910-2010

Esti añu 2010 el Reinu de León (Salamanca, Zamora y León) jadi 1.100 añus. No debemus olvial que es n'esti Reinu nel que la nuestra comarca d'El Rebollal ajundi las sus raícis historicas y culturalis. Por esu, dendi esti rinconinu queremus recordal el su cumpriañus. FELICIDADIS

sábado, 28 de noviembre de 2009

Palra y Leyis


En estus días s'está palrandu muchu, en tó'l país, del escritu que han sacáu los periódicus catalanis alreol del su estatutu y de cómu esti estatutu lo quierin echal p'atrás pol mé de las Leyis, de la prencipal Ley que tenemus nel nuestru país: la Costitución de 1978.

Sin entral a vel quien tieni razón, sí voi a chalral de la alegría con que anguna genti mienta a la Costitución cuandu le vieni en gana, que mú a menudu es cuandu se va a palral de los nacionalismus, comu pasa en esti golpi con los catalanis. Peru esa mesma genti se olvía de la mesma Costitución cuandu no le interesa. D'estu se podia estal chalrandu jasta'l día del Añu Nuevu del 2025, peru se puedi vel mú fácil qu'en la nuestra tierra tenemus un casu craru de Costitución "olvidá": el Artículu 3.3.

Pa los que no sabin lo que idi esi artículu, voi a recordálsilu: la riqueza de las diferentis palras d'España es un patrimoñu cultural que será ojetu d'especial respetu y proteción.

Hai que fijalsi bien en lo que idi: las palras (comu la nuestra palra d'El Rebollal) son UN PATRIMOÑU que tienin de tenel RESPETU Y PROTECÍON. Peru en la nuestra tierra, y por estensión en tó'l históricu Reinu de León, vemus que la LENGUA LEONESA (la palra d'El Rebollal está en drentru del LEONÉS ORIENTAL) no sólu no está siendu defendía, sinu que está siendu preseguía en nombri del "progresu" y del centralismu de esta comunidá autónoma. Peru no sólu esu, sinu que se mos quieri cerral la boca a los que defendemus la nuestra lengua, comu si defendel la herencia cultural que ha íu pasandu de agüelus a nietus, y de padris a hijus juesi pecáu. Comu si defendel la nuestra cultura juesi algu malu.

Pos nó señoris, defendel el nuestru patrimoñu no es malu, mú al contrariu. Y resulta que los que jadin de la Costitución la su bandera son los primerus que se olvían de esti articulu (y de otrus tan emportantis, peru no vieni al casu), y esu del RESPETU Y LA PROTECIÓN de la nuestra lengua, ná de ná. Tólu contrariu.

Peru güenu, comu en tó, hai escecionis. Comu hi leíu en engún láu, HOROSAS ESCECIONIS. En esti casu de la nuestra palra, y de la lengua leonesa en general, se trata del pueblu de ROBREA, que el añu 2008 tuvu el aciertu, los arrestus y la valentía, de ponel los nombris de las callis lo mesmu en la palra d'El Rebollal comu en la lengua oficial del Estáu. Paici mentira que tengamus de felicital a un ayuntamientu (n'esti casu, gobernáu por el PSOE) pol jadel lo qu'es debíu, peru en esas estamus.

Dendi esti escritu, la mi noragüena al ayuntamientu de Robrea, en la nuestra comarca d'El Rebollal, pol defendel la nuestra palra, pol defendel la nuestra lengua, pol defendel la herencia cultural de los nuestrus antepasáus. A vel si pol tólus rinconis de la nuestra tierra toman ejempru. Lo dichu: NORAGÜENA.

SALÚS, LIBERTÁ Y CULTURA TRADICIONAL.
Palra d'El Rebollal. ¡¡RESPETU Y OFICIALIDÁ!!


AFOTU: cartel d'una de las callis de Robrea (Salamanca)

viernes, 20 de noviembre de 2009

Il a jongus






Comu tólus añus, cuandu llega el tardíu, los nuestrus pinalis, robrealis, jessas y demás s'enllenan de jongus d'un montonáu de crasis: parasolis, tortullus, güevus de rey, champiñonis, carboneras, nícalus,... Y, comu tólus añus, mucha genti sali al campu a cogelus.

