Librus

SÁBADU, 3 DE NOVIEMBRI. Día de sol. Mín: -0'1ºC Máx: 16'6ºC

Esti sábadu me tomé la tardi libri pa il a la Feria el Libru Antigu de Salamanca. La verdá es que, a los que mos gustan los librus, y mos gusta leel, el il a estas ferias y ponelti a vel librus y más librus es comu vel un peazu de paraísu.

Y craru, no se puedi il a la Feria el Libru y venil conas manus vadías. Asina que me truji pa'l lugal una güena carga d'ellus. Ningunu d'ellus era caru, el más caru 11 eurus (11 €), peru sí que me paicin interesantis. Primeru, porque me truji pa cassa librus escritus en 4 lenguas distintas: inglés, francés, latín y castellanu. Lástima no encontral en esus lugaris ná escritu ena nuestra palra... peru tó s'andará. Y Segundu, porque me paicin cosas interesantis las que vienin.

Estus últimus añus se ha veníu jadiendu en Robrea, nel mes d'agostu, una mini-feria el libru, lo qu'es mú de agraecel. Y anque ná más hi puíu il un añu, me paici qu'está bien jechu, y que tólus pueblus d'El Rebollal tenían de tenel una Feria asina. Y tamién una pequeña feria andi ajuntásemus los librus que hai escritus alreol d'El Rebollal. Angún despistáu entovía andará pensandu: "¿Qué librus?". Pos los hai. Aquí vos pongu una lista de los que conozu:
- Ángel Iglesias Ovejero. EL HABLA DE EL REBOLLAR. DESCRIPCIÓN. 1982
- Ángel Iglesias Ovejero. EL HABLA DE EL REBOLLAR. LÉXICO. 1990
- Ángel Iglesias y Cecile Iglesias. ROMANCES Y COPLAS DEL REBOLLAR. 1998
- José Alonso Pascual. ROBLEDA, CRÓNICA Y DESCRIPCIÓN DEL LUGAR. 2002
- José Alonso Pascual. EL OBISPO ROBLEDANO FR. ANTONIO SÁNCHEZ-MATAS. 2004
- José Benito Mateos Pascual. BREVE DESCRIPCIÓN DE PEÑAPARDA. 2002
- José Benito Mateos Pascual. EL CORRAL LOS MIS AGÜELUS. 2004
- Varius. CAHIERS DU P.R.O.H.E.M.I.O. nºs 5 al 8. 2004 y 2006

A éstus tenemus d'añuil angunus que entovía nu han síu pubricáus, comu COPLAS Y CANTARIS DE ROBLEA, de José Alonso Pascual, o el libru de Payu, escritu ya hai añus, peru nu pubricáu.

Lo que se puedi vel es que, polu menus, "cantera" de escritoris hai. Y ojalá sigan saliendu muchus librus alreol de la nuestra tierra, pa conocel mejol los nuestrus lugaris y en defensa de la nuestra cultura.

El añu 2008 está a la güelta la esquina. Esperemus que mos traiga angún libru nuevu alreol d'El Rebollal, y que angún día se puedan encontral en ferias comu la de Salamanca y, por qué no, que en los nuestrus pueblus se jagan ferias andi podel encontralus tós juntus.

El tiempu los jongus

VIERNIS, 2 de noviembri Día de sol. Mín: -0,1ºC Máx: 16,1ºC

En llegandu el tardíu, hai cosas que nunca faltan. Una (de la que palré antiel) son las castañas. Otra, el vel cael las hojas de los árbolis. Y la tercera, salil a jongus.

Y es que en ningún lugal de la nuestra comarca falta anguién que salga a dalsi un paséu polus nuestrus robrealis, o los nuestrus pinalis, o polas veréas y caminus a buscal jongus, ya sea pa comel en cassa o pa vendelus y sacalsi unas perras.

