conus sus vestíus de jorramachi.

Y el Miércolis de Cenizaotru grupinu de presonas jidun el intierru de la sardina. Anque angunus d'estu de mantenel las tradicionis no s'enteran, y la misa del Miércolis de Ceniza la dan el juevis...

Jadi angunus añus, naidi daba un duru polus Carnavalis de Peñaparda. Peru jadi 3 añus salimus, el Martis de Carnaval, un grupinu de 4 presonas (contandu con el qu'estu escribi). Jadi 2 añus esi grupinu ya era de 8 ó 9 presonas. Y esti añu, eramus alreol de 50 nel baili del domingu, y más de 20 el Martis de Carnaval. Además, se siguin cantandu las dos tonás d'esti tiempu: "La Charrascona" y "Un Martis de Carnaval".

¿Que se puedin jadel mejol las cosas? Craru que sí. Yo hi echáu de menus que saliesi polas callis de Peñaparda la "Vaca Romera" (en Villarrubias, la "Vaca Galana"). O que se le diesi más pubricidá a la cosa (ná más se jidun unus cartelinus pa anuncial el baili que se pusun enos baris y comercius del lugal). Ni si quiera s'echó un pregón pa que la genti del lugal subiesi esa tardi a bailal a las escuelas. Peru güenu, esperemus que pa otru añu se jagan entovía mejol las cosas. Pa comu estaban los Carnavalis otrus añus, demasiáu.

Esu sí, dispués m'encargué yo de mandal las cosas que se jidun a los periódicus. Y además himus teníu la suerti de que han sacáu los nuestrus Carnavalis enos tres periódicus de Salamanca: Gaceta, Adelanto y Tribuna.

Güenu, esti añu podemus estal contentus. Los Carnavalis de Peñaparda han arrancáu. Y tienin pinta de seguil p'alantri. Ojalá güelvan a arrancal tamién enos demás pueblus d'El Rebollal.

Más de 1000 vesitas

Pos sí, amigus. Esti "blog" ya tieni más de 1000 vesitas.

Quiciás sea porque es interesanti lo qu'escribu. Quiciás sea porque hai genti a la que le gusta leel cosas ena palra d'El Rebollal. Quiciás sea por sabel más alreol d'El Rebollal. Quiciás sea pa riilsi un ratinu. O quiciás, por qué no, porque le caigu bien.

El casu es que, entri unus y otrus héis jechu que esti humildi lugal, esti "blog" alreol d'El Rebollal, tenga ya más de 1000 vesitas.

Ya sé qu'estus últimus tiempus lu hi teníu más abandonáu que de costumbri peru voi a intental golvel a escribil más de continu, chalrandu de tó un pocu, peru siempri con El Rebollal y la nuestra palra bien presentis.

Muchas gracias a tólus que héis entráu a leel lo que hi escritu estus mesis. Muchas gracias a tólus que héis dejáu el vuestru parecel alreol de lo que hi escritu. Y muchas gracias, pol alantráu, a tólus que leáis los mis escritu dis quí p'alantri.

Yo, intentaré jadel las cosas tólu mejol que puéa.

Carnavalis o Antrueju

Pos sí, ya tenemus aquí los Carnavalis (o el Antrueju), y anque paici que ná más jadin fiesta los de Ciarrodrigu, tamién enos demás lugaris se jadin cosas por el antrueju.

Antañu, la genti se vestía "de jorramachi", conas vestimientas más viejas que tenían. Polas callis salía la "Vaca Romera" (en Villarrubias, "Vaca Galana"), que era una presona disfrazá de vaca (cona calavera d'una vaca) que salía corriendu tras la genti. Y, comu no pué sel menus, se cantaban los cantus más propius d'esti tiempu: "El Martis de Carnaval" y "La Charrascona".

Peru güenu, hogañu, anque siempri se presumi de lo muchu que se defiendi la cultura enos nuestrus lugaris, se ha dejáu perdel cuasi tó lu del Antrueju, y se han cogíu las moas de juera (ya se sabi, lo que vieni de juera a angunus siempri le paici mejol que lo nuestru).

Con tó y con esu, enos nuestrus lugaris se van a jadel angunas cosinas. No sé si enos demás pueblus d'El Rebollal se va a jadel algu, peru en Peñaparda la asociación el panderu cuadráu ha preparán un par de cosinas pa'l Domingu de Carnaval, que vos deju en esti escritu:

DOMINGU 3 DE JEBRERU
-------------------------
14:30 COMÍA nel restauranti "El Castillo" (apuntalsi antis)
17:00 Si el tiempu acompaña, PASACALLIS vestíus de jorramachi con música
17:30 BAILI DE CARNAVAL nel Centru Cultural (enas escuelas viejas) con panderu, gaita y tamboril, rumbas, pasodobris, vas corríus,...
A toa la genti que vaya al baili, se le convidará a chocolati calienti con biscochus

Pos ya sabéis, estu es lo que se va a jadel en Peñaparda polus carnavalis. Estáis tós envitáus a venil.

