Día de la Lengua Madri 2016

Tólus añus, el día 21 de Jebreru se celebra en tó’l mundu el Día la Lengua Madri, un día pa defendel las lenguas minorizás y llamal la atención de la genti alreol de la riqueza que es, pa la Humanidá, el que haiga muchas lenguas diferentis y no sólu un puñáu d’ellas. Y es que, cuandu una lengua desapareci, con ella se va un mó y manera especial de vel el mundu. Cuandu una lengua se mueri, con ella mueri el recuerdu d’aquellus que la ussarun.

Cartel d'una calli de Robrea

La lengua madri de las gentis d’El Rebollal es la nuestra “palra d’El Rebollal”, qu’es el mó y manera que tenemus n’El Rebollal d’ussal la Lengua Leonesa. Una lengua que ha íu pasandu de generación a generación, la lengua en la que palraban (y entovía palran) los nuestrus padris, los nuestrus agüelus, los nuestrus bisagüelus,… El mejol homenaji que podemus jadeli a aquellus que mos han dejáu es guardal la cultura que ellus mos dejarun d’herencia, la lengua qu’ellus palrarun y que mos aprendierun, la lengua qu’ellus aprendierun de los sus padris y agüelus.

Y es que la nuestra palra d’El Rebollal es una riqueza cultural tan emportanti comu puedin sel el panderu cuadráu, o la gaita y el tamboril, o las vestimientas de charru, o los nuestrus sonis, los nuestrus bailis, los nuestrus juegus, las nuestras comías,… De pocu sirvi que presumamus de defendel la cultura si dejamus de láu una parti tan grandi d’ella comu la nuestra “palra d’El Rebollal”.

La nuestra palra d’El Rebollal es un tesoru. Un tesoru que mos jadi más ricus. Un tesoru que, además, mos dejarun d’herencia los nuestrus padris y agüelus. Un tesoru qu’es un jilinu que mos uñi con aquellus que, antis que nusotrus, vivierun, trabajarun, lucharun y murierun por esta tierra. Si dejamus moril la nuestra lengua, con ella dejaremus moril un pocu más a aquellus que la palrarun antis que nusotrus. Por esu tenemus de defendela, tenemus d’ussala, tenemus de tratala comu lo qu’es, un riqueza, un tesoru, una de las nuestras señas d’identidá. La nuestra palra d’El Rebollal, además de jadelmus especialis, es un recuerdu que mos han dejáu los nuestrus antepasáus. Engamus viva la su mimoria. Tengamus viva la nuestra palra.

Palra d’El Rebollal. ¡¡RESPETU Y OFICIALIDÁ!!

Felís Día de la Lengua Madri

Dendi el añu 2000, las Nacionis Uñías vienen celebrandu, tal día comu hoi, 21 de Jebreru, el Día la Lengua Madri pa la defensa de tóas las lenguas que, comu la nuestra, han síu jechas de menus.

Es ésti un día pa acordalsi de que, anque lo mesmu la Costitución qu'el estatutu d'autonomía y las leyis internacionales defiendin a lengua comu la nuestra Palra d'El Rebollal, ná se jadi por defendela y tó sigui comu el que oyi sopral el airi.

Pasileras

La nuestra Legua Madri es la Lengua Leonesa, y la nuestra Palra d'El Rebollal es el mó y manera que tenemos n'El Rebollal de palral el leonés. Una palra, la nuestra, que himus recibíu d'herencia de los nuestrus padris y agüelus. Una palra, la nuestra Palra d'El Rebollal que jadi que sigan vivus nel nuestru recuerdu los que ya no están. Una palra, la nuestra Palra d'El Rebollal, que mos jadi especialis porque, anque hai otras palras apaecías y hermanas de la nuestra palra, ya no son igualitas del tó, lo que jadi de la nuestra palra algu únicu. Una palra, la nuestra Palra d'El Rebollal, qu'es una de las nuestras señas d'identidá, lo mesmu que las vestimientas, o los bailis, o los sonis, o los estrumentus. Una palra, la nuestra Palra d'El Rebollal, qu'es una riqueza más de la nuestra tierra y de la nuestra cultura.

