Comu tólus añus por esti tiempu, a los mandamasis d'Europa les da pol cambial la hora. ¿Cuál es la escusa que ponin? Pos que asina se ajorra energía.
Peru estu del cambiu la hora (qu'es una cosa de no jadi tantu tiempu, alreol de 30 añus) cá vés más me paici una tontería, y cá vés estoi más convencíu de que no vali pa ná güenu.
Lo primeru de tó, porque esti cambiu la hora lo primeru que jadi es atontal a la genti. Y es que se mos cambian las horas de jadel tó: de levantalsi, de comel, de dormil,... Ya con el cambiu el cuerpu está atontáu unus cuantus de días. Peru de seguru que tó estu se acaba pagandu, porque estus descontrolis no son ná de güenus pa la salú.
Lo segundu, por el afrontu d'andal cambiandu la hora a tólus relojis de la casa: que si el relós de la parés, que si el relós de pulsera, que si los relojis los móviis,... Anda que no se pierdi tiempu ni ná con éstu.
Y lo terceru, que tampocu es güenu pa las máquinas el andal tocándula a cá istanti pa cumpril los caprichus de cuatru sabiondus. La prueba la tenemus nel relós de Peñaparda. El día el cambiu la hora el alguacil jué a alantralu una hora (que es lo que tocaba pa esti cambiu), asina que ya lo dejó con una hora más. Pos en cuantis llegarun las 12 la nochi y el relós jué a dal las 12 campanás, apencipió a tocal y no paraba. Total, que se tiró un cuartu d'hora dandu campanás. Esu, a 30 capanás pol minutu mos dá más de 400 campanás seguías. Peru esu no es tó. Al sotru día el relós se paró y tuvun que ponelu en hora otra vés. Y la mañana el lunis (o sea, esta mañana) se golvió a paral.
Pos sí, paisanus, pa esu es pa lo que vali el cambiu de hora. En vés de ajorral energía lo que jadi es derrotal los nuestrus cuerpus, la nuestra salús y el nuestru patrimoñu (porqu'el relós de Peñaparda es un patrimoñu d'El Rebollal, de lo pocu que mos va queandu). Más les vali alos mandamasis que se dejin de tantas pamprinas y de tantu jadeli judiás al personal y se dediquin a gobernal bien, que pa esu cobran... ¡¡NO AL CAMBIU LA HORA!!
Palra d'El Rebollal
¡¡RESPETU Y OFICIALIDÁ!!
NOTA: afotu del relós de Peñaparda (20 d'eneru de 2008)
4 comentarios:
Ablucante lu de las campanas!! Cristu benditu que forma de tocar lus cu*****, you tamién albildru comu tuo.
Un beisu!!!
Pos sí, prenda. Paici qu'el deporti nacional del lugal es derrotal tólu que tieni de güenu el nuestru pueblu.
Anque esta vés no lo han jechu adredi, peru derrotáu quéa, porque tólus días se para.
Tenían de pasali la factura del arregru a los c... que idin que tenemus de cambial la hora dos vecis al añu.
Esperemus que no se les ocurra ninguna idea pa arregral estu del relós, porque cuandu tienin anguna idea es pa echalmus a rejilal...
Un abrazu.
TXEBE ¿esti que idi sel CISASTURA es de paqui.? Porque yo no lo entiendu.
En cuantu al relos ya sabis es una Maquina.
Y las máquinas si no tienin buenus mecánicus no son na.
Estoy contigu en lo del cambiu de hora. Es una manera de tocal los cojonis, sin naidi entendel pa que sirvi.
Paisanu, Cisastura es una amiga que palra leonés del norti. La nuestra palra es leonés del sur. Angunas cosinas cambian y, cuandu nu s'está acostumbráu, a las vecis cuesta entendelu tó.
Güenu, pa dambus dos: que sepáis qu'el relós está dandu las dodi. Paici que hoi va algu mejol. Vos seguiré informandu.
Un saludu.
Publicar un comentario