El Tesoru de la nuestra palra

Lo podremus idil una y mil vedis: la nuestra palra d'El Rebollal es un TESORU, con mayúsculas. No por repetíu deja de sel verdá.

Tó estu vieni a cuentu de que, tólus añus por esti tiempu, el 21 de Jebreru, se jadi en tó'l Mundu el Día la Lengua Madri, un día pa celebral que nel mundu se palran un montonáu de lenguas (y no un puñáu d'ellas, comu quierin que creamus), y que tóas ellas (entri ellas la nuestra palra) tienin el derechu a ussalsi y el derechu a sel oyías y defendías. No es un día que me haiga inventáu yo, vieni dendi la ONU (Organización las Nacionis Uñías), la mesma que poni, por ejembru, el Día cntra'l Cáncil o el Día Mundial los Dagalis.



Calli en Robrea

¿Y qué se quieri jadel con esti día? Pos abril los ojus a la genti, que tós veamus que el que haiga muchas lenguas es una RIQUEZA, que cá una de las lenguas es un TESORU (tamién la nuestra palra d'El Rebollal, el mó y manera que tenemus los rebollanus d'ussal la lengua leonesa). Es, además, una parti mú emportanti de la herencia que himus recibíu de los nuestrus padris y agüelus. Asina que, ussandu y teniendu viva la nuestra palra, vivirán un poquinu más los que la palrarun antis de nusotrus, los que se juerun pa siempri. De verdá, honraremus muchu mejol la su mimoria si mos sentimus orgullosus de la lengua que mos dejarun, la que ussarun siempri, la que aprendierun de los sus padris,..


Y es que la nuestra palra d'El Rebollal tieni de sel un orgullu pa tólus que somus y mos sentimus rebollanus. Es una parti mú emportanti de la nuestra cultura. Es una parti mú emportanti de la nuestra hestoria. Es una parti mú emportanti de la herencia los nuestrus padris y agüelus. Y jadremus mú mal en dejal moril lo que otrus os dejarun vivu...

Caminu en Peñaparda

Por esu, tós tenemus de ponelmus manus a la obra a defendela, en mimala, en querela, en ussala. Tós tenemus de ponel el nuestru ganitu d'arena, dendi los AYUNTAMIENTUS que, por ejempru, puedin ponel los nombris de las callis ena nuestra palra d'El Rebollal (hogañu, ná más en Robrea), o marcal los caminus (hogañu sólu unus poquinus en Peñaparda), o jadel los cartelis de las fiestas,... Jasta las ASOCIACIONIS culturalis, que tamién puedin jadel los cartelis de las sus fiestas en la nuestra palra u organizal un día de puesías, o de cuentus, o un Día de la Palra d'El Rebollal. Pasandu, comu no puedi sel menus, polus nuestrus GRUPUS FOLKLÓRICUS, que puedin ussal la palra d'El Rebollal en los bailis, enos sonis que cantin,...

Se puedin jadel muchas cosas, y muchas vedis no jadin falta perras, sinu voluntá pa jadel cosas. Me paici que se lo debemus a los que vivierun n'El Rebollal antis de nusotrus, los que siempri lucharun ponal nuestra tierra y por mantenel vivas la nuestra cultura. Y la nuestra palra es una parti mú importanti de la nuestra cultura, tan emportanti comu las vestimientas, los bailis, los estrumentus, los juegus,... Y comu parti emportanti qu'es, comu un TESORU, tenemus de defendela. ¡¡VIVA LA NUESTRA PALRA D'EL REBOLLAL!!

Palra d'El Rebollal.
¡¡RESPETU Y OFICIALIDÁ!!

2017, un añu pa'l relumbial de la nuestra tierra

Dejamus atrás el añu 2016 y apencipiamus el 2017, llenu de güenus deséus y güenus propósitus.

El añu 2016 llegó al su cabu con la nuestra comarca d'El Rebollal ena teli. Nel programa nel que salió, "El Arcón", chalrarun alreol de la nuestra naturaleza, chararun alreol de la nuestra palra y tamién chalrarun alreol el panderu cuadráu. Naturaleza y cultura ena que la nuestra tierra es rica, y que n'esti añu qu'apencipiamus agora tienin d'estal presenti entovía más.

Gamonitu, frol de la gamona

La nuestra naturaleza tenemus de cudiala y disfrutala. Los nuestrus padris y agüelus mos mostrarun que se puedi vivil d'ella, del monti, del ganáu, y que pa que tenga futuru se tieni de cudial. De ná vali el que arramplemus con tó hogañu si, al sotru día, no va a queal ná pa los nuestrus dagalis. Se puedi vivil de la Madri Naturaleza, peru tamién se puedi disfrutal d'ella. Los nuestrus pueblus, la nuestra comarca está acomolgaíta de caminus polus que il a andal, o correl en bici, o comu se quiera. Tenemus el bosqui de rebollus más grandi de tóa Uropa. Tenemus un montonáu de ríus y regatus, de podas y juentis con el agua crara y fresca, esi agua que quiciás jadi que la nuestra genti llegui a los 100 añus... La nuestra es tamién tierra de jongus, tierra de jabalinis, de pecis,... D'un montonáu de cosas que, de verdá mos jadi ricus en naturaleza. Cuantus lugaris quijieran tenel lo que tenemus nusotrus.



Calli en Robrea

La nuestra palra ha estáu mú presenti nel cabu el añu, y tieni d'estal tamien mú presenti n'esti apu 2017. Ha llegáu el tiempu de sentilsi orgullosus de la nuestra palra d'El Rebollal, de la nuestra palra leonesa, la mesma qu'ussarun los nuestrus padris, los nuestrus agüelus, los nuestrus bisagüelus,... Una palra que es una de las nuestras señas d'identidá. Una palra qu'es herencia viva de los nuestrus antepasáus. Una palra, la palra d'El Rebollal, qu'es parti de la nuestra hestoria, del nuestru pasáu y el nuestru presenti, y tieni de selu tamién del nuestru futuru. Una palra, la nuestra palra d'El Rebollal qu'está craru qu'interesa a la genti, y que ha lleváu el nombri de la nuestra comarca a tólus rinconis de la Península. Una palra, la nuestra palra d'El Rebollal, qu'es un trozinu vivu de los que ya no están con nusotrus. Honrandu a la nuestra palra, honrandu a la nuestra lengua, estaremus tamién honrandu a los que la ussarun antis de nusotrus.

El nuestru folclori tamién ha estáu presenti. ¿Quién no conoci a Peñaparda, el su panderu cuadráu y esi mó y manera de tocalu únicu nel Mundu? ¿Quién no ha oyíu palral de Payu y los sus bailis al son de la sartén? ¿Quién no ha oyíu ó vistu anguna vés los bailis de Robrea, tocáus con gaita y tamboril? El añu 2017 tieni d'estal llenu de bailis, llenu de fiestas, llenu de festivalis. La "Fiesta el Panderu", en Peñaparda, y "La Sartén Charra" en Payu son festivalis con muchu nombri nel mundu el folclori. ¿Conoceremus n'esti 2017 angún nuevu festival en Robrea, Villarrubias o Navafrías? ¿Se jadrá angún grupu n'estus dos últimus pueblus?

Sartén charra 2016 en Payu

El 2017 tieni de sel un añu andi la nuestra comarca d'El Rebollal güelva a relumbial. Tenemus cosas de sobra pa que pasi esu: el tesoru que es la nuestra naturaleza; el tesoru que e la nuestra palra d'El Rebollal; el tesoru que son los nuestros bailis, sonis y estrumentus;... Esti añu, ¡que se palri muchu y bien d'El Rebollal!