Mal mes el d'eneru

Anque no se puedi idil de ningún mes que sea malu por sí mesmu, n'estus últimus añus paici que los mesis d'eneru están siendu malus.

Yo no sé qu'es lu que tendrá esti mes, que paici que tólus añus se mueri un montonáu de genti. No sé en los otrus pueblus, peru en Peñaparda, en lo que llevamus del mes d'eneru, ya se han muertu tres mujeritas. La primera, la Tia Másima (que trujun hai pocus añus dendi Francia y estaba ena residencia), la segunda la Tia María "de las Patatas", y la tercera la Tia Caitana (madri de los "Piñas").

La verdá es que a la primera no la conocía, peru a las otras dos sí las había tratáu. Lo qu'es seguru es qu'eran tres mujeris mú querías nel lugal, tres mujeris que palraban la nuestra lengua y, polu menus las dos últimas, mujeris qu'entovía vestían al mó y manera tradicional, con las sayas y el pañuelu ena cabeza.

Siempri da pena que se muera anguién, anque sean presonas mayoris. Entovía dá más pena si es anguién a quien conocis, y cuantis más cerca esté de ti, más pena te da. Y, en estus casus, cona muerti d'estas presonas ha muertu tamién un pocu de la nuestra tierra y la nuestra cultura, anque n'estus casus no sea lo más emportanti.

El mes d'eneru de 2008 está siendu malu en esti sentíu. Mediu lugal está de lutu. Las familias de la Tia Másima, la Tia María y la Tia Caitana están de lutu. La nuestra cultura está de lutu.

Esperemus que jebreru sea mejol, muchu mejol.

La Tia María "de las patatas"

Hai unus días mos dejó la Tia María "de las patatas", una de las mujeris que, enos últimus 15 ó 20 añus, más han sobresalíu ena defensa de la nuestra cultura tradicional y, en especial del panderu cuadráu de Peñaparda.

Nunca gusta chalral alreol d'estas cosas, peru qué menus que dedicali a la mujerita unas rayinas comu homenaji.

A la Tia María le gustaba muchu cantal y tocal el panderu, y jasta esti últimu añu siempri que pudu estuvu ena Fiesta el Panderu Cuadráu que tolus veranus se jadi en Peñaparda. La recuerdu esti veranu sentá ena praza, en una silla, viendu cómu tocaba y bailaba la genti encima el tabráu, tabráu qu'otrus añus había pisáu ella pa tocal el panderu. Y es qu'esta mujel llevaba la música ena sangri.

Con tó y con esu, lo más emportanti de la Tia María, además de sabel cantal y tocal, era que sabía jadel panderus. ¡Cuántus panderus habrán jechu las sus manus pa la genti del lugal y la genti forastera! Pos muchus, la verdá. M'acuerdu que una vés jidu con los mis padris un panderu abaju, ena cassa El Castillu, momentu del que saqué una afotu que tengu puesta nel mi libru y ena mi güeb de Peñaparda (afotu que tamién es el acompañamientu d'esti escritu). Tamién recuerdu que le jidun un reportaji de cómu se jadía el panderu pa una coleición de vídeus alreol de los "oficius perdíus" o "oficius d'antañu" (agora mesmu no m'acuerdu cómu se llama la coleición).

La Tia María siempri repartió a los demás la su música, la su alegría y los sus saberis. Y tólus que himus tratáu con ella mos queamus con un güen recuerdu.

Sirva esti escritu pa jadeli un pequeñu homenaji a la Tia María "de las patatas". Jasta siempri, Tia María.

Luminaria de San Sebastián

En los nuestrus pueblus, San Sebastián siempri jué una fiesta grandi, una de las prencipalis del añu. San Sebastián siempri ha síu unu de los que, n'El rebollal, himus llamáu "Santus del Gorru", pol sel enos mesis del fríu.

Tó estu vieni a cuentu por dos cosas. La primera, porque esti fin de semana es San Sebastián. Y segundu, porque pol una vés se va a jadel algu enos nuestrus pueblus pa honral al santu.

Hogañu, lo pencipal (y cuasi lo únicu que se ha jechu jasta esti añu) ha síu la Luminaria, que es una gran lumbri, foguera o capazu, apaecía a las que se jadin polus Sanjuanis, y alreol d'ella s'ajunta la genti del lugal a chalral, calentalsi, comel choridu y patatis asás, bebel y, si se tercia (y hai anguién que ponga música), bailial. En Peñaparda es la última fiesta que los quintus del lugal celebran comu quintus.

