¿Cuándu va a paral éstu?

¡Mú güenas, paisanus!

Ya estaríais idiendu que había dejáu d'escribil nel blog. La verdá es que lo hi eniu derrotáu muchus días y, jasta que nu ha güeltu a furrulal, no me hi puestu a escribil otra vés. Peru hi güeltu con más juerza que nunca a chalral alreol de la nuestra tierra, de la nuestra cultura y, comu no pué sel menus, a defendel la nuestra lengua y el nuestru patrimoñu.

Y alreol del nuestru patrimoñu es esti escritu de hoi lunis.

Áina si ha pasáu un mes dendi que pasó, peru a mi entovía me dueli comu si juesi d'ayel. Vos cuentu. El pasáu lunis, 12 de mayu de 2008, jadi agora 4 semanas, el nuestru patrimoñu tuvu una pérdida que es difícil que se puea recuperal angún día, más pol mé de la genti que tenía de movelsi pa recuperau que de lo que puedi costal recuperalu.

Ya estaréis idiendu: ¡deja de dali güeltas, dagal. ¡Dilu ya! Güenu, allá va. Resulta que esi tristi día, un día de lutu pa tólus que quierin, anque ná más sea un poquinu el nuestru patrimoñu, quitarun el retabru de la ilesia de Peñaparda. No es que lo robasin, sinu que tenían de quitalu pol mé la carcoma.

Jasta ahí pos güenu, si no había más remediu que quitalu, qué le vamus a jadel. Peru esi no es el problema. Lo malu es que van a dejal la ilesia asina, sin retablu ni ná. Yo ya las tuvi esi día con el cura, y le dije a las craras lo que piensu: que una ilesia sin retabru no es una ilesia, sinu una navi industrial. Pareci que quierin dejal la navi lo mesmu que la de Villarrubias.

A mi me dueli nel alma el idilu peru hogañu, dendi que la "arregrarun" (anque habría qu'idil que la DERROTARUN), la ilesia de Villarrubias tieni de sel la más fea de toa la provincia de Salamanca. Y hogañu, han jechu de la de Peñaparda si no la segunda más fea, quiciás la tercera. ¡Una ilesia sin retabru! ¡Esu ni es ilesia ni es ná!

Peru güenu, sigún el parecel del cura, los retabrus son cosa del pasáu, de otrus tiempus. O sea, qu'el retabru de la ilesia de Peñaparda, el de la ilesia de Villarrubias, los ofretorius de Robrea, Peñaparda y Villarrubias... estorbaban.

Y lo que es peol, naidi ha movíu un déu pa no perdel lo que tenemus. Mú al contrariu, arriman el hombru a echal una manu pa vel si lo perdemus más ligierus...

Güenu, lo voi a dejal aquí porque estoi apencipiandu a afrontalmi, y lo mesmu acabu insultandu a anguién, y esu tampocu puedi sel.

Peru esi día, el 12 de mayu de 2008, quedará ena mi mimoria comu un día de lutu, un día tristi, un día que tólus que queremus la nuestra tierra teníamus de recordal con vergüenza. Porque es una vergüenza cómu s'está tratandu el nuestru patrimoñu, lo mesmu el de las ilesias qu'el cultural. ¿Cuándu va a paral éstu? ¿Cuandu se va a respetal y defendel, de verdá, el nuestru patrimoñu?

Palra d'El Rebollal. ¡¡RESPETU Y OFICIALIDÁ!!

NOTA: afotu de cómu quea la navi industr... digu la ilesia de Peñaparda