Comel el jornazu

Enos periódicus de Salamanca esti lunis van a palral de muchas cosas. Primeru, de la mujel que han matáu d'un tiru cona espingarda en Ciarrodrigu. Y pa los de Salamanca, de qu'es el día de comel el jornazu. Y es qu'esti lunis jadin en Salamanca lo que llaman el "Lunes de Aguas" (Lunis d'Aguas), y la genti se va al campu (el pocu que quea ena capital de la provincia) a pasa un día de fiesta y comel el jornazu (esa riquísima "empaná charra" rellena de choridu, jamón, panceta,...).

Peru craru, las modas son las modas, y anguna genti que tieni menus personalidá qu'una charra de vinu saldrán enos nuestrus pueblus a comel el jornazu esti lunis porque comu en Salamanca lo comin esti día... Pos no señoris, el Lunis d'Aguas sólu es típicu de la ciudá de salamanca, no de la provincia.

Enos nuestrus pueblus siempri himus teníu pol costumbri comelu otrus días. Pol ejempru, en Villarrubias siempri se ha comíu el jornazu el Domingu de Resurreción. En Peñaparda, el día de la Crús de Mayu. Enos demás pueblus d'El Rebollal no sé, peru de seguru que se jadi tamién esus días.

Asina que podemus escogel. O tenemus un pocu de personalidá y jademus la tradición de comel el jornazu enos nuestrus pueblus el día que se ha jechu de siempri, o le pegamus otra patá (una más) a las nuestras tradicionis y, mientris dejamus moril las nuestras, aplaudimus las de los demás.

Ya sé que lo digu siempri, peru son las nuestras tradicionis las que jadin de los nuestrus pueblus algu especial. Si las dejamus moril, si dejamus que los nuestrus pueblus pierdan la su personalidá lo habremus perdíu tó.

Porque no sólu son tradicionis los bailis y el panderu. Tamién lo es la nuestra lengua. Tamién lo son los nuestrus juegus. Y tamién lo es comel el jornazu el día que se ha comíu toa la vía.

Palra d'El Rebollal. ¡¡RESPETU Y OFICIALIDÁ!!