Tamién tólus añus, la Mancomunidá Altu Águeda jadi unas jornás alreol d'estu de los jongus, jornás qu'esti añu han síu en Peñaparda. Anque a mi no me vagó salil la mañana que juerun a polus jongus, paici que la cosa jué mú bien, lo pasarun bien y arrocogierun un montonáu de jongus de muchas crasis, ¡¡alreol d'unas 150 crasis diferentis!! Y es que la nuestra tierra es rica en muchas cosas, y una d'ellas es que es rica en jongus.

Y ricus son tamién los jongus. Al sotru día de la salía al campu, jué la chalra alreol de los jongus y la comía. Asina, los que mos apuntamus teniamus esti menú:
- Canapés jechus con paté de jongus
- Patatis guisás con nícalus
- Pollu asáu con tortullus y salsa de tortullus

Y la verdá es que la genti queó mú contenta. Además, dispués mos echamus unus bailis, asina que queó un día reondu.

Anque ya se está jadiendu tardi pa salil a jongus, nunca está de más dal unus consejus:
- Salil pol lugaris conocíus, y dejandu dichu a anguián andi se va, no sea cuentu que pasi algu. Siempri es mejol estal preveníu
- Lleval ropa que valga pa il pol el campu. Asina que ná de zapatus con taconis, ni faldas, ni la ropa de los domingus, porque de seguru que muchas vecis mos va a tocal il entri escoberas y zarzalis, y al final se derrota la ropa
- Lleval una cesta de bimbri. Los jongus hay que llevalus en una cesta para que puéan il soltandu la simientu pol el campu. Si no, pa otru añu no va a habel ná. Además, en una cesta van a legal los jungus bien, mientris que en una bolsa de prásticu se derrotan tós. Y pol si juera pocu, está prohibíu lleval bolsas, y si te pillan los guardias es fácil que te pongan una multa. ¿La raón? La primera que hi dáu: porque los jongus tienin de il soltandu la simienti pol el campu pa que pal sotru añu güelva a habel.
- Lleval un cuchillu pa cuertal los jongus. No vali arrancalus, tieni de queal el pie, porque asina los jongus güelvin a salil nel mesmu lugal pa'l sotru añu. Si se arrancan quiciás no güelvan a salil.
- Cogel ná más los jongus que se conozan. Anque siempri en güenu lleval un librinu de crasis de jongus, lo mejol cuandu no sa sabi si un jongu es güenu o malu es dejalu nel lugal, porque los hai que son mú venenosus, y no sería el primeru al que le dan un disgustu unus jongus venenosus
- Respetal los jongus que no se cojan. Anque a nusotrus mos paiza que los que no conocemus no valin pa ná, quiciás valin pa muchu. Anque sean venenosus, en esus jongus podría estal el remediu pa anguna enfermedá, y si somus tan "listus" que los derrotamus porque no los conocemus, quiciás esi remediu desapareza pa siempri. Hay que respetal tós lus jongus, anque creamus que son "de los malus"
- Cogel ná más los que se vayan a comel. Los jongus se derrotan en un verbu. Jasta congeláus no duran demasiáu, asina que no vali la pena cogel un montonáu de jongus pa dejalus derrotal. Somus mucha genti a cogel, y si tós vamus cogiendu a hechu, sin medía, al final no va a queal ningunu

Pos na, a los que entovía vayáis a salil a jongus, estus consejus vos vendrán bien, muchu más si pensáis que esta es una más de las razonis polas qu'El Rebollal es un lugal maravillosu. Si queremus seguil siendu ricus en jongus, tenemus de cudialus. Porqu'en las tardis del tardíu, una de las mejoris cosas que se puedin jadel es salil al campu a paseal y vel qué jongus han salíu esti añu, y comelus a la nochi rebujáus con güevu, o en tortilla, o con salsa, o en una pizza, o de cualisquiel manera que se vos venga al celebru. Y no penséis qu'estu es algu de pocu valol. ¡Qué más quijieran en otrus lugaris tenel lo que tenemus n'El Rebollal!

Pos ná, dagalis. ¡A disfrutal de los jongus! ¡A disfrutal de la nuestra tierra!

SALÚS LIBERTÁ Y CULTURA TRADICIONAL.
Palra d'El Rebollal. ¡¡RESPETU Y OFICIALIDÁ!

AFOTUS: TXEBE (noviembri 2009)