910-2010

Esti añu 2010 el Reinu de León (Salamanca, Zamora y León) jadi 1.100 añus. No debemus olvial que es n'esti Reinu nel que la nuestra comarca d'El Rebollal ajundi las sus raícis historicas y culturalis. Por esu, dendi esti rinconinu queremus recordal el su cumpriañus. FELICIDADIS

viernes, 22 de octubre de 2010

El Monolitu de Villarrubias


Villarrubias y, con él, los demás pueblus d'El Rebollal, guarda muchus tesorus en drentru las sus lindis. Unu d'estus tesorus es natural, y no tenemus más de caminal polos sus caminus y veréas pa dalmus cuenta d'ellu. Otru es cultural, con la palra d'El Rebollal (en la qu'está esti escritu). Y otrus tesorus son hestóricus.

Unu d'estus tesorus hestóricus es el monolitu que se levanta al pié el campanariu. Un monolitu jechu nel añu 1610 y que, pol esu, esti añu jadi 400 añus.

El monolitu, d'alreol de metru y mediu de altu pol mediu d'anchu está jechu de granitu y tieni escritus en la su cara. Asina, podemus leel el añu en que se jidu (1610), el nombri del obispu esi añu (Pedro Ponce de León), la cantidá de 23 ducáus (monéas d'oru d'esi tiempu, lo mesmu que hogañu los eurus, que anguna genti sigui llamandu orus), y el nombri de Suan Mayor (Juan el Mayol, ¿el que dió los 23 ducáus?), además de palabras comu ilesia, misa,... Lo que mos jadi pensal que el tal Suan dió a la ilesia de Villarrubias 23 ducáus pa jadel una misa (o angunas misas) nel añu de 1610, en siendu obispu el tal Pedru Ponci de León.

El domingu 17 d'otubri de esti añu 2010 quisimus jadel una pequeña conmemoración y, de pasu, conocel un poquininu más la hestoria del lugal. Asina que jidimus, allí al pié el campanariu un pequeñu "homenaji" al monolitu. Rafael Sánchez Ramos, que jué alcaldi de Villarrubias hai unus 10 añus, leyó un escritu de por qué se jadía éstu. Tomás Acosta Píriz, de Navafrías, leyó un pal de puemas jechus por él, unu d'ellus escritu ná más pol mé el actu el momnolitu. Dispués, un serviol, José Benito Mateos Pascual, dió una pequeña chalra alreol de la hestoria de Villarrubias. Y, pa acabal, Damián (a la guitarra y la viola) y Patricia Santamaría (con la su vós) dierun el final a la fiesta cantandu unus ssonis del músicu charru Juan del Encina y otrus del su tiempu.

A tó lo que se jidu vinu genti, entri unas 40 y 50 presonas. Peru pareci que la cosa, juera d'El Rebollal, tuvu la su emportancia, pos vinu de juera del lugal genti comu Ángel Iglesias Ovejeru (Presidenti de Documentación y Estudiu d'El Rebollal), Carlos García Medina (pintol famosu de Ciarrodrigu), Agustín García (tamorileru d'El Cabacu), además de Florencio Ramos (Presidenti de la Mancomunidá Altu Águeda) y Camila Vizarro (alcaldesa de Peñaparda). Además, lo que se jidu en Villarrubias ha salíu pubricáu en Salamanca24horas.com, MujerHoy.com, Tribuna de Salamanca, Ciudadrodrigo.net y, además, el martis 20 me jidun una entrevista en direstu pa Puntu Arradiu de Ciarrodrigu que, además, lo sacó a la nochi en la teli de Ciarrodrigu. Asina que paici que la cosa jué emportanti y que Villarrubias, pol una vés, jué la capital cultural de la comarca de Ciarrodrigu.

Comu hi dichu muchas vecis, los nuestrus pueblus, pol mú chicus que sean, guardan mucha hestoria y muchus tesorus. Muchas vecis los tenemus delantri las nuestras naricis y no somus capacis de velu. El tema del monolitu es unu d'ellus, no hai más que vel tó lo que se ha palráu esta semana de él. El tema de la palra es otru, anque siempri habrá angún ilumináu, angún sabijondu qu'esté en contra pol mé de cosas más escurar que craras.