¡¡VIVA EL REBOLLAL!!
Palra d'El Rebollal ¡¡RESPETU Y OFICIALIDÁ!!

Día de la Lengua Madri 2016

Tólus añus, el día 21 de Jebreru se celebra en tó’l mundu el Día la Lengua Madri, un día pa defendel las lenguas minorizás y llamal la atención de la genti alreol de la riqueza que es, pa la Humanidá, el que haiga muchas lenguas diferentis y no sólu un puñáu d’ellas. Y es que, cuandu una lengua desapareci, con ella se va un mó y manera especial de vel el mundu. Cuandu una lengua se mueri, con ella mueri el recuerdu d’aquellus que la ussarun.

Cartel d'una calli de Robrea

La lengua madri de las gentis d’El Rebollal es la nuestra “palra d’El Rebollal”, qu’es el mó y manera que tenemus n’El Rebollal d’ussal la Lengua Leonesa. Una lengua que ha íu pasandu de generación a generación, la lengua en la que palraban (y entovía palran) los nuestrus padris, los nuestrus agüelus, los nuestrus bisagüelus,… El mejol homenaji que podemus jadeli a aquellus que mos han dejáu es guardal la cultura que ellus mos dejarun d’herencia, la lengua qu’ellus palrarun y que mos aprendierun, la lengua qu’ellus aprendierun de los sus padris y agüelus.

Y es que la nuestra palra d’El Rebollal es una riqueza cultural tan emportanti comu puedin sel el panderu cuadráu, o la gaita y el tamboril, o las vestimientas de charru, o los nuestrus sonis, los nuestrus bailis, los nuestrus juegus, las nuestras comías,… De pocu sirvi que presumamus de defendel la cultura si dejamus de láu una parti tan grandi d’ella comu la nuestra “palra d’El Rebollal”.

La nuestra palra d’El Rebollal es un tesoru. Un tesoru que mos jadi más ricus. Un tesoru que, además, mos dejarun d’herencia los nuestrus padris y agüelus. Un tesoru qu’es un jilinu que mos uñi con aquellus que, antis que nusotrus, vivierun, trabajarun, lucharun y murierun por esta tierra. Si dejamus moril la nuestra lengua, con ella dejaremus moril un pocu más a aquellus que la palrarun antis que nusotrus. Por esu tenemus de defendela, tenemus d’ussala, tenemus de tratala comu lo qu’es, un riqueza, un tesoru, una de las nuestras señas d’identidá. La nuestra palra d’El Rebollal, además de jadelmus especialis, es un recuerdu que mos han dejáu los nuestrus antepasáus. Engamus viva la su mimoria. Tengamus viva la nuestra palra.

Palra d’El Rebollal. ¡¡RESPETU Y OFICIALIDÁ!!

Felís Día de la Lengua Madri

Dendi el añu 2000, las Nacionis Uñías vienen celebrandu, tal día comu hoi, 21 de Jebreru, el Día la Lengua Madri pa la defensa de tóas las lenguas que, comu la nuestra, han síu jechas de menus.

Es ésti un día pa acordalsi de que, anque lo mesmu la Costitución qu'el estatutu d'autonomía y las leyis internacionales defiendin a lengua comu la nuestra Palra d'El Rebollal, ná se jadi por defendela y tó sigui comu el que oyi sopral el airi.

Pasileras

La nuestra Legua Madri es la Lengua Leonesa, y la nuestra Palra d'El Rebollal es el mó y manera que tenemos n'El Rebollal de palral el leonés. Una palra, la nuestra, que himus recibíu d'herencia de los nuestrus padris y agüelus. Una palra, la nuestra Palra d'El Rebollal que jadi que sigan vivus nel nuestru recuerdu los que ya no están. Una palra, la nuestra Palra d'El Rebollal, que mos jadi especialis porque, anque hai otras palras apaecías y hermanas de la nuestra palra, ya no son igualitas del tó, lo que jadi de la nuestra palra algu únicu. Una palra, la nuestra Palra d'El Rebollal, qu'es una de las nuestras señas d'identidá, lo mesmu que las vestimientas, o los bailis, o los sonis, o los estrumentus. Una palra, la nuestra Palra d'El Rebollal, qu'es una riqueza más de la nuestra tierra y de la nuestra cultura.

Hai muchas más razonis, peru comu muestra valin esas que hi mentáu. Por tóas esas razonis, los que somus hijus d'El Rebollal deberíamus estal orgullosus de la nuestra palra, y tendríamus de defendela lo mesmu que defendemus tólu demás (y, si puedi sel, mejol). Las nuestras callis deberían tenel los nombris en la nuestra Palra d'El Rebollal (en estu, en Robrea han cogíu la lantrera). Los cartelis que pregonan las nuestras fiestas deberían estal escritus también en la nuestra Palra d'El Rebollal. Los nuestrus dagalis debían aprendel la nuestra palra en la escuela,... Y asina un montonáu de cosas que tendrían de jadelsi y no se jadin.

Y es que no podemus presumil de defendel la cultura tradicional si no defendemus una parti mú emportanti d'ella comu es la nuestra Palra d'El Rebollal.

Hoi Día de la Lengua Madri, es un día tan güenu comu cualisquiel otru p'apencipial a defendela y a ussala. Defendamus lo nuestru. Defendamus la nuestra Palra.

¡¡VIVA LA PALRA D'EL REBOLLAL!!

Mensaji d'Añu Nuevu 2015

¡Saludus, paisanus y amigus!

Enos últimus tiempus está de moda esu d'echal chalras pola teli. Antañu ná más jadía esas cossas el Rei Juan Carlus. Agora, también lo jadi el su dagal, el Rei Jelipi VI. Peru, además d'essus "de siempri" dan la su chalra los presidentis de las autonomías y, nesti tiempu nel que no hai otras noticias, los partis están acomolgaítus de lo que ha dichu el unu o el otru.

Yo no quieru comparalmi ni con el Rei ni con presidenti ningunu, sólu faltaba qu'essu. Peru sí quería dal la bienvenía al Añu Nuevu con un pequeñu escritu dis quí p'alantri. Asina que vamus p'allá.

Apencipiamus el añu 2015. Un añu que vieni acomolgaítu de cosas. Lo primeru, que esti añu hai votus pa escogel los nuestrus alcaldis y presidentis de las autonomías (no sabemus si tamién presidenti del Gobiernu). De tóas menus de Galicia, País Vascu, Andalucía y Cataluña, que tienin eleicionis propias. Nel restu el Estáu votaremus pa escogel los nuestus alcaldis y los presidentis. Ena nuestra tierra, las gentis del Reinu de León (Salamanca, Zamora y León), al no tenel autonomía propia, tendremus de compartil presidenti, asina que la nuestra tierra andará, un añu más, un pocu coja. Es esti añu tiempu de promesas, las que mos van a jadel comu se jadin siempri nel tiempu los votus. ¿Qué mos prometerán pa la nuestra tierra?

