El Tesoru de la nuestra palra

Lo podremus idil una y mil vedis: la nuestra palra d'El Rebollal es un TESORU, con mayúsculas. No por repetíu deja de sel verdá.

Tó estu vieni a cuentu de que, tólus añus por esti tiempu, el 21 de Jebreru, se jadi en tó'l Mundu el Día la Lengua Madri, un día pa celebral que nel mundu se palran un montonáu de lenguas (y no un puñáu d'ellas, comu quierin que creamus), y que tóas ellas (entri ellas la nuestra palra) tienin el derechu a ussalsi y el derechu a sel oyías y defendías. No es un día que me haiga inventáu yo, vieni dendi la ONU (Organización las Nacionis Uñías), la mesma que poni, por ejembru, el Día cntra'l Cáncil o el Día Mundial los Dagalis.



Calli en Robrea

¿Y qué se quieri jadel con esti día? Pos abril los ojus a la genti, que tós veamus que el que haiga muchas lenguas es una RIQUEZA, que cá una de las lenguas es un TESORU (tamién la nuestra palra d'El Rebollal, el mó y manera que tenemus los rebollanus d'ussal la lengua leonesa). Es, además, una parti mú emportanti de la herencia que himus recibíu de los nuestrus padris y agüelus. Asina que, ussandu y teniendu viva la nuestra palra, vivirán un poquinu más los que la palrarun antis de nusotrus, los que se juerun pa siempri. De verdá, honraremus muchu mejol la su mimoria si mos sentimus orgullosus de la lengua que mos dejarun, la que ussarun siempri, la que aprendierun de los sus padris,..


Y es que la nuestra palra d'El Rebollal tieni de sel un orgullu pa tólus que somus y mos sentimus rebollanus. Es una parti mú emportanti de la nuestra cultura. Es una parti mú emportanti de la nuestra hestoria. Es una parti mú emportanti de la herencia los nuestrus padris y agüelus. Y jadremus mú mal en dejal moril lo que otrus os dejarun vivu...

Caminu en Peñaparda

Por esu, tós tenemus de ponelmus manus a la obra a defendela, en mimala, en querela, en ussala. Tós tenemus de ponel el nuestru ganitu d'arena, dendi los AYUNTAMIENTUS que, por ejempru, puedin ponel los nombris de las callis ena nuestra palra d'El Rebollal (hogañu, ná más en Robrea), o marcal los caminus (hogañu sólu unus poquinus en Peñaparda), o jadel los cartelis de las fiestas,... Jasta las ASOCIACIONIS culturalis, que tamién puedin jadel los cartelis de las sus fiestas en la nuestra palra u organizal un día de puesías, o de cuentus, o un Día de la Palra d'El Rebollal. Pasandu, comu no puedi sel menus, polus nuestrus GRUPUS FOLKLÓRICUS, que puedin ussal la palra d'El Rebollal en los bailis, enos sonis que cantin,...

Se puedin jadel muchas cosas, y muchas vedis no jadin falta perras, sinu voluntá pa jadel cosas. Me paici que se lo debemus a los que vivierun n'El Rebollal antis de nusotrus, los que siempri lucharun ponal nuestra tierra y por mantenel vivas la nuestra cultura. Y la nuestra palra es una parti mú importanti de la nuestra cultura, tan emportanti comu las vestimientas, los bailis, los estrumentus, los juegus,... Y comu parti emportanti qu'es, comu un TESORU, tenemus de defendela. ¡¡VIVA LA NUESTRA PALRA D'EL REBOLLAL!!

Palra d'El Rebollal.
¡¡RESPETU Y OFICIALIDÁ!!

Polus caminus

Si hai una cosa, además de la nuestra cultura y la nuestra palra, de la que podemus presumil los que vivimus n'El Rebollal es de la nuestra Naturaleza con mayúsculas. Y qué mejol manera de profital d'ella que cogel cualisquiera de los caminus que salin de los nuestrus pueblus y dal un paséu por ellus. Porque, además, los sabius idin qu'es buenu no sólu paseal, sinu paseal por el campu, pos el hombri necesita de la Naturaleza y el estal en ella, anque sea un ratinu al día.



