El plenu el ayuntamientu

MARTIS, 4 DE DICIEMBRI. Niebra meona a la mañana, sol a la tardi. Mín: 2'4ºC Máx: 14'2ºC

Esta tardi-nochi ha habíu plenu del Ayuntamientu de Peñaparda. El alcaldi (en Peñaparda, alcaldesa) y los justicialis del lugal se han reuníu nel cuartu de Peñaparda pa chalral y jadel cosas por el pueblu.

¿De qué han palráu? De muchas cosas: de dinerus que se pidin a otrus organismus, de cosas que pidin las gentis del lugal,... De tó un pocu. Peru güenu, no es a esu a lo que yo iba.

Andi de verdá quería yo llegal es al asuntu de il a los plenus. No sé si la genti lo sabi, peru los vecinus d'un pueblu tenemus derechu a il, sin palral y sin votu, a los plenus del ayuntamientu. O sea, a il a un plenu a oyel lo que palran los nuestrus alcaldis y justicialis, a vel cómu decidin qué jadel (o qué no jadel) en el pueblu. Y lo mesmu que pasa en esti pueblu, pasa en tólus pueblus d'El Rebollal, y debería sel asina en tólus pueblus d'España. El il a los plenus es libri pa toas las gentis, siempri que se guardin silenciu.

Anque haiga genti qu'estu le pareza raru, es unu de los derechus que tenemus la genti en Democracia, y es un mó y manera más de participal en asuntus públicus. Otrus mós y maneras son, pol ejempru: el votal, el presentalsi a las eleicionis,...

Peru que sepáis qu'el il a los plenus es un derechu que tenemus tós, y es un derechu que vos animu a ussal, pos me paici interesanti abondu vel cómu las gentis que himus escogíu enas eleicionis pa que mos representis y mos gobiernin jadin esu pa lo que los himus votáu: representalmus y gobernalmus.

Sólu pongu una pega: la mayoría las vecis, la genti de los nuestrus pueblus no sabin cuándu son los plenus. Normalmenti se pregonan nel tablón d'anuncius del Cuartu, peru nel de dentru. Lo mesmu si el plenu lo pregonasin nel tablón de juera, o echasin un pregón comu cuandu se va a cuertal el agua, a lo mejol iba más genti, pos de seguru que hai más genti que yo a la que l'interesa estu ve vel cómu llevan los nuestrus representantis el pueblu.

Güenu, lo dichu: il a oyel a los plenus es algu que recomiendu, ussal esi derechu que tós tenemus d'il a oyel.