El Rebollal

I Festival Folclóricu JUENTI EL GALLU

2011-05-23T17:06:00.006+02:00

Villarrubias (Salamanca), sábadu 28 de mayu de 2011

18:00 PASACALLIS polas callis del lugal

18:30 FESTIVAL con los grupus
- TXEBE y PATRI (Peñaparda - Villarrubias)
- EL CHARAÍZ REDONDO (Guinaldu)
- Grupo JÁLAMA (Payu)
- SERGIO "EL MANTERITO" (Bodón)
- ALDABA (Vitigudinu)
- RANCHO FOLCLÓRICO DE ARANHAS (Portugal)
- ARCENDAJAS (Salamanca)
- JULIO "EL SERRANO" (El Maíllu)

20:00 Conciertu el grupu NOIXAS (León)

21:30 Cena y Fiesta

ORGANIZA: Excmu. Aytu Villarrubias

COLABORAN (por ahora): Bar GALÁN (Villasrubias) - Bar Restaurante LA MINA (Villasrubias) - Bar TERE (Villasrubias) - Estación de Servicio SAMATE (Robleda) - Bar NUEVO (Robleda) - Bar estanco CHUCHI (Robleda) - Tahona EL TAMBORILERU (Peñaparda)- Mantas EL TAXISTA (Bodón) - Bar MERCE (Payu) - Supermercado FELIPA (Payu) - DOCUMENTACIÓN Y ESTUDIO DE EL REBOLLAR Asociación Cultural - DIPUTACIÓN DE SALAMANCA (Cultura)... Y el pueblu de Villasrubias

Candidatu

2011-05-07T23:23:00.004+02:00

¡Saludus, paisanus!

Comu tós sabréis, ya estamus en drentru la campaña pa los votus. Los partíus, sobri tó los mayoris, mos bombardearán con futuras promesas no cumprías, con promesas ya incumprías de eleicionis que ya juerun y con mucha, mucha propaganda. Ellus puedin jadelu. Puedin ofrecelmus el sol, la luna y las estrellas,... jasta'l 22 de mayu. Dispués d'esi día la cosa cambia...

Los qu'estamus en partíus chicus, los que no vivimus de la política, tenemus qu'ussal medius comu ésti, el interné, para que s'oyan las nuestras ideas y pa que la genti sepa que mos presentamus a las eleicionis. Porque estu tan cendillu, el que haiga más genti aparti de los "grandis", muchas veces no es conocíu.

¿Y qué ideas tenemus los demás? Nel mi casu es bien cendillu: la defensa la nuestra tierra, la defensa la nuestra hestoria, la defensa la nuestra cultura.

En cuantu a la defensa la nuestra tierra, los que himus vivíu juera anguna vés peru himus güeltu por amol a la tierra los nuestrua padris y agüelus, mos damus cuenta de lo que mos falta aquí, mucho más en falta si se compara con lo que hay juera. Porque la nuestra tierra sufri un abandonu que paici mentira que puéa dalsi nel sigru XXI. Y, lo que es peol, quierin jadelmus creel lo contrariu. Anque essas cossas se las crei el que quieri creélselas, porque lo idin "los suyus" (los del su partíu). Luchal contra el abandonu la nuestra tierra, y jadelu dendi otru parecel es una de las razonis polas que soy candidatu a las Cortis por el PREPAL (Partíu Regionalista el País Leonés).

En cuantu a la hestoria la nuestra tierra, lo diré craru: la provincia de Salamanca, lo mesmu que las de Zamora y León, jorman el históricu Reinu de León. Somus leonesis. Cualisquiel otru nombri sería tan "verdaéru" comu llamalmus griegus, o australianus. Salamanca tieni la su Universidá porque Alfonsu IX, Rey de León, la jidu pa que la genti nueva del Reinu de León no tuviesi que ilsi pa estudial. El nuestru Reinu de León jué el primeru en celebral Cortis en tóa Uropa, Cortis andi, pol primera vés, había representantis de las ciudadis. Cortis enas que, comu ciudadis del Reinu de León, estaban Ciarrodrigu y Salamanca,... No quieru estendelmi ena hestoria. Peru me da pena, y a la mesma vés rabia, el vel cómu s'intenta escondel esta realidá hestórica, cómu se mos quieri jadel creel que somus otra cosa, cómu se quieri jadel creel a la genti que algu que s'inventó jadi ná ha esistíu siempri. Y esu se jadi con dineru púbricu, con el dineru de tós, mientris que cuandu se pidi pa carreteras y sanidá nunca lo hay... Yo no puéu quedalmi de brazus crudáus viendu cómu desprecian y ningunean la hestoria de la nuestra tierra. Esa es otra de las razonis polas que soy candidatu a las Cortis por el PREPAL (Partíu Regionalista el País Leonés), el únicu partíu que, hogañu, lucha contra el olvíu hestórico la nuestra tierra, sin cambiar el discursu sigún de sopre el airi. Hogañu, es el únicu partíu que defiendi que Salamanca, Zamora y León, el hestóricu Reinu de León, tenga autonomía propia, autonomía a la que tenemus derechu pol mé el artículu 2 de la Costitución.

La nuestra cultura es comu el nuestru carné: es lo que mos idi quienis somus comu persona, comu pueblu. Comu ya sabréis (y si no, ya vos lo digu yo) tocu varius estrumentus tradicionalis (entri ellus, panderu cuadráu, gaita y tamboril), estoy en asociacionis culturalis, grupus, defiendu la palra d'El Rebollal (el mó y manera que tenemus n'El Rebollal de palral leonés),... Y , comu no pué sel menus, seguiré defendiéndolas siempri, comu señas d'identidá que son de la nuestra tierra, comu herencia los nuestrus antepasáus. Y, pol esu mesmu, esti escritu de presentación, nel mi blog de candidatu, lo hi puestu en dos lenguas, en castellanu y en la palra d'El Rebollal. Porque a mi no me da vergüenza ussal la lengua los mis antepasáus, porque hay que predical con el ejempru y porque, si no, no sería yo.

Los que me conocéis sabéis de sobra que la defensa la nuestra tierra, la defensa la nuestra hestoria y la defensa la nuestra cultura es algu que me tomu mú en seriu. Otra más de las razonis polas que presentu la mi candidatura a las Cortis por el PREPAL (Partíu Regionalista el País Leonés): porque siempri ha defendíu la nuestra hestoria, la nuestra cultura y la nuestra tierra con seriedá, sin dependel de naidi, conas ideas craras.

Pol tó esu, el día 22 vos píu el votu pa'l PREPAL (Partíu Regionalista el País Leonés). Pola nuestra hestoria. Pola nuestra cultura. Pola nuestra genti.

Los votus n'El Rebollal

2011-04-29T18:00:00.004+02:00

Comu de seguru ya sabéis, el domingu 22 de mayu son los votus pa escogel a los que van a sel alcaldis en los nuestrus pueblus. Comu no pué sel menus, hai un pocu de tó, asina que vos voi a contal un poquinu quién se presenta en cá unu de los nuestrus pueblus.

NAVAFRÍAS
En Navafrías s'escogin 7 justicialis, y es nel pueblu andi más genti se presenta pa alcaldi. Asina, tenemus:
1. PP (Partíu Populal): Esteban Alfonso González
2. SI (Coalición SI pol Salamanca): Sergio Rastrero Sánchez
3. PSOE (Partíu Socialista Obreru Español): Celso Ramos Blanco
4. DN (Democracia Nacional): José Bellanco Dionisio

PAYU
En Payu tamién s'escogin 7 justicialis, a repartil entri dos listas:
1. PP (Partíu Populal): Jesús Martín Chaparro
2. PSOE (Partíu Socialista Obreru Español): Esteban González Pascual

PEÑAPARDA
En Peñaparda los y justicialis del Ayuntamientu hai qu'escogelus entri estas dos listas:
1. PP (Partíu Populal): Camila Vizarro Andrés
2. PSOE (Partíu socialista Obreru Español): María Soledad Heras Juanes

ROBREA
Tamién son 7 los justicialis a escogel y dos las listas presentás:
1. PP (Partíu Populal): Ángel Ovejero Mateos
2. PSOE (Partíu socialista Obreru Español): José Luis Varas Carballo

VILLARRUBIAS
En Villarrubias son 5 los justicialis, a escogel entri:
1. PP (Partíu Populal): Juan José Moreno Mateos
2. PSOE (Partíu Socialista Obreru Español): David Amado Santos

En tólus pueblus repitin comu candidatu los alcaldis menus en Villarrubias, andi Félix Mateos, hogañu alcaldi por el PSOE no güelvi a presentalsi n'estas eleicionis.

Pa acabal, idil que ena comarca tenemus otru cabeza de lista más, n'esti casu José Benito Mateos Pascual, que es el primeru a las Cortis por el PREPAL (Partíu Regionalista el País Leonés)

La solución a a la preguntina de quiénis serán los nuestrus alcaldis y los nuestrus justicialis, el 22 de mayu.

A tólus que se presentan (o mos presentamus), suerti pa estas eleicionis.

Palra d'El Rebollal.
¡¡PRESPETU Y OFICIALIDÁ!!

El curdión n'El Rebollal

2011-04-13T17:31:00.004+02:00

Comu angunus ya sabéis, el sábadu que pasó, el 9 d'abril, jidimus en Villarrubias un encuentru de genti que toca el curdión. Comu siempri que s'organiza anguna cosina, se tieni nel pensamientu si saldrá bien, si saldrá mal, si va a respondel la genti,... Y, la verdá, esi día respondió la genti mú bien, lo mesmu los que vinun a tocal que los que vinun a oyel tocal.

Estrumentus tradicionalis tenemus unus pocus n'El Rebollal: el panderu cuadráu, la sartén, la gaita y el tamboril y las castañuelas. Peru, dendi hai un tiempu, el curdión s'está apencipiandu a jadel un güequinu en dretru la nuestra cultura tradicional.

Y es que el curdión es un estrumentu mú políu de tocal y de oyel (no mos equivoquemus, tós los que hi mentáu tamién). Y a la genti de Villarrubias, o a la de Robrea, o a la de cualisquiera los nuestrus pueblus en cuantis que oyi sonal un curdión, paici comu si se le abriesi una ventanina nel alma pol andi entra un rayinu de lús.

En Villarrubias mesmu hai unus cuantus que, pol Santu Ferinu, siempri sacan de ronda el curdión, y el día que comemus la vaca nel Riufríu siempri la llevan pa tocal y bailal. Y la genti baila, lo mesmu que baila con el tamboril, o con el panderu, o con la sartén, o con una orquesta. Y tenemus anguna genti n'El Rebollal que toca mú bien.

Pos ná, esa tardi del sábadu mos ajuntamus 14 curdionis, y yo conté alreol de 70 presonas ena Praza el lugal. Chemari "Cocu", Juan, Ninu "Lisboa" y Toñitu de Villarrubias; Pabru el tamborileru, su padri Manuel y Juan (el que jué alcaldi) de Robrea; Pedru de Saúgu; Domingu "Rei" de Peñaparda; Sidru de Monsagru y el su curdión verdi (ya no jadin muchus d'esa colol); Santiagu de Ciarrodrigu con los sus 90 añus y el su bandoneón (el que s'ussan pa tocal los tangus); Jussé de San Martín de Treveju y Antoñu "Tó" de Las Arañas (Portugal) juerun una buena compaña y, cá unu al su mó y manera, cá unu conas sus tonás, unus mejol (porque llevan más tiempu) y otrus menus mejol (porqu'están aprendiendu), tós ellus jidun que la tardi el sábadu juesi especial.

