Pocus días hai nel añu que le gusti tantu a la genti comu es el día de hoi: Domingu de Ramus.
No sé si será oficial, peru de seguru qu'esti día es el que apencipia la Semana Santa, lo mesmu qu'el día la Lutería es el qu'apencipia la Navidá.
¿Y qué tieni d'especial esti día? Pos el mesmu nombri lo idi: los ramus. Y es que, anque no se vaya a misa en tó'l añu, es esti domingu de los pocus que está la ilesia llena. ¿Por qué? Porqu'es el únicu día que regalan algu en misa: un ramu d'aurel. Esu en los nuestrus pueblus, qu'enas ciudadis hai que pagal (y bien) pol un ramu jechu d'hojas de palma. Peru en los nuestrus pueblus la genti se poni las mejoris vestimientas que tenga nel armariu, se cogi y se va a misa a por el ramitu d'aurel, cuantis más grandi, mejol. Los devotus van porque créin en estu. Los no devotus, porque asina tienin pa guisal tó'l añu.
En lo que tieni de vel con lo propiu de las misas, el Domingu de Ramus quieri jadel mimoria del día en que Cristu entró en jerusalén, y las gentis de la ciudá salierun a recibilu alabándolu "armáus" con ramus, comu el liberaol del pueblu d'Israel del yugu de los invasoris romanus. La hestoria de dispués ya la sabemus tós (y el que no la sepa, que se ponga la teli estus días, que de seguru qu'echan anguna película alreol de Cristu).
Golviendu a los nuestrus pueblus, se créi qu'el ramu d'aurel, puestu enas ventanas y puertas, jadi que no entrin en cassa las brujas y los malis, que se quedin juera, lo que de seguru es un ecu de lo que poni en la Biblia alreol de la Pascua judía, de cuandu estaban esclavus en Egiptu y el su Señol mandó las famosus "sieti andancius", unu de ellus el matal al primel dagal de cá familia. Dios le diju a los judíus que pusiesin una ramina en la puerta la su cassa pa qu'esi castigu pasasi de largu pola su puerta. Es hestoria, contá en misa mil y una vecis, en tiempus además en los que a los qu'entovía guardaban la religión antigua se les llamaba brujus y brujas (y se les quemaba comu "enemigus de la fé") jadría qu'en los nuestrus pueblus (y en muchus pueblus de la Península los "creyentis" apencipiasin a ponel el aurel en las puertas y ventanas de la su cassa pa que las brujas saliesin ajuyendu. Y asina ha llegáu jasta hogañu.
Pos sí, paisanus, estu es lo que celebramus el Domingu de Ramus. Anqu, comu diji aniantis, tamién se ha jechu d'esti día algu pa presumil. Ya sabéis lo qu'idi el reflán: "El que nu estrena ná el Domingu de Ramus, no tieni ni pies ni manus".
Palra d'El Rebollal.
¡¡RESPETU Y OFICIALIDÁ!!
AFOTU: ramu d'aurel del Domingu de Ramus
3 comentarios:
Bonaaaas!!
jajaja... lu que dixeras de lus no devotus prestóume (yá teneden pa guisar too l' annu xD!), ya gracias pur la desplicación curtia de La Biblia ("novela" qu' entá nun lleíme... dixénonme que yera de ciencia fición ya eisu, purque' l tíu resucítanlu ya tou!! jajaja, -que chistes mas malus gastu :( -.
Lus apuntes sobru las bruxas vou cuoyételos, asperu que nun t' importe -nun tenía nin idega de l' aneudota esa de punxiar lus ramos en la puortas ya ventanos- :)
Nel meiu barriu el cura una vegá enfadóuse purque dibamos a misa pa esti día solamente ya echóunos de l' igresia, diciendu que nun valía que solu fuoramos a presumir... que si se cree, tien de creese too l' annu. Lus ninnines llorandu desilusionáos... en fin
Un conseyu pa' l laurel, yía caltenelu en la solombra, ensin que -y de la llume, ya dempués quitar las fueyas ya punxialas toas nun tarru crsital (na de plastiecayu ya eisu). Pavias secan, vwn eichandu un golorín qu' aroma toa la ca :) -lu malu lus bichos-
Pus si, lus del grupu Fandangu soden lus miyores, you güedeyei el su discu pur primera vegá -nin siquier lus conocía- en Cidá Rodrigu, quedeime ablucada pur que falaban igual que tuo!!.
Bonu, gracias pur camentame y' allegróme que prestarate, teu de faer más reportaxes sobru la tua provincia. Eiquí deixoute unu sobru' l pandeiru ya Pennaparda:
http://paislliones.gugara.com/frisneu/post/2006/12/02/taller-cumu-facer-un-panderu-pa-la-batalla-xd
Utiliza lus videos si quies pa punxialos nel tuo blog ou en la tua páxina.
Saludines a tuo ya la tua moza!!
Ta lluéu!!
En Roblea se tieni la creencia,que teniendu en casa, laurel venditu en el Dia de Ramus, no cain rayus
¡Vaya, MOTERU! Esa de los rayus me la tengu d'apuntal.
Y pa Licia, voi a echali una güeyá al reportaji alreol el panderu, a vel qué tal. ¿Y sabis? Del aurel me has dáu el mesmu conseju que mi madri jejeje
Publicar un comentario