Antañu se jadían más cosas. Sigún José Alonso Pascual, nel su libru de Robrea, nel lugal San Sebastián era una fiesta con Mayordomus. El día antis se jadía al Capazu ena praza, y el día el Santu había misa mayol, y se corrían los gallus. Al final del día se jadían las subastas del istiercul de las jessas, las marrás y la yerba los Vallis La Laguna y Las Zorreras.

Güenu, comu diji aniantis, tó estu vieni a cuentu de qu'esti añu en Peñaparda se va a jadel en peñaparda anguna cosina más que la Luminaria de costumbri. A mi me parecía que, es cayendu en fin de semana la fiesta de San Sebastián, se podía jadel nel lugal algu más, asina que pensé un programa pa dambus dos días (sábadu y domingu) y se lo di a la alcaldesa pa que lo dijiera nel plenu del ayuntamientu. Y paici sel que la cosa gustó, anque lo que tenía pensáu pa'l sábadu a la tardi no se va a podel jadel (peru lo tendré en cuenta pa otra vés). Asina, el programa e San Sebastián en Peñaparda va a queal asina:

SÁBADU 19 D'ENERU
Luminaria (nochi y madrugá)

DOMINGU 20 D'ENERU
9:30 Alborá, por José Benito, tamborileru del lugal
10:45 Misa
17:00 Baili al son del panderu y el tamboril ena praza

Anque el programa no es mú grandi, polu menus sí que esperamus pasalu bien. Y, comu no pué sel menus, toa la genti está envitá a venil a Peñaparda.

Ésto demuestra tamién una cosa: pa jadel cosas no jadi falta muchu dineru, sólu ilusión, ganas de jadel cosas y anguién que tenga las ideas.

Esta vés la idea la tuvi yo, peru la puedi tenel cualisquiera de la genti d'El Rebollal. A los que tengáis ideas, no tengáis miéu de idilselas a anguién. a vecis, jaste vos puedin jadel casu.

Quería acabal el escritu con una puesía-conjuru que jidi pa la nochi de la Luminaria (tamién le pusi música). Idi asina:

Luminaria de San sebastián
que ya ardis nel lugal.

Ardi bien juerti, ardi bien altu,
lleva lejotis todu lo malu. (BIS)

Luminaria de San Sebastián,
que ardistis, ardis y arderás.

Ardi bien juerti, damus calol,
lo vieju, lo malu, ya s'acabó.(BIS)

NOTA: afotu arrecogía de http://weblogs.clarin.com

Dagalis

Anque la noticia ya es del añu pasáu, créu que tenemus d'apencipial el nuevu añu con güenas noticias.

El otru día chalré alreol de la presona más vieja de Peñaparda (y de seguru que d'El Rebollal): la Tia Gora, que jidu 103 añus el 4 d'eneru.

Peru agora voi a palral de la más nueva. Y es que a últimus de diciembri (me paici qu'el 27 de diciembri) vinu al mundu un dagal (créu qu'es un dagal, si no pidu perdón a los sus padris). Qué mejol noticia pa terminal el 2007 y apencipial el 2008 qu'el nacimientu d'un dagal. Porque, pol desgracia, es algu de lo que no tenemus abondu ena nuestra tierra.

En Peñaparda jadía lo menus 2 añus que no nacía ningún dagal. Y me paici qu'enos otrus pueblus d'El Rebollal pasa algu apaecíu. Peru esti nuevu dagal, la presona más nueva de la nuestra comarca, ha íu a nacel nel sestu pueblu d'El Rebollal: Perosín (que, anque hogañu está en drentru de Peñaparda, antañu jue el más emportanti).

Los dagalis son el futuru de la nuestra tierra, de los nuestrus pueblus. No hai cosa más tristi qu'un pueblu que no tieni dagalis corriendu y juegandu polas sus callis, o pueblus conas sus escuelas cerrás. N'El Rebollal entovía tenemus la suerti de tenel las nuestras escuelas abiertas y con dagalis. Peru comu no nacin dagalis tólus días, es noticia el que naza unu.

Dendi esti escritu quería dali la noragüena a los sus padris. Esperu que criéis al dagal polu menus igual de bien qu'estáis criandu a la su hermana. Y que la felicidá que ha entráu ena vuestra cassa esté con vusotrus y los vuestrus dagalis muchu, muchu tiempu.

Receta pa llegal a los 103 añus

Esti escritu lo escribí cuandu la Tia Gora, de Peñaparda, jidu 102 añus. Lo mandé a los periódicus con toa la güena intención de que lo sacasin tal y comu lo escribí yo. Peru lo cogió un "periodista", lo cambió de lengua (el mi original estaba ena palra d'El Rebollal) y lo firmó con el su nombri. Peru güenu, esu ya pasó. Aquí vos deju lo qu'escribí antoncis (cambiandu los 102 añus del añu pasáu polus 103 d'esti añu).

