10.000

Comu celebral cosas está de moda, y mos gusta celebral más que ná los númerus reondus, en esti humildi "blog" estamus de celebración, pos a finalis d'eneru ha llegáu a las 10.000 vesitas.

Y esu, con tólu emportanti que es pol sí mesmu, es muchu más emportanti pol estal escritu ena palra d'El Rebollal, una d'esas lenguas que han síu preseguías dendi hai muchus añus pol tós aquellus a los que les jiedi que en angún lugal haiga algu diferenti. Una palra, en drentru la lengua leonesa, que quierin jadel de menus tós los que se piensan que ná más vali el su parecel y que el que no piensi y respiri comu ellus no debería tenel derechus.

Peru güenu, qu'estas 10.000 vesitas sean un homenaji primeru a tólus que defendemus no sólu la palra d'El Rebollal, sinu tamién tóas las palras minorizás y preseguías. Qu'estas 10.000 vesitas sean tamién un homenaji a los nuestrus padris, a los nuestrus agüelus y a tólus nuestrus antepasáus que, antis qu'ellus ussarun y mos dejarun esta palra tan polía. Genti, sangri de la nuestra sangri, a la que deshonra tó aquel que quieri jadel de menus la palra qu'ellus ussarun. Porque una cosa es no defendel la nuestra palra y otra mú distinta atacala y querel jadela de menus, lo mesmu a la palra que a los que la defendemus.

Podría seguil asina muchu ratu, peru estamus de fiesta. Gracias a los que han jechu que esti "blog" llegui a 10.000 vesitas. Gracias a los que han dejáu el su parecel. Gracias a tólus que defiendin la palra d'El Rebollal y demás palras minorizás. Y gracias, las más especialis, a los que mos han dejáu d'herencia esti tesoru que ha íu pasandu de generación en generación. Que siga siendu asina muchus, muchus, muchus añus.

Palra d'El Rebollal.
¡¡RESPETU Y OFICIALIDÁ!!

Palra y Leyis

En estus días s'está palrandu muchu, en tó'l país, del escritu que han sacáu los periódicus catalanis alreol del su estatutu y de cómu esti estatutu lo quierin echal p'atrás pol mé de las Leyis, de la prencipal Ley que tenemus nel nuestru país: la Costitución de 1978.

Sin entral a vel quien tieni razón, sí voi a chalral de la alegría con que anguna genti mienta a la Costitución cuandu le vieni en gana, que mú a menudu es cuandu se va a palral de los nacionalismus, comu pasa en esti golpi con los catalanis. Peru esa mesma genti se olvía de la mesma Costitución cuandu no le interesa. D'estu se podia estal chalrandu jasta'l día del Añu Nuevu del 2025, peru se puedi vel mú fácil qu'en la nuestra tierra tenemus un casu craru de Costitución "olvidá": el Artículu 3.3.

Pa los que no sabin lo que idi esi artículu, voi a recordálsilu: la riqueza de las diferentis palras d'España es un patrimoñu cultural que será ojetu d'especial respetu y proteción.

Hai que fijalsi bien en lo que idi: las palras (comu la nuestra palra d'El Rebollal) son UN PATRIMOÑU que tienin de tenel RESPETU Y PROTECÍON. Peru en la nuestra tierra, y por estensión en tó'l históricu Reinu de León, vemus que la LENGUA LEONESA (la palra d'El Rebollal está en drentru del LEONÉS ORIENTAL) no sólu no está siendu defendía, sinu que está siendu preseguía en nombri del "progresu" y del centralismu de esta comunidá autónoma. Peru no sólu esu, sinu que se mos quieri cerral la boca a los que defendemus la nuestra lengua, comu si defendel la herencia cultural que ha íu pasandu de agüelus a nietus, y de padris a hijus juesi pecáu. Comu si defendel la nuestra cultura juesi algu malu.

Pos nó señoris, defendel el nuestru patrimoñu no es malu, mú al contrariu. Y resulta que los que jadin de la Costitución la su bandera son los primerus que se olvían de esti articulu (y de otrus tan emportantis, peru no vieni al casu), y esu del RESPETU Y LA PROTECIÓN de la nuestra lengua, ná de ná. Tólu contrariu.

Peru güenu, comu en tó, hai escecionis. Comu hi leíu en engún láu, HOROSAS ESCECIONIS. En esti casu de la nuestra palra, y de la lengua leonesa en general, se trata del pueblu de ROBREA, que el añu 2008 tuvu el aciertu, los arrestus y la valentía, de ponel los nombris de las callis lo mesmu en la palra d'El Rebollal comu en la lengua oficial del Estáu. Paici mentira que tengamus de felicital a un ayuntamientu (n'esti casu, gobernáu por el PSOE) pol jadel lo qu'es debíu, peru en esas estamus.

