910-2010

Esti añu 2010 el Reinu de León (Salamanca, Zamora y León) jadi 1.100 añus. No debemus olvial que es n'esti Reinu nel que la nuestra comarca d'El Rebollal ajundi las sus raícis historicas y culturalis. Por esu, dendi esti rinconinu queremus recordal el su cumpriañus. FELICIDADIS

miércoles, 30 de enero de 2008

Carnavalis o Antrueju

Pos sí, ya tenemus aquí los Carnavalis (o el Antrueju), y anque paici que ná más jadin fiesta los de Ciarrodrigu, tamién enos demás lugaris se jadin cosas por el antrueju.

Antañu, la genti se vestía "de jorramachi", conas vestimientas más viejas que tenían. Polas callis salía la "Vaca Romera" (en Villarrubias, "Vaca Galana"), que era una presona disfrazá de vaca (cona calavera d'una vaca) que salía corriendu tras la genti. Y, comu no pué sel menus, se cantaban los cantus más propius d'esti tiempu: "El Martis de Carnaval" y "La Charrascona".

Peru güenu, hogañu, anque siempri se presumi de lo muchu que se defiendi la cultura enos nuestrus lugaris, se ha dejáu perdel cuasi tó lu del Antrueju, y se han cogíu las moas de juera (ya se sabi, lo que vieni de juera a angunus siempri le paici mejol que lo nuestru).

Con tó y con esu, enos nuestrus lugaris se van a jadel angunas cosinas. No sé si enos demás pueblus d'El Rebollal se va a jadel algu, peru en Peñaparda la asociación el panderu cuadráu ha preparán un par de cosinas pa'l Domingu de Carnaval, que vos deju en esti escritu:

DOMINGU 3 DE JEBRERU
-------------------------
14:30 COMÍA nel restauranti "El Castillo" (apuntalsi antis)
17:00 Si el tiempu acompaña, PASACALLIS vestíus de jorramachi con música
17:30 BAILI DE CARNAVAL nel Centru Cultural (enas escuelas viejas) con panderu, gaita y tamboril, rumbas, pasodobris, vas corríus,...
A toa la genti que vaya al baili, se le convidará a chocolati calienti con biscochus


Pos ya sabéis, estu es lo que se va a jadel en Peñaparda polus carnavalis. Estáis tós envitáus a venil.

viernes, 25 de enero de 2008

Mal mes el d'eneru

Anque no se puedi idil de ningún mes que sea malu por sí mesmu, n'estus últimus añus paici que los mesis d'eneru están siendu malus.

Yo no sé qu'es lu que tendrá esti mes, que paici que tólus añus se mueri un montonáu de genti. No sé en los otrus pueblus, peru en Peñaparda, en lo que llevamus del mes d'eneru, ya se han muertu tres mujeritas. La primera, la Tia Másima (que trujun hai pocus añus dendi Francia y estaba ena residencia), la segunda la Tia María "de las Patatas", y la tercera la Tia Caitana (madri de los "Piñas").

La verdá es que a la primera no la conocía, peru a las otras dos sí las había tratáu. Lo qu'es seguru es qu'eran tres mujeris mú querías nel lugal, tres mujeris que palraban la nuestra lengua y, polu menus las dos últimas, mujeris qu'entovía vestían al mó y manera tradicional, con las sayas y el pañuelu ena cabeza.

Siempri da pena que se muera anguién, anque sean presonas mayoris. Entovía dá más pena si es anguién a quien conocis, y cuantis más cerca esté de ti, más pena te da. Y, en estus casus, cona muerti d'estas presonas ha muertu tamién un pocu de la nuestra tierra y la nuestra cultura, anque n'estus casus no sea lo más emportanti.

El mes d'eneru de 2008 está siendu malu en esti sentíu. Mediu lugal está de lutu. Las familias de la Tia Másima, la Tia María y la Tia Caitana están de lutu. La nuestra cultura está de lutu.

Esperemus que jebreru sea mejol, muchu mejol.

lunes, 21 de enero de 2008

La Tia María "de las patatas"


Hai unus días mos dejó la Tia María "de las patatas", una de las mujeris que, enos últimus 15 ó 20 añus, más han sobresalíu ena defensa de la nuestra cultura tradicional y, en especial del panderu cuadráu de Peñaparda.