Dispués, comu no puía sel menus, mos juimus de ronda pol el lugal, comu en una güena tardi de fiesta de las d'antañu. Y corrimus las cuatru tabernas del lugal con los curdionis y la mi concertina irlandesa, tocandu un poquininu en cá lugal.

Faltó genti. Faltó mi tíu Toñín, que cuandu vivía era un hombri pegáu a un curdión. Faltó Chenchu, que tuvu un problema de salús del qu'esperemus que salga bien. Faltó otra genti que no pudu venil. Peru lo que no faltarun juerun las ganas de seguil tocandu y seguil aprendiendu.

Palra d'El Rebollal.
¡¡RESPETU Y OFICIALIDÁ!!

Congresu en Astorga

2011-03-30T17:22:00.003+02:00

El sábadu 26 de marzu se jidu en Astorga un congresu alreol de las palras minoritarias, comu son el leonés y el gallegu. Pa chalral de la nuestra palra d'El Rebollal (comu ya sabemus, una de las palras leonesas) estuvu Ángel Iglesias Ovejero, presidenti de "Documentación y Estudio de El Rebollar" y natural de Robrea.

Paici que la cosa jué mú bien, que la genti queó mú contenta y que, otra vés, los periódicus han tratáu mú bien el tema, lo que quieri idil que estu de las palras INTERESA y que cá vés más genti ve qu'ena nuestra tierra tenemus un tesoru que hai que defendel.

Comu muestra, lo que salió nel periódicu Salamanca24horas.com: Astorga acoge una Jornada sobre Patrimonio Lingüístico con destacada presencia del Rebollar

Comu no pué sel menus, siempri hai anguién en contra. Asina, nel primel escritu apaeci anguién que, además, idi sel d'El Rebollal, anguién que, además, de cretical a los que defendemus la palra y la cultura tradicional de la nuestra tierra NO DA LA CARA (porque otrus, anque escribamus con un moti, es un moti reconocíu pol tó'l mundu). Pocu d'El Rebollal puedi sel el qu'está en contra de la nuestra lengua, la que himus heredáu de los nuestrus antepasáus, la que, si de verdá es d'El Rebollal, han palráu tamién los sus padris, agüelus,... Pocu d'El Rebollal puedi sel cuandu presigui y desprecia a los que jademus lo que podemus y más pol defendel no sólu la nuestra palra, sinu tóa la cultura tradicional de la nuestra tierra. Pocu d'El Rebollal puedi sel el que s'avergüenza de la nuestra herencia cultural.

Güenu, tampocu quieru dali más pubricidá de la que se mereci a esta genti. Lo emportanti es que la nuestra palra cá vés es más conocía, que la nuestra tierra cá vés la conoci más genti pol mé, entri otras cosas, de la nuestra palra. Y, lo más emportanti, qu'entovía se puedi oyel a la nuestra genti palral asina, ussal la nuestra palra, la palra de los sus padris, la palra de los sus agüelus,... Y asina seguirá siendu nel futuru, mal que le pesi a anguna genti.

Noragüena a Ángel y a tóa la genti que defiendi la nuestra palra y la nuestra cultura.

Palra d'El Rebollal.
¡¡RESPETU Y OFICIALIDÁ!!

Agua, mucha agua

2011-03-14T16:17:00.006+01:00

Lluevi, lluevi y paici que no va a dejal de llovel. Asina le paici a mucha genti d'El Rebollal que, dendi'l viernis pasáu ha vistu llovel (y bien) tólus días. Peru, anque la genti se queji, el agua es algu que, además de necesitalsi, tieni muchu de vel cona nuestra tierra y la nuestra cultura.

Pa apencipial, podemus vel el montonáu de palabras que, en drentru la nuestra palra, tienin de vel con el agua: agua, juenti, charail, podu, poda, regatu, ríu, chabarcón, bonal, váu, canal, pantanu, barril, charpadu, llovel, muelli-muelli,...

Tamién podemus seguil con frasis, refranis... tamién con el agua comu tema:
- Cuandu Jálama tieni toca, Perosín tá jechu una sopa
- Llovel a botijás
- Llovel a bocacántaru
- Llovel con muchu jostigu
- Agua bien caía
- Agua mal caía

Tamién, jasta que llegarun las piscinas, el agua de ríus y regatus era la mejol pa refrescalsi en veranu. Asina, tenemus un montonáu de lugaris pa bañalsi: las Mayas (nel ríu Ollerus, en Robrea), La Bañera, La Pesquera y El Valli (tós tres en Riufríu, en Villarrubias), La Puenti (nel ríu de Peñaparda), El Charcu Palu (nel ríu de Payu),...

Comu no pué sel menus, el agua apaeci tamién enos cantaris:

Agua menudita lluevi, yo me moju en tus canalis...

Si tus padris no me quierin, quiéremi tú, cielu míu,
que yo le sabré buscal las pasileras al ríu...

De tu puerta a la mía corri un regatu
y andan las envidiosas por enturbialu...

Y, pa acabal, los ritus antigus relacionáus con el agua, comu el de la madrugá de San Juan, que hai de lavalsi con el agua de 7 juentis pa espantal los malis y no quealsi dormíu en tó'l añu, o el de bebel de la Juenti las Muelas, qu'idin que si bebis d'esi agua no te güelvin a dolel las muelas en tó'l añu.

Pos sí, dagalis, el agua es güena y que llueva en su justa medía es güenu no sólu pa'l campu, sinu pa tós, porque el agua se lleva tó lu malu que hai nel airi.

Además, cuandu lluevi no mos quéa más remediu que jadel lo mesmu que jadin los portuguesis: dejala cael.

AFOTU: Riufríu

Palra d'El Rebollal.
¡¡RESPETU Y OFICIALIDÁ!!

La palra en periódicus, arradius, telivisionis,...

2011-02-28T14:19:00.005+01:00

Que la nuestra palra es un patrimoñu cultural de primel ordin, ya lo himus dichu muchas vecis en esti rinconinu de la redi. Que es una herencia de los nuestrus padris y agüelus que tenemus el debel, polu menus moral, de defendel, tamién. Qu'es una de las nuestras señas d'identidá, tamién. Qu'es algu que mos jadi especialis nel güen sentíu de la palabra, tamién. Y qu'es algu qu'interesa muchu juera d'El Rebollal y que los nuestrus pueblus tenían d'aprovechal tamién.

Lo qu'estamus viviendu dendi'l pasáu 26 de mayu de 2010 es güena prueba d'esti interés. Dendi que la palra d'El Rebollal jué la primera lengua no castellana en oyelsi enas Cortis, con tó lo que'esu truju dispués, son muchas las vecis que himus salíu enos periódicus, arradius y jasta telivisionis pol mé la palra. Sí señoris, POL MÉ LA PALRA, POL MÉ DE QUE TENEMUS ALGU ESPECIAL QUE SE CONOCI COMU PALRA D'EL REBOLLAL.

Pol no alargalmi muchu, voy a apencipial a ponel enlacis que tienin de vel con esti tema, pa que cá unu les echi un oju, anque pol sel muchus, voi a ponel ná más los más nuevus.

SALAMANCA24HORAS: http://www.salamanca24horas.com/provincia/42418-once-asociaciones-culturales-constituyen-una-plataforma-para-la-defensa-de-las-lenguas-gallega-y-leonesa-en-la-comunidad

DIARIO DE LEÓN: http://www.diariodeleon.es/noticias/noticia.asp?pkid=587811

LA OPINIÓN DE ZAMORA: http://www.laopiniondezamora.es/zamora/2011/02/27/constituida-plataforma-defensa-lengua-leonesa/500870.html

EL NORTE DE CASTILLA: http://www.nortecastilla.es/v/20110226/opinion/elogio-palra-20110226.html

LA GACETA: http://www.lagacetadesalamanca.es/provincia/2011/02/21/expertos-cifran-2400-personas-comunican-habla-rebollar/22145.html

SALAMANCA24HORAS: http://www.salamanca24horas.com/provincia/42077-las-lenguas-minoritarias-del-reino-y-de-leon-y-extremadura-a-debate-en-el-congreso-celebrado-en-villasrubias

ABC: http://www.abc.es/agencias/noticia.asp?noticia=697430

SALAMANCA24HORAS: http://www.salamanca24horas.com/provincia/41894-villasrubias-acoge-este-sabado-el-congreso-sobre-lenguas-minoritarias

Y tó éstu ná más en 10 días, sin contal entrevistas pa la arradiu, entrevistas pa la teli y periódicus (comu Tribuna de Salamanca o El Adelanto de Zamora) que no pusun ena redi el enlaci de la noticia, peru sí la tenían en papel.

La nuestra palra interesa. La nuestra palra es un tesoru que tenemus en la nuestra tierra. Y que interesi tantu juera de la nuestra comarca es prueba más que suficienti d'ellu. Craru, pa'l que quiera velu.

Palra d'El Rebollal
¡¡RESPETU Y OFICIALIDÁ!!

AFOTU: Unu de los cartelis de las callis de Robrea

Congresu de palras minoritarias en Villarrubias

2011-02-18T12:24:00.006+01:00

Esti sábadu 19 de jebreru se va a jadel en Villasrubias el Congresu alreol de las Palras Minoritarias (Reinu de León, Estremaúra) nel Salón del Ayuntamientu:

- 11:30 h. Presentación (Documentación y Estudio de El Rebollar. Asociación Cultural)
- 12:00 h. Chalras alreol de las distintas palras:
- "EL ESTREMEÑU", jecha pol ISMAEL CARMONA GARCÍA, miembru de la Asociación Cultural Pablo Gonzálvez, licenciáu en Filología Clásica pola Universidá d'Estremadúra, maestru de secundaria nel IES Alagón de Coria (Cáciris), investigaol, tradustol y gramáticu del estremeñu y autol de "Ortografía del extremeño" (2007) y "Morfología del Extremeño" (2009).
- "HISTORIA Y VIDA DE LA PALRA D'EL REBOLLAL", jecha pol JOSÉ BENITO MATEOS PASCUAL, vicepresidenti de Documentación y Estudio de El Rebollar, dipromáu en Ciencias Empresariales pola Universidá Carlos III, tamborileru de Peñaparda y Villarubias, folclorista, miembru de los grupus "Chabarconis d'El Rebollal" y "Arcendajas" y escritol, autol de "Breve descripción de Peñaparda" (2002) y "El corral los mis agüelus" (2004).
- "NUESTRAS LENGUAS AUTÓCTONAS Y LOS CAMINOS PARA SU DEFENSA", jecha por Xesús, representante de la asociación AGORA
- "EN LA RAYA - NA RAIA", jecha pol PATRICIA SANTAMARÍA HERNÁNDEZ, miembru de los grupus "Chabarconis d'El Rebollal" y "Arcendajas", miembru de Ciudadanos del Reinu de León.