Comu no pué sel menus, yo tamién hi cogíu la mi cesta, la mi navaja y un librinu alreol de los jongus (que asina es comu hai que salil, polu menus cona cesta y la navaja) a jongus. Cá unu tieni los sus lugaris preferíus y yo, anque áina si soi nuevu en estu de los jongus, tengu los mis 3 u 4 lugaris a los que me gusta il porque de seguru, voi a encontral lo que buscu. Craru, que estaría faltu si contasi aquí los mis "lugaris secretus". Esu, cá unu tieni de buscalsi los suyus.

Peru güenu, una vés que unu sali y se poni a buscal los jongus, son de muchas crasis los que se puedin trael pa cassa. Yo no conozu muchas crasis, peru sí que hi cogíu angunus de los más ricus: parasolis o jongus de los práus (Lepiota procera y Lepiota Rhacodes); tortullus (Boletus Edulis); champiñonis (de la familia los Agáricus); nícalus (Lactarius deliciosus) y güevus de rei (Amanita cesarea). Los demás, comu no los conozu, los deju andi están.

Y es qu'en estu de los jongus es mú emportanti el cogel ná más que lus que se conozan, porque los hai mú güenus, peru amién os hai mú malus, angunus jasta puedin jadel que se muera la genti. Pol esu nu me cansaré de repetil que, cuandu se vaya a jongus, hai que cogel ná más los jongus que se conozan, o salil a jongus con anguién que los conoza bien.

Una vés arrecogíus los güenus, se puedin comel de mil mó y maneras: regüeltus con güevu, asáus a la lumbri con sal, en tortilla,... Esu ya, sigún cá cual.

Pues ná, lo dichu: güen provechu, y muchu cudiáu con los jongus, que son mú ricus y tós se puedin comel. Lo malu es que angunus ná más se puedin comel una vés...

Recordandu...

JUEVIS, 1 DE NOVIEMBRI. Día de sol. Mín: -2'1ºC Máx. 14,5ºC

El primeru de noviembri es unu d'esus días señaláus en coloráu enus calendarius. Y es qu'es un día especial pol mé de que los cristianus recordamus a los que ya nu están entri nusotrus.

Esi mesmu día, y unus días ntis, toas las casas son comu un jormigueru. Que si froris brancas p'aqui, que si amarillas p'allá,... Y es que queremus que esi día, los nuestrus seris queríus, los que ya mos dejarun, tengan la su cassa, la su última cassa, lo más polía que se puea. Y los qu'entovía estamus d'esti láu del mundu le enllenamus el lugal de froris.

El Día de Los Santus, que asina llamamus a esti día, los ciminterius s'enllenan de genti, que van a jadeli una vesita a los sus padris, hermanus, agüelus,... y demás familia que dejarun esti mundu.

Craru que en estu, comu en cuasi toas las cosas, hai de tó. Hai genti que idi que no va al ciminteriu porque nu necesita un día especial pa acordalsi de los sus familiaris, qu'el añu tieni 12 mesis p'acordalsi. Hai otra genti que ná más s'acuerda esi día...

No quieru jadel esti escritu mú juerti. Ná má mandal, dendi esti pequeñu lugal de la redi, un recuerdu y un abrazu a toa la genti que mos dejó, a esa genti que, anque ya nu están vivus entri nusotrus, están vivus enus nuestrus recuerdus.

Esti escritu y esti recuerdu va pa ellus.

NOTA: Hi puestu nel escritu una afotu d'un centru de froris porque, al contrariu que muchus periódicus y televisionis, me paici de mal gustu sacal las tumbas de los ciminterius y el dolol de la genti que va a vesital a los sus muertus.

La víspera de Los Santus

El 31 d'otubri, la víspera de Los Santus, siempri ha síu, en toa la Península, un día ricu en tradicionis.