Nunca gusta chalral alreol d'estas cosas, peru qué menus que dedicali a la mujerita unas rayinas comu homenaji.

A la Tia María le gustaba muchu cantal y tocal el panderu, y jasta esti últimu añu siempri que pudu estuvu ena Fiesta el Panderu Cuadráu que tolus veranus se jadi en Peñaparda. La recuerdu esti veranu sentá ena praza, en una silla, viendu cómu tocaba y bailaba la genti encima el tabráu, tabráu qu'otrus añus había pisáu ella pa tocal el panderu. Y es qu'esta mujel llevaba la música ena sangri.

Con tó y con esu, lo más emportanti de la Tia María, además de sabel cantal y tocal, era que sabía jadel panderus. ¡Cuántus panderus habrán jechu las sus manus pa la genti del lugal y la genti forastera! Pos muchus, la verdá. M'acuerdu que una vés jidu con los mis padris un panderu abaju, ena cassa El Castillu, momentu del que saqué una afotu que tengu puesta nel mi libru y ena mi güeb de Peñaparda (afotu que tamién es el acompañamientu d'esti escritu). Tamién recuerdu que le jidun un reportaji de cómu se jadía el panderu pa una coleición de vídeus alreol de los "oficius perdíus" o "oficius d'antañu" (agora mesmu no m'acuerdu cómu se llama la coleición).

La Tia María siempri repartió a los demás la su música, la su alegría y los sus saberis. Y tólus que himus tratáu con ella mos queamus con un güen recuerdu.

Sirva esti escritu pa jadeli un pequeñu homenaji a la Tia María "de las patatas". Jasta siempri, Tia María.

viernes, 18 de enero de 2008

Luminaria de San Sebastián


En los nuestrus pueblus, San Sebastián siempri jué una fiesta grandi, una de las prencipalis del añu. San Sebastián siempri ha síu unu de los que, n'El rebollal, himus llamáu "Santus del Gorru", pol sel enos mesis del fríu.

Tó estu vieni a cuentu por dos cosas. La primera, porque esti fin de semana es San Sebastián. Y segundu, porque pol una vés se va a jadel algu enos nuestrus pueblus pa honral al santu.

Hogañu, lo pencipal (y cuasi lo únicu que se ha jechu jasta esti añu) ha síu la Luminaria, que es una gran lumbri, foguera o capazu, apaecía a las que se jadin polus Sanjuanis, y alreol d'ella s'ajunta la genti del lugal a chalral, calentalsi, comel choridu y patatis asás, bebel y, si se tercia (y hai anguién que ponga música), bailial. En Peñaparda es la última fiesta que los quintus del lugal celebran comu quintus.

Antañu se jadían más cosas. Sigún José Alonso Pascual, nel su libru de Robrea, nel lugal San Sebastián era una fiesta con Mayordomus. El día antis se jadía al Capazu ena praza, y el día el Santu había misa mayol, y se corrían los gallus. Al final del día se jadían las subastas del istiercul de las jessas, las marrás y la yerba los Vallis La Laguna y Las Zorreras.

Güenu, comu diji aniantis, tó estu vieni a cuentu de qu'esti añu en Peñaparda se va a jadel en peñaparda anguna cosina más que la Luminaria de costumbri. A mi me parecía que, es cayendu en fin de semana la fiesta de San Sebastián, se podía jadel nel lugal algu más, asina que pensé un programa pa dambus dos días (sábadu y domingu) y se lo di a la alcaldesa pa que lo dijiera nel plenu del ayuntamientu. Y paici sel que la cosa gustó, anque lo que tenía pensáu pa'l sábadu a la tardi no se va a podel jadel (peru lo tendré en cuenta pa otra vés). Asina, el programa e San Sebastián en Peñaparda va a queal asina:

SÁBADU 19 D'ENERU
Luminaria (nochi y madrugá)

DOMINGU 20 D'ENERU
9:30 Alborá, por José Benito, tamborileru del lugal
10:45 Misa
17:00 Baili al son del panderu y el tamboril ena praza


Anque el programa no es mú grandi, polu menus sí que esperamus pasalu bien. Y, comu no pué sel menus, toa la genti está envitá a venil a Peñaparda.

