Virgin del Rosariu

Ayel domingu, primel domingu d'otubri, jué la Virgin del Rosariu. No es que yo sea mú religiosu ni ná d'esu, peru esti día estaba antaú acomolgaítu de tradicionis.

La Virgin del Rosariu era ena nuestra tierra una fiesta con mayordomus y madrinas. Comu fiesta religiosa, se jadía misa (ayel hubu misa pol mé de qu'era domingu, que si no ná de ná). Peru lo mejol venía dispués de la misa.

Enos nustrus pueblus se jadía el Ofretoriu. Ya sé que se jadi en muchus pueblus de la comarca (no hai más que leel los periódicus del fin de semana). Lo que tienin d'especial los nuestrus ofretorius, tocáus con gaita y tamboril, que no tienin los d'otrus lugaris es que los ofretorius de los nuestrus pueblus se bailaban, polu menus los de Peñaparda, Robrea y Villarrubias, anque de seguru que el de Payu tamién. Con el baili las madrinas le ofrecían a la Virgin unas velas y unos rosconis. Dispués, los rosconis se subastaban y los que tenían "la obrigación" de compralus eran los novius de las madrinas.

Peru, ¿qué mos ha queáu de tó esu? Pos poca cosa. Hogaú ya no se jadi ni ofretoriu, ni misa, ni procesion, ni se subastan los rosconis ni ná de ná. El casu es que cuandu vinun de nuevus los curas que tenemus agora quitarun tó estu de los ofretorius en lo que yo piensu que es una mala manera d'entendel la "puerza religiosa" (´¿a qué me suena a mi estu de la pureza religiosa?). Asina, toas estas cosas que de siempri se jidun ena nuestra tierra las quitarun, y mos dejarun a velas venil. Angún día tendríamus que palral bien abondu de tóas las nuestras tradicionis que mos han quitáu "nel nombri de Dius"...

Por suerti, grupus comu "El Fandangu" de Robrea y el grupu de Peñaparda han conseguíu que nu se olví el baili del ofretoriu, y entovía se baila enas actuacionis que se tienin nel veranu anque, por desgracia, ya no se baila nel tiempu que se tenía de bailal, qu'es esti día de la Virgin del Rosariu.

Y agora vieni lo más curiosu. Pueblus que de siempri han síu menus ricus que los nuestrus en tradicionis resulta que conservan el Ofretoriu el día que siempri se ha jechu. Y los nuestrus pueblus, que de siempri han presumíu de guardal las tradicionis (en angunus pueblus se presumi d'estu más qu'en otrus), jadi 20 añus que no se jadi y lo qu'es peol, ni cuenta con ellu.

Idi el reflán esu de "dimi de qué presumis, y te diré de qué carecis". ¡Y qué verdá es! Vas mos vali que mos dejemus e tantu presumil y mos pongamus de verdá a defendel las tradicionis, TOAS LAS TRADICIONIS.

Al vel cuál es el primel pueblu d'El Rebollal en jadel el Ofretoriu el día que siempri jue: el día de la Virgin del Rosariu.

Recuperandu tradicionis

Anque nu es comu pa tiral cohetis paici que, poquinu a pocu, se va recuperandu anguna tradición n'El Rebollal. Y es que ya iba siendu hora de que, en vés de jadel pol derrotal lo que tenemus, se jidiesi anguna cosa pa recuperal lo que s'está perdiendu.

Güenu, esta vés la alegría mos la han dáu los Carnavalis de Peñaparda. Y es que himus teníu tres días de Carnavalis nel lugal.

El Domingu de Carnaval, la asociación "El pandero cuadrado" (el panderu cuadráu) organizó una comía nel restauranti "El Castillo", seguía d'un pasacallis vestíus de jorramachi polas callis del lugal (que no se pudu jadel porque esi día llovió con muchu jostigu) y dispués, enas Escuelas Viejas, un baili al son del panderu y el tamboril, y un chocolati con biscochus.

El Martis de Carnaval, un grupu de vecinus de Peñaparda, sin estal organizáu pol ninguna asociación, salí a correl las callis del lugal cona música del tamboril. Comu no pué sel menus, toa la genti iba conus sus vestíus de jorramachi.

Y el Miércolis de Cenizaotru grupinu de presonas jidun el intierru de la sardina. Anque angunus d'estu de mantenel las tradicionis no s'enteran, y la misa del Miércolis de Ceniza la dan el juevis...

Jadi angunus añus, naidi daba un duru polus Carnavalis de Peñaparda. Peru jadi 3 añus salimus, el Martis de Carnaval, un grupinu de 4 presonas (contandu con el qu'estu escribi). Jadi 2 añus esi grupinu ya era de 8 ó 9 presonas. Y esti añu, eramus alreol de 50 nel baili del domingu, y más de 20 el Martis de Carnaval. Además, se siguin cantandu las dos tonás d'esti tiempu: "La Charrascona" y "Un Martis de Carnaval".

¿Que se puedin jadel mejol las cosas? Craru que sí. Yo hi echáu de menus que saliesi polas callis de Peñaparda la "Vaca Romera" (en Villarrubias, la "Vaca Galana"). O que se le diesi más pubricidá a la cosa (ná más se jidun unus cartelinus pa anuncial el baili que se pusun enos baris y comercius del lugal). Ni si quiera s'echó un pregón pa que la genti del lugal subiesi esa tardi a bailal a las escuelas. Peru güenu, esperemus que pa otru añu se jagan entovía mejol las cosas. Pa comu estaban los Carnavalis otrus añus, demasiáu.

Esu sí, dispués m'encargué yo de mandal las cosas que se jidun a los periódicus. Y además himus teníu la suerti de que han sacáu los nuestrus Carnavalis enos tres periódicus de Salamanca: Gaceta, Adelanto y Tribuna.

Güenu, esti añu podemus estal contentus. Los Carnavalis de Peñaparda han arrancáu. Y tienin pinta de seguil p'alantri. Ojalá güelvan a arrancal tamién enos demás pueblus d'El Rebollal.