Que sí, qu'es verdá, que tenemus muchus tesorus. No mos dejemus engañal, ni mos dejemus albardal. Los de los pueblus chicus no somus menus que naidi. La nuestra hestoria y la nuestra cultura no son peoris que la de otrus lugaris más famosus, sinu tólu contrariu. Y el domingu lo demostramus en Villarrubias.

Palra d'El Rebollal
¡¡RESPETU Y OFICIALIDÁ!!


AFOTU: Monolitu de Villarrubias (juliu de 2010)

martes, 5 de octubre de 2010

Tardíu


Llegó el tardíu, con él, el fríu y el agua, agua que güena falta mos jadi, porque no había caíu una gota en tó'l veranu (quiciás anguna tormentina).

Comu ya hi dichu anguna vés, el tardíu es un tiempu especial. Primeru, porque los nuestros robrealis, los que dan el su nombri a la nuestra comarca d'El Rebollal, s'enllenan de coloris, lo mesmu de las hojinas que se van ensecandu comu de las de los árbolis que, comu los pinus, están verdis tó'l añu. Y esu sin contal las coloris de los frutus del campu, comu los madroñus, los tapaculus, los bruñus, las nuecis, las castañas,...

Paseal polus nuestrus caminus es un regalu pa la vista y pa'l oyíu. Dalsi en paséu polas nuestrus robrealis, o pinalis, o por cualisquiera de los lugaris de la nuestra tierra es olvial los problemas de tólus días, es encontral la pás, la tranquilidá y la belleza pol andiquiera que vamus.

Y dispués, con las primeras gotinas de agua, apencipian a salil los jongus. Peru d'esu ya palraré otru día.

El casu es qu'esta mañana, al cogel el cochi pa il a trabajal a Villarrubias, bajandu pola carretera vi una cosina que me truju un montonáu de recuerdus de cuandu era un dagal. Ni más ni menus que una cuadrilla de genti sacandu patatis en un güertu de Peñaparda. En otrus pueblus s'arrecogin antis, peru en Peñaparda apencipian a finalis del veranu y siguin nel principiu del tardíu.

Pos al vel esi cuadru me vinu a la cabeza cuandu ibamus tóa la familia con los mis agüelus a sacal las patatis al güertu. Cogiamus los cestus, los costalis, las sachas y el almuerzu, y allá que mos ibamus tós, a sachal el güertu. Los dagalis teniamus una sachina más chica, y allí andabamus aporreandu los jurcus. Menus mal que no muchu, porque la metá las vecis rachábamus las patatis, y las que estaban tocás ya no valían pa guardal, porque podían ponel pochas las que tenía al láu.

Peru entri tós sachábamus el güertu, y las patatis qu'ibamus sacandu las ibamus echandu en los cestus. Cuandu el cestu estaba llenu, pa'l sacu, o pa un costal. Y asina un jurcu, y otru jurcu,...

Craru que no era tó trabajal. Estaba el ratinu del almuerzu con el cachinu pan, el cahinu choridu, todinu, salchichón, quesu,... Los mayoris bebían la gotina vinu, y los dagalis agua de la juenti, o del charail,... que estaba bien frequita metía nel barril.

Cuandu estaban llenus los sacus venía el agüelu Ugeniu con el carru, se ataban los sacus con una cuerda y, una vés qu'estaban cerráus, se echaban encima el carru. Un sacu, otru sacu,... Asina jasta qu'estaba el carráu. Antoncis se uñían las vaquis (el mi agüelu ya no ussaba güés) y, con el carráu de patatis, pa cassa.

Tamién m'acuerdu de que las patatis había que tenelas guardás en un lugal frescu y escuru, y que no juesi húmedu, porque si no apencipiaban a echal tallus y ya no estaban igual. Entovía vi, hai angunus añus (no muchus) un carráu de patatis en Villarrubias. La verdá hai angunas cosas que da pena no golvel a vel y que train muchus recuerdus...

Pos ná, dagalis, a disfrutal del tardíu (o a profital, qu'es una de las nuevas palabras de la nuestra lengua). Y es que tólus tiempus del añu tienen un montonáu de cosas güenas, no hai más que sabel buscalas.