El día 4 d’eneru la Tia Gora de Peñaparda jidu 103 añus. Llegal a 103 añus es difícil, peru es muchu más difícil llegal jasta esus añus con esa juerza, esa salús y esi saleru que tieni la Tia Gora. Es verdá que tieni los malis de la genti vieja, el no oyel ni vel comu la genti nueva, peru muchus quijiéramus tenel esa salús comu un robri que tieni la Tia Gora.

No soi ningún sabiu que tenga toas las respuestas, ni muchu menus el amu de la verdá. Peru sí podemus cogel comu ejempru a la Tia Giora pa, polu menus, vel un mó y manera de llegal a viejus con güena salús.

No lo hi dichu aniantis, peru la Tia Gora nació en Peñaparda nel añu 1905. De nueva estuvu trabajandu en Francia y golvió al lugal justu el añu qu’apencipió la Guerra, en 1936.

Dispués estuvu muchus añus trabajandu nel campu, y llevandu traviesas y patatis a vendelas a Ciarrodrigu, en aquellus tiempus en que se tardaban alreol de 2 días en llegal con el carru y los bués. Y otrus dos días de güelta. Una vés jasta tuvu un dgal nel caminu. Asina ya tenemus una de las cosas pa echali al nuestru guisu de llegal a viejus: el trabaju. Idin qu’el trabaju es salús y, en viendu a la Tia Gora, tieni de sel verdá.

Palrandu de guisus. ¿Qué comi una mujel que ha pasáu de los cientu? Yo se lo preguntu tós los días y podemus jadel un resumin. Pa desayunal: café con lechi y azúcal (más lechi que café), y algu pa mojal (pan, biscochus, galletas,...). Pa comel y pa cenal: frejonis, berzas, garbanzus, patatis,... Tó jechu a la lumbri en un pucherinu y con un cachinu de tocinu o de chorizu. De postir: un “golosu” (asina llama la Tia Gora a los yoguris). Y antis de ilsi a echal, una tila, pa dormil tranquilu.

Peru la receta entovía sigui. Los paséus son güenus a toas las edadis, peru cuandu se llega a vieju lo son más, pos jadin que los brazus y piernas no se quedin entumíus. La Tia Gora sali tolus días a paseal, cuandu no es pa’l Caminu Payu es a jadel anguna vesita a los sus dagalis, o a los vecinus, o a compral los golosus que tantu le gusta comel.

Y entovía tenemus otra cosina: el güen humol. Pocas vecis hi vistu a la Tia Gora renegá. Al contrariu, siempri anda con ganas de riilsi, o de bailal, o de cantal. Anque ya no baila, porque 103 aus son muchus, jasta pa la Tia Gora. Esti añu no se le ha jechu homenaji, peru sí se le jidu cuandu llegó a los cientu, y esi día echó un baili al son de la gaita y el tamboril del tamborileru del lugal. Y muchas vecis se le puedi oyel cantal nel su corral. Asina es el güen humol de la Tia Gora.

Y asina podemus vel hogañu a la Tia Gora. Siempri vestía de negru dendi la cabeza jasta los pies, con el su pañuelu, la chambra, la rebeca, las sayas, el mandil, las medias y las alpargatas. Siempri andandu p’allá y p’acá con la su cachera ena manu. Siempri contandu anguna cosina de cuandu era más nueva. Y siempri cantandu.

¿Cómu llegal a esus añus asina? Lo podemus idil con cuatru cosinas: trabaju, güena comía, güenus paséus y güen humol. Habrá que esprimentalu a vel si llegamus a viejus.

Añu Nuevu, escritus nuevus

¡Saludos, paisanus!

Diréis que ya jadi tiempu que nu escribu ná en esti lugal. Pos es verdá. Peru tamién es verdá que nel tiempu las vacancias naidi se poni a leel cosas ena redi. Y esu d'escribil pa no lo lea la genti, pos no es del gustu de naidi. Asina que me hi tomáu unas vacancias d'unus días en estu de dejal los mis escritus nel "blog".

Peru dendi hoi mesmu güelvu a lo mesmu, a intental contalvus cosas d'El Rebollal, a intental que tós sepamus un poquinu más alreol de la nuestra tierra y a seguil defendiendu la nuestra palra.

Pos esu, bienveníus a nuevu añu. Qu'esti añu 2008 venga llenu de cosas güenas pa tós nusotrus, pa la nuestra tierra y la nuestra genti.

Y qu'sti añu 2008 la nuestr palra tenga el respetu y la proteición que se mereci y a la que, sigún el artículu 3.3 de la Costitución, tieni derechu.

FELÍS AÑU 2008