Froris

Ya estamus en primavera, anque por el calol que jadi más pareci qu'estamus ya nel veranu. Peru el casu es que ya ha llegáu mayu.

De siempri se ha oyíu idil a la genti que mayu es el mes de las froris y de verdá, cualisquiera que se ponga a paseal polus nuestrus campus y caminus puedi del que es verdá, pos andiquiera que se miri se puedin vel froris de tóas las crasis y coloris.

Da lo mesmu que vayas pola Cañá, por el caminu Los Bonalis, por el caminu Guinaldu, por el caminu Payu,... Si miras pa las cunetas, o al láu los regatus, o pa los práus, siempri ves anguna frol. Y hai muchas pa escogel: margaritas, gamonitus, candelillas, tijeritas, catalinas, sangri de nuestru señol, lechuguillas, joramagus, la frol de la escobera negral,...

Las coloris se ansoman a los nuestrus ojus, a las vecis paici qu'el arcu del Señol se ha caíu en angún práu y, rebujáu con el verdi de la yerba, podemus encontral froris de tóas las coloris: amarillas, colorás, brancas, azulis, morás,... Lo dichu, paici qu'el arcu el Señol ha veníu a jadel una vesita.

Pues ná, paisanus, a tó'l que le vagui, que no deji de dalsi un paséu por el campu, anque sólu sea a vel froris. Mereci la pena.

Palra d'El Rebollal
¡¡RESPETU Y OFICIALIDÁ!!

El Lunis d'Aguas

En drentru la provincia de Salamanca, ¿quién no ha oyíu palral anguna vés del Lunis d'Aguas? Es cuandu, dispués de Semana Santa, la genti de Salamanca capital, s'ajuntaban nel campu a comel el jornazu (una "empaná" de coridu, lombu, jamón, panceta,...), a jinchalsi de comel carni dispués de cuarenta días de cuaresma. Es una tradición que ha llegáu jasta hogañu.

En los nuestrus pueblus tamién se jadi (o, polu menus, se jadía), pos tamién las nuestras gentis pasaban la cuaresma. Y las gentis de los nuestrus pueblus s'ajuntaban pa comel el jornazu en familia, o con amigus, y se jadía una güena fiesta pos Cristu había resucitáu, y era algu pa celebral.

Peru tenemus de tenel craru algu: en los nuestur pueblus NUNCA se ha celebráu el Lunis d'Aguas. Esu es pa los de la capital. Polu menus, en Villarrubias de siempri se ha comíu el jornazu el Domingu de Resurreción. En Peñaparda, el día la Crús Bindita (3 de mayu). En los demás pueblus d'El Rebollal no lo sé. Peru de lo qu'estoi seguru es de que nunca se comió cuandu en Salamanca capital.

Ya sé que ha pasáu, y que pa esti añu ya no se puedi jadel ná (o casi ná), peru no está de más que vos recuerdi que nusotrus no somus la capital, y que la tradición del Lunis d'Aguas es mú polía, peru NO ES NUESTRA. Tantu que presumimus de tradicionis en la nuestra tierra, lo que no podemus jadel es trael una de juera y escondel en un rincón las nuestras. Asina que la genti de Peñaparda a vel si se poni las pilas y pa'l 3 de mayu, pa la Crús Bindita, salimus tós a comel el jornazu a la Jessa, o al Mostajal, o pa las Majaíllas, o pal Riufríu, o p'andi quiera que queramus juntalmus. Porqu'esa es la nuestra tradición del comel el jornazu, nu otra. La genti de Villarrubias, que presumin menus que la mayoría de las sus tradicionis, sigui comiendu el jornazu el día qu'es: el Domingu de Resurreción. A vel si tomamus ejempru.

Palra d'El Rebollal.
¡¡RESPETU Y OFICIALIDÁ!!

Qué bonita está la sierra...

Asina es comu apencipia unu de los nuestrus cantaris de boa.

Qué bonita está la sierra
con el beredu froríu
más bonita está la novia
al láu del su maríu...

Y es que la nuestra sierra está mú polía nesti tiempu. El agua, bendita agua, que ha caíu la última semana ha jechu que tó esté verdi... y de tólas coloris, pos agora con los caloris de la primavera toas las prantas estan echandu hojas y froris, y las nuestras sierras, cotorrus y demás s'enllenan de coloris lo mesmu qu'un arcu del señol.

El miércolis que pasó mucha genti de Peñaparda se jue d'escursión a Gata pola calzá, y lo que más vinun ididendu es esu, que qué bonita estaba la sierra. Y es que pocas cosas hai más polías que la sierra en primavera, con los beredus, las jaras, los chagüarzus, las escobas,... y las milis y milis de froris que salin estus días. A cualisquiel láu que miris se te van los ojus y se t'enllena el espíritu de belleza y alegría.

Asina, dagalis, pa esti fin de semana vos doi un conseju. Dispués de comel, id a dal un paséu pol el campu. Cogel un caminu, o una veréa y ponelvus a andal. Sin prisa, sin afrontus, disfrutandu de la naturaleza. Es la mejol medecina.

P.D. Consejus cuandu se va a paseal: siempri que se puea, paseal en compaña en vés de sólu; cuandu vayáis pol un caminu no vos salgáis de lo conocíu; dejal dichu a anguién p'andi se va a paseal; lleval un teléfonu pol si pasa algu; lleval algu pa bebel; lleval un gorru pa no cogel una insolación

Palra d'El Rebollal ¡¡RESPETU Y OFICIALIDÁ!!