910-2010

Esti añu 2010 el Reinu de León (Salamanca, Zamora y León) jadi 1.100 añus. No debemus olvial que es n'esti Reinu nel que la nuestra comarca d'El Rebollal ajundi las sus raícis historicas y culturalis. Por esu, dendi esti rinconinu queremus recordal el su cumpriañus. FELICIDADIS

martes, 5 de octubre de 2010

Tardíu


Llegó el tardíu, con él, el fríu y el agua, agua que güena falta mos jadi, porque no había caíu una gota en tó'l veranu (quiciás anguna tormentina).

Comu ya hi dichu anguna vés, el tardíu es un tiempu especial. Primeru, porque los nuestros robrealis, los que dan el su nombri a la nuestra comarca d'El Rebollal, s'enllenan de coloris, lo mesmu de las hojinas que se van ensecandu comu de las de los árbolis que, comu los pinus, están verdis tó'l añu. Y esu sin contal las coloris de los frutus del campu, comu los madroñus, los tapaculus, los bruñus, las nuecis, las castañas,...

Paseal polus nuestrus caminus es un regalu pa la vista y pa'l oyíu. Dalsi en paséu polas nuestrus robrealis, o pinalis, o por cualisquiera de los lugaris de la nuestra tierra es olvial los problemas de tólus días, es encontral la pás, la tranquilidá y la belleza pol andiquiera que vamus.

Y dispués, con las primeras gotinas de agua, apencipian a salil los jongus. Peru d'esu ya palraré otru día.

El casu es qu'esta mañana, al cogel el cochi pa il a trabajal a Villarrubias, bajandu pola carretera vi una cosina que me truju un montonáu de recuerdus de cuandu era un dagal. Ni más ni menus que una cuadrilla de genti sacandu patatis en un güertu de Peñaparda. En otrus pueblus s'arrecogin antis, peru en Peñaparda apencipian a finalis del veranu y siguin nel principiu del tardíu.

Pos al vel esi cuadru me vinu a la cabeza cuandu ibamus tóa la familia con los mis agüelus a sacal las patatis al güertu. Cogiamus los cestus, los costalis, las sachas y el almuerzu, y allá que mos ibamus tós, a sachal el güertu. Los dagalis teniamus una sachina más chica, y allí andabamus aporreandu los jurcus. Menus mal que no muchu, porque la metá las vecis rachábamus las patatis, y las que estaban tocás ya no valían pa guardal, porque podían ponel pochas las que tenía al láu.

Peru entri tós sachábamus el güertu, y las patatis qu'ibamus sacandu las ibamus echandu en los cestus. Cuandu el cestu estaba llenu, pa'l sacu, o pa un costal. Y asina un jurcu, y otru jurcu,...

Craru que no era tó trabajal. Estaba el ratinu del almuerzu con el cachinu pan, el cahinu choridu, todinu, salchichón, quesu,... Los mayoris bebían la gotina vinu, y los dagalis agua de la juenti, o del charail,... que estaba bien frequita metía nel barril.

Cuandu estaban llenus los sacus venía el agüelu Ugeniu con el carru, se ataban los sacus con una cuerda y, una vés qu'estaban cerráus, se echaban encima el carru. Un sacu, otru sacu,... Asina jasta qu'estaba el carráu. Antoncis se uñían las vaquis (el mi agüelu ya no ussaba güés) y, con el carráu de patatis, pa cassa.

Tamién m'acuerdu de que las patatis había que tenelas guardás en un lugal frescu y escuru, y que no juesi húmedu, porque si no apencipiaban a echal tallus y ya no estaban igual. Entovía vi, hai angunus añus (no muchus) un carráu de patatis en Villarrubias. La verdá hai angunas cosas que da pena no golvel a vel y que train muchus recuerdus...

Pos ná, dagalis, a disfrutal del tardíu (o a profital, qu'es una de las nuevas palabras de la nuestra lengua). Y es que tólus tiempus del añu tienen un montonáu de cosas güenas, no hai más que sabel buscalas.

Palra d'El Rebollal.
¡¡RESPETU Y OFICIALIDÁ!!


AFOTU: El Mostajal (Peñaparda)

(Ya pondré otra afotu d'esti añu, que de seguru que esa ya la héis vistu muchas vecis)

3 comentarios:

EL MOTERU dijo...

Pos si dagal.Y dispues de cojel las patatas eseguia a sembral ,no siendu que se metiera el tiempu en agua.

Anónimo dijo...

hola, os mando este enlace para que, si os apetece, podáis votar por la foto de un concurso nacional en la que aparecn la Tia Gora y la Tia Dionisia de Peñaparda. La foto ganadora será la imagen del Día de la Mujer, el próximo 8 de marzo. Es un concurso nacional organizado por el Instituto Nacional de la Mujer. El que quiera votar por la foto podrá hacerlo a través del facebook, en el siguiente enlace: http://www.fotoconcursoinmujer.com/seleccionada.php?foto_id=545&order=fecha&fotonum=

hermes birkin replica dijo...

You threw me for a loop here! LOL