Hai muchas más razonis, peru comu muestra valin esas que hi mentáu. Por tóas esas razonis, los que somus hijus d'El Rebollal deberíamus estal orgullosus de la nuestra palra, y tendríamus de defendela lo mesmu que defendemus tólu demás (y, si puedi sel, mejol). Las nuestras callis deberían tenel los nombris en la nuestra Palra d'El Rebollal (en estu, en Robrea han cogíu la lantrera). Los cartelis que pregonan las nuestras fiestas deberían estal escritus también en la nuestra Palra d'El Rebollal. Los nuestrus dagalis debían aprendel la nuestra palra en la escuela,... Y asina un montonáu de cosas que tendrían de jadelsi y no se jadin.

Y es que no podemus presumil de defendel la cultura tradicional si no defendemus una parti mú emportanti d'ella comu es la nuestra Palra d'El Rebollal.

Hoi Día de la Lengua Madri, es un día tan güenu comu cualisquiel otru p'apencipial a defendela y a ussala. Defendamus lo nuestru. Defendamus la nuestra Palra.

¡¡VIVA LA PALRA D'EL REBOLLAL!!

Mensaji d'Añu Nuevu 2015

¡Saludus, paisanus y amigus!

Enos últimus tiempus está de moda esu d'echal chalras pola teli. Antañu ná más jadía esas cossas el Rei Juan Carlus. Agora, también lo jadi el su dagal, el Rei Jelipi VI. Peru, además d'essus "de siempri" dan la su chalra los presidentis de las autonomías y, nesti tiempu nel que no hai otras noticias, los partis están acomolgaítus de lo que ha dichu el unu o el otru.

Yo no quieru comparalmi ni con el Rei ni con presidenti ningunu, sólu faltaba qu'essu. Peru sí quería dal la bienvenía al Añu Nuevu con un pequeñu escritu dis quí p'alantri. Asina que vamus p'allá.

Apencipiamus el añu 2015. Un añu que vieni acomolgaítu de cosas. Lo primeru, que esti añu hai votus pa escogel los nuestrus alcaldis y presidentis de las autonomías (no sabemus si tamién presidenti del Gobiernu). De tóas menus de Galicia, País Vascu, Andalucía y Cataluña, que tienin eleicionis propias. Nel restu el Estáu votaremus pa escogel los nuestus alcaldis y los presidentis. Ena nuestra tierra, las gentis del Reinu de León (Salamanca, Zamora y León), al no tenel autonomía propia, tendremus de compartil presidenti, asina que la nuestra tierra andará, un añu más, un pocu coja. Es esti añu tiempu de promesas, las que mos van a jadel comu se jadin siempri nel tiempu los votus. ¿Qué mos prometerán pa la nuestra tierra?

Otru tema emportanti pa esti añu qu'entra tieni de sel el de la nuestra cultura. Esti añu 2015 tieni de sel el añu nel que, por fin, se apencipi a defendel la nuestra palra d'El Rebollal comu lo qu'es de verdá: una de las nuestras señas d'identidá, quiciás la herencia más emortanti que himus recibíu de los nuestrus padris y agüelus. No vali esu de presumil de defendel la cultura tradicional si dispués dejamus de láu algu tan emportanti comu la nuestra palra leonesa, la nuestra palra d'El Rebollal. Es tiempu de que las nuestras callis tengan puestus los nombris ena nuestra palra (algu que ya hai añus que han jechu en Robrea). Es tiempu de que tólus caminus d'El Rebollal estén señaláus con cartelis ena nuestra palra. Es tiempu de que los nombris de lugal de tó'l Rebollal estén y se conozan por el nombri que han teníu de siempri, el nombri por el que lo han mentáu los nuestrus antipasáus. Y es tiempu de que la nuestra palra entri enas escuelas pa que los nuestrus dagalis la apriendan comu lo que es: una parti de la nuestra cultura.