- 14:30 h. Comía d'hermanamientu (las comías y sobremesas a menú dan pa muchu)

- 17:30 h. "EL PATRIMONIO LINGÜÍSTICO EN CASTILLA Y LEÓN: EL ESTATUTO Y LA REALIDAD", a cargo de JOSÉ IGNACIO MARTÍN BENITO, licenciáu en Geografía y Hestoria pola Universidá de Salamanca, Doctol en Hestoria pola Universidá de Salamanca, Catedráticu de Geografía y Hestoria nel IES León Felipe de Benaventi (Zamora), procuraol en las Cortis por el PSOE, Secretariu de Patrimoñu de la comisión ejecutiva del PSOE de C. y León, presidenti del Centro de Estudios Mirobrigenses, investigaol, divulgaol (ha pubricáu más de cien escritus en rivistas y pubricacionis especializás, lo mesmu en España comu en Portugal), escritol (autol de varius librus. Yo he leído "Prehistoria y Romanización de la Tierra de Ciudad Rodrigo (1994), anque tieni muchus más de temas hestóricus, y jasta tres novelas),...

- 18:00 h. Mesa reonda alreol de los problemas de las palras minoritarias y las sus posibris solucionis (conferenciantis y púbricu asistenti, que de seguru que tamién tieni muchu que idil)

Para acabal, Rincón Literariu, andi se podrán oyel ejemprus literarius de las lenguas de las que s'ha palráu enas chalras ( estremeñu, palra d'El Rebollal, leonés, gallegu, portugués y "fala de Xálima"...)

Estáis tós envitáus a venil (esu sí, la comía cá unu se paga la suya).

Palra d'El Rebollal
¡¡RESPETU Y OFICIALIDÁ!!

10.000

2011-02-02T13:03:00.004+01:00

Comu celebral cosas está de moda, y mos gusta celebral más que ná los númerus reondus, en esti humildi "blog" estamus de celebración, pos a finalis d'eneru ha llegáu a las 10.000 vesitas.

Y esu, con tólu emportanti que es pol sí mesmu, es muchu más emportanti pol estal escritu ena palra d'El Rebollal, una d'esas lenguas que han síu preseguías dendi hai muchus añus pol tós aquellus a los que les jiedi que en angún lugal haiga algu diferenti. Una palra, en drentru la lengua leonesa, que quierin jadel de menus tós los que se piensan que ná más vali el su parecel y que el que no piensi y respiri comu ellus no debería tenel derechus.

Peru güenu, qu'estas 10.000 vesitas sean un homenaji primeru a tólus que defendemus no sólu la palra d'El Rebollal, sinu tamién tóas las palras minorizás y preseguías. Qu'estas 10.000 vesitas sean tamién un homenaji a los nuestrus padris, a los nuestrus agüelus y a tólus nuestrus antepasáus que, antis qu'ellus ussarun y mos dejarun esta palra tan polía. Genti, sangri de la nuestra sangri, a la que deshonra tó aquel que quieri jadel de menus la palra qu'ellus ussarun. Porque una cosa es no defendel la nuestra palra y otra mú distinta atacala y querel jadela de menus, lo mesmu a la palra que a los que la defendemus.

Podría seguil asina muchu ratu, peru estamus de fiesta. Gracias a los que han jechu que esti "blog" llegui a 10.000 vesitas. Gracias a los que han dejáu el su parecel. Gracias a tólus que defiendin la palra d'El Rebollal y demás palras minorizás. Y gracias, las más especialis, a los que mos han dejáu d'herencia esti tesoru que ha íu pasandu de generación en generación. Que siga siendu asina muchus, muchus, muchus añus.

Palra d'El Rebollal.
¡¡RESPETU Y OFICIALIDÁ!!

San Sebastián 2011

2011-01-20T13:56:00.005+01:00

"El venti d'eneru, San Sebastián el primeru."

Asina idi el reflán, anque el calandariu ponga angunus otrus antis. Peru la verdá es que, en llegandu San Sebastián (unu de los "santus del gorru", pol sel en inviernu), en los nuestrus pueblus se ha jechu siempri la primera fiesta grandi del añu.

Y es que San Sebastián jué, de siempri, una fiesta grandi, con la su Foguera, o Luminaria, o de cualisquiera de los nombris que le damus en los nuestrus pueblus. Tan grandi ha síu siempri que había jasta Mayordomus.

La víspera San Sebastián (la nochi del 19) se jadía siempri la lumbri, una lumbri andi simbólicamenti se quema tólu vieju pa dal pasu a lo nuevu. Asina lo pongu en esta puesía (a la que le hi puestu música) que, dendi hai unus añus, tocu con el tamboril la nochi de la Luminaria.

Luminaria de San sebastián
que ya ardis nel lugal.

Ardi bien juerti, ardi bien altu,
lleva lejotis todu lo malu. (BIS)

Luminaria de San Sebastián,
que ardistis, ardis y arderás.

Ardi bien juerti, damus calol,
lo vieju, lo malu, ya s'acabó.(BIS)

Esti fin de semana me paici que se van a jadel las Luminarias en Peñaparda y en Robrea, asina que la fiesta (anque mermá) entovía se jadi.

Un casu aparti es el de Villarrubias. Anochi jidimus la luminaria dispues de 20 añus sin jadelsi. Y pasamus un ratinu bien agradabri alreol de la lumbri. Vos pongu una afotu (anque no se ve mú bien, peru es que con lumbri y tó estaba escuru).

Me paici qu'es emportanti recuperal tóas estas fiestas que siempri se han jechu en los nuestrus pueblus, comu San Sebastián, o los Ofretorius, o San Isidru,... Fiestas que, comu los bailis, los ssonis, las vestimientas, los estrumentus,... o la nuestra palra, himus íu pasandu de generación en generación dendi jadi sigrus. Son parti de las nuestras señas d'identidá, son parti de la nuestra hestoria, y son parti de la nuestra herencia. Es un mó y manera de honral a los nuestrus antepasáus.

¡¡VIVA SAN SEBASTIÁN!! ¡¡VIVA'L REBOLLAL!!

Palra d'El Rebollal.
¡¡RESPETU Y OFICIALIDÁ!!

Añu Nuevu, ¿vida nueva?

2011-01-13T13:42:00.003+01:00

Estamus nel añu 2011. Atrás quedó el añu 2010, añu nel que Ciarrodrigu metió tóas las bolas nel sacu del bicentenariu mientris se olviaba que, muchu más emportanti qu'esu, es sel parti el Reinu de León (diócesis, fuerus, muralla, repobracionis, títulu de "civitas",...). Ciarrodrigu y la su comarca le debin tó a sel Reinu de León, y al bicentenariu de la invasión de los soldáus de Napoleón no le debemus más que miserias. Peru craru, en esta tierra olviá de la manu de lo divinu y de la manu de lo humanu, lo emportanti no es conocel la nuestra verdaera hestoria, sinu escondela. No es d'estrañal que, con estas bimbris, la nuestra tierra esté comu esté.

Peru, vistu cómu "los nuestrus representantis" han olviáu, adredi, celebral esta parti emportanti de la nuestra hestoria, no está de más seguil recordándula dendi esti rinconinu, asina qu'el añu 2011 seguirá siendu de celebración nel nuestru Reinu de León. ¿Que mos han negáu el 1.100 aniversariu? Pos celebramus el 2011, el 1.101 aniversariu.

De cómu lo "humanu" ha olvíau la nuestra tierra tenemus ejemprus de sobra. En la nuestra comarca seguimus teniendu el hospital a más de 100 km y, encima, entovía hai quien idi que "no jadi falta". La nuestra tierra sigui sin tenel salía a la autovía. Peru los mesmus que idin que no necesitamus hospital idin que tampocu necesitamus llegal rápidu a la autovía. Pa colmu, agora la puenti de Vaucarrus tieni problemas porque, al enllenal la PRESA DE VAUCARRUS pa que no entri el agua en las casas en Ciarrodrigu, la puenti de Vaucarrus áina si quéa pol baju el agua. Y la puenti no está jecha pa aguantal esu, asina que s'está abriendu. Peru los mesmus que idin que no necesitamus hospital, los mesmus que idin que no necesitamus salía a la autovía, idin tamién que no pasa ná. Alreol de la nuestra palra, enos presupuestus de la Junta de Pucela no han desapartáu ni un céntimu pa defendela, violandu asina el estatutu d'autonomía (art. 5.2) y la propia Costitución (art. 3.3). Asina que los mesmus que mos idin que no mos jadi falta el hospital, los mesmus que idin que no mos jadi falta salía a la autovía, los mesmus que idin que no pasa ná en Vaucarrus mos vienin a idil que defiendin la nuestra palra de boquilla, peru que de ayual, si a casu a ajundila más.

¿Y esa genti es la que mos representa? ¿A santu de qué? Porque lo mesmu que jadin con esas cuatru cosinas jadin con tólu demás. ¿Y encima mos tenemus de callal?

No quería acabal esti primel escritu del añu sin recordal que la Tia Gora ya tieni 106 añus, cumpríus el pasáu 4 d'eneru. Estuvu la teli de Ciarrodrigu, salió enos periódicus (jasta de juera de Salamanca), y jasta vinu a grabal Telicincu. ¡¡FELICIDADIS, TIA GORA!! Esu sí, no hai que olvial una cosa. La Tia Gora es especial, única, irrepetibri. Peru no lo es ná más pol tenel 106 añus (que ya es sel especial), sinu pol sel auténtica: pol seguil conas vestimientas tradicionalis, pol seguil tocandu el panderu a esus añus, pol seguil viviendu sóla en cassa,... Y pol seguil ussandu la palra d'El Rebollal.

Y lo mesmu pasa con los nuestrus pueblus: son especialis, peru son especialis no porque se toqui tal o cual estrumentu, ni haiga tal o cual baili, sinu pol tó, TAMIÉN POLA NUESTRA PALRA D'EL REBOLLAL. Si de verdá queremus que los nuestrus pueblus tirin p'alantri, no tenemus d'olvial esu. Y si anguién mos quieri jadel olvial esu, pocu amigu es de la nuestra tierra, pocu amigu es de los nuestrus pueblus, y pocu amigu es de los nuestrus antepasáus.

Pos ná que, anque seamus un añu más viejus, anque haigamus entráu en un añu nuevu, la vida sigui igual: luchandu pola nuestra tierra, anque anguna genti quiera jadel creel lo contrariu (esu sí, se lo crei el que ya está abiertu dendi el principiu a creélsilu). Nusotrus, seguiremus luchandu. FELIZ 2011.

Palra d'El Rebollal.
¡¡RESPETU Y OFICIALIDÁ!!

Afotu: la gavia que se ha abiertu ena puenti Vaucarrus. Y mos vienin idiendu que "no pasa ná"...

La Costitución, la palra y las Cortis

2010-12-10T17:15:00.005+01:00

Comu tólus añus, al llegal el mes de diciembri apencipian un montonáu de fiestas que jadin que la metá de los días haiga algu que celebral y no se trabaji (el que puéa no trabajal esus días). Una d'estas fiestas se jadi el 6 de diciembri, y en ella se celebra el día que, nel año 1978, la genti de los pueblus y ciudadis d'España votó, en referéndum, si quería la Costitución. Al final salió que sí, y dendi esi añu 1978 el nuestru país es gobernáu pol esas leyis que se votarun esi añu.