Otru tema emportanti pa esti añu qu'entra tieni de sel el de la nuestra cultura. Esti añu 2015 tieni de sel el añu nel que, por fin, se apencipi a defendel la nuestra palra d'El Rebollal comu lo qu'es de verdá: una de las nuestras señas d'identidá, quiciás la herencia más emortanti que himus recibíu de los nuestrus padris y agüelus. No vali esu de presumil de defendel la cultura tradicional si dispués dejamus de láu algu tan emportanti comu la nuestra palra leonesa, la nuestra palra d'El Rebollal. Es tiempu de que las nuestras callis tengan puestus los nombris ena nuestra palra (algu que ya hai añus que han jechu en Robrea). Es tiempu de que tólus caminus d'El Rebollal estén señaláus con cartelis ena nuestra palra. Es tiempu de que los nombris de lugal de tó'l Rebollal estén y se conozan por el nombri que han teníu de siempri, el nombri por el que lo han mentáu los nuestrus antipasáus. Y es tiempu de que la nuestra palra entri enas escuelas pa que los nuestrus dagalis la apriendan comu lo que es: una parti de la nuestra cultura.

Será tamien un añu llenitu de música, de bailis, de fiestas,... Lo mesmu que la nuestra palra, los nuestrus bailis, las nuestras vestimientas, los nuestrus estrumentus y la música que se jadi con ellus son una parti mú emportanti de la nuestra cultura. Lo mesmu que de la nuestra palra, tenemos d'estal mú orgullosus d'esta herencia que mos dejarun los nuestrus agüelus, y tenemos de jadel tólu que podamus pa que no se pierda y pa recuperala. Tieni de sel algu de un día y sotru día, dendi el primel jasta el últimu día el añu. No podemos presumil de cultura si dejamus qu'esta se mos muera.

Paisanus, amigus, qu'esti Añu Nuevu, qu'esti Añu 2015 sea, comu pocu, comu el que dejamus. Y, si puedi sel, que sea mejol en muchas cosas. Peru no podemos quedalmus a velas venil. Si queremus qu'esti añu sea mejol pa nusotrus y pa la nuestra tierra, tenemos de jadel lo qu'esté ena nuestra manu pa intental que sea mejol. Naidi con dos déus de frente mos puedi cretical por defendel lo nuestru. Qu'esti Añu Nuevu sea el añu de la nuestra tierra, de la nuestra cultura y de la nuestra genti.

FELÍS AÑU NUEVU A TÓS

Palra d'El Rebollal. ¡¡RESPETU Y OFICIALIDÁ!!

Cultura y recuerdus

Estamus cerquina de las Navidadis y, en llegandu esti tiempu, tóa la genti s'acuerda de los que ya mos han dejáu. Lo mesmu que nel día de Tólus Santus, mos acordamus de cómu eran, qué jadían,... Sacamus tólus güenus recuerdus que tenemos d'ellus.

Peru, ¿mos himus paráu anguna vés a pensal en que la cultura tradicional tamién mos la han dejáu comu recuerdu suyu? Pos sí, la cultura tradicional, esa a la que mucha genti no le da la emportancia que mereci, tamién es un recuerdu d'aquellus que no están con nusotrus.

Lo mesmu los bailis que los estrumentus, las vestimientas, las tonás,... Tó esu mos lo han dejáu de recuerdu los nuestrus padris, los nuestrus agüelus,... Cá vés que bailamus un ajecháu, o un ofretoriu, o un fandangu,... Cá vés que tocamus las castañuelas, o el panderu, o cantamus la Charrascona,... le estamus jadiendu un pequeñu homenaji a los antigus, a los que vivierun, trabajarun y sufrierun por esta tierra, por esta cultura y pola nuestra genti.

¿Y qué podemos idil de la nuestra palra d'El Rebollal? El seguir palrandu el rebollanu (o el peñaparderu, o el robreanu, o el nombri que le damus a la mesma lengua sigún el pueblu andi la palramus), el seguil manteniendu viva la palra qu'ussamus n'El Rebollal es seguil manteniendu vivu el recuerdu d'aquellus que la palrarun antis que nusotrus.

Y es que no vali pa ná que mos acordemus de la nuestra genti en días señaláus si un día, y otru día, y al sotru día, mos olviámus y dejamus de láu la cultura qu'ellus mos dejarun comu herencia.

No hai mejol recuerdu ni mejol mó y manera de honralis que mantenel viva la nuestra cultura, los nuestrus bailis, los nuestrus sonis, la nuestra palra,... Los que mos dejarun entovía vivin en ella.

Palra d'El Rebollal. ¡¡RESPETU Y OFICIALIDÁ!!

Congresu en Astorga

El sábadu 26 de marzu se jidu en Astorga un congresu alreol de las palras minoritarias, comu son el leonés y el gallegu. Pa chalral de la nuestra palra d'El Rebollal (comu ya sabemus, una de las palras leonesas) estuvu Ángel Iglesias Ovejero, presidenti de "Documentación y Estudio de El Rebollar" y natural de Robrea.

Paici que la cosa jué mú bien, que la genti queó mú contenta y que, otra vés, los periódicus han tratáu mú bien el tema, lo que quieri idil que estu de las palras INTERESA y que cá vés más genti ve qu'ena nuestra tierra tenemus un tesoru que hai que defendel.

Comu muestra, lo que salió nel periódicu Salamanca24horas.com: Astorga acoge una Jornada sobre Patrimonio Lingüístico con destacada presencia del Rebollar

Comu no pué sel menus, siempri hai anguién en contra. Asina, nel primel escritu apaeci anguién que, además, idi sel d'El Rebollal, anguién que, además, de cretical a los que defendemus la palra y la cultura tradicional de la nuestra tierra NO DA LA CARA (porque otrus, anque escribamus con un moti, es un moti reconocíu pol tó'l mundu). Pocu d'El Rebollal puedi sel el qu'está en contra de la nuestra lengua, la que himus heredáu de los nuestrus antepasáus, la que, si de verdá es d'El Rebollal, han palráu tamién los sus padris, agüelus,... Pocu d'El Rebollal puedi sel cuandu presigui y desprecia a los que jademus lo que podemus y más pol defendel no sólu la nuestra palra, sinu tóa la cultura tradicional de la nuestra tierra. Pocu d'El Rebollal puedi sel el que s'avergüenza de la nuestra herencia cultural.

Güenu, tampocu quieru dali más pubricidá de la que se mereci a esta genti. Lo emportanti es que la nuestra palra cá vés es más conocía, que la nuestra tierra cá vés la conoci más genti pol mé, entri otras cosas, de la nuestra palra. Y, lo más emportanti, qu'entovía se puedi oyel a la nuestra genti palral asina, ussal la nuestra palra, la palra de los sus padris, la palra de los sus agüelus,... Y asina seguirá siendu nel futuru, mal que le pesi a anguna genti.

Noragüena a Ángel y a tóa la genti que defiendi la nuestra palra y la nuestra cultura.

Palra d'El Rebollal.
¡¡RESPETU Y OFICIALIDÁ!!

La palra en periódicus, arradius, telivisionis,...

Que la nuestra palra es un patrimoñu cultural de primel ordin, ya lo himus dichu muchas vecis en esti rinconinu de la redi. Que es una herencia de los nuestrus padris y agüelus que tenemus el debel, polu menus moral, de defendel, tamién. Qu'es una de las nuestras señas d'identidá, tamién. Qu'es algu que mos jadi especialis nel güen sentíu de la palabra, tamién. Y qu'es algu qu'interesa muchu juera d'El Rebollal y que los nuestrus pueblus tenían d'aprovechal tamién.

Lo qu'estamus viviendu dendi'l pasáu 26 de mayu de 2010 es güena prueba d'esti interés. Dendi que la palra d'El Rebollal jué la primera lengua no castellana en oyelsi enas Cortis, con tó lo que'esu truju dispués, son muchas las vecis que himus salíu enos periódicus, arradius y jasta telivisionis pol mé la palra. Sí señoris, POL MÉ LA PALRA, POL MÉ DE QUE TENEMUS ALGU ESPECIAL QUE SE CONOCI COMU PALRA D'EL REBOLLAL.