Caminu entri robris

Pos cogaus cualisquiera de los caminus de la nuestra comarca. Quiciás solus, quiciás cona compaña d'anguién. Podemus disfrutal de los nuestrus robris (no tenemus d'olvial que tenemus el bosqui de rebollus más grandi d'Uropa), de los nuestrus pinus, de los nuestrus mostajus, de los nuestrus sanguinus,... Y tó'l montonáu de árbolis que crecin enas orillas los nuestrus caminus, ríus y regatus. Tamién crecin escoberas, escoberas negralis, bñuñalis andi cogel los bruñus, zarzalis andi cogel las moras, espinerus,... Un tesoru natural que ya quijieran en otrus lugaris...

Andal polus caminus ena Primavera es vel las froris que salin, de tóas las coloris, anque mos va a llamal muchu la atención la colol amarilla los joramagus que crecin enos práus. Andal polus nuestrus caminus en Veranu es oyel los soníus del monti, es aprovechal el agua fresca de los regatus, es arrecogel los frutus que mos va dejandu, comu las moras, los bruñus, los tapaculus,... Andal los caminus nel Tardíu es vel las coloris las hojas de los árbolis, dendi'l verdi jasta'l marrón, es metelsi enos bosquis a cogel jongus comu los tortullus, los níscalus, los güevus de rei, los jongus de los práus,... En Inviernu, paseal mos vali pa orealmus y no estal encerráus en cassa tó'l día, pa vel los regatus y juentis llenus y, por qué no, pa barruntal la llegá de la Primavera y, con ella, la güelta a la vía de la nuestra tierra.

Froris

Pero paseal por el campu es tamién recordal a la genti que vivió aquí antis de nusotrus, los que anduvun por esus caminus en otrus tiempus en que los pueblus estaban llenus, en otrus tiempus en que no estaban tólus güertus abandonáus,... Aquellus tiempus en que los nuestrus agüelus pisaban estas tierras llamandu a cá cosa por el su nombri. Un nombri que, comu no puedi sel menus, estaba ena nuestra palra d'El Rebollal y que entovía s'idin ena nuestra palra (anque dispués los señalin en una palra forastera). Estaría bien qu'esus nombris se recuperasin y que los nuestrus caminus y lo qu'encontramus en ellus estuviesin señaláus en la nuestra palra d'El Rebollal...

Es tiempu de profital de los nuestrus caminus, de disfrutal de la Madri Naturaleza. Un tiempu de disfrutal que van dendi'l mes d'Eneru jasta'l mes de Diciembri. Y es que la nuestra tierra es pa disfrutal d'ella tó'l añu.

2017, un añu pa'l relumbial de la nuestra tierra

Dejamus atrás el añu 2016 y apencipiamus el 2017, llenu de güenus deséus y güenus propósitus.

El añu 2016 llegó al su cabu con la nuestra comarca d'El Rebollal ena teli. Nel programa nel que salió, "El Arcón", chalrarun alreol de la nuestra naturaleza, chararun alreol de la nuestra palra y tamién chalrarun alreol el panderu cuadráu. Naturaleza y cultura ena que la nuestra tierra es rica, y que n'esti añu qu'apencipiamus agora tienin d'estal presenti entovía más.

Gamonitu, frol de la gamona

La nuestra naturaleza tenemus de cudiala y disfrutala. Los nuestrus padris y agüelus mos mostrarun que se puedi vivil d'ella, del monti, del ganáu, y que pa que tenga futuru se tieni de cudial. De ná vali el que arramplemus con tó hogañu si, al sotru día, no va a queal ná pa los nuestrus dagalis. Se puedi vivil de la Madri Naturaleza, peru tamién se puedi disfrutal d'ella. Los nuestrus pueblus, la nuestra comarca está acomolgaíta de caminus polus que il a andal, o correl en bici, o comu se quiera. Tenemus el bosqui de rebollus más grandi de tóa Uropa. Tenemus un montonáu de ríus y regatus, de podas y juentis con el agua crara y fresca, esi agua que quiciás jadi que la nuestra genti llegui a los 100 añus... La nuestra es tamién tierra de jongus, tierra de jabalinis, de pecis,... D'un montonáu de cosas que, de verdá mos jadi ricus en naturaleza. Cuantus lugaris quijieran tenel lo que tenemus nusotrus.