Ena Costitución vieni cómu está organizáu el Estáu: autonomías, los Reyis,... Peru quiciás lo más emportanti vieni nel principiu de la Costitución, enos artículus que palran de cómu es el Estáu y de los derechus (y tamién deberis) de las gentis.

Pa apencipial, comu ya hi palráu más vecis, nel "Preámbulu" y nel artículu 3.3 idi que tóas las palras d'España (TOAS, TAMIÉN LA NUESTRA PALRA D'EL REBOLLAL) son un patrimoñu cultural de primel ordin, que tieni de sel RESPETÁU Y PROTEGÍU. Sí, tamién la nuestra palra d'El Rebollal. La mesma Costitución lo idi. Y, pol esu mesmu, hai que defendel lo mesmu la palra d'El Rebollal comu tóas las demás variedadis de la lengua leonesa, o el aragonés, o el aranés, o el gallegu, o el vascu,... O cualisquiel otra palra que se ussi nel nuestru país. En ningún lugal, en ningún libru del mundu idi que ná más valga una lengua, que una lengua sea la mejol y las demás sean "palral mal" y tengan de sel preseguías... Tóas esas palra se tienin de defendel no porque lo diga la Costitución, sinu porque es un patrimoñu cultural, es una de las nuestras señas d'identidá y porque es una herencia que himus recebíu de los nuestrus padris y agüelus (si es que angún apreciu les tenemus).

Y agora vamus con la otra parti, la de los derechus de las gentis. Hogañu quiciás lo vemus comu algu normal, peru esu no siempri ha síu asina. Y muchas vecis, por escurus interesis de los políticus, se escuendi la verdá, se escuendi la hestoria de la nuestra tierra y mos queamus sin sabel d'andi vienin las cosas. Nel casu de la democracia, los derechus de las gentis y las Cortis estamus en esu.

Las primeras Cortis representativas d'Uropa juerun las Cortis que Alfonsu IX, Rei de León, convocó nel añu 1188. En esas Cortis, además del Rei, los nobris y los religiosus, estuvun POL VÉS PRIMERA EN UROPA las gentis de las ciudadis. Las primeras Cortis juerun nel nuestru Reinu de León. El que diga otra cosa, MIENTI. El que se inventi un reinu distintu, MIENTI. En esas Cortis, comu ciudadis del Reinu de León que han síu siempri, estuvun, entri otras, Salamanca y Ciarrodrigu. Y el que las meta en drentru d'otru reinu que no sea el Reinu de León, MIENTI. Y el que se inventi un reinu con dos cabezas que nunca jamás esistió, MIENTI.

Peru esas primeras Cortis d'Uropa, esas primeras Cortis que jidu el Reinu de León no juerun emportantis ná más por esu (que lo juerun), sino porqu'en esas Cortis, tamién pol primera vés, se dio una lista de DERECHUS DE LAS GENTIS del Reinu de León, derechus que hogañu son lo primeru en cualisquiel país que se lami a si mesmu democráticu. Esta lista vieni en un montonáu de leyis que pusu el Rei en esas primeras Cortis, leyis que en conjuntu tienin el nombri de Carta Magna Leonesa. Entri los derechus que la Carta Magna Leonesa da a los ciudadanus están derechus comu:
- Inviolabilidá de la cassa propia
- Inviolabilidá del corréu priváu
- La necesidá del Rei de convocal a las Cortis para jadel la guerra (o la pás)
- Derechu a la propiedá privá

Y asina otrus derechus que, comu ya diji aniantis, hogañu los tenemus pol segurus pero que las gentis de los pueblus y las ciudadis no himus teníu siempri. Y esus derechus de las gentis, mal que le pesi a los que no quierin a la nuestra tierra, nacierun nel nuestru REINU DE LEÓN nel añu 1188. Y, mal que le pesi a los que no quierin a la nuestra tierra, jué nel nuestru REINU DE LEÓN andi juerun las primeras Cortis, las que convocó Alfonsu IX de León nel añu 1188. Y tamién las segundas, esta vés ena ciudá de Benaventi, nel añu 1202.

Y en esas estamus hogañu. La Cortis de 1188, que juerun el principiu de la democracia en Uropa, juerun nel nuestru Reinu de León. Los primerus derechus de las gentis de los pueblus y ciudadis, que juerun el principiu de los derechus fundamentalis que hogañu disfrutamus, tamién tuvun la su nacencia en aquellas Cortis de 1188 que se jidun nel nuestru Reinu de León. Y, comu premiu, esa parti de la nuestra hestoria s'escuendi pa que no se conoza. Y, comu premiu, el Reinu de León es el únicu reinu medieval sin autonomía propia. Y, comu premiu, a los habitantis de las tres provincias leonesas (Salamanca, Zamora y León), en vés de llamalmus polu que somus, LEONESIS, mos quierin llamal otra cosa distinta que vieni a sel tan verdaera comu si mos llamasin rusus o chinus,...

Paisanus, no mos dejemus engañal. No mos dejemus albardal. Las Cortis y los derechus de las gentis nacierun ena nuestra tierra, nacierun nel nuestru Reinu de León. Y tenemus d'estal orgullosus d'ellu.

NOTA: afotu, d'un dibuju d'Alfonsu IX, arrecogía del blog "El cazurro ilustrado"

Palra d'El rebollal
¡¡RESPETU Y OFICIALIDÁ!!

Peñaparda, el panderu y la nuestra palra ena Telivisión d'Asturies

2010-11-05T14:20:00.005+01:00

Paici mentira, peru paici que a la nuestra cultura le tienin más apreciu juera d'El Rebollal que en la nuestra comarca. Un ejempru craru es el que voi a espricalvus agora mesmu.

El pasáu sábadu, 30 d'otubri d'esti 2010 pusun ena Telivisión d'Asturies un programa alreol de unu de los nuestrus pueblus, Peñaparda. El programa se llama "Camín de Cantaris" (ena palra d'El Rebollal sería "Caminu de Cantaris"), y está jechu alreol de los cantaris tradicionalis de los pueblus y las palras qu'entovía se puedin oyel a las gentis de los pueblus que vesitan.

Esta vés le tocó A Peñaparda. Y jué pol mé el panderu, peru tamién pol mé la palra, pos al los que jadin el programa les dijun que si hubiesi síu ná más pol el panderu no habían jechu ná. O, lo qu'es lo mesmu, si en Peñaparda y nel restu d'El Rebollal no se palrasi asina, el panderu sólu no había valíu pa que Peñaparda tuviesi un programa propiu en drentru el "Camín de Cantares".

¿Qué quieri idil éstu? Que, juera de la nuestra tierra, en un lugal tan lejotis comu es Asturies, tienin en alta estima la nuestra palra, y pol esu vinun jasta aquí. En la nuestra tierra angunos ya hai tiempu que lo himus vistu, otrus están apencipiandu a velu craru. La única verdá es que la nuestra palra es un tesoru, tantu comu lo puéa sel el panderu, o los bailis, o las vestimientas,... Y juera lo tienin mú craru. Ya va siendu tiempu de que en la nuestra tierra mos demus cuenta tamién y la defensamus y ussemus con orgullu. Ya es hora de ponelmus a defendel la palra que himus heredáu de los nuestrus padris y agüelus.

Güenu, pol si anguién quieri vel los vídeus, aquí vos los deju.

Un saludu.

Palra d'El Rebollal.
¡¡RESPETU Y OFICIALIDÁ!!

NOTA: afotu arrecogía de Folkenlared.com

Los Santus

2010-11-03T17:27:00.005+01:00

Tólus añus, el primel día de noviembri, en los nuestrus pueblus (anque no sólu en ellus) se celebra la fiesta de Tólus Santus. Esi día, las nuestras gentis se acercan a los ciminterius con froris (ya sean naturalis o no) pa dejal encima las tumbas de los sus familiaris.

La verdá es que es una fiesta tan polía comu tristi. Polía, porque siempri es bonitu acordalsi de los que ya no están entri nusotrus. Tristi polu mesmu, porque esa genti de la que mos acordamus ya se juerun pa no golvel.

Es mú güenu y mú nobri acordalsi de los padris, los agüelus,... Anque nel calendariu mos tienin puestu esi día, el 1 de noviembri (y al sotru día, el 2 de noviembri) pa acordalmus d'ellus, la verdá es que mucha genti s'acuerda d'ellus más días al añu, cuasi tólus días. Y esu demuestra el amol que se tieni pol esa persona.

Sin tenel qu'esperal a esus días, podemus jadele un homenaji a los nuestrus antepasáus tólus días del añu. Y no hai mejol homenaji, no hai mejol manera de tenelus vivus en la nuestra mimoria que no dejal moril la cultura qu'ellus mos dejarun d'herencia. Los nuestrus bailis, los nuestrus ssonis, los nuestrus juegus, los nuestrus trajis,... Y, comu no puedi sel menus, la nuestra palra d'El Rebollal. Tó ellu mos lo dejarun d'herencia los nuestrus agüelus, los nuestrus antepasáus, y mala mimoria les jademus si no defendemus la cultura qu'ellus ussarun, qu'ellus amarun, qu'ellus mos dejarun.

No dejemus moril la nuestra palra. Con ella, moriría una parti mú grandi de la mimoria los nuestrus antepasáus.

Palra d'El Rebollal
¡¡RESPETU Y OFICIALIDÁ!!

NOTA: afotu d'una crús celta d'Irlanda, sacá de Paseando por la Historia

El Monolitu de Villarrubias

2010-10-22T17:01:00.007+02:00

Villarrubias y, con él, los demás pueblus d'El Rebollal, guarda muchus tesorus en drentru las sus lindis. Unu d'estus tesorus es natural, y no tenemus más de caminal polos sus caminus y veréas pa dalmus cuenta d'ellu. Otru es cultural, con la palra d'El Rebollal (en la qu'está esti escritu). Y otrus tesorus son hestóricus.

Unu d'estus tesorus hestóricus es el monolitu que se levanta al pié el campanariu. Un monolitu jechu nel añu 1610 y que, pol esu, esti añu jadi 400 añus.

El monolitu, d'alreol de metru y mediu de altu pol mediu d'anchu está jechu de granitu y tieni escritus en la su cara. Asina, podemus leel el añu en que se jidu (1610), el nombri del obispu esi añu (Pedro Ponce de León), la cantidá de 23 ducáus (monéas d'oru d'esi tiempu, lo mesmu que hogañu los eurus, que anguna genti sigui llamandu orus), y el nombri de Suan Mayor (Juan el Mayol, ¿el que dió los 23 ducáus?), además de palabras comu ilesia, misa,... Lo que mos jadi pensal que el tal Suan dió a la ilesia de Villarrubias 23 ducáus pa jadel una misa (o angunas misas) nel añu de 1610, en siendu obispu el tal Pedru Ponci de León.