Pol no alargalmi muchu, voy a apencipial a ponel enlacis que tienin de vel con esti tema, pa que cá unu les echi un oju, anque pol sel muchus, voi a ponel ná más los más nuevus.

SALAMANCA24HORAS: http://www.salamanca24horas.com/provincia/42418-once-asociaciones-culturales-constituyen-una-plataforma-para-la-defensa-de-las-lenguas-gallega-y-leonesa-en-la-comunidad

DIARIO DE LEÓN: http://www.diariodeleon.es/noticias/noticia.asp?pkid=587811

LA OPINIÓN DE ZAMORA: http://www.laopiniondezamora.es/zamora/2011/02/27/constituida-plataforma-defensa-lengua-leonesa/500870.html

EL NORTE DE CASTILLA: http://www.nortecastilla.es/v/20110226/opinion/elogio-palra-20110226.html

LA GACETA: http://www.lagacetadesalamanca.es/provincia/2011/02/21/expertos-cifran-2400-personas-comunican-habla-rebollar/22145.html

SALAMANCA24HORAS: http://www.salamanca24horas.com/provincia/42077-las-lenguas-minoritarias-del-reino-y-de-leon-y-extremadura-a-debate-en-el-congreso-celebrado-en-villasrubias

ABC: http://www.abc.es/agencias/noticia.asp?noticia=697430

SALAMANCA24HORAS: http://www.salamanca24horas.com/provincia/41894-villasrubias-acoge-este-sabado-el-congreso-sobre-lenguas-minoritarias

Y tó éstu ná más en 10 días, sin contal entrevistas pa la arradiu, entrevistas pa la teli y periódicus (comu Tribuna de Salamanca o El Adelanto de Zamora) que no pusun ena redi el enlaci de la noticia, peru sí la tenían en papel.

La nuestra palra interesa. La nuestra palra es un tesoru que tenemus en la nuestra tierra. Y que interesi tantu juera de la nuestra comarca es prueba más que suficienti d'ellu. Craru, pa'l que quiera velu.

Palra d'El Rebollal
¡¡RESPETU Y OFICIALIDÁ!!


AFOTU: Unu de los cartelis de las callis de Robrea

Congresu de palras minoritarias en Villarrubias

Esti sábadu 19 de jebreru se va a jadel en Villasrubias el Congresu alreol de las Palras Minoritarias (Reinu de León, Estremaúra) nel Salón del Ayuntamientu:

- 11:30 h. Presentación (Documentación y Estudio de El Rebollar. Asociación Cultural)
- 12:00 h. Chalras alreol de las distintas palras:
- "EL ESTREMEÑU", jecha pol ISMAEL CARMONA GARCÍA, miembru de la Asociación Cultural Pablo Gonzálvez, licenciáu en Filología Clásica pola Universidá d'Estremadúra, maestru de secundaria nel IES Alagón de Coria (Cáciris), investigaol, tradustol y gramáticu del estremeñu y autol de "Ortografía del extremeño" (2007) y "Morfología del Extremeño" (2009).
- "HISTORIA Y VIDA DE LA PALRA D'EL REBOLLAL", jecha pol JOSÉ BENITO MATEOS PASCUAL, vicepresidenti de Documentación y Estudio de El Rebollar, dipromáu en Ciencias Empresariales pola Universidá Carlos III, tamborileru de Peñaparda y Villarubias, folclorista, miembru de los grupus "Chabarconis d'El Rebollal" y "Arcendajas" y escritol, autol de "Breve descripción de Peñaparda" (2002) y "El corral los mis agüelus" (2004).
- "NUESTRAS LENGUAS AUTÓCTONAS Y LOS CAMINOS PARA SU DEFENSA", jecha por Xesús, representante de la asociación AGORA
- "EN LA RAYA - NA RAIA", jecha pol PATRICIA SANTAMARÍA HERNÁNDEZ, miembru de los grupus "Chabarconis d'El Rebollal" y "Arcendajas", miembru de Ciudadanos del Reinu de León.

- 14:30 h. Comía d'hermanamientu (las comías y sobremesas a menú dan pa muchu)

- 17:30 h. "EL PATRIMONIO LINGÜÍSTICO EN CASTILLA Y LEÓN: EL ESTATUTO Y LA REALIDAD", a cargo de JOSÉ IGNACIO MARTÍN BENITO, licenciáu en Geografía y Hestoria pola Universidá de Salamanca, Doctol en Hestoria pola Universidá de Salamanca, Catedráticu de Geografía y Hestoria nel IES León Felipe de Benaventi (Zamora), procuraol en las Cortis por el PSOE, Secretariu de Patrimoñu de la comisión ejecutiva del PSOE de C. y León, presidenti del Centro de Estudios Mirobrigenses, investigaol, divulgaol (ha pubricáu más de cien escritus en rivistas y pubricacionis especializás, lo mesmu en España comu en Portugal), escritol (autol de varius librus. Yo he leído "Prehistoria y Romanización de la Tierra de Ciudad Rodrigo (1994), anque tieni muchus más de temas hestóricus, y jasta tres novelas),...

- 18:00 h. Mesa reonda alreol de los problemas de las palras minoritarias y las sus posibris solucionis (conferenciantis y púbricu asistenti, que de seguru que tamién tieni muchu que idil)

Para acabal, Rincón Literariu, andi se podrán oyel ejemprus literarius de las lenguas de las que s'ha palráu enas chalras ( estremeñu, palra d'El Rebollal, leonés, gallegu, portugués y "fala de Xálima"...)

Estáis tós envitáus a venil (esu sí, la comía cá unu se paga la suya).

Palra d'El Rebollal
¡¡RESPETU Y OFICIALIDÁ!!

10.000

Comu celebral cosas está de moda, y mos gusta celebral más que ná los númerus reondus, en esti humildi "blog" estamus de celebración, pos a finalis d'eneru ha llegáu a las 10.000 vesitas.

Y esu, con tólu emportanti que es pol sí mesmu, es muchu más emportanti pol estal escritu ena palra d'El Rebollal, una d'esas lenguas que han síu preseguías dendi hai muchus añus pol tós aquellus a los que les jiedi que en angún lugal haiga algu diferenti. Una palra, en drentru la lengua leonesa, que quierin jadel de menus tós los que se piensan que ná más vali el su parecel y que el que no piensi y respiri comu ellus no debería tenel derechus.

Peru güenu, qu'estas 10.000 vesitas sean un homenaji primeru a tólus que defendemus no sólu la palra d'El Rebollal, sinu tamién tóas las palras minorizás y preseguías. Qu'estas 10.000 vesitas sean tamién un homenaji a los nuestrus padris, a los nuestrus agüelus y a tólus nuestrus antepasáus que, antis qu'ellus ussarun y mos dejarun esta palra tan polía. Genti, sangri de la nuestra sangri, a la que deshonra tó aquel que quieri jadel de menus la palra qu'ellus ussarun. Porque una cosa es no defendel la nuestra palra y otra mú distinta atacala y querel jadela de menus, lo mesmu a la palra que a los que la defendemus.

Podría seguil asina muchu ratu, peru estamus de fiesta. Gracias a los que han jechu que esti "blog" llegui a 10.000 vesitas. Gracias a los que han dejáu el su parecel. Gracias a tólus que defiendin la palra d'El Rebollal y demás palras minorizás. Y gracias, las más especialis, a los que mos han dejáu d'herencia esti tesoru que ha íu pasandu de generación en generación. Que siga siendu asina muchus, muchus, muchus añus.