Palra d'El Rebollal.
¡¡RESPETU Y OFICIALIDÁ!!


AFOTU: El Mostajal (Peñaparda)

(Ya pondré otra afotu d'esti añu, que de seguru que esa ya la héis vistu muchas vecis)

viernes, 1 de octubre de 2010

REINU DE LEÓN I: Nacencia


¡Saludus, paisanus!

Comu ya sabréis (y si no, ya vos lo digu yo), esti añu 2010 se cumprin 1.100 añus (11 sigrus) del nacimientu del nuestru Reinu de León.

Dendi esti rinconinu quería jadel un pequeñu homenaji al nuestru Reinu, al Reinu del que himus heredáu la nuestra cultura tradicional, cultura ena que tamién entra la nuestra palra d'El Rebollal, y Reinu en drentru del qu'estamus dendi'l sigru XII.

Para que conozamus tós un poquinu más alreol de la nuestra hestoria, cá viernis voi a escribil un poquininu de la hestoria del nuestru Reinu de León, pa que no olviemus d'andi venimus, cosa imprescindibri pa sabel p'andi vamus.

NACENCIA DEL REINU DE LEÓN
Nel añu 711, los morus invadierun el Reinu de los Visigóus, derrotandu al rei Rodrigu, custión que merecería un libru aparti. El casu es que los árabis conquistarun la mayor parti de la Península (angunus lugaris, comu Viséu y el norti de la Península nunca juerun conquistáus).

Nel añu 718 jué la famosa batalla en Covadonga, cuandu los asturianus, con Pelayu a la cabeza, derrotarun a los morus y jidun el Reinu d'Asturies. Unu d'estus reyis d'Asturies, Ordoñu I, conquistó nel añu 856 la ciudá de León que, pocus añus más tardi, pasaría a sel cabeza del Reinu que esti añu celebramus.

Y llegamus al reináu d'Alfonsu III, que jué Rei d'Asturies dendi'l añu 866 jasta'l 910. El su hiju mayol, García, se regolvió nel añu 910 contra su padri y ésti, pa evital una guerra civil, dejó el tronu y se retiró a Zamora, andi moriría esi mesmu añu.

Los hijus de Alfonsu III dividierun el Reinu d'esti mó y manera:
- García I, el mayol, con León, lo que jué la nacencia del Reinu de León
- Ordoñu II, Galicia
- Fruela II, Asturies
- Ramiru, el más chicu, tuvu el títulu de Rei, peru sin tierras, al sel chicu demás, anque quiciás pudu heredal el Reinu d'Asturies al pasal a sel su hermanu Fruela Rei de León

Asina qu'estamus nel añu 910, añu de la nacencia del Reinu de León con su primel rei, García I. Peru a García le duró pocu el su reinu, ya que murió, sin dagalis, nel añu 914. Heredó el Reinu el su hermanu Ordoñu, que asina pasó a sel rei de Galicia y rei de León (no se inventó ningún nuevu Reinu de Galicia y León, comu jadría angunu hogañu pa justifical la esistencia de anguna autonomía...).

Ordoñu II tampocu es que durasi muchu, pos murió nel añu 924, asina que jué rei de dambus reinus alreol de 10 añus. Le siguió el su hermanu Fruela II, que ná más jué rei de León un añu, pos murió nel añu 925.

Asina, en la nacencia del Reinu de León, juerun reyis 3 de los dagalis de Alfonsu III. Tres reyis en 15 añus...

Güenu, 4 reyis en 15 añus, porque a Fruela II le siguió Alfonsu Froilaz, que muchus autoris no reconocin comu rei y pol esu no se le pusu ordinal. Peru la verdá es que heredó el tronu de León comu hiju de Fruela II, tronu que le porfiarun sus primus Sanchu Ordoñiz, Alfonsu y Ramiru, hijus del segundu rei de León, Ordoñu II.

Al final, Alfonsu Froilaz jué vencíu polus sus primus nel añu 926, dejandu asina el tronu de León. Peru esu ya es otra hestoria...

Palra d'El Rebollal.
¡¡RESPETU Y OFICIALIDÁ!!


AFOTU: Estatua de García I de León ena Praza Orienti de Madrís (sacá de commons.wikimedia.org)