El domingu 17 d'otubri de esti añu 2010 quisimus jadel una pequeña conmemoración y, de pasu, conocel un poquininu más la hestoria del lugal. Asina que jidimus, allí al pié el campanariu un pequeñu "homenaji" al monolitu. Rafael Sánchez Ramos, que jué alcaldi de Villarrubias hai unus 10 añus, leyó un escritu de por qué se jadía éstu. Tomás Acosta Píriz, de Navafrías, leyó un pal de puemas jechus por él, unu d'ellus escritu ná más pol mé el actu el momnolitu. Dispués, un serviol, José Benito Mateos Pascual, dió una pequeña chalra alreol de la hestoria de Villarrubias. Y, pa acabal, Damián (a la guitarra y la viola) y Patricia Santamaría (con la su vós) dierun el final a la fiesta cantandu unus ssonis del músicu charru Juan del Encina y otrus del su tiempu.

A tó lo que se jidu vinu genti, entri unas 40 y 50 presonas. Peru pareci que la cosa, juera d'El Rebollal, tuvu la su emportancia, pos vinu de juera del lugal genti comu Ángel Iglesias Ovejeru (Presidenti de Documentación y Estudiu d'El Rebollal), Carlos García Medina (pintol famosu de Ciarrodrigu), Agustín García (tamorileru d'El Cabacu), además de Florencio Ramos (Presidenti de la Mancomunidá Altu Águeda) y Camila Vizarro (alcaldesa de Peñaparda). Además, lo que se jidu en Villarrubias ha salíu pubricáu en Salamanca24horas.com, MujerHoy.com, Tribuna de Salamanca, Ciudadrodrigo.net y, además, el martis 20 me jidun una entrevista en direstu pa Puntu Arradiu de Ciarrodrigu que, además, lo sacó a la nochi en la teli de Ciarrodrigu. Asina que paici que la cosa jué emportanti y que Villarrubias, pol una vés, jué la capital cultural de la comarca de Ciarrodrigu.

Comu hi dichu muchas vecis, los nuestrus pueblus, pol mú chicus que sean, guardan mucha hestoria y muchus tesorus. Muchas vecis los tenemus delantri las nuestras naricis y no somus capacis de velu. El tema del monolitu es unu d'ellus, no hai más que vel tó lo que se ha palráu esta semana de él. El tema de la palra es otru, anque siempri habrá angún ilumináu, angún sabijondu qu'esté en contra pol mé de cosas más escurar que craras.

Que sí, qu'es verdá, que tenemus muchus tesorus. No mos dejemus engañal, ni mos dejemus albardal. Los de los pueblus chicus no somus menus que naidi. La nuestra hestoria y la nuestra cultura no son peoris que la de otrus lugaris más famosus, sinu tólu contrariu. Y el domingu lo demostramus en Villarrubias.

Palra d'El Rebollal
¡¡RESPETU Y OFICIALIDÁ!!

AFOTU: Monolitu de Villarrubias (juliu de 2010)

Tardíu

2010-10-05T13:03:00.005+02:00

Llegó el tardíu, con él, el fríu y el agua, agua que güena falta mos jadi, porque no había caíu una gota en tó'l veranu (quiciás anguna tormentina).

Comu ya hi dichu anguna vés, el tardíu es un tiempu especial. Primeru, porque los nuestros robrealis, los que dan el su nombri a la nuestra comarca d'El Rebollal, s'enllenan de coloris, lo mesmu de las hojinas que se van ensecandu comu de las de los árbolis que, comu los pinus, están verdis tó'l añu. Y esu sin contal las coloris de los frutus del campu, comu los madroñus, los tapaculus, los bruñus, las nuecis, las castañas,...

Paseal polus nuestrus caminus es un regalu pa la vista y pa'l oyíu. Dalsi en paséu polas nuestrus robrealis, o pinalis, o por cualisquiera de los lugaris de la nuestra tierra es olvial los problemas de tólus días, es encontral la pás, la tranquilidá y la belleza pol andiquiera que vamus.

Y dispués, con las primeras gotinas de agua, apencipian a salil los jongus. Peru d'esu ya palraré otru día.

El casu es qu'esta mañana, al cogel el cochi pa il a trabajal a Villarrubias, bajandu pola carretera vi una cosina que me truju un montonáu de recuerdus de cuandu era un dagal. Ni más ni menus que una cuadrilla de genti sacandu patatis en un güertu de Peñaparda. En otrus pueblus s'arrecogin antis, peru en Peñaparda apencipian a finalis del veranu y siguin nel principiu del tardíu.

Pos al vel esi cuadru me vinu a la cabeza cuandu ibamus tóa la familia con los mis agüelus a sacal las patatis al güertu. Cogiamus los cestus, los costalis, las sachas y el almuerzu, y allá que mos ibamus tós, a sachal el güertu. Los dagalis teniamus una sachina más chica, y allí andabamus aporreandu los jurcus. Menus mal que no muchu, porque la metá las vecis rachábamus las patatis, y las que estaban tocás ya no valían pa guardal, porque podían ponel pochas las que tenía al láu.

Peru entri tós sachábamus el güertu, y las patatis qu'ibamus sacandu las ibamus echandu en los cestus. Cuandu el cestu estaba llenu, pa'l sacu, o pa un costal. Y asina un jurcu, y otru jurcu,...

Craru que no era tó trabajal. Estaba el ratinu del almuerzu con el cachinu pan, el cahinu choridu, todinu, salchichón, quesu,... Los mayoris bebían la gotina vinu, y los dagalis agua de la juenti, o del charail,... que estaba bien frequita metía nel barril.

Cuandu estaban llenus los sacus venía el agüelu Ugeniu con el carru, se ataban los sacus con una cuerda y, una vés qu'estaban cerráus, se echaban encima el carru. Un sacu, otru sacu,... Asina jasta qu'estaba el carráu. Antoncis se uñían las vaquis (el mi agüelu ya no ussaba güés) y, con el carráu de patatis, pa cassa.

Tamién m'acuerdu de que las patatis había que tenelas guardás en un lugal frescu y escuru, y que no juesi húmedu, porque si no apencipiaban a echal tallus y ya no estaban igual. Entovía vi, hai angunus añus (no muchus) un carráu de patatis en Villarrubias. La verdá hai angunas cosas que da pena no golvel a vel y que train muchus recuerdus...

Pos ná, dagalis, a disfrutal del tardíu (o a profital, qu'es una de las nuevas palabras de la nuestra lengua). Y es que tólus tiempus del añu tienen un montonáu de cosas güenas, no hai más que sabel buscalas.

Palra d'El Rebollal.
¡¡RESPETU Y OFICIALIDÁ!!

AFOTU: El Mostajal (Peñaparda)

(Ya pondré otra afotu d'esti añu, que de seguru que esa ya la héis vistu muchas vecis)

REINU DE LEÓN I: Nacencia

2010-10-01T18:05:00.005+02:00

¡Saludus, paisanus!

Comu ya sabréis (y si no, ya vos lo digu yo), esti añu 2010 se cumprin 1.100 añus (11 sigrus) del nacimientu del nuestru Reinu de León.

Dendi esti rinconinu quería jadel un pequeñu homenaji al nuestru Reinu, al Reinu del que himus heredáu la nuestra cultura tradicional, cultura ena que tamién entra la nuestra palra d'El Rebollal, y Reinu en drentru del qu'estamus dendi'l sigru XII.

Para que conozamus tós un poquinu más alreol de la nuestra hestoria, cá viernis voi a escribil un poquininu de la hestoria del nuestru Reinu de León, pa que no olviemus d'andi venimus, cosa imprescindibri pa sabel p'andi vamus.

NACENCIA DEL REINU DE LEÓN
Nel añu 711, los morus invadierun el Reinu de los Visigóus, derrotandu al rei Rodrigu, custión que merecería un libru aparti. El casu es que los árabis conquistarun la mayor parti de la Península (angunus lugaris, comu Viséu y el norti de la Península nunca juerun conquistáus).

Nel añu 718 jué la famosa batalla en Covadonga, cuandu los asturianus, con Pelayu a la cabeza, derrotarun a los morus y jidun el Reinu d'Asturies. Unu d'estus reyis d'Asturies, Ordoñu I, conquistó nel añu 856 la ciudá de León que, pocus añus más tardi, pasaría a sel cabeza del Reinu que esti añu celebramus.

Y llegamus al reináu d'Alfonsu III, que jué Rei d'Asturies dendi'l añu 866 jasta'l 910. El su hiju mayol, García, se regolvió nel añu 910 contra su padri y ésti, pa evital una guerra civil, dejó el tronu y se retiró a Zamora, andi moriría esi mesmu añu.

Los hijus de Alfonsu III dividierun el Reinu d'esti mó y manera:
- García I, el mayol, con León, lo que jué la nacencia del Reinu de León
- Ordoñu II, Galicia
- Fruela II, Asturies
- Ramiru, el más chicu, tuvu el títulu de Rei, peru sin tierras, al sel chicu demás, anque quiciás pudu heredal el Reinu d'Asturies al pasal a sel su hermanu Fruela Rei de León

Asina qu'estamus nel añu 910, añu de la nacencia del Reinu de León con su primel rei, García I. Peru a García le duró pocu el su reinu, ya que murió, sin dagalis, nel añu 914. Heredó el Reinu el su hermanu Ordoñu, que asina pasó a sel rei de Galicia y rei de León (no se inventó ningún nuevu Reinu de Galicia y León, comu jadría angunu hogañu pa justifical la esistencia de anguna autonomía...).

Ordoñu II tampocu es que durasi muchu, pos murió nel añu 924, asina que jué rei de dambus reinus alreol de 10 añus. Le siguió el su hermanu Fruela II, que ná más jué rei de León un añu, pos murió nel añu 925.

Asina, en la nacencia del Reinu de León, juerun reyis 3 de los dagalis de Alfonsu III. Tres reyis en 15 añus...

Güenu, 4 reyis en 15 añus, porque a Fruela II le siguió Alfonsu Froilaz, que muchus autoris no reconocin comu rei y pol esu no se le pusu ordinal. Peru la verdá es que heredó el tronu de León comu hiju de Fruela II, tronu que le porfiarun sus primus Sanchu Ordoñiz, Alfonsu y Ramiru, hijus del segundu rei de León, Ordoñu II.

Al final, Alfonsu Froilaz jué vencíu polus sus primus nel añu 926, dejandu asina el tronu de León. Peru esu ya es otra hestoria...

Palra d'El Rebollal.
¡¡RESPETU Y OFICIALIDÁ!!

AFOTU: Estatua de García I de León ena Praza Orienti de Madrís (sacá de commons.wikimedia.org)

II Fiesta Cultural del País Leonés

2010-09-23T13:01:00.005+02:00

Esti sábadu 25 de setiembri se va a jadel, nel pueblu de Benaventi (Zamora) la II Fiesta Cultural del País Leonés, ena que se va dal publicidá y a disfrutal cona cultura tradicional de tó'l Reinu de León, más en esti añu 2010 nel que celebramus el 1.100 aniversariu de la fundación del nuestru Reinu de León.