Palra d'El Rebollal.
¡¡RESPETU Y OFICIALIDÁ!!

Añu Nuevu, ¿vida nueva?

Estamus nel añu 2011. Atrás quedó el añu 2010, añu nel que Ciarrodrigu metió tóas las bolas nel sacu del bicentenariu mientris se olviaba que, muchu más emportanti qu'esu, es sel parti el Reinu de León (diócesis, fuerus, muralla, repobracionis, títulu de "civitas",...). Ciarrodrigu y la su comarca le debin tó a sel Reinu de León, y al bicentenariu de la invasión de los soldáus de Napoleón no le debemus más que miserias. Peru craru, en esta tierra olviá de la manu de lo divinu y de la manu de lo humanu, lo emportanti no es conocel la nuestra verdaera hestoria, sinu escondela. No es d'estrañal que, con estas bimbris, la nuestra tierra esté comu esté.

Peru, vistu cómu "los nuestrus representantis" han olviáu, adredi, celebral esta parti emportanti de la nuestra hestoria, no está de más seguil recordándula dendi esti rinconinu, asina qu'el añu 2011 seguirá siendu de celebración nel nuestru Reinu de León. ¿Que mos han negáu el 1.100 aniversariu? Pos celebramus el 2011, el 1.101 aniversariu.

De cómu lo "humanu" ha olvíau la nuestra tierra tenemus ejemprus de sobra. En la nuestra comarca seguimus teniendu el hospital a más de 100 km y, encima, entovía hai quien idi que "no jadi falta". La nuestra tierra sigui sin tenel salía a la autovía. Peru los mesmus que idin que no necesitamus hospital idin que tampocu necesitamus llegal rápidu a la autovía. Pa colmu, agora la puenti de Vaucarrus tieni problemas porque, al enllenal la PRESA DE VAUCARRUS pa que no entri el agua en las casas en Ciarrodrigu, la puenti de Vaucarrus áina si quéa pol baju el agua. Y la puenti no está jecha pa aguantal esu, asina que s'está abriendu. Peru los mesmus que idin que no necesitamus hospital, los mesmus que idin que no necesitamus salía a la autovía, idin tamién que no pasa ná. Alreol de la nuestra palra, enos presupuestus de la Junta de Pucela no han desapartáu ni un céntimu pa defendela, violandu asina el estatutu d'autonomía (art. 5.2) y la propia Costitución (art. 3.3). Asina que los mesmus que mos idin que no mos jadi falta el hospital, los mesmus que idin que no mos jadi falta salía a la autovía, los mesmus que idin que no pasa ná en Vaucarrus mos vienin a idil que defiendin la nuestra palra de boquilla, peru que de ayual, si a casu a ajundila más.

¿Y esa genti es la que mos representa? ¿A santu de qué? Porque lo mesmu que jadin con esas cuatru cosinas jadin con tólu demás. ¿Y encima mos tenemus de callal?

No quería acabal esti primel escritu del añu sin recordal que la Tia Gora ya tieni 106 añus, cumpríus el pasáu 4 d'eneru. Estuvu la teli de Ciarrodrigu, salió enos periódicus (jasta de juera de Salamanca), y jasta vinu a grabal Telicincu. ¡¡FELICIDADIS, TIA GORA!! Esu sí, no hai que olvial una cosa. La Tia Gora es especial, única, irrepetibri. Peru no lo es ná más pol tenel 106 añus (que ya es sel especial), sinu pol sel auténtica: pol seguil conas vestimientas tradicionalis, pol seguil tocandu el panderu a esus añus, pol seguil viviendu sóla en cassa,... Y pol seguil ussandu la palra d'El Rebollal.

Y lo mesmu pasa con los nuestrus pueblus: son especialis, peru son especialis no porque se toqui tal o cual estrumentu, ni haiga tal o cual baili, sinu pol tó, TAMIÉN POLA NUESTRA PALRA D'EL REBOLLAL. Si de verdá queremus que los nuestrus pueblus tirin p'alantri, no tenemus d'olvial esu. Y si anguién mos quieri jadel olvial esu, pocu amigu es de la nuestra tierra, pocu amigu es de los nuestrus pueblus, y pocu amigu es de los nuestrus antepasáus.

Pos ná que, anque seamus un añu más viejus, anque haigamus entráu en un añu nuevu, la vida sigui igual: luchandu pola nuestra tierra, anque anguna genti quiera jadel creel lo contrariu (esu sí, se lo crei el que ya está abiertu dendi el principiu a creélsilu). Nusotrus, seguiremus luchandu. FELIZ 2011.

Palra d'El Rebollal.
¡¡RESPETU Y OFICIALIDÁ!!

Afotu: la gavia que se ha abiertu ena puenti Vaucarrus. Y mos vienin idiendu que "no pasa ná"...

La Costitución, la palra y las Cortis

Comu tólus añus, al llegal el mes de diciembri apencipian un montonáu de fiestas que jadin que la metá de los días haiga algu que celebral y no se trabaji (el que puéa no trabajal esus días). Una d'estas fiestas se jadi el 6 de diciembri, y en ella se celebra el día que, nel año 1978, la genti de los pueblus y ciudadis d'España votó, en referéndum, si quería la Costitución. Al final salió que sí, y dendi esi añu 1978 el nuestru país es gobernáu pol esas leyis que se votarun esi añu.

Ena Costitución vieni cómu está organizáu el Estáu: autonomías, los Reyis,... Peru quiciás lo más emportanti vieni nel principiu de la Costitución, enos artículus que palran de cómu es el Estáu y de los derechus (y tamién deberis) de las gentis.

Pa apencipial, comu ya hi palráu más vecis, nel "Preámbulu" y nel artículu 3.3 idi que tóas las palras d'España (TOAS, TAMIÉN LA NUESTRA PALRA D'EL REBOLLAL) son un patrimoñu cultural de primel ordin, que tieni de sel RESPETÁU Y PROTEGÍU. Sí, tamién la nuestra palra d'El Rebollal. La mesma Costitución lo idi. Y, pol esu mesmu, hai que defendel lo mesmu la palra d'El Rebollal comu tóas las demás variedadis de la lengua leonesa, o el aragonés, o el aranés, o el gallegu, o el vascu,... O cualisquiel otra palra que se ussi nel nuestru país. En ningún lugal, en ningún libru del mundu idi que ná más valga una lengua, que una lengua sea la mejol y las demás sean "palral mal" y tengan de sel preseguías... Tóas esas palra se tienin de defendel no porque lo diga la Costitución, sinu porque es un patrimoñu cultural, es una de las nuestras señas d'identidá y porque es una herencia que himus recebíu de los nuestrus padris y agüelus (si es que angún apreciu les tenemus).

Y agora vamus con la otra parti, la de los derechus de las gentis. Hogañu quiciás lo vemus comu algu normal, peru esu no siempri ha síu asina. Y muchas vecis, por escurus interesis de los políticus, se escuendi la verdá, se escuendi la hestoria de la nuestra tierra y mos queamus sin sabel d'andi vienin las cosas. Nel casu de la democracia, los derechus de las gentis y las Cortis estamus en esu.