La más nueva de toas las que sí son tradicionis de la nuestra Península es la subía a la catedral de Salamanca de "El Mariquelo" pa dal gracias por que el terremotu que derrotó Lisboa el 31 d'otubri de 1755 no jidu ningún mal en Salamanca. Cuentan que esi erremotu jue tan juerti que las gentis, temorintás, se metierun en drentru la Catedral, y que tan juerti cimbreó la tierra que las campanas de la Catedral tocaban solas. Peru, pol suerti, no jidu ningún mal, y el obispu diju que tolus añus había de dali gracias al señol pol éstu, y mandó que unu de la familia de "Los Mariquelus" subiesin a la torri de la Catedral a dal gracias y meil la inclinación de la torri. El últimu d'esta familia subió enos añus 70 del sigru XX, y la herencia la tradición la recuperó un tamborileru, Ángel Rufino de Haro que, pol mé d'estu, es conocíu comu "El Mariquelo", anque sin tenel ná que vel cona familia que antañu llevó esi moti.

Peru la tradición propia más estendía en la Península, la fiesta prencipal del tardíu, es la de la fiesta de las castañas, que según el lugal andi se jaga tieni un nombri: "magosto" o "mangosto" (Galicia); "magüestu" (Asturies); "chiquitía", "calbochá" o "magostu" (Estremaúra); "magostu" (Reinu de León), gaztañarre (País Vascu), "magosta" (Cantabria),... La fiesta se jadi entri los días 31 d'otubri (víspera de Los Santus) y metá de noviembri, y en ella se asan (craru, y se comin) castañas y choridu asáus, además de regalu tó con güen vinu, en un ritu antigu de dal gracias pola cosecha, uñíu a la magia del fuegu (idin que la palabra "magostu" vieni del latín "magum ustum"=fuegu mágicu). Esta fiesta se jadi en tós esus lugaris que hi nombráu aniantis, además de en La Alberca ("magosto") y ena Raya Portugal, lo que me jadi pensal que aquí tamién se ha jechu nel pasáu peru que pol mé de las nuevas moas, se ha dejáu perdel (comu se dejan perdel hogañu cuasi toas las nuestras tradicionis).

Esta tardi, andandu pola calli, hi vistu a los dagalis de Peñaparda vestíus de jorramachi. Polu vistu, ena escuela han celebráu una fiesta forastera de cuyu nombri no quieru acordalmi. ¿Peru qué les aprendin en la escuela a los nuestrus dagalis? ¿Cómu es que les aprendin a celebral fiestas forasteras mientris que las nuestras SE DEJAN MORIL?

La verdá, yo véu muchu más nuestra la fiesta del "magostu", la fiesta del fuegu y las castañas, que esa fiesta que trujun los resabíus de juera no ya del lugal, sinu de la Península. Asina que animu a toa la nuestra genti a que celebri el "magostu", con esi nombri leonés (comu la nuestra lengua) y las sus castañas, y que se deji en pás de fiestas forasteras. Porque 1.000 vecis más nuestru es el MAGOSTU que la fiesta esa anglo-sajona de las calabazas...

Polu menus yo, esta nochi piensu celebral el MAGOSTU con las castañas asás a la lumbri, música y baili. ¡¡VIVA'L MAGOSTU!!

NOTA: afotu arrecogía de http://blogs.periodistadigital.com/espanaprofunda.php/2006/11/11/el_magosto_la_exaltacion_de_la_castana

Un nuevu lugal andi chalral d'El Rebollal

¡Saludus, paisanus!

Hi jechu esti nuevu lugal andi palral de la nuestra tierra, d'El Rebollal, más a diariu que, pol ejempru, jagu en LA GURULLA (¡que a vel si me vaga sacal el númeru 14 ya, cois!).

Asina, con un poquininu tólus días la genti puedi sabel lo qu'ha pasáu, el tiempu que ha jechu esi día, lo que va a habel esus días,... De tó un pocu.

Y, comu no puedi sel menus, pa aprendel un poquininu más alreol de la nuestra tierra, y pa defendel la nuestra lengua y la nuestra cultura.

Pos ná, con esti escritu quea apencipiáu esti lugal alreol d'El Rebollal.