Ésto demuestra tamién una cosa: pa jadel cosas no jadi falta muchu dineru, sólu ilusión, ganas de jadel cosas y anguién que tenga las ideas.

Esta vés la idea la tuvi yo, peru la puedi tenel cualisquiera de la genti d'El Rebollal. A los que tengáis ideas, no tengáis miéu de idilselas a anguién. a vecis, jaste vos puedin jadel casu.

Quería acabal el escritu con una puesía-conjuru que jidi pa la nochi de la Luminaria (tamién le pusi música). Idi asina:

Luminaria de San sebastián
que ya ardis nel lugal.

Ardi bien juerti, ardi bien altu,
lleva lejotis todu lo malu. (BIS)


Luminaria de San Sebastián,
que ardistis, ardis y arderás.

Ardi bien juerti, damus calol,
lo vieju, lo malu, ya s'acabó.(BIS)


NOTA: afotu arrecogía de http://weblogs.clarin.com

domingo, 13 de enero de 2008

Dagalis

Anque la noticia ya es del añu pasáu, créu que tenemus d'apencipial el nuevu añu con güenas noticias.

El otru día chalré alreol de la presona más vieja de Peñaparda (y de seguru que d'El Rebollal): la Tia Gora, que jidu 103 añus el 4 d'eneru.

Peru agora voi a palral de la más nueva. Y es que a últimus de diciembri (me paici qu'el 27 de diciembri) vinu al mundu un dagal (créu qu'es un dagal, si no pidu perdón a los sus padris). Qué mejol noticia pa terminal el 2007 y apencipial el 2008 qu'el nacimientu d'un dagal. Porque, pol desgracia, es algu de lo que no tenemus abondu ena nuestra tierra.

En Peñaparda jadía lo menus 2 añus que no nacía ningún dagal. Y me paici qu'enos otrus pueblus d'El Rebollal pasa algu apaecíu. Peru esti nuevu dagal, la presona más nueva de la nuestra comarca, ha íu a nacel nel sestu pueblu d'El Rebollal: Perosín (que, anque hogañu está en drentru de Peñaparda, antañu jue el más emportanti).

Los dagalis son el futuru de la nuestra tierra, de los nuestrus pueblus. No hai cosa más tristi qu'un pueblu que no tieni dagalis corriendu y juegandu polas sus callis, o pueblus conas sus escuelas cerrás. N'El Rebollal entovía tenemus la suerti de tenel las nuestras escuelas abiertas y con dagalis. Peru comu no nacin dagalis tólus días, es noticia el que naza unu.

Dendi esti escritu quería dali la noragüena a los sus padris. Esperu que criéis al dagal polu menus igual de bien qu'estáis criandu a la su hermana. Y que la felicidá que ha entráu ena vuestra cassa esté con vusotrus y los vuestrus dagalis muchu, muchu tiempu.

jueves, 10 de enero de 2008

Receta pa llegal a los 103 añus


Esti escritu lo escribí cuandu la Tia Gora, de Peñaparda, jidu 102 añus. Lo mandé a los periódicus con toa la güena intención de que lo sacasin tal y comu lo escribí yo. Peru lo cogió un "periodista", lo cambió de lengua (el mi original estaba ena palra d'El Rebollal) y lo firmó con el su nombri. Peru güenu, esu ya pasó. Aquí vos deju lo qu'escribí antoncis (cambiandu los 102 añus del añu pasáu polus 103 d'esti añu).

El día 4 d’eneru la Tia Gora de Peñaparda jidu 103 añus. Llegal a 103 añus es difícil, peru es muchu más difícil llegal jasta esus añus con esa juerza, esa salús y esi saleru que tieni la Tia Gora. Es verdá que tieni los malis de la genti vieja, el no oyel ni vel comu la genti nueva, peru muchus quijiéramus tenel esa salús comu un robri que tieni la Tia Gora.