Calli en Robrea

La nuestra palra ha estáu mú presenti nel cabu el añu, y tieni d'estal tamien mú presenti n'esti apu 2017. Ha llegáu el tiempu de sentilsi orgullosus de la nuestra palra d'El Rebollal, de la nuestra palra leonesa, la mesma qu'ussarun los nuestrus padris, los nuestrus agüelus, los nuestrus bisagüelus,... Una palra que es una de las nuestras señas d'identidá. Una palra qu'es herencia viva de los nuestrus antepasáus. Una palra, la palra d'El Rebollal, qu'es parti de la nuestra hestoria, del nuestru pasáu y el nuestru presenti, y tieni de selu tamién del nuestru futuru. Una palra, la nuestra palra d'El Rebollal qu'está craru qu'interesa a la genti, y que ha lleváu el nombri de la nuestra comarca a tólus rinconis de la Península. Una palra, la nuestra palra d'El Rebollal, qu'es un trozinu vivu de los que ya no están con nusotrus. Honrandu a la nuestra palra, honrandu a la nuestra lengua, estaremus tamién honrandu a los que la ussarun antis de nusotrus.

El nuestru folclori tamién ha estáu presenti. ¿Quién no conoci a Peñaparda, el su panderu cuadráu y esi mó y manera de tocalu únicu nel Mundu? ¿Quién no ha oyíu palral de Payu y los sus bailis al son de la sartén? ¿Quién no ha oyíu ó vistu anguna vés los bailis de Robrea, tocáus con gaita y tamboril? El añu 2017 tieni d'estal llenu de bailis, llenu de fiestas, llenu de festivalis. La "Fiesta el Panderu", en Peñaparda, y "La Sartén Charra" en Payu son festivalis con muchu nombri nel mundu el folclori. ¿Conoceremus n'esti 2017 angún nuevu festival en Robrea, Villarrubias o Navafrías? ¿Se jadrá angún grupu n'estus dos últimus pueblus?

Sartén charra 2016 en Payu

El 2017 tieni de sel un añu andi la nuestra comarca d'El Rebollal güelva a relumbial. Tenemus cosas de sobra pa que pasi esu: el tesoru que es la nuestra naturaleza; el tesoru que e la nuestra palra d'El Rebollal; el tesoru que son los nuestros bailis, sonis y estrumentus;... Esti añu, ¡que se palri muchu y bien d'El Rebollal!

¡¡VIVA EL REBOLLAL!!
Palra d'El Rebollal ¡¡RESPETU Y OFICIALIDÁ!!

Día de la Lengua Madri 2016

Tólus añus, el día 21 de Jebreru se celebra en tó’l mundu el Día la Lengua Madri, un día pa defendel las lenguas minorizás y llamal la atención de la genti alreol de la riqueza que es, pa la Humanidá, el que haiga muchas lenguas diferentis y no sólu un puñáu d’ellas. Y es que, cuandu una lengua desapareci, con ella se va un mó y manera especial de vel el mundu. Cuandu una lengua se mueri, con ella mueri el recuerdu d’aquellus que la ussarun.

Cartel d'una calli de Robrea

La lengua madri de las gentis d’El Rebollal es la nuestra “palra d’El Rebollal”, qu’es el mó y manera que tenemus n’El Rebollal d’ussal la Lengua Leonesa. Una lengua que ha íu pasandu de generación a generación, la lengua en la que palraban (y entovía palran) los nuestrus padris, los nuestrus agüelus, los nuestrus bisagüelus,… El mejol homenaji que podemus jadeli a aquellus que mos han dejáu es guardal la cultura que ellus mos dejarun d’herencia, la lengua qu’ellus palrarun y que mos aprendierun, la lengua qu’ellus aprendierun de los sus padris y agüelus.

Y es que la nuestra palra d’El Rebollal es una riqueza cultural tan emportanti comu puedin sel el panderu cuadráu, o la gaita y el tamboril, o las vestimientas de charru, o los nuestrus sonis, los nuestrus bailis, los nuestrus juegus, las nuestras comías,… De pocu sirvi que presumamus de defendel la cultura si dejamus de láu una parti tan grandi d’ella comu la nuestra “palra d’El Rebollal”.

La nuestra palra d’El Rebollal es un tesoru. Un tesoru que mos jadi más ricus. Un tesoru que, además, mos dejarun d’herencia los nuestrus padris y agüelus. Un tesoru qu’es un jilinu que mos uñi con aquellus que, antis que nusotrus, vivierun, trabajarun, lucharun y murierun por esta tierra. Si dejamus moril la nuestra lengua, con ella dejaremus moril un pocu más a aquellus que la palrarun antis que nusotrus. Por esu tenemus de defendela, tenemus d’ussala, tenemus de tratala comu lo qu’es, un riqueza, un tesoru, una de las nuestras señas d’identidá. La nuestra palra d’El Rebollal, además de jadelmus especialis, es un recuerdu que mos han dejáu los nuestrus antepasáus. Engamus viva la su mimoria. Tengamus viva la nuestra palra.

