Villancicus

La Navidá ya está aquí. Primeru, con el sortéu de la Lutería (del que ya dijimus ayel que no mos había tocáu ná). Dispués, con el partíu del sigru d'esti mes, el Barça-Madrís (que no tieni ná que vel cona Navidá, peru ha síu esta tardi). Y mañana ya es Nochigüena, y pasáu la Navidá.

En toas las casas habrúa más o menus comía, más o menus carni, más o menus pescáu, mariscus, dulcis, postris, vinus, bebías, genti,... Y villancicus.

Algu de lo que me hi dáu cuenta enos últimus tiempus (güenu, enos últimus añus) es que cá vés somus más probis. No ya de dinerus, sinu de cultura. Y es que, con esu de ponelsi modorru en desprecial lo nuestru y siempri idil que lo de juera es mejol, toa la riqueza cultural que himus teníu siempri s'está perdiendu. Esu está pasandu cona nuestra lengua, con los bailis, con los trajis, con los cuentus, con las recetas de codina, con los juegus,... Y tamién conas cancionis. Y, en drentru d'estas cancionis, con las típicas d'esti tiempu: los villancicus.

Si vos paráis a yoel a los dagalis y le idís que vos canti un villancicu, de seguru que vos canta esi que sali en toas las películas americanas, el de "Navidá, Navidá, dulci Navidá...". Y es que toa la cantidá de villancicus que se han cantáu de siempri ena nuestra tierra al final se van a queal en esu, en que los nuestrus dagalis ná más van a sabel cantal esi, y sólu esa frasi que hi puestu yo, porque lo continúan cantandu "na na na, na na na,...".

¿Qué ha síu de tólus nuestrus villancicus? Pos comu está de moda (peru ná más n'El Rebollal) preseguil la nuestra cultura y jadeli reverencias a la cultura forastera, los nuestrus villancicus s'están perdiendu. Lo mesmu qu'el restu de la nuestra cultura. Esu son parti de los beneficius de la "globalización" (tamién hai otrus comu la subía del gasóil, el tribu,... Beneficius mú grandis... pa los grandis).

Una cosa tenemus de tenel mú crara: la nuestra tierra, sin la nuestra cultura, no es más que cincu pueblus con cincu árbolis y cuatru gatus. Asina de craru, y asina de duru. Si dejamus perdel la nuestra cultura, dejamus perdel la nuestra tierra.

Lo qu'es ena mi cassa, los villancicus que van a oyelsi no son los típicus de tólus láus, sinu otrus que, anque se oyin menus, son más nuestrus. Dejémonus ya de adoral tantu la cultura forastera. ¡Tengamus un pocu de cariñu pola nuestra, carallu!