Las primeras Cortis representativas d'Uropa juerun las Cortis que Alfonsu IX, Rei de León, convocó nel añu 1188. En esas Cortis, además del Rei, los nobris y los religiosus, estuvun POL VÉS PRIMERA EN UROPA las gentis de las ciudadis. Las primeras Cortis juerun nel nuestru Reinu de León. El que diga otra cosa, MIENTI. El que se inventi un reinu distintu, MIENTI. En esas Cortis, comu ciudadis del Reinu de León que han síu siempri, estuvun, entri otras, Salamanca y Ciarrodrigu. Y el que las meta en drentru d'otru reinu que no sea el Reinu de León, MIENTI. Y el que se inventi un reinu con dos cabezas que nunca jamás esistió, MIENTI.

Peru esas primeras Cortis d'Uropa, esas primeras Cortis que jidu el Reinu de León no juerun emportantis ná más por esu (que lo juerun), sino porqu'en esas Cortis, tamién pol primera vés, se dio una lista de DERECHUS DE LAS GENTIS del Reinu de León, derechus que hogañu son lo primeru en cualisquiel país que se lami a si mesmu democráticu. Esta lista vieni en un montonáu de leyis que pusu el Rei en esas primeras Cortis, leyis que en conjuntu tienin el nombri de Carta Magna Leonesa. Entri los derechus que la Carta Magna Leonesa da a los ciudadanus están derechus comu:
- Inviolabilidá de la cassa propia
- Inviolabilidá del corréu priváu
- La necesidá del Rei de convocal a las Cortis para jadel la guerra (o la pás)
- Derechu a la propiedá privá

Y asina otrus derechus que, comu ya diji aniantis, hogañu los tenemus pol segurus pero que las gentis de los pueblus y las ciudadis no himus teníu siempri. Y esus derechus de las gentis, mal que le pesi a los que no quierin a la nuestra tierra, nacierun nel nuestru REINU DE LEÓN nel añu 1188. Y, mal que le pesi a los que no quierin a la nuestra tierra, jué nel nuestru REINU DE LEÓN andi juerun las primeras Cortis, las que convocó Alfonsu IX de León nel añu 1188. Y tamién las segundas, esta vés ena ciudá de Benaventi, nel añu 1202.

Y en esas estamus hogañu. La Cortis de 1188, que juerun el principiu de la democracia en Uropa, juerun nel nuestru Reinu de León. Los primerus derechus de las gentis de los pueblus y ciudadis, que juerun el principiu de los derechus fundamentalis que hogañu disfrutamus, tamién tuvun la su nacencia en aquellas Cortis de 1188 que se jidun nel nuestru Reinu de León. Y, comu premiu, esa parti de la nuestra hestoria s'escuendi pa que no se conoza. Y, comu premiu, el Reinu de León es el únicu reinu medieval sin autonomía propia. Y, comu premiu, a los habitantis de las tres provincias leonesas (Salamanca, Zamora y León), en vés de llamalmus polu que somus, LEONESIS, mos quierin llamal otra cosa distinta que vieni a sel tan verdaera comu si mos llamasin rusus o chinus,...

Paisanus, no mos dejemus engañal. No mos dejemus albardal. Las Cortis y los derechus de las gentis nacierun ena nuestra tierra, nacierun nel nuestru Reinu de León. Y tenemus d'estal orgullosus d'ellu.

NOTA: afotu, d'un dibuju d'Alfonsu IX, arrecogía del blog "El cazurro ilustrado"

Palra d'El rebollal
¡¡RESPETU Y OFICIALIDÁ!!

Peñaparda, el panderu y la nuestra palra ena Telivisión d'Asturies

Paici mentira, peru paici que a la nuestra cultura le tienin más apreciu juera d'El Rebollal que en la nuestra comarca. Un ejempru craru es el que voi a espricalvus agora mesmu.

El pasáu sábadu, 30 d'otubri d'esti 2010 pusun ena Telivisión d'Asturies un programa alreol de unu de los nuestrus pueblus, Peñaparda. El programa se llama "Camín de Cantaris" (ena palra d'El Rebollal sería "Caminu de Cantaris"), y está jechu alreol de los cantaris tradicionalis de los pueblus y las palras qu'entovía se puedin oyel a las gentis de los pueblus que vesitan.

Esta vés le tocó A Peñaparda. Y jué pol mé el panderu, peru tamién pol mé la palra, pos al los que jadin el programa les dijun que si hubiesi síu ná más pol el panderu no habían jechu ná. O, lo qu'es lo mesmu, si en Peñaparda y nel restu d'El Rebollal no se palrasi asina, el panderu sólu no había valíu pa que Peñaparda tuviesi un programa propiu en drentru el "Camín de Cantares".

¿Qué quieri idil éstu? Que, juera de la nuestra tierra, en un lugal tan lejotis comu es Asturies, tienin en alta estima la nuestra palra, y pol esu vinun jasta aquí. En la nuestra tierra angunos ya hai tiempu que lo himus vistu, otrus están apencipiandu a velu craru. La única verdá es que la nuestra palra es un tesoru, tantu comu lo puéa sel el panderu, o los bailis, o las vestimientas,... Y juera lo tienin mú craru. Ya va siendu tiempu de que en la nuestra tierra mos demus cuenta tamién y la defensamus y ussemus con orgullu. Ya es hora de ponelmus a defendel la palra que himus heredáu de los nuestrus padris y agüelus.

Güenu, pol si anguién quieri vel los vídeus, aquí vos los deju.










Un saludu.

Palra d'El Rebollal.
¡¡RESPETU Y OFICIALIDÁ!!

NOTA: afotu arrecogía de Folkenlared.com

Los Santus

Tólus añus, el primel día de noviembri, en los nuestrus pueblus (anque no sólu en ellus) se celebra la fiesta de Tólus Santus. Esi día, las nuestras gentis se acercan a los ciminterius con froris (ya sean naturalis o no) pa dejal encima las tumbas de los sus familiaris.

La verdá es que es una fiesta tan polía comu tristi. Polía, porque siempri es bonitu acordalsi de los que ya no están entri nusotrus. Tristi polu mesmu, porque esa genti de la que mos acordamus ya se juerun pa no golvel.

Es mú güenu y mú nobri acordalsi de los padris, los agüelus,... Anque nel calendariu mos tienin puestu esi día, el 1 de noviembri (y al sotru día, el 2 de noviembri) pa acordalmus d'ellus, la verdá es que mucha genti s'acuerda d'ellus más días al añu, cuasi tólus días. Y esu demuestra el amol que se tieni pol esa persona.

Sin tenel qu'esperal a esus días, podemus jadele un homenaji a los nuestrus antepasáus tólus días del añu. Y no hai mejol homenaji, no hai mejol manera de tenelus vivus en la nuestra mimoria que no dejal moril la cultura qu'ellus mos dejarun d'herencia. Los nuestrus bailis, los nuestrus ssonis, los nuestrus juegus, los nuestrus trajis,... Y, comu no puedi sel menus, la nuestra palra d'El Rebollal. Tó ellu mos lo dejarun d'herencia los nuestrus agüelus, los nuestrus antepasáus, y mala mimoria les jademus si no defendemus la cultura qu'ellus ussarun, qu'ellus amarun, qu'ellus mos dejarun.

No dejemus moril la nuestra palra. Con ella, moriría una parti mú grandi de la mimoria los nuestrus antepasáus.

Palra d'El Rebollal
¡¡RESPETU Y OFICIALIDÁ!!

NOTA: afotu d'una crús celta d'Irlanda, sacá de Paseando por la Historia

La palra d'El Rebollal, en las Cortis

Ya hai muchu tiempu que no me vagaba escribil, peru la noticia me paici que bien vali sacal un ratininu d'andi séa.

