El Fandangu de Robrea

Esti sábadu que pasó se jidu en Ciarrodrigu la Charrá, una Fiesta de folclori que tólus añus, el Sábadu Santu, se jadi ena ciudá.

Esti añu, pola parti d'El Rebollal, han estáu los del grupu "El Fandangu" de Robrea. Y lo jidun comu siempri, mú bien. Primeru, bailarun el Ofretoriu, dispués la Jota de dos Pasus, y pa acabal el Son. "El Fandangu" es un grupu que, a tólus lugaris que va, siempri cumpri y siempri deja a la nuestra tierra, al nuestru Rebollal, mú altu.

La verdá es que el grupu de Robrea mereci toas las alabancias y cumpríus que se le puedan dal.

Primeru, pol sacal p'alantri un grupu en esta tierra andi tan difícil es sacal p'alantri cualisquiera cosa. El grupu tieni ya muchus añus, y la genti qu'está en él de seguru que jadi las cosas cona mesma ilusión qu'el primel día.

Segundu, pol recuperal bailis que áina si estaban ya perdíus, comu pasa con El Son (que a mi es de los que más me gustan pol esi sabol a auténticu y esi señoríu que tienin los bailaoris al bailalu).

Terceru, pol lleval el nombri d'El Rebollal pol tólus rinconis de la provincia, cona cabeza bien alta y con tan güen arti.

Cuartu, pol defendel la nuestra lengua dendi el principiu. Ya dendi el mesmu nombri se ve esta defensa, pos está puestu ena palra d'El Rebollal: "El Fandangu". Además, hai ya unus añus (nel añu 2002) sacarun un discu con el nombri tamién ena nuestra palra: "Cantaris antigus de Roblea". Y, pol si juera pocu, nel discu cantan 3 cantaris ena nuestra lengua: "Que rompan la Jesa Arriba", "La Charrascona" y "La Joya los Caballus". Y entovía hai más. Otrus dos sonis del discu tienin el su nombri puestu ena palra d'El Rebollal: "El Fandangu" y "Pasacallis".

Asina es "El Fandangu". Siempri cona cabeza bien alta, siempri orgullosus de los nuestrus pueblus, los nuestrus bailis y la nuestra cultura. Y siempri teniendu mú craru que en drentru la nuestra cultura está la nuestra lengua. ¡Ay, cuantu tieni d'aprendel otra genti!

Noragüena, robreanus. No cambiéis nunca.

Palra d'El Rebollal. ¡¡RESPETU Y OFICIALIDÁ!!