Tocandu en San Martín

El pasáu martis, 11 de noviembri, era el día de San Martín de Tours, o sea, San Martín de tóa la vía. Ya sabéis el reflán: a tó cerdu le llega'l su San Martín. Además de sel una fecha señalá pa los cerdus, tamién es el patrón d'unu de los pueblus vecinus d'El Rebollal: San Martín de Treveju. Y, al sel al patrón del lugal, me llamarun pa tocal allí.

De siempri me ha gustáu muchu bajal a San Martín. Es unu de los mis pueblus preferíus. Anque esi día bajé a "trabajal", peru es un trabaju d'esus que, de verdá, jadin disfrutal abondu a tó el que tieni amol pola cultura tradicional.

Lo primeru que m'encontré al llegal allí a las 7 de la mañana a tocal la alborá jué al "señol de los cohetis" ("foguetis" ena palra mañega), y que qu'aniantis d'apencipial yo a tocal el tamboril ya estaban sonandu los cohetis. Dispués me pusi a tocal la alborá polas callis del lugal. A esas horas, y cona arquitectura tradicional de San Martín (casas altas con entramáu en callis estrechinas), la música tieni un soníu mú güenu o, comu idin los músicus, tieni mú güena "acústica". O sea, se me oyía "que te cagas" por tó'l lugal. Peru no sólu esu. acostumbráu comu estoy a il tocandu sólu polas callis, en San Martín tenía una compaña de ¡15 presonas! O sea, qu'ibamus jadiendu l'alborá lo menus una compaña de 16, con castañuelas y botella d'anís d'acompañamientu. Y la genti salía a ofrecelmus aguardienti pa que no se mos ensecasi'l gañoti.

Comu no pué sel menus, el tema de la lengua propia del lugal, el mañegu, jue otra cosa que me gustó muchu (siempri me gustó). Allí, del grupu qu'estaba conmigu, lo palraba el 90 por cientu de la genti. Y lo qu'es más emportanti: estaban orgullosus de palralu y de tenel esu nel su pueblu. Porque tienin mú presenti que la su lengua es algu que les jadi especialis. Y porque tienin mú presenti qu'es algu que han recebíu d'herencia de los sus padris y agüelus. ¡Y qué orgullosus estaban! "cuasi" comu ena nuestra tierra que, menus un grupinu de amantis d'esta tierra, los demás tienin vergüenza de palral la nuestra lengua, y jasta hai angunus vendíus que lo que quierin es acabal con ella...

Peru es qu'allí el tema de la lengua lo tienin mú presenti en tó: los nombris de las callis (lo mesmu que hogañu en Robrea, peru dendi jadi muchu más tiempu); los demás cartelis del lugal (los que te idin p'andi está el ayuntamientu, el conventu, la farmacia,...); los nombris de los negocius (por ejempru, el "bar Ángil", la "Boiga de cumías",...); el pregón del ayuntamientu lo mesmu en cstellanu qu'en mañegu; y lo que más me llamó l'atención: ena mesma misa el cura diju la homilía en mañegu. ¡Impensabri en cualisquiera de los nuestrus pueblus! Del tema de la lengua podría estal palrandu muchu más largu, peru dejaremus un poquinu pa otrus días.

Otra cosa que me llamó muchísimu la atención: la procesión. Primeru porque ¡la jidun antis de jadel la misa! No lo había vistu ena vía. Y dispués porque, abriendu pasu a "San Martiño" (comu lo llaman allí, mientris qu'aquí le cambian el nombri a Santu Ferinu y a San Silveriu) polas callis del lugal iban, además de la crús y los cirius, un montonáu de pendonis con imáginis de santus, cristus y vírginis. ¡Qué políu de vel, dagalis! Esty sí lo había vistu una vés nel pueblu de La Alberca el 15 d'agostu.

A lo que ya no me quedé jué a la otra procesión, la que lleva a la genti de "boiga en boiga" a probal el vinu nuevu del añu. Y es que dispués tenía de conducil. Ya se sabi, si bebis no conduzcas...