Y es que la nuestra palra, la palra d'El Rebollal (o rebollanu) se a oyíu, pol primera vés, en las Cortis, andi están los deputáus autonómicus. Y es que el deputáu por el PSOE (Partíu Socialista Obreru Español), que es el que palra de Cultura en drentru d'esti partíu en las Cortis, ha teníu a bien leel, en vós alta, el principiu del mi puema "Jálama", un puema que ya hai angunus añus qu'escribí y que apaeci nel mi libru "El corral los mis agüelus" (2004).

Estu, que quiciás pa angunu paici cosa sin emportancia, es de verdá un honol, no sólu pa mi comu presona que lleva muchus añus defendiendu la nuestra lengua, sinu pa tós los que, antis de mi, ussarun, palrarun y defendierun la palra d'El Rebollal. Y pa tóa la comarca d'El Rebollal que, pol un ratinu, ha síu la comarca más famosa de tó'l Reinu de León. Himus teníu, además, el honol de que la nuestra variedá del leonés, la palra d'El Rebollal o rebollanu, haiga síu la primera en oyelsi en las Cortis, comu representanti de tóas las palras leonesas que, de norti a sul, se palran entovía enas tierras del vieju Reinu.

Dendi esti rinconinu, dal las gracias al deputáu por habel usáu la nuestra palra, gracias tamién por defendel la lengua leonesa, tan polía y auténtica comu preseguía en tiempus. Gracias a Goyu de Benaventi pol emprestali el mi libru al deputáu. Gracias a Ángel Iglesias y José Alonso, dambus dos de Robrea, polus sus estudius alreol de la palra d'El Rebollal y a tós los que, comu él la han tratáu con respetu y cariñu. Gracias a tólus que jidun que, hai dos añus, pusieran en Robrea los cartelis en la palra d'El Rebollal, y los pocus que señalan los caminus en Peñaparda. Gracias a los grupus que, comu "El Fandangu" de Robrea o los "Chabarconis d'El Rebollal" defiendin la nuestra palra llevándola nel su nombri y ussándola en las sus cancionis. Y, en especial, a los nuestrus padris, agüelus, bisagüelus,... que mos dejarun de herencia una lengua tan polía comu la nuestra. Más que a naidi, a esta genti va dedicáu tó éstu, pos se ha jechu justicia con la su mimoria, la su cultura y la su lengua.

¡Ah, se me olviaba! Tó estu de palral la nuestra variedá del leonés en las Cortis vieni porque se ha aprobáu, con el votu de tólus deputáus autonómicus, "que se impulse el leonés y se regule su protección y su uso". O sea, lo mesmu los deputáus de dechas, que los d'izquierdas, que los leonesistas. A tós ellus, gracias por comprendel que la nuestra lengua es, comu idi el artículu 3.3. de la Costitución, un patrimoñu que mereci especial respetu y proteción.

Palra d'El Rebollal.
¡¡RESPETU Y OFICIALIDÁ!!

AFOTU: el picu Jálama neváu

Palra y Leyis

En estus días s'está palrandu muchu, en tó'l país, del escritu que han sacáu los periódicus catalanis alreol del su estatutu y de cómu esti estatutu lo quierin echal p'atrás pol mé de las Leyis, de la prencipal Ley que tenemus nel nuestru país: la Costitución de 1978.

Sin entral a vel quien tieni razón, sí voi a chalral de la alegría con que anguna genti mienta a la Costitución cuandu le vieni en gana, que mú a menudu es cuandu se va a palral de los nacionalismus, comu pasa en esti golpi con los catalanis. Peru esa mesma genti se olvía de la mesma Costitución cuandu no le interesa. D'estu se podia estal chalrandu jasta'l día del Añu Nuevu del 2025, peru se puedi vel mú fácil qu'en la nuestra tierra tenemus un casu craru de Costitución "olvidá": el Artículu 3.3.

Pa los que no sabin lo que idi esi artículu, voi a recordálsilu: la riqueza de las diferentis palras d'España es un patrimoñu cultural que será ojetu d'especial respetu y proteción.

Hai que fijalsi bien en lo que idi: las palras (comu la nuestra palra d'El Rebollal) son UN PATRIMOÑU que tienin de tenel RESPETU Y PROTECÍON. Peru en la nuestra tierra, y por estensión en tó'l históricu Reinu de León, vemus que la LENGUA LEONESA (la palra d'El Rebollal está en drentru del LEONÉS ORIENTAL) no sólu no está siendu defendía, sinu que está siendu preseguía en nombri del "progresu" y del centralismu de esta comunidá autónoma. Peru no sólu esu, sinu que se mos quieri cerral la boca a los que defendemus la nuestra lengua, comu si defendel la herencia cultural que ha íu pasandu de agüelus a nietus, y de padris a hijus juesi pecáu. Comu si defendel la nuestra cultura juesi algu malu.

Pos nó señoris, defendel el nuestru patrimoñu no es malu, mú al contrariu. Y resulta que los que jadin de la Costitución la su bandera son los primerus que se olvían de esti articulu (y de otrus tan emportantis, peru no vieni al casu), y esu del RESPETU Y LA PROTECIÓN de la nuestra lengua, ná de ná. Tólu contrariu.

Peru güenu, comu en tó, hai escecionis. Comu hi leíu en engún láu, HOROSAS ESCECIONIS. En esti casu de la nuestra palra, y de la lengua leonesa en general, se trata del pueblu de ROBREA, que el añu 2008 tuvu el aciertu, los arrestus y la valentía, de ponel los nombris de las callis lo mesmu en la palra d'El Rebollal comu en la lengua oficial del Estáu. Paici mentira que tengamus de felicital a un ayuntamientu (n'esti casu, gobernáu por el PSOE) pol jadel lo qu'es debíu, peru en esas estamus.

Dendi esti escritu, la mi noragüena al ayuntamientu de Robrea, en la nuestra comarca d'El Rebollal, pol defendel la nuestra palra, pol defendel la nuestra lengua, pol defendel la herencia cultural de los nuestrus antepasáus. A vel si pol tólus rinconis de la nuestra tierra toman ejempru. Lo dichu: NORAGÜENA.

SALÚS, LIBERTÁ Y CULTURA TRADICIONAL.
Palra d'El Rebollal. ¡¡RESPETU Y OFICIALIDÁ!!


AFOTU: cartel d'una de las callis de Robrea (Salamanca)

El Fandangu de Robrea

Esti sábadu que pasó se jidu en Ciarrodrigu la Charrá, una Fiesta de folclori que tólus añus, el Sábadu Santu, se jadi ena ciudá.

Esti añu, pola parti d'El Rebollal, han estáu los del grupu "El Fandangu" de Robrea. Y lo jidun comu siempri, mú bien. Primeru, bailarun el Ofretoriu, dispués la Jota de dos Pasus, y pa acabal el Son. "El Fandangu" es un grupu que, a tólus lugaris que va, siempri cumpri y siempri deja a la nuestra tierra, al nuestru Rebollal, mú altu.

La verdá es que el grupu de Robrea mereci toas las alabancias y cumpríus que se le puedan dal.

Primeru, pol sacal p'alantri un grupu en esta tierra andi tan difícil es sacal p'alantri cualisquiera cosa. El grupu tieni ya muchus añus, y la genti qu'está en él de seguru que jadi las cosas cona mesma ilusión qu'el primel día.

Segundu, pol recuperal bailis que áina si estaban ya perdíus, comu pasa con El Son (que a mi es de los que más me gustan pol esi sabol a auténticu y esi señoríu que tienin los bailaoris al bailalu).

