San Sebastián 2011

"El venti d'eneru, San Sebastián el primeru."

Asina idi el reflán, anque el calandariu ponga angunus otrus antis. Peru la verdá es que, en llegandu San Sebastián (unu de los "santus del gorru", pol sel en inviernu), en los nuestrus pueblus se ha jechu siempri la primera fiesta grandi del añu.

Y es que San Sebastián jué, de siempri, una fiesta grandi, con la su Foguera, o Luminaria, o de cualisquiera de los nombris que le damus en los nuestrus pueblus. Tan grandi ha síu siempri que había jasta Mayordomus.

La víspera San Sebastián (la nochi del 19) se jadía siempri la lumbri, una lumbri andi simbólicamenti se quema tólu vieju pa dal pasu a lo nuevu. Asina lo pongu en esta puesía (a la que le hi puestu música) que, dendi hai unus añus, tocu con el tamboril la nochi de la Luminaria.

Luminaria de San sebastián
que ya ardis nel lugal.

Ardi bien juerti, ardi bien altu,
lleva lejotis todu lo malu. (BIS)

Luminaria de San Sebastián,
que ardistis, ardis y arderás.

Ardi bien juerti, damus calol,
lo vieju, lo malu, ya s'acabó.(BIS)

Esti fin de semana me paici que se van a jadel las Luminarias en Peñaparda y en Robrea, asina que la fiesta (anque mermá) entovía se jadi.

Un casu aparti es el de Villarrubias. Anochi jidimus la luminaria dispues de 20 añus sin jadelsi. Y pasamus un ratinu bien agradabri alreol de la lumbri. Vos pongu una afotu (anque no se ve mú bien, peru es que con lumbri y tó estaba escuru).

Me paici qu'es emportanti recuperal tóas estas fiestas que siempri se han jechu en los nuestrus pueblus, comu San Sebastián, o los Ofretorius, o San Isidru,... Fiestas que, comu los bailis, los ssonis, las vestimientas, los estrumentus,... o la nuestra palra, himus íu pasandu de generación en generación dendi jadi sigrus. Son parti de las nuestras señas d'identidá, son parti de la nuestra hestoria, y son parti de la nuestra herencia. Es un mó y manera de honral a los nuestrus antepasáus.

¡¡VIVA SAN SEBASTIÁN!! ¡¡VIVA'L REBOLLAL!!

Palra d'El Rebollal.
¡¡RESPETU Y OFICIALIDÁ!!