Asina, la II Fiesta cultural del País Leonés va a tenel esti programa:

12:15 PASACALLIS jechu polus gaiterus de Val de San Lorenzu (León) y AVANTAL
13:00 Actuación del grupu folclóricu AVANTAL, de Benaventi (Zamora)
16:00 JUEGUS TRADICIONALIS leonesis
17:30 CURSU de BAILIS TRADICIONALIS jechu pola asociación ARLAFOLK
18:30 MUESTRA DE FOLCLORI jecha pol TXEBE, tamborileru de Peñaparda (Salamanca)
19:00 LECTURA DEL MANIFIESTU de la II Fiesta Cultural del País Leonés
19:20 CONCIERTU del grupu de RAP "GUILLE&LUISITO" (Benaventi, Zamora)

La Fiesta será nel Parqui la Estación de Ferrocarril de Benaventi (Zamora)

Pa estal más informáus, pical en esti enlaci: II Fiesta Cultural del País Leonés

Comu podéis vel, voi a estal tocandu nel escenariu, asina que intentaré dejal a la nuestra comarca d'El Rebollal en lo más altu, anque estemus nel sul del Reinu de León.

Palra d'El Rebollal. ¡¡RESPETU Y OFICIALIDÁ!!

Vai con Dios, Agüelu

2010-09-20T13:09:00.007+02:00

Esti domingu mos acordamus con una noticia tristi: la muerti de José antonio Labordeta, escribiol, cantanti, políticu, viajeru,... La verdá es qu'esti hombri jué muchas cosas, anque cáu unu le recordará pol una distinta.

M'acuerdu cuandu era chicu y los dagalis de los pueblus d'El Rebollal ibamus de campamentu. M'acuerdu que una vés mos aprendierun a cantal una canción qu'apencipiaba asina:
"Habrá un día en que todos
al levantar la vista
veremos una tierra
que ponga Libertad."

Es la primera vés que supi algu d'esti Hombri. No, no me hi equivocáu, HOMBRI con mayúsculas, luchaol polas libertadis de la genti, luchaol pola su tierra y de los pocus que podemus idil que juerun, de verdá, "representantis del pueblu" nel Congresu los Deputáus. No sólu de la su tierra, Aragón, sinu del nuestru Reinu de León. Es más, en angún Debati alreol el estáu la Nación jué el únicu deputáu en mental a Salamanca. Y esu que no era deputáu pol Salamanca, sinu pol una de las provincia d'Aragón. Y mientris Labordeta palraba de Salamanca, los deputáus que himus elegíu ena provincia de Salamanca (no con el mi votu, desdi luegu) calláus. Ni una palabra. Labordeta era, nel Congresu, la vós del pueblu, la verdadera vós del pueblu.

Tamién le recordaremus pol mé el programa la Telivisión Española "Un país en la mochila", programa que a mi me gustaba muchu y pol mé del cual descubrí muchas cosas del nuestru país que no sabía. Un programa de viajis que, más qu'en los paisajis, estaba centráu en la genti que vivía en los pueblus por andi pasaba. Asina idin qu'era Labordeta, anguién que quería estal cerca de la genti, tratal con ella, escuchala y aprendel. Porque, comu tóa presona sabia, sabía que tenía muchu d'aprendel y que lo suyu no eran verdadis absolutas.

Tamién era cantanti, d'esus qu'escribin las sus cancionis y, con una guitarra y la su vós, enllenan el airi de versus y notas, de sentimientus y paisajis, un poquinu de su propia alma. Yo tuvi la oportunidá de velu una vés, de casualidá, en Madrís. Resulta que había íu a vel otra cosa y, al pasal al láu un local chicu había un cartel en la entrá que ponía que tocaba Labordeta. Y, olviandu lo que había íu a jadel a Madrís, p'allí qu'entré, a un local qu'era de grandi (o de chicu) comu el salón de cualisquiera los nuestrus ayuntamientus. Y allí estaba "El Abuelu" cantandu los sus cantaris, y la genti escuchandu. Esa jué la primera, y la última vés, que vi en persona a Labordeta.

Ayel mañana, al oyel la noticia ena teli, lo primeru que jidi jué buscal el discu que tengu de él, el "Tiempo de Espera", del añu 1975, y ponelu pa oyel la su vós, esa vós del pueblu que se apagó pa siempri, esa vós y esi "agüelu" que mos ha dejáu un poquinu más sólus de lo qu'estabamus los que, de verdá, creemus en la Libertá.

Y asina quieru acabal esti escritu, dejandu el vídeu nel que, nel interné, Labordeta cantaba el su Cantu a la Libertá, una Libertá que, 30 añus dispués, seguimus esperandu.

Jasta siempri, Agüelu Labordeta.

Canto a la Libertad (Labordeta, vídeu de Youtube)

Palra d'El Rebollal. ¡¡RESPETU Y OFICIALIDÁ!!

P.D. Es curiosu, peru los grandis hombris dedicáus a la cultura que anguna vés han síu deputáus lo han síu por partíus chicus: Rafael Alberti lo jué por el PCE (Partíu Comunista d'España) y José Antonio Labordeta por la CHA (Chunta Aragonesista).

Árbul genealógicu

2010-09-18T18:43:00.006+02:00

Esta vés va de antepasáus, de los nuestrus padris, agüelus, bisagüelus, tataragüelus,...

¿Vos héis puestu anguna vés a miral cualis son los nombris de los vuestrus antepasáus? ¿Cuándu y andi nacierun? ¿Andi se casarun? ¿Los dagalis que tuvun?... La verdá, a mi me paici un tema mú interesanti, pos mucha vecis se descubrin cosas alreol de la tu familia y alreol de los apellíus que no se puedin sabel normalmenti, comu quién truju al lugal un apellíu, o qué apellíus han síu de siempri los que más había, o la genti que había antañu en los nuestrus pueblus,... Y un montonáu de cosas más, qu'es mú largu de contal en un escritu nel blog.

Si anguién tieni curiosidá y quieri apencipial a miral los sus antepasáus, puedi seguil estus pasus.
1... Palral con los familiaris que tieni vivus: padris, agüelus, tíus,... D'esta investigación directa se puedin sacal datus como los nomris de agüelus, bisagüelus, d'andi eran, en qué trabajaban, andi y cuandu se casarun, los hermanus que tuvun, los dagalis que tuvun (los que vivin y los que murierun de chicus), si siempri vivierun nel lugal, si vivierun juera del lugal,... Mucha información emportanti pa sabel de la familia, por si anguién quieri jadel una hestoria que quedi pa siempri.
2... Una vés que sabis cuandu nacierun los antepasáus, il al Registru Civil (normalmenti está nel Cuartu del pueblu) a vel las partías de nacimientu, matrimonius y muertis de los antepasáus. De aquí se puedin sacal datus comu los nombris de padris y agüelus, en qué trabajaban, si estaban vivus o muertus nel momentu de nacel el dagal, andi vivían los sus padris, d'andi eran (si eran del lugal o de juera), en qué trabajaban, los testigus, los dagalis que deja el que se mueri,... Un montonáu de información que añuil a la nuestra hestoria familial. Comu datu, tenemus de tenel en cuenta qu'el Registru Civil apencipia nel añu 1871.
3... Cuandu el Registru Civil se mos quéa cortu, tenemus de il al Registru de la Ilesia. Ena comarca de Ciarrodrigu tenemus la suerti de podel velu ena redi, pos los librus de cuasi tólus pueblus de la Diócesis de Ciarrodrigu vienin nel interné. Pa esu, vesital esta güeb: Familysearch.org y, una vés estemus en ella, pical abaju a la isquierda, andi poni "See prototype for searching millions of records", o sea, pa buscal millonis d'archivus de tólus paísis.
4... Organizal la información lo mejol que se puéa. Ena afotu podéis vel cómu tengu yo el principiu del mi árbul del láu de Peñaparda. Comu es normal, no mos va a cabel tóa la información en un árbul, asina que vamus a tenel que ponel los datus mínimus y guardal los otrus pa tenelus d'otru mó y manera. Anque hai páginas ena redi y programas que sirvin pa estu, pos estu de la genealogía (que asina es el su nombri) es el "viciu" de mucha genti.

Y ná, una ves mos pongamus vamus a vel que salin muchas cosas interesantis y que queremus sabel más. Anque a lo mejol ná más queremus sabel jasta los tatarabuelus (yo consideru familia a tólus que desciendin del últimu gráu con nombri, que es esi, el de los tataragüelus. Los demás son parientis lejanus).

Por si anguién tieni curiosidá pol sabel del mi árbul, vos pongu aquí jasta los tataragüelus.

Padris
Jacinto MATEOS MATEOS (Villarrubias)
Mª Antonia PASCUAL MATEOS (Peñaparda)

Agüelus
Láu del padri
Gregorio MATEOS CERRAJERO (Villarrubias)
Antonia MATEOS HERNÁNDEZ (Villarrubias)
Láu de la madri
Eugenio PASCUAL HERNÁNDEZ
Benita MATEOS SÁNCHEZ

Bisagüelus
Láu del agüelu paternu
Benito MATEOS MOLINA (Villarrubias)
Joaquina CERRAJERO MATEOS (Villarrubias)
Jacinto MATEOS MATEOS (Villarrubias)
María Josefa HERNÁNDEZ ASENCIO (La Torri Don Miguel, Cáciris)
Láu del agüelu maternu
Francisco PASCUAL DOMÍNGUEZ (Peñaparda)
Lorenza HERNÁNDEZ MATEOS (Peñaparda)
Eusebio MATEOS BENITO (Peñaparda)
Leocadia SÁNCHEZ AMADO (Peñaparda)

Tataragüelus
Agüelus del agüelu paternu
Calixto MATEOS MATEOS (Villarrubias)
Andrea MOLINA MATEOS (Villarrubias)
Mateo CERRAJERO BLASCO (Villarrubias)
Francisca MATEOS BLASCO (Villarrubias)
Agüelus de la agüela paterna
Antonio MATEOS SANTOS (Villarrubias)
María MATEOS MATEOS (Villarrubias)
Santiago HERNÁNDEZ SÁNCHEZ (La Torri Don Miguel, Cáciris)
Luisa ASENSIO FLORES (La Torri Don Miguel, Cáciris)
Agüelus del agüelu maternu
Felipe PASCUAL SÁNCHEZ (Peñaparda)
Estefanía DOMÍNGUEZ GARCÍA (Peñaparda)
Pedro HERNÁNDEZ PASCUAL (Peñaparda)
María MATEOS MATEOS (Peñaparda)
Agüelus de la agüela materna
José MATEOS SEVILLANO (Peñaparda)
Eugenia BENITO MATEOS (Peñaparda)
Juan SÁNCHEZ GATA (Peñaparda)
María AMADO MATEOS (Peñaparda)

A partir de ahí apencipian a aparecel de tólus demás pueblus d'El Rebollal. Asina tengu antepasáus en Robrea, Payu, Navafrías y jasta Perosín. Del únicu qu'entovía no me han aparecíu es del Villal. Y tamién d'otrus pueblus de cerca d'El Rebollal, otrus de más lejus, otrus de la provincia de Cáciris,...