Palra d’El Rebollal. ¡¡RESPETU Y OFICIALIDÁ!!

Felís Día de la Lengua Madri

Dendi el añu 2000, las Nacionis Uñías vienen celebrandu, tal día comu hoi, 21 de Jebreru, el Día la Lengua Madri pa la defensa de tóas las lenguas que, comu la nuestra, han síu jechas de menus.

Es ésti un día pa acordalsi de que, anque lo mesmu la Costitución qu'el estatutu d'autonomía y las leyis internacionales defiendin a lengua comu la nuestra Palra d'El Rebollal, ná se jadi por defendela y tó sigui comu el que oyi sopral el airi.

Pasileras

La nuestra Legua Madri es la Lengua Leonesa, y la nuestra Palra d'El Rebollal es el mó y manera que tenemos n'El Rebollal de palral el leonés. Una palra, la nuestra, que himus recibíu d'herencia de los nuestrus padris y agüelus. Una palra, la nuestra Palra d'El Rebollal que jadi que sigan vivus nel nuestru recuerdu los que ya no están. Una palra, la nuestra Palra d'El Rebollal, que mos jadi especialis porque, anque hai otras palras apaecías y hermanas de la nuestra palra, ya no son igualitas del tó, lo que jadi de la nuestra palra algu únicu. Una palra, la nuestra Palra d'El Rebollal, qu'es una de las nuestras señas d'identidá, lo mesmu que las vestimientas, o los bailis, o los sonis, o los estrumentus. Una palra, la nuestra Palra d'El Rebollal, qu'es una riqueza más de la nuestra tierra y de la nuestra cultura.

Hai muchas más razonis, peru comu muestra valin esas que hi mentáu. Por tóas esas razonis, los que somus hijus d'El Rebollal deberíamus estal orgullosus de la nuestra palra, y tendríamus de defendela lo mesmu que defendemus tólu demás (y, si puedi sel, mejol). Las nuestras callis deberían tenel los nombris en la nuestra Palra d'El Rebollal (en estu, en Robrea han cogíu la lantrera). Los cartelis que pregonan las nuestras fiestas deberían estal escritus también en la nuestra Palra d'El Rebollal. Los nuestrus dagalis debían aprendel la nuestra palra en la escuela,... Y asina un montonáu de cosas que tendrían de jadelsi y no se jadin.

Y es que no podemus presumil de defendel la cultura tradicional si no defendemus una parti mú emportanti d'ella comu es la nuestra Palra d'El Rebollal.

Hoi Día de la Lengua Madri, es un día tan güenu comu cualisquiel otru p'apencipial a defendela y a ussala. Defendamus lo nuestru. Defendamus la nuestra Palra.

¡¡VIVA LA PALRA D'EL REBOLLAL!!

Mensaji d'Añu Nuevu 2015

¡Saludus, paisanus y amigus!

Enos últimus tiempus está de moda esu d'echal chalras pola teli. Antañu ná más jadía esas cossas el Rei Juan Carlus. Agora, también lo jadi el su dagal, el Rei Jelipi VI. Peru, además d'essus "de siempri" dan la su chalra los presidentis de las autonomías y, nesti tiempu nel que no hai otras noticias, los partis están acomolgaítus de lo que ha dichu el unu o el otru.

Yo no quieru comparalmi ni con el Rei ni con presidenti ningunu, sólu faltaba qu'essu. Peru sí quería dal la bienvenía al Añu Nuevu con un pequeñu escritu dis quí p'alantri. Asina que vamus p'allá.

Apencipiamus el añu 2015. Un añu que vieni acomolgaítu de cosas. Lo primeru, que esti añu hai votus pa escogel los nuestrus alcaldis y presidentis de las autonomías (no sabemus si tamién presidenti del Gobiernu). De tóas menus de Galicia, País Vascu, Andalucía y Cataluña, que tienin eleicionis propias. Nel restu el Estáu votaremus pa escogel los nuestus alcaldis y los presidentis. Ena nuestra tierra, las gentis del Reinu de León (Salamanca, Zamora y León), al no tenel autonomía propia, tendremus de compartil presidenti, asina que la nuestra tierra andará, un añu más, un pocu coja. Es esti añu tiempu de promesas, las que mos van a jadel comu se jadin siempri nel tiempu los votus. ¿Qué mos prometerán pa la nuestra tierra?