Será tamien un añu llenitu de música, de bailis, de fiestas,... Lo mesmu que la nuestra palra, los nuestrus bailis, las nuestras vestimientas, los nuestrus estrumentus y la música que se jadi con ellus son una parti mú emportanti de la nuestra cultura. Lo mesmu que de la nuestra palra, tenemos d'estal mú orgullosus d'esta herencia que mos dejarun los nuestrus agüelus, y tenemos de jadel tólu que podamus pa que no se pierda y pa recuperala. Tieni de sel algu de un día y sotru día, dendi el primel jasta el últimu día el añu. No podemos presumil de cultura si dejamus qu'esta se mos muera.

Paisanus, amigus, qu'esti Añu Nuevu, qu'esti Añu 2015 sea, comu pocu, comu el que dejamus. Y, si puedi sel, que sea mejol en muchas cosas. Peru no podemos quedalmus a velas venil. Si queremus qu'esti añu sea mejol pa nusotrus y pa la nuestra tierra, tenemos de jadel lo qu'esté ena nuestra manu pa intental que sea mejol. Naidi con dos déus de frente mos puedi cretical por defendel lo nuestru. Qu'esti Añu Nuevu sea el añu de la nuestra tierra, de la nuestra cultura y de la nuestra genti.

FELÍS AÑU NUEVU A TÓS

Palra d'El Rebollal. ¡¡RESPETU Y OFICIALIDÁ!!

Inviernu

El añu no para, y dispués del Tardíu entramus nel Inviernu. Un Inviernu que, ena nuestra tierra, es largu (anque no más qu'en otrus lugaris) y fríu.

A mucha genti no le gusta el Inviernu por el fríu, peru hai un montonáu de cosas que puedin jadelsi y celebralsi. Apencipiamus  cona Navidá, el Solsticiu d'Inviernu, el Sol Invictu,... O comu quieras llamalu. Es el tiempu nel que los días apencipian a sel más largus. Una fiesta celebrá dendi siempri que hogañu se ha disfrazáu de fiesta ena que compral y gastal dineru.

N'estus días celebramus tamién el Añu Nuevu, con tóa la fiesta y tólus güenus deséus pa'la añu qu'entra. Anque los antigus lo celebraban nel mes de marzu... Peru esu es otra historia.

Es tiempu tamién de regalal. Agora se ha puestu comu de móa el jadel el amigu invisibri, o que te lo traiga los regalus el señol del traji coloráu... Peru tamién, ena nuestra tierra, regala y alegra ena Nochigüena El Tamborileru, lo mesmu que nel País Vascu el "Olentzero" (El Carboneru). Anque tampocu no faltan los Reyis.

Dispués d'estus días, el día San Sebastián (unu de los "santus del gorru") siempri jué un día grandi ena nuestra tierra, y no estaría de más que enos nuestrus pueblus se recuperasin tóas estas tradicionis heredás de los nuestrus agüelus y qu'el día San Sebastían, güelva a sel una fiesta grandi.

Se podían contal muchas más cosas, peru tampocu hai que jadel el escritu muchu más largu. Lo emportanti es que, sea Primavera, sea Veranu, sea Tardíu o sea el Inviernu, la nuestra tierra y la nuestra cultura tiene muchas cosas que ofrecel.

Felís Inviernu a tós.

Palra d'El Rebollal. ¡¡RESPETU Y OFICIALIDÁ!!

Cultura y recuerdus

Estamus cerquina de las Navidadis y, en llegandu esti tiempu, tóa la genti s'acuerda de los que ya mos han dejáu. Lo mesmu que nel día de Tólus Santus, mos acordamus de cómu eran, qué jadían,... Sacamus tólus güenus recuerdus que tenemos d'ellus.

Peru, ¿mos himus paráu anguna vés a pensal en que la cultura tradicional tamién mos la han dejáu comu recuerdu suyu? Pos sí, la cultura tradicional, esa a la que mucha genti no le da la emportancia que mereci, tamién es un recuerdu d'aquellus que no están con nusotrus.