Peru güenu, los que vos pongáis tenéis de tenel en cuenta qu'estu lleva muchu tiempu, sobri tó dispués de los tataragüelus, que d'un día pa otru no váis a avanzal tan rápidu comu al apencipial. Peru a mi me paici que mereci la pena sabel d'andi venimus, pos tamién es parti de la nuestra hestoria comu presonas, comu pueblu y comu comarca.

Palra d'El Rebollal. ¡¡RESPETU Y OFICIALIDÁ!!

La palra d'El Rebollal, en las Cortis

2010-05-26T17:25:00.004+02:00

Ya hai muchu tiempu que no me vagaba escribil, peru la noticia me paici que bien vali sacal un ratininu d'andi séa.

Y es que la nuestra palra, la palra d'El Rebollal (o rebollanu) se a oyíu, pol primera vés, en las Cortis, andi están los deputáus autonómicus. Y es que el deputáu por el PSOE (Partíu Socialista Obreru Español), que es el que palra de Cultura en drentru d'esti partíu en las Cortis, ha teníu a bien leel, en vós alta, el principiu del mi puema "Jálama", un puema que ya hai angunus añus qu'escribí y que apaeci nel mi libru "El corral los mis agüelus" (2004).

Estu, que quiciás pa angunu paici cosa sin emportancia, es de verdá un honol, no sólu pa mi comu presona que lleva muchus añus defendiendu la nuestra lengua, sinu pa tós los que, antis de mi, ussarun, palrarun y defendierun la palra d'El Rebollal. Y pa tóa la comarca d'El Rebollal que, pol un ratinu, ha síu la comarca más famosa de tó'l Reinu de León. Himus teníu, además, el honol de que la nuestra variedá del leonés, la palra d'El Rebollal o rebollanu, haiga síu la primera en oyelsi en las Cortis, comu representanti de tóas las palras leonesas que, de norti a sul, se palran entovía enas tierras del vieju Reinu.

Dendi esti rinconinu, dal las gracias al deputáu por habel usáu la nuestra palra, gracias tamién por defendel la lengua leonesa, tan polía y auténtica comu preseguía en tiempus. Gracias a Goyu de Benaventi pol emprestali el mi libru al deputáu. Gracias a Ángel Iglesias y José Alonso, dambus dos de Robrea, polus sus estudius alreol de la palra d'El Rebollal y a tós los que, comu él la han tratáu con respetu y cariñu. Gracias a tólus que jidun que, hai dos añus, pusieran en Robrea los cartelis en la palra d'El Rebollal, y los pocus que señalan los caminus en Peñaparda. Gracias a los grupus que, comu "El Fandangu" de Robrea o los "Chabarconis d'El Rebollal" defiendin la nuestra palra llevándola nel su nombri y ussándola en las sus cancionis. Y, en especial, a los nuestrus padris, agüelus, bisagüelus,... que mos dejarun de herencia una lengua tan polía comu la nuestra. Más que a naidi, a esta genti va dedicáu tó éstu, pos se ha jechu justicia con la su mimoria, la su cultura y la su lengua.

¡Ah, se me olviaba! Tó estu de palral la nuestra variedá del leonés en las Cortis vieni porque se ha aprobáu, con el votu de tólus deputáus autonómicus, "que se impulse el leonés y se regule su protección y su uso". O sea, lo mesmu los deputáus de dechas, que los d'izquierdas, que los leonesistas. A tós ellus, gracias por comprendel que la nuestra lengua es, comu idi el artículu 3.3. de la Costitución, un patrimoñu que mereci especial respetu y proteción.

Palra d'El Rebollal.
¡¡RESPETU Y OFICIALIDÁ!!

AFOTU: el picu Jálama neváu

Recuerdus de jadi 6 añus

2010-03-11T20:46:00.003+01:00

Aquel día iba a sel especial. Y de verdá que jué un día especial. Lo recuerdu comu si juesi ayel mesmu.

Pol aquellus tiempus entovía vivía en Madrís. Estaba de vacancias, y esa mesma semana iban a sel las mis primeras eleicionis. Era candidatu al Senáu por el PREPAL (Partíu Regionalista del País Leonés). Yo estaba nerviositu perdíu, porque esi juevis me iban a jadel una entrevista en la Teli de Ciarrodrigu pol mé d'esu de sel candidatu. Y craru, comu antoncis vivía en Madrís, tenía de cogel el cochi y venilmi p'acá a que me jidiesin la entrevista en la teli.

Asina que la nochi del miércolis pusi el despertaol a las 9 de la mañana (la entrevista era a la tardi) pa andal con tiempu y no jadelu tó deprisa y corriendu. Y me juí a la cama pensandu que esi juevis iba a sel especial.

Y llegó el juevis. En vés de dispiertalmi a las 9, comu tenía puestu nel despertaol, me dispierté a las 8. Y pensé: "vamus a vel qué cuenta l'arradiu". Asina que pusi la arradiu y lo qu'estaban idiendu me despertó de golpi porradu.

Era el juevis, 11 de marzu de 2004. El juevis que jidun esprotal, en los trenis de cercanías de Madrís, unas bombas. Unus trenis que yo conocía bien abondu, pos había estáu cogiéndu esus mesmus trenis a esa mesma hora jasta una semana antis de los atentáus. Unas bombas que se llevarun pol delantri la vía de 192 presonas, que derrotó pa siempri 192 familias, sin contal las familias de los que quearun mal y nunca más golvierun a sel los mesmus, ni de cuerpu ni de menti.

No podéis ni imaginalvus con qué "juerzas" cogí el cochi pa venilmi a Ciarrodrigu a jadel una entrevista que ya me daba lo mesmu y que me paici que ni siquiera echarun pola teli. Los más de 300 km vini oyendu l'arradiu, oyendu cómu iba subiendu el númeru de muertus, d'aquella genti que se dejó la vía en los trenis en yendu a trabajal, o a estudial,... En aquellus trenis que yo conocía bien abondu...

M'acuerdu qu'esa mañana, en estandu en la ducha, me llamó un güen amigu a preguntalmi si yo estaba bien. Y me preguntó pol otra güena amiga que tamién cogía el tren en Atocha tóas las mañanas. Y dambus dos estabamus bien. Esi día, esi terribri 11 de marzu de 2004, la suerti estuvu del nuestru láu.

Hoi, 6 añus dispués, en viendu la noticia de los homenajis pola teli, en viendu a esas madris muertas en vía, llorandu por lo que perdierun esi día, se me ponía la carni de gallina. Entovía m'estran escalofríus recordandu esi día, en viendu esa genti rota por el dolol, por el recuerdu d'aquellus que se juerun sin razón ninguna, que se juerun pa no golvel. Y viendu a esas madris, pensal que una d'ellas podía sel la mía, o la de mi amiga, o la de mucha de la genti de la nuestra tierra que vivi en Madrís y cogía aquellus mesmus trenis a esa mesma hora. O la de los milis y milis de presonas que s'ajuntan en Atocha pa cogel el tren que les llevi andi quierin il...

Angunas vecis piensu qu'esi día golví a nacel. Hoi es una d'esas vecis.

192

Siempri nel recuerdu...

NOTA: afotu de los cirius que pusimus en la Praza de Peñaparda en recuerdu de lo que pasó, justu un añu dispués

Carnavalis n'El Rebollal

2010-02-24T13:53:00.005+01:00

Anque ya han pasáu angunus días, me paici que estaría bien palral un pocu de los Carnavalis de la nuestra tierra, que no tó van a sel los famosus Carnavalis-incierrus de Ciarrodrigu.

Y es que tamién nel nuestru Rebollal himus teníu siempri Carnavalis, bien políus y divertíus, y que nel mi parecel tenemus de jadel tó lo que poamus pa que no se pierdan y vayan p'alantri.

Esti añu, lo mesmu qu'el añu pasáu, himus teníu en Peñaparda dos días bien señaláus pa los Carnavalis: el domingu y el martis.

El Domingu de Carnaval se jidu, pol mé la asoaicaión el panderu cuadráu de Peñaparda, una comía enas escuelas viejas, andi tós comimus paella y carni guisá (gracias a las cocinera, Julia Vizarro y Nicolasa Ramos, estaba tó mú güenu). Dispués jidimus un pasacallis por el lugal al son de la gaita y el tamboril que pusimus Raúl y un serviol (TXEBE) y dispués, a la tardi, tomamus chocolati y dulcis caserus. No faltarun, después del chocolati, los abilis con la gaita y el tamboril y con el panderu, tocáu por Isabel. No podía faltal el cantal propiu d'westi tiempu: "La Charrascona".

El Martis de Carnaval, pol mé de la Taberna "El Rincón" y la Tahona "El Tamborileru" se pusun ena praza el lugal perrunillas y aguardienti (además de choridu, panceta, vinu y dulcis caserus) y, con la música del mi tamboril, pasamus una güena mañana de fiesta. Pola tardi, una cuadrilla de valientis no mos dejamus albardal por el fríu y el agua, y salimus, comu tóa la vía, a correl el lugal disfrazáus y paseandu una Charrasconina. Comu homenaji, pondré los nombris de la "Cuadrilla los Valientis" que salierun en Peñaparda la tardi del Martis de Carnaval: Amparo, Juliana, el su hombri (que no m'acuerdu agora cómu se llama), Julio, Félix, María, Julián y TXEBE

Paici qu'estu de los Carnavalis de Peñaparda gustó, porque lo mandé a los periódicus y lo sacarun lo menus en estus dos d'interné: Salamanca 24 horas y La Vozd e Salamanca. Vos pongu aquí los enlacis, por si queréis leelu:

Peñaparda celebra sus tradicionales y antestrales "Carnavalis"

Carnavales en Peñaparda

Y es que es mú emportanti jadel cosas, peru tamién que se sepa que se jadin. Asina que polu menus mental que tamién en Villarrubias salió una cuadrilla de dagalis a correl las calis del lugal vestíus de jorramachi, y me paici que tamién los quintus matarun el gallu. Y en Robrea los dagalis de la escuela jidun algu, y los jubiláus jidun una cena. No tengu afotus de ná d'estus dos pueblus, asina que no puéu ponelas.

Asina que los nuestrus Carnavalis están vivus y se siguin jadiendu. Anque estus añus a faltáu algu mú típicu del Antrueju los nuestrus pueblus, comu es la Vaca Romera (Peñaparda) o la Vaca Galana (Villarrubias), que tamién salían a la calli n'esti tiempu. Y no estaría de más que los ayuntamientus de los nuestrus pueblus jidiesin un poquinu. No digu que vivan ná más palus Carnavalis, comu jadin los farinatus, peru sí que pusiesin algu. Quiciás cartelis con el programa los Carnavalis, quiciás otra cosina. No jadi falta que se pongan millonis, lo que jadi falta es ilusión por jadel las cosas y por que los nuestrus pueblus tengan vía tó'l añu. No podemus quealmus en los tres días de San Silveriu, o Santu Ferinu, o los Sanjuanis, que asina no jademus caminu.

Pos ná, animal a tóa la genti d'El Rebollal a recuperal las nuestras tradicionis (fiestas, lengua, juegus, ssonis, bailis,...), porque son TÓAS ELLAS las que jadin especialis a los nuestrus pueblus. Sí, héis leíu bien, los nuestrus pueblus son especialis pola nuestra cultura tradicional, pol TÓAS LAS TRADICIONIS (no sólu una, o no sigún quien la defienda). Cuandu tengamus estu presenti podremus vel un futuru pa la nuestra tierra. Si dejamus moril lo que mos jadi especialis, tólu demás da igual.