Dendi esti escritu, la mi noragüena al ayuntamientu de Robrea, en la nuestra comarca d'El Rebollal, pol defendel la nuestra palra, pol defendel la nuestra lengua, pol defendel la herencia cultural de los nuestrus antepasáus. A vel si pol tólus rinconis de la nuestra tierra toman ejempru. Lo dichu: NORAGÜENA.

SALÚS, LIBERTÁ Y CULTURA TRADICIONAL.
Palra d'El Rebollal. ¡¡RESPETU Y OFICIALIDÁ!!


AFOTU: cartel d'una de las callis de Robrea (Salamanca)

El vagal jadi cuchal

SÁBADU, 15 DE DICIEMBRI. Día de sol. Mín: -7'1ºC Máx: 7'7ºC

"El vagal jadi cuchal". Esti refrán me lo diju esta mañana la Tia Gora (102 añus, en eneru 103) al velmi juegandu con los mis perrus ena puerta de cassa.

El refrán tieni ná más que cuatru palabrinas, peru se puedi escribil muchu alreol d'ellas.

La primera, el, es el artículu, lo mesmu qu'en castellanu, asina que no voi a idil más.

Vagal es un verbu mú d'aquí. No sé si en otrus lugaris de Salamanca o de Cáciris se ussa el verbu "vagal" (o la su castellanización "vagar"). N'El Rebollal s'ussa pa idil si se tieni tiempu (o no se tieni tiempu) pa jadel algu. Asina, cuandu anguién no tieni tiempu de jadel anguna cosa, se la puedi oyel idil: no me vaga. La terminación en -l es la propia de la palra d'El Rebollal.

Jadi es la tercera persona del prural del presenti del verbu jadel, unu de los que más s'ussan ena comarca d'El Rebollal. Podemus el dos cosas ena palabra "jadi". Primeru, la j- no es la "j castellana" (que n'El Rebollal no esisti), sinu que es el resultáu d'aspiral la f- latina. N'el Rebollal s'ussa esta aspiración en un montonáu bien grandi de palabras. Angunus ejemprus, además de los tiempus el verbu jadel, son: jelechu, juenti, Jelipi, jorramachi, jornu, jierru, jebreru,... Peru con tó y con esu, la f- aspirá no es lo más curiosu de la palabra "jadi". Y es que lo que está escritu comu -d- ena palabra, tampocu es la "d castellana", sinu qu'el su soníu es el de la antigua "z sonora". Un preciosismu, un tesoru qu'entovía guarda la nuestra palra, y que tamién se oyi en un montonáu de palabras: dagal, jadel, codina, codel, bederru, dodi, dodena, calabodu,...

Y, pa acabal, tenemus la que, nel mi parecel, quiciás sea la palabra más curiosa de las cuatru: cuchal. Cuchal es lo qu'en castellanu se llama "cuchara". Esi cambiu entri el leonés d'El Rebollal y el castellanu podría valel, pol si mesmu, pa tenel comu mú curiosa esta palabra. Peru entovía hai más. El prural de cuchal es cucharis, con el prural femeninu en -es (, típicu de la lengua leonesa, que n'El Rebollal se cierra en -is). Esti prural entovía s'ussa hogañu en Peñaparda (anque hai estudiosus que idin que esi tipu de prural ná más s'ussaba en Payu, peru los datus idin que, polu menus, tamién s'ussaba en Peñaparda). Esta curiosa característica típica de la lengua leonesa entovía se conserva en Peñaparda en un puñaínu de palabras: cuchal/cucharis; llaris; gallina/gallinis; patata/patatis; vaca/vaquis; ristri/ristris. Bien es verdá que poca genti s'acuerda ya, peru ussalsi, s'ussa. Y a la hora d'escribil ena palra d'El Rebollal, aconseju ussal esti tipu de prural qu'está documentáu que se ha ussáu ena nuestra palra (mientris yo viva, s'ussará lo mesmu ena lengua oral comu ena escrita).

Pos ná, dagalas y dagalis. No quieru jadel esti escritu más grandi, peru piensu que, con lo que hi escritu hoi, podéis barruntal angunus de los tesorus qu'entovía guardan la nuestra lengua y la nuestra tierra. De seguru que nunca pensásteis que se pudiesi chalral tantu alreol d'un refrán tan chicu.¡Lo que arrejundin cuatru palabrinas!