Lo mesmu los bailis que los estrumentus, las vestimientas, las tonás,... Tó esu mos lo han dejáu de recuerdu los nuestrus padris, los nuestrus agüelus,... Cá vés que bailamus un ajecháu, o un ofretoriu, o un fandangu,... Cá vés que tocamus las castañuelas, o el panderu, o cantamus la Charrascona,... le estamus jadiendu un pequeñu homenaji a los antigus, a los que vivierun, trabajarun y sufrierun por esta tierra, por esta cultura y pola nuestra genti.

¿Y qué podemos idil de la nuestra palra d'El Rebollal? El seguir palrandu el rebollanu (o el peñaparderu, o el robreanu, o el nombri que le damus a la mesma lengua sigún el pueblu andi la palramus), el seguil manteniendu viva la palra qu'ussamus n'El Rebollal es seguil manteniendu vivu el recuerdu d'aquellus que la palrarun antis que nusotrus.

Y es que no vali pa ná que mos acordemus de la nuestra genti en días señaláus si un día, y otru día, y al sotru día, mos olviámus y dejamus de láu la cultura qu'ellus mos dejarun comu herencia.

No hai mejol recuerdu ni mejol mó y manera de honralis que mantenel viva la nuestra cultura, los nuestrus bailis, los nuestrus sonis, la nuestra palra,... Los que mos dejarun entovía vivin en ella.

Palra d'El Rebollal. ¡¡RESPETU Y OFICIALIDÁ!!

Dispués de dos añus

¡Saludus, paisanus!

Ya hai dos añus que no escribu unas rayinas nel blog, peru llegó el tiempu de golvel a escribil.

En dos añus han pasáu un montonáu de cossas, dendi las fiestas los nuestrus pueblus jasta el grupu de Robrea ena teli. Dos añus enos que, anque de seguru que le pesi a anguna genti, la nuestra palra entovía está viva. Y, dendi esti rinconinu de la redi, vamus a seguil poniendu nuestru pequeñu graninu d'arena pa que siga viva y tenga el respetu que mereci.

Porque ya lo idi la nuestra Costitución nel su artículo 3.3: "La riqueza de los diferentis mós y maneras de palral en España es un patrimoñu cultural que será objetu d'especial respetu y proteición". Y la nuestra palra, la que himus heredáu de los nuestrus padris, la que mos dejarun los nuestrus agüelus, mereci tantu respetu comu cualisquiera otra. Y mereci que la defiendan lo mesmu que a las demás.

Asina qu'aquí estamus, dos añus dispués, pa seguil ussandu la nuestra palra, pa seguil defendiéndola, y a seguil honrandu a la palra a a los que la ussarun antis que nusotrus. ¡VIVA LA PALRA D'EL REBOLLAL!

Palra d'El Rebollal. ¡¡RESPETU Y OFICIALIDÁ!!

Los paléus de Vilvestri

¡Saludus, paisanus!

Me hi dáu cuenta de que tenía esti rinconinu de la redi mú abandonáu. Peru ya va siendu hora de que mos pongamus a remuálu y a escribil anguna cosna nueva, comu no pué sel menus dedicáu a la cultura ttradicional.

Esta vés mos vamus a salil de la comarca d'El Rebollal, anque no del nuestru Reinu de León, ni de la provincia de Salamanca. Mos vamus a il a Las Arribis, al pueblu de Vilvestri.

Lo mesmu qu'enos pueblus d'El Rebollal tenemus los nuestrus sonis y bailis, en Las Arribis tienin los suyus. Y los del pueblu de Vilvestri se bailan con palus enas manus que se van chocandu al son que marca el tamboril. Y en cá pueblu tienin los sus propius bailis y los sus sonis.

Pos resulta qu'esta semana los dagalis de Vilvestri salierun ena telivisión jadiendu unu de los sus bailis. Estuvun nel programa "Tú sí que vales", de Telicincu. Programa y cadena que, pa qué vamus a engañalmus, no véu cuasi nunca. Esta vés lo vi porque salía esti grupu andi toca el güenu de "Afro". Asina que pusi la teli y justu nesi momentu iban a apencipial a balilal. Dispués d'un primel intentu (los nervius del momentu), a la segunda jidun el su baili, mú bien tocáu y mú bien bailáu. Comu no pué sel menus, con los vestíus tradicionalis.

