En abril, aguas mil

Polu menus, esu idi el reflán. Y esti añu paici que se va a cumpril lo que idi, pos ya hai añus que no llovía tantu comu n'esti mes d'abril. ¡Y no creáis que cuatru gotinas de ná! Unas güenas aguarrás. No es d'estrañal que los regatus güelvan a correl, las juentis a manal, los ríus s'enllenin de vía...

Peru craru, siempri vienin anguién a idil esu de "estamus jartus de tanta agua, ¡ya puía paral de llovel!". U otra genti qu'idi esu de que "los ganaerus estarán contentus". ¡Cómu puedi estal la genti tan equivocá!

Vamus a dejal las cosas bien craras, a vel si a la genti l'entra de una vés ena cabeza que el llovel tamién es "güen tiempu".
- El agua no es sólu pa los ganaerus: es pa tós, porque tós bebemus, mos lavamus y cocinamus con ella
- El llovel limpia el airi, y jadi que los microbius se vayan, y mos libra de muchus andancius
- El llovel jadi que tó esté verdi. Ná sería más tristi que vel la nuestra tierra sin esi verdi qu'es una de las sus señas d'identidá
- Si no lluevi y sigue le sequeá, no se puedin enllenal las piscinas, ni llevarán agua los ríus. Y dambas dos cosas jadin de los nuestrus pueblus unus lugaris mú interesantis nel veranu

El agua es la vía. A los que piensan que ná más el sol es "güen tiempu" les digu que del sol no se puedi bebel. Vivimus en un país con mucha sequeá, y pocas cosas son más emportantis qu'el agua. Y con esu del cambiu del tiempu, los añus van a sel cá vés más secus. Que se lo piensis dos vecis aniantis de deseal qu deji de llovel, porque quiciás nel futuru, y no mú lejotis, lo vamus a echal de menus.

P'acabal, otru reflán, que oyí un día a una mujel en Peñaparda: si el tiempu es nel su tiempu, no es mal tiempu. Y ya lo idi el reflán del títulu del escritu: "En abril, aguas mil". Disfrutemus del agua hogañu que podemus, sabi Dios pol cuántu tiempu podremus disfrutal d'ella.

Palra d'El RebollaL ¡¡RESPETU Y OFICIALIDÁ!!