Moras

Una de las cosas de las que más m'acuerdu de cuandu era un dagal es el salil a moras. Cogía un cubinu, o anguna cosa asina y me iba por el barriu El Jornitu de Peñaparda, andi antoncis había muchus zarzalis que daban güenas moras, y lo enllenaba.

Bien es verdá que hai que tenel cudiáu con las parés qu'estaban mediu esbarrungás, con los zarzalis,... ¡Peru qué güenas estaban las moras! No jadía más que llegal a cassa y polu menus un pratu de moras con azucal me jincaba. Y con las demás se jadía confitura, una confitura qu'es de lo más güenu que eníamus antoncis, y que me llevaba en tarrus pa merendal cuandu vivía en Madrís.

Hogañu ni vivu en Madrís ni soi un dagal, polu menus pol el tiempu que tengu. Peru me sigui gustandu esu de il a moras, anque ná más sea una vés, polu menus pa catalas. Asina qu'el otru día cogí un cubu y me recorrí toa Peñaparda pa cogel unas cuantas moras, dendi las Majaíllas, jasta'l Caminu Payu, pasandu polus Cotorrus y El Jornitu. La verdá es que no cogí muchas (este añu ha habíu pocas moras, y malatas), peru sí hi cogíu moras abondu pa golvel a sentilmi comu cuandu era un dagal.

Cuandu llegué a cassa, ¿que pensáis que jidi lo primeru? Cogel un pratu de moras, echali azúcal pol cima,.. ¡y p'adentru! Otras cuantas las metí en almíbal, pa tenel moras pa cuandu no las haiga. Y otras las himus jechu confitura. No es el ganal dineru, anque tólus añus las compran (polu menus en Villarrubias) y m'acuerdu que de dagal tamién cogiamus pa vendelas y sacal unas perras. Tampocu es enllenal la despensa, porque hogañu quien más quien menus tieni la cassa acomolgaíta de cosas pa comel, más de lo que tuvun nunca los nuestrus padris y agüelus.

Pa mi lo mejol de salil a moras es recordal viejus tiempus, golvel a sentil comu cuandu eramus unus dagalis. Y tamién el paseal por el campu y vel los zarzalis, los bruñus,... toas las prantas de las que tenemus bien abondu ena nuestra tierra. Y oyel a los pájarus, los burrus, las vaquis,...

La verdá, es algu que dendi aquí recomiendu a toa la genti. No dejéis moril al dagal que tós tenemus drentru. Quiciás, salil a moras puedi ayual a mantenelu vivu.