Pos asina jué el mi día de San Martín nel pueblu que, con más orgullu, lleva el nombri del santu: San Martín de Treveju. Estamus acostumbráus a qu'en los nuestrus pueblus se presumi muchu de la cultura tradicional y cómu se conserva. Peru ¡cuánt mos quéa por aprendel!

Palra d'El Rebollal
¡¡RESPETU Y OFICIALIDÁ!!

Otra dagala más

Pos sí, paisanus. N'El Rebollal estamus de noragüena, pos eti mes mos ha nacíu otra dagala más.

Esta dagala tieni de nombri Alicia, y es metá payenga (por parti de madri) y metá peñapardera (por parti de padri), asina que somus dos pueblus de la comarca los qu'estamus contentus.

Que sepáis que la dagala nació'l 2 de noviembri, lo que pasa es que no me hi enteráu jasta esta mañana. Peru güenu, la alegría ha síu la mesma.

Dendi esti rinconinu de la redi, la mi noragüena a los padris, y la mi bienvenía a la dagala.

Esperamus dis quí a pocu dal la bienvenía a más dagalis ena nuestra tierra, pos hi oyíu que hai angunu más en caminu.

Peru, polu prontu, dal la bienvenía a los que ya están aquí. Esta vés, la reina eris tú, Alicia: BIENVENÍA.

Palra d'El Rebollal.
¡¡RESPETU Y OFICIALIDÁ!!

Castañas y froris

Ya prontu jadi una semana dendi que en la nuestra tierra (y tamién juera d'ella) se celebró la "fiesta" de Tólus Santus.

Estus días de siempri juerun especialis, un tiempu pa acordalsi de los que ya nu están con nusotrus, de los que mos dejarun, de los que murierun.

Hogañu los cristianus celebran esta "fiesta" yendu a misa y jadiendu vesita a los muertus enos ciminterius. Estus lugaris, en algu que puedi parecel comu'n cuentu, s'enllenan de vía más que nunca, pos quien más quien menus le va a lleval a los sus familiaris froris pa que la su tumba esté polía. Y, anque mucha genti no pisa nel ciminteriu en tó'l añu, esi día va a recordal a los que ya nu están con nusotrus.

Anque no sólu de frotis vivi el hombri n'esti tiempu, anque bien verdá es que los que vendin froris es justu esti tiempu nel que más vendin en tó'l añu. Esti tiempu es tamién el tiempu las castañas. Y la fiesta de las castañas sí qu'es una fiesta de verdá, porque no es una fiesta tristi comu la de Tólus Santus, sinu una fiesta alegri de dal gracias polus frutus arrecogíus ena cosecha, de fiesta pola llegá el tardíu, d'alegría por uñilsi toa la genti alreol de la lumbri a comel castañas asás, cantal, bailal, contal hestorias,...

A esta fiesta se la conoci con muchus nombris: magostu, amagüestu, calbochá,... Y lo prencipal es siempri lo mesmu: pasalu bien comiendu castañas. ¿Que es una fiesta menus religiosa? Los cristianus dirían que sí. Anque a las vecis pasa comu los romanus: que pa ellus eran bárbarus tólus que nu eran romanus. Pos pa los cristianus lo mesmu: son profanus tólus ritus que no son cristianus. Anque es natural que tóas las religionis piensin que la su religión es la verdaéra.

Esu nu quieri idil que los ritus "profanus" sean menus religiosus que los que tienin de vel con los curas y las misas. El il a los ciminterius es un ritu de recordal y honral a los muertus. El comel castañas es un ritu de dal gracias polus frutus arrecogíus nel veranu y nel tardíu.

Y un ritu que tamién se jadi por esti tiempu es el que tóas las vísperas de Los Santus jadi Ángel Rufino de Haro, "El Mariquelo", a la Catedral de Salamanca pa dal gracias por qu'el terremotu de Lisboa del añu 1755 no jidu ningún mal en Salamanca.

Se jadin muchas más cosas n'esti tiempu. Angunas, que trujun de juera, s'están poniendu de móa hogañu. Anque, dendi esti rinconinu de la redi, apostamus por defendel lo nuestru. ¡Viva la fiesta de Tólus Santus! ¡Viva'l magostu! ¡Y viva'l Mariquelu!