Terceru, pol lleval el nombri d'El Rebollal pol tólus rinconis de la provincia, cona cabeza bien alta y con tan güen arti.

Cuartu, pol defendel la nuestra lengua dendi el principiu. Ya dendi el mesmu nombri se ve esta defensa, pos está puestu ena palra d'El Rebollal: "El Fandangu". Además, hai ya unus añus (nel añu 2002) sacarun un discu con el nombri tamién ena nuestra palra: "Cantaris antigus de Roblea". Y, pol si juera pocu, nel discu cantan 3 cantaris ena nuestra lengua: "Que rompan la Jesa Arriba", "La Charrascona" y "La Joya los Caballus". Y entovía hai más. Otrus dos sonis del discu tienin el su nombri puestu ena palra d'El Rebollal: "El Fandangu" y "Pasacallis".

Asina es "El Fandangu". Siempri cona cabeza bien alta, siempri orgullosus de los nuestrus pueblus, los nuestrus bailis y la nuestra cultura. Y siempri teniendu mú craru que en drentru la nuestra cultura está la nuestra lengua. ¡Ay, cuantu tieni d'aprendel otra genti!

Noragüena, robreanus. No cambiéis nunca.

Palra d'El Rebollal. ¡¡RESPETU Y OFICIALIDÁ!!

¡Himus güeltu!

Dispués d'esti líu de los votus, aquí estamus otra vés.

Esti mes que pasó hi estáu de campaña. Pos sí, amigus, yo tamién hi estáu de camapaña. Y es que, comu diji en otrus escritu, estaba pa'l Senáu por el PREPAL (Partíu Regionalista del País Leonés) y, anque era seguru que no iba a salil, a tó'l que se presenta le gusta que le votin, asina que hai que jadel un poquinu de campaña. Pa'l que tenga curiosidá, hi sacáu 534 votus (más los que haiga teníu nel votu emigranti, qu'entovía no lo sé).

Peru aquí estamus otra vés a lo que interesa: a defendel la nuestra tierra, a defendel la nuestra cultura y a defendel la nuestra lengua.

Asina que me váis a vel pol esti rinconinu de la redi muchu más de continu que estas últimas semanas. Y esperu velvus a vusotrus tamién.

Palra d'El Rebollal: RESPETU Y OFICIALIDÁ

Los nombris de las callis

Unu de los pueblus de la Sierra de Gata que más me gusta está juera d'El Rebollal. Es San Martín de Treveju, ena provincia de Cáciris. Los mañegus han sabíu conserval tres cosas mú emportantis:

Lo primeru, el regatu que pasa pol metá el lugal, que llama la atención sigún pisas nel centru del pueblu. Agua fría, agua crara, siempri corriendu. En otrus pueblus (comu en Peñaparda) enterrarun esi regatu que pasa pol metá. Lo qu'en San Martín es un orgullu aquí... güenu algu pa escuendel y tiral basura.

Lo segundu, la arquitectura tradicional. Las callis de San Martín están llenitas de cassas jechas al mó y manera tradicional. La genti que se pusu a arregral las sus cassas respetarun las tradicionis, y respetarun la jorma y los materialis de las qu'estaban jechas las cassas. Lo mesmu que en La Alberca. Asina, dambus dos pueblus puedin presumil d'arquitectura tradicional, y de tenel muchas vesitas pa vel las sus cassas. N'El Rebollal, se derrotan las cassas pa jadelas nuevas d'arriba a abaju, sin respetal las piedras, sin respetal los tejáus, sin respetal ná. Es que, lo mesmu que de los regatus, paici que tamién mos avergonzamus de las nuestras cassas...

Y lo terceru, quiciás lo más emportanti, es que las gentis de San Martín han sabíu guardal unu de los mayoris tesorus de la Península: la su lengua. Pos sí, lo mesmu que n'El Rebollal, en San Martín, Eljas y Valverdi tienin una lengua propia. En San Martín lo llaman mañegu; en Eljas, lagarteiru; en Valverdi, valverdeiru. Peru es la mesma lengua. Lo mesmu que cuandu n'El Rebollal en Robrea idin que palran "robreanu", en Villarrubias "mangurrinu" y en Peñaparda "peñaparderu", siendu la mesma lengua leonesa.

Peru lo mejol es vel la querencia que le tienin a la su lengua. Los dagalis la apriendin ena escuela, mientris que aquí jidun tólu posibri pa que no le aprendiesi la palra d'El Rebollal a los nuestrus dagalis. Los negocius tienin nombres en "la fala" mientris que los nuestrus (menus la "tahona El Tamborileru", en Peñaparda) ajuyin de la nuestra lengua comu de la pesti. Y lo más políu s il dandu un paséu polus pueblus y vel los nombris de las callis escritus lo mesmu ena palra del lugal comu ena lengua oficial del Estáu. Asina, comu ena afotu, se puedi leel "Calli a Fonti / Calle la Fuente". Igualitu que enos nuestrus pueblus. ¿Pa cuandu vamus a podel leel enos nuestrus pueblus nombris comu "Calli el Cristu", "Calli el Jornitu", "Calli la Juenti",...?

Esa es la gran diferencia entri esus lugaris y los nuestrus pueblus. Nel láu de Cáciris, la su cultura tradicional, incluída la lengua es un orgullu pa toas las gentis de esus pueblus. En pasandu a esti láu de la Sierra, vemus que enos nuestrus pueblus la genti se avergüenza de la su lengua.

Los tres pueblus del "Val de Xálima" son especialis. Los nuestrus cincu pueblus d'El Rebollal tamién. La diferencia es qu'ellus están orgullosus de lo ue les jadi especialis, y por esu serán especialis siempri. Y nusotrus mos avergonzamus de lo que mos jadi especialis, y cuandu éstu desapareza, dejaremus de sel especialis y seremus comu los demás. O peoris, pol dejal moril lo que mos jadía especialis.

A los señoris que mandan n'El Rebollal. No se puedi presumil de defendel la cultura tradicional estandu en contra d'una parti d'ella, quiciás de la parti más emportanti de la nuestra cultura: LA NUESTRA LENGUA. Si de verdá defiendin la cultura tradicional, es tiempu d'apencipial a dal pasus pa defendel la palra d'El Rebollal. Si no, no güelvan a presumil de defendel la cultura, porque será mentira.

Palra d'El Rebollal. ¡¡RESPETU Y OFICIALIDÁ!!

Más de 1000 vesitas

Pos sí, amigus. Esti "blog" ya tieni más de 1000 vesitas.

Quiciás sea porque es interesanti lo qu'escribu. Quiciás sea porque hai genti a la que le gusta leel cosas ena palra d'El Rebollal. Quiciás sea por sabel más alreol d'El Rebollal. Quiciás sea pa riilsi un ratinu. O quiciás, por qué no, porque le caigu bien.

El casu es que, entri unus y otrus héis jechu que esti humildi lugal, esti "blog" alreol d'El Rebollal, tenga ya más de 1000 vesitas.

Ya sé qu'estus últimus tiempus lu hi teníu más abandonáu que de costumbri peru voi a intental golvel a escribil más de continu, chalrandu de tó un pocu, peru siempri con El Rebollal y la nuestra palra bien presentis.

Muchas gracias a tólus que héis entráu a leel lo que hi escritu estus mesis. Muchas gracias a tólus que héis dejáu el vuestru parecel alreol de lo que hi escritu. Y muchas gracias, pol alantráu, a tólus que leáis los mis escritu dis quí p'alantri.

Yo, intentaré jadel las cosas tólu mejol que puéa.