Vesita al Rebollal

JUEVIS, 13 DE DICIEMBRI. Día de sol. Mín: -5'8ºC

Esti juevis himus teníu n'El Rebollal una vesita emportanti. El señol Jesús Málaga, subdelegáu del Gobiernu en Salamanca (un cargu apaecíu a lo que aniantis era el Gobernaol Civil) ha estáu de vesita en Villarrubias, Peñaparda y Payu, paseandu polus pueblus y chalrandu con los sus alcaldis.

Sigún han dichu ena teli, los alcaldis le han estáu pidiendu al "gobernaol" cosas pa los pueblus comu, pol ejempru, que la A-62 tenga una salía pa estus lugaris (agora tenemus que pasal pol metá de Ciarrodrigu pa cogel la autovía), o que se pongan bandas sonoras pa que los cochis y cambionis no vayan tan ligierus al pasal pol metá de Villarrubias, o que se arregri el Riufríu, o que pongan "banda ancha" en los pueblus porqu'el inerné va mú lentu,... S'echa de menus que pidiesin ayúa pa defendel la cultura tradicional (y muchu más pa la nuestra palra, que es la parti de la nuestra cultura más olvidá). Se ha echáu de menus tamién que la vesita juesi ná más con los alcaldis y justicialis, sin qu'el pueblu s'enterasi de ná ni pudiesi vel y saludal al señol "gobernaol".

La vesita ha síu emportanti. Ena telivisión de Ciarrodrigu han jechu tó'l programa de "Plaza Mayor" (Praza Mayol) alreol d'esta vesita, y han chalráu con los alcaldis de Villarrubias y Payu (¿por qué no han chalráu tamién cona alcaldesa de Peñaparda?). Y de seguru que mañana los periódicus de Salamanca van a escribil abondu alreol d'esta vesita.

Está mú bien esu de que los políticus emportantis jagan asina vesitas a los pueblus chicus, comu los nuestrus lugaris. Esperemus qu'esta vesita sirva pa algu, y que nu haiga síu pol mé de qu'en marzu hai eleicionis... ´Peru a tólus que vengan os recibiremus conus brazus abiertus. Asina que ¿a qué esperan os pecis gordus? Anque pa prometel y no cumpril... cuasi mejol que mos dejin de jaléus, pa otras vés será.

NOTA: afotu de la vesita de Jesús Málaga a Peñaparda. D'izquierda a derecha: José y Luisa (justicialis), Jesús Málaga (subdelegáu del Gobiernu), Camila (alcaldesa), Toño (justicial) y Javi (secretariu)