No soi ningún sabiu que tenga toas las respuestas, ni muchu menus el amu de la verdá. Peru sí podemus cogel comu ejempru a la Tia Giora pa, polu menus, vel un mó y manera de llegal a viejus con güena salús.

No lo hi dichu aniantis, peru la Tia Gora nació en Peñaparda nel añu 1905. De nueva estuvu trabajandu en Francia y golvió al lugal justu el añu qu’apencipió la Guerra, en 1936.

Dispués estuvu muchus añus trabajandu nel campu, y llevandu traviesas y patatis a vendelas a Ciarrodrigu, en aquellus tiempus en que se tardaban alreol de 2 días en llegal con el carru y los bués. Y otrus dos días de güelta. Una vés jasta tuvu un dgal nel caminu. Asina ya tenemus una de las cosas pa echali al nuestru guisu de llegal a viejus: el trabaju. Idin qu’el trabaju es salús y, en viendu a la Tia Gora, tieni de sel verdá.

Palrandu de guisus. ¿Qué comi una mujel que ha pasáu de los cientu? Yo se lo preguntu tós los días y podemus jadel un resumin. Pa desayunal: café con lechi y azúcal (más lechi que café), y algu pa mojal (pan, biscochus, galletas,...). Pa comel y pa cenal: frejonis, berzas, garbanzus, patatis,... Tó jechu a la lumbri en un pucherinu y con un cachinu de tocinu o de chorizu. De postir: un “golosu” (asina llama la Tia Gora a los yoguris). Y antis de ilsi a echal, una tila, pa dormil tranquilu.

Peru la receta entovía sigui. Los paséus son güenus a toas las edadis, peru cuandu se llega a vieju lo son más, pos jadin que los brazus y piernas no se quedin entumíus. La Tia Gora sali tolus días a paseal, cuandu no es pa’l Caminu Payu es a jadel anguna vesita a los sus dagalis, o a los vecinus, o a compral los golosus que tantu le gusta comel.

Y entovía tenemus otra cosina: el güen humol. Pocas vecis hi vistu a la Tia Gora renegá. Al contrariu, siempri anda con ganas de riilsi, o de bailal, o de cantal. Anque ya no baila, porque 103 aus son muchus, jasta pa la Tia Gora. Esti añu no se le ha jechu homenaji, peru sí se le jidu cuandu llegó a los cientu, y esi día echó un baili al son de la gaita y el tamboril del tamborileru del lugal. Y muchas vecis se le puedi oyel cantal nel su corral. Asina es el güen humol de la Tia Gora.

Y asina podemus vel hogañu a la Tia Gora. Siempri vestía de negru dendi la cabeza jasta los pies, con el su pañuelu, la chambra, la rebeca, las sayas, el mandil, las medias y las alpargatas. Siempri andandu p’allá y p’acá con la su cachera ena manu. Siempri contandu anguna cosina de cuandu era más nueva. Y siempri cantandu.

¿Cómu llegal a esus añus asina? Lo podemus idil con cuatru cosinas: trabaju, güena comía, güenus paséus y güen humol. Habrá que esprimentalu a vel si llegamus a viejus.

martes, 8 de enero de 2008

Añu Nuevu, escritus nuevus

¡Saludos, paisanus!

Diréis que ya jadi tiempu que nu escribu ná en esti lugal. Pos es verdá. Peru tamién es verdá que nel tiempu las vacancias naidi se poni a leel cosas ena redi. Y esu d'escribil pa no lo lea la genti, pos no es del gustu de naidi. Asina que me hi tomáu unas vacancias d'unus días en estu de dejal los mis escritus nel "blog".

Peru dendi hoi mesmu güelvu a lo mesmu, a intental contalvus cosas d'El Rebollal, a intental que tós sepamus un poquinu más alreol de la nuestra tierra y a seguil defendiendu la nuestra palra.

Pos esu, bienveníus a nuevu añu. Qu'esti añu 2008 venga llenu de cosas güenas pa tós nusotrus, pa la nuestra tierra y la nuestra genti.

Y qu'sti añu 2008 la nuestr palra tenga el respetu y la proteición que se mereci y a la que, sigún el artículu 3.3 de la Costitución, tieni derechu.

FELÍS AÑU 2008