Y llegó el tiempu los votus pa vel si seguían p'alantri o no. Y comu paici que al púbrico no le gustó (o no entendió) el baili y al juráu tampocu, pos no pasarun. Agora vieni la miga el asuntu.

Lo primeru, el púbricu, qu'escapáu votó en contra los bailis. Y es que paici qu'en esti "benditu" país paici que estu de la cultura tradicional es algu comu prohibíu, y jasta raru. Y si no son sevillanas o framencu, comu que "no vali". Comu lo de las lenguas, que paici que si no son "castellanu" no valin... Asina va el país... Pos craru, ¡cómu iba a valel algu tan antigu y tan puru comu los paléus de Vilvestri!

Lo segundu, la chalra el juráu. El unu, anque s'acuerda de vel al su agüelu vestíu de charru (la su madri es de Salamanca) los votó, sí, peru pola su familia de Salamanca. ¿Cómu iba a sel pol defendel la cultura? Es más, la jidu de menus idiendu qu'esu no vendía. Craru, esu es lo qu'importa hogañu, el "vendel". Da igual que las cosas no sean puras, da lo mesmu que no tengan ná del vel con nusotrus, da igual que sean peol que pegali a un padri, que si vendin pa anguna genti son güenas. Asina va el país... (Sí, ya sé que lo hi dichu hai poquinu, peru no deja de sel verdá). La otra cuasi les votó comu pol pena, porque era del mesmu parecel qu'el mediu charru.

Y deju aparti el parecel del famosu Risto. Y es que, anque votó que no, a mi me paici que poca genti ha jechu mejol defensa de la cultura tradicional qu'esti hombri. Primeru, porque s'interesó pol sabel d'andi venía el baili y qué quería idil. Segundu, porque defendió la cultura tradicional de tóa la península idiendu que no tó era framencu, y que si no se conocía más era porque no se había sabíu vendel (lo mesmu es que no ha interesáu vendelu). Terceru, pol dal las gracias al grupu de Vilvestri pol lleval algu auténticu al programa. Anque dispués votó que no, es muchu mejol esi no, peru con defensa de lo que han jechu y lo que jadin pol defendel la cultura que el otru sí graciosu "pa que le dejin entral en Salamanca". Risto, tú sí que valis.

Y mos quéa palral del grupu y de lo que diju "Afro". El grupu lo jidu bien, los dagalis bailarun bien, el tamborileru tocó bien,... Quiciás les sobró esi jadelu "a la segunda". Peru no es lo emportanti. Lo emportanti es que dierun la cara por el su pueblu, dierun la cara pola su tierra y dierun la cara pola cultura tradicional. Y, lo qu'es más emportanti, lo jidun no pa jadelsi elus más que naidi, sino, comu diju "Afro", que los pocus dagalis que van queandu ena nuestra tierra tirin p'alantri y puedan idil nel futuru que ellus tamién valin. El il al programa es una mirá al futuru, sin rompel con el pasáu (comu quierin jadel muchus), sinu amandu y defendiendu la herencia cultural heredá de los nuestrus mayoris, y estandu orgullosus d'ella. Y, pa los defensoris de la cultura tradicional, esti orgullu tieni de sel el mesmu pa los bailis, que pa los sonis, que pa los trajis, que pa la palra... Porque tós los himus recebíu de los mesmus y tós son igual d'emportantis.

Dendi esti rinconinu de la provincia de Salamanca, dendi la nuestra comarca d'El Rebollal, quieru mandalvus los mis ánimus. Comu tamborileru, comu bailaol, comu charru, comu leonés y comu defensol de la cultura tradicional estoi orgullosu de lo que jidísteis ena teli. Y, anque nel programa no vos dijus que valíais, dendi aquí vos lo digu yo: vusotrus sí que valéis, y lo que vusotrus jadéis vali muchu. Que sea pol muchu tiempu.

Noragüena, amigus.

Palra d'El Rebollal.
¡¡RESPETU Y OFICIALIDÁ!!