Otru tema emportanti pa esti añu qu'entra tieni de sel el de la nuestra cultura. Esti añu 2015 tieni de sel el añu nel que, por fin, se apencipi a defendel la nuestra palra d'El Rebollal comu lo qu'es de verdá: una de las nuestras señas d'identidá, quiciás la herencia más emortanti que himus recibíu de los nuestrus padris y agüelus. No vali esu de presumil de defendel la cultura tradicional si dispués dejamus de láu algu tan emportanti comu la nuestra palra leonesa, la nuestra palra d'El Rebollal. Es tiempu de que las nuestras callis tengan puestus los nombris ena nuestra palra (algu que ya hai añus que han jechu en Robrea). Es tiempu de que tólus caminus d'El Rebollal estén señaláus con cartelis ena nuestra palra. Es tiempu de que los nombris de lugal de tó'l Rebollal estén y se conozan por el nombri que han teníu de siempri, el nombri por el que lo han mentáu los nuestrus antipasáus. Y es tiempu de que la nuestra palra entri enas escuelas pa que los nuestrus dagalis la apriendan comu lo que es: una parti de la nuestra cultura.

Será tamien un añu llenitu de música, de bailis, de fiestas,... Lo mesmu que la nuestra palra, los nuestrus bailis, las nuestras vestimientas, los nuestrus estrumentus y la música que se jadi con ellus son una parti mú emportanti de la nuestra cultura. Lo mesmu que de la nuestra palra, tenemos d'estal mú orgullosus d'esta herencia que mos dejarun los nuestrus agüelus, y tenemos de jadel tólu que podamus pa que no se pierda y pa recuperala. Tieni de sel algu de un día y sotru día, dendi el primel jasta el últimu día el añu. No podemos presumil de cultura si dejamus qu'esta se mos muera.

Paisanus, amigus, qu'esti Añu Nuevu, qu'esti Añu 2015 sea, comu pocu, comu el que dejamus. Y, si puedi sel, que sea mejol en muchas cosas. Peru no podemos quedalmus a velas venil. Si queremus qu'esti añu sea mejol pa nusotrus y pa la nuestra tierra, tenemos de jadel lo qu'esté ena nuestra manu pa intental que sea mejol. Naidi con dos déus de frente mos puedi cretical por defendel lo nuestru. Qu'esti Añu Nuevu sea el añu de la nuestra tierra, de la nuestra cultura y de la nuestra genti.

FELÍS AÑU NUEVU A TÓS

Palra d'El Rebollal. ¡¡RESPETU Y OFICIALIDÁ!!

Inviernu

El añu no para, y dispués del Tardíu entramus nel Inviernu. Un Inviernu que, ena nuestra tierra, es largu (anque no más qu'en otrus lugaris) y fríu.

A mucha genti no le gusta el Inviernu por el fríu, peru hai un montonáu de cosas que puedin jadelsi y celebralsi. Apencipiamus  cona Navidá, el Solsticiu d'Inviernu, el Sol Invictu,... O comu quieras llamalu. Es el tiempu nel que los días apencipian a sel más largus. Una fiesta celebrá dendi siempri que hogañu se ha disfrazáu de fiesta ena que compral y gastal dineru.

N'estus días celebramus tamién el Añu Nuevu, con tóa la fiesta y tólus güenus deséus pa'la añu qu'entra. Anque los antigus lo celebraban nel mes de marzu... Peru esu es otra historia.

Es tiempu tamién de regalal. Agora se ha puestu comu de móa el jadel el amigu invisibri, o que te lo traiga los regalus el señol del traji coloráu... Peru tamién, ena nuestra tierra, regala y alegra ena Nochigüena El Tamborileru, lo mesmu que nel País Vascu el "Olentzero" (El Carboneru). Anque tampocu no faltan los Reyis.

Dispués d'estus días, el día San Sebastián (unu de los "santus del gorru") siempri jué un día grandi ena nuestra tierra, y no estaría de más que enos nuestrus pueblus se recuperasin tóas estas tradicionis heredás de los nuestrus agüelus y qu'el día San Sebastían, güelva a sel una fiesta grandi.

Se podían contal muchas más cosas, peru tampocu hai que jadel el escritu muchu más largu. Lo emportanti es que, sea Primavera, sea Veranu, sea Tardíu o sea el Inviernu, la nuestra tierra y la nuestra cultura tiene muchas cosas que ofrecel.

Felís Inviernu a tós.

Palra d'El Rebollal. ¡¡RESPETU Y OFICIALIDÁ!!