¡¡Vivan los Carnavalis!! ¡¡Viva'l Rebollal!!

Palra d'El Rebollal. ¡¡RESPETU Y OFICIALIDÁ!!

Un añu más, y van 105

2010-01-17T17:52:00.005+01:00

Esti añu, comu hai ya angunus añus que vengu jadiendu, voi a recordal el cumpriañus de la Tia Gora. Anque esti añu no hi vistu por aquí a la telivisión, ni a los periódicus, el jadel 105 añus de verdá que tieni el su méritu. Y dendi esti rinconinu de la redi no quieru dejal que pasi de largu.

La Tia Gora nació ya hai 105 añus, tan lejotis comu el día 4 d'eneru del añu 1905. No voi a contal aquí la vía de la Tia Gora, que de seguru que da pa un libru, dendi su viaji a Francia, antis de la Guerra, a los tiempus de lleval traviessas a Ciarrodrigu,... Y las sus ganas de cantal (tólus días se la puedi oyel cantal en la su cassa), y la su mimoria.

Tia Gora es hestoria viva. Son muchas las cosas que puedi contal. Son muchas las cosas que ha vivíu. Y de seguru qu'es la presona más vieja que ha vivíu, de siempri, n'El Rebollal. Además, con otrus dos méritus a sumal al de los añus que tieni: seguil vistiendu al mó y manera tradicional, y seguil ussandu la nuestra lengua, la palra d'El Rebollal (la Tia Gora es la mayol de tólus palrantis del leonés d'El Rebollal, anque haiga quien quieri jadel creel qu'es la única presona que palra la nuestra clasi de leonés, más por deséu de que se muera la nuestra lengua que por sel verdá).

No quieru olvialmi d'otra centenaria de Peñaparda: la Tia Lonisia "Cabrera", que jidu el veranu pasáu 103 y va caminu de los 104.

Ojalá que dambas dos estén entovía muchus añus con nusotrus. Felicidadis, Tia Gora. Felicidadis, El Rebollal.

Palra d'El Rebollal.
¡¡RESPETU Y OFICIALIDÁ!!

Parcelas

2010-01-04T18:54:00.004+01:00

Anque no es un tema de los que palru nel blog, me han pedíu que a vel si puéu pregonal un pocu estu de las parcelas, por si anguién tieni tierras o güertus en Peñaparda y está d'acuerdu (u en contra) d'estu de las parcelas.

Comu angunus ya sabréis, en Peñaparda se quierin jadel parcelas, y la Junta de C. y León (supongu que comu en "requisitu" antis de jadel las parcelas) quieri sabel si los que tienin tierras en Peñaparda está d'acuerdu en que se jagan las parcelas o no, asina que ha sacáu unus papelis pa que la genti de el su parecel alreol del asuntu. Las puedin encontral en estus lugaris:
- Cuartu (ayuntamientu) de Peñaparda
- Güeb del Istitutu Tesnológicu Agrariu de C. y León www.itacyl.es
- Güeb de la Junta de C. y León: www.jcyl.es

Cuandu se haiga contestáu a lo que te preguntan, hai que mandal el escritu a:
- Cuartu de Peñaparda (Ayuntamientu de Peñaparda, Calli Fontanilla nº 2 CP. 37523 Peñaparda)
- Servicio Territorial de Agricultura y Ganadería de Salamanca (C/ Alfonso de Castro, 28-30 CP 37071 Salamanca)

La respuesta al escritu hai que mandala antis del día 20 d'eneru d'esti añu 2010 a cualisquiera d'esus dos lugaris. Es emportanti que tó'l que tenga güertus en Peñaparda de el su parecel alreol de las parcelas antis d'esi día.

Palra d'El Rebollal.
¡¡RESPETU Y OFICIALIDÁ!!

Palra y Leyis

2009-11-28T20:33:00.005+01:00

En estus días s'está palrandu muchu, en tó'l país, del escritu que han sacáu los periódicus catalanis alreol del su estatutu y de cómu esti estatutu lo quierin echal p'atrás pol mé de las Leyis, de la prencipal Ley que tenemus nel nuestru país: la Costitución de 1978.

Sin entral a vel quien tieni razón, sí voi a chalral de la alegría con que anguna genti mienta a la Costitución cuandu le vieni en gana, que mú a menudu es cuandu se va a palral de los nacionalismus, comu pasa en esti golpi con los catalanis. Peru esa mesma genti se olvía de la mesma Costitución cuandu no le interesa. D'estu se podia estal chalrandu jasta'l día del Añu Nuevu del 2025, peru se puedi vel mú fácil qu'en la nuestra tierra tenemus un casu craru de Costitución "olvidá": el Artículu 3.3.

Pa los que no sabin lo que idi esi artículu, voi a recordálsilu: la riqueza de las diferentis palras d'España es un patrimoñu cultural que será ojetu d'especial respetu y proteción.

Hai que fijalsi bien en lo que idi: las palras (comu la nuestra palra d'El Rebollal) son UN PATRIMOÑU que tienin de tenel RESPETU Y PROTECÍON. Peru en la nuestra tierra, y por estensión en tó'l históricu Reinu de León, vemus que la LENGUA LEONESA (la palra d'El Rebollal está en drentru del LEONÉS ORIENTAL) no sólu no está siendu defendía, sinu que está siendu preseguía en nombri del "progresu" y del centralismu de esta comunidá autónoma. Peru no sólu esu, sinu que se mos quieri cerral la boca a los que defendemus la nuestra lengua, comu si defendel la herencia cultural que ha íu pasandu de agüelus a nietus, y de padris a hijus juesi pecáu. Comu si defendel la nuestra cultura juesi algu malu.

Pos nó señoris, defendel el nuestru patrimoñu no es malu, mú al contrariu. Y resulta que los que jadin de la Costitución la su bandera son los primerus que se olvían de esti articulu (y de otrus tan emportantis, peru no vieni al casu), y esu del RESPETU Y LA PROTECIÓN de la nuestra lengua, ná de ná. Tólu contrariu.

Peru güenu, comu en tó, hai escecionis. Comu hi leíu en engún láu, HOROSAS ESCECIONIS. En esti casu de la nuestra palra, y de la lengua leonesa en general, se trata del pueblu de ROBREA, que el añu 2008 tuvu el aciertu, los arrestus y la valentía, de ponel los nombris de las callis lo mesmu en la palra d'El Rebollal comu en la lengua oficial del Estáu. Paici mentira que tengamus de felicital a un ayuntamientu (n'esti casu, gobernáu por el PSOE) pol jadel lo qu'es debíu, peru en esas estamus.

Dendi esti escritu, la mi noragüena al ayuntamientu de Robrea, en la nuestra comarca d'El Rebollal, pol defendel la nuestra palra, pol defendel la nuestra lengua, pol defendel la herencia cultural de los nuestrus antepasáus. A vel si pol tólus rinconis de la nuestra tierra toman ejempru. Lo dichu: NORAGÜENA.

SALÚS, LIBERTÁ Y CULTURA TRADICIONAL.
Palra d'El Rebollal. ¡¡RESPETU Y OFICIALIDÁ!!

AFOTU: cartel d'una de las callis de Robrea (Salamanca)

Il a jongus

2009-11-20T19:13:00.005+01:00

Comu tólus añus, cuandu llega el tardíu, los nuestrus pinalis, robrealis, jessas y demás s'enllenan de jongus d'un montonáu de crasis: parasolis, tortullus, güevus de rey, champiñonis, carboneras, nícalus,... Y, comu tólus añus, mucha genti sali al campu a cogelus.

Tamién tólus añus, la Mancomunidá Altu Águeda jadi unas jornás alreol d'estu de los jongus, jornás qu'esti añu han síu en Peñaparda. Anque a mi no me vagó salil la mañana que juerun a polus jongus, paici que la cosa jué mú bien, lo pasarun bien y arrocogierun un montonáu de jongus de muchas crasis, ¡¡alreol d'unas 150 crasis diferentis!! Y es que la nuestra tierra es rica en muchas cosas, y una d'ellas es que es rica en jongus.

Y ricus son tamién los jongus. Al sotru día de la salía al campu, jué la chalra alreol de los jongus y la comía. Asina, los que mos apuntamus teniamus esti menú:
- Canapés jechus con paté de jongus
- Patatis guisás con nícalus
- Pollu asáu con tortullus y salsa de tortullus

Y la verdá es que la genti queó mú contenta. Además, dispués mos echamus unus bailis, asina que queó un día reondu.

Anque ya se está jadiendu tardi pa salil a jongus, nunca está de más dal unus consejus:
- Salil pol lugaris conocíus, y dejandu dichu a anguián andi se va, no sea cuentu que pasi algu. Siempri es mejol estal preveníu
- Lleval ropa que valga pa il pol el campu. Asina que ná de zapatus con taconis, ni faldas, ni la ropa de los domingus, porque de seguru que muchas vecis mos va a tocal il entri escoberas y zarzalis, y al final se derrota la ropa
- Lleval una cesta de bimbri. Los jongus hay que llevalus en una cesta para que puéan il soltandu la simientu pol el campu. Si no, pa otru añu no va a habel ná. Además, en una cesta van a legal los jungus bien, mientris que en una bolsa de prásticu se derrotan tós. Y pol si juera pocu, está prohibíu lleval bolsas, y si te pillan los guardias es fácil que te pongan una multa. ¿La raón? La primera que hi dáu: porque los jongus tienin de il soltandu la simienti pol el campu pa que pal sotru añu güelva a habel.
- Lleval un cuchillu pa cuertal los jongus. No vali arrancalus, tieni de queal el pie, porque asina los jongus güelvin a salil nel mesmu lugal pa'l sotru añu. Si se arrancan quiciás no güelvan a salil.
- Cogel ná más los jongus que se conozan. Anque siempri en güenu lleval un librinu de crasis de jongus, lo mejol cuandu no sa sabi si un jongu es güenu o malu es dejalu nel lugal, porque los hai que son mú venenosus, y no sería el primeru al que le dan un disgustu unus jongus venenosus
- Respetal los jongus que no se cojan. Anque a nusotrus mos paiza que los que no conocemus no valin pa ná, quiciás valin pa muchu. Anque sean venenosus, en esus jongus podría estal el remediu pa anguna enfermedá, y si somus tan "listus" que los derrotamus porque no los conocemus, quiciás esi remediu desapareza pa siempri. Hay que respetal tós lus jongus, anque creamus que son "de los malus"
- Cogel ná más los que se vayan a comel. Los jongus se derrotan en un verbu. Jasta congeláus no duran demasiáu, asina que no vali la pena cogel un montonáu de jongus pa dejalus derrotal. Somus mucha genti a cogel, y si tós vamus cogiendu a hechu, sin medía, al final no va a queal ningunu

Pos na, a los que entovía vayáis a salil a jongus, estus consejus vos vendrán bien, muchu más si pensáis que esta es una más de las razonis polas qu'El Rebollal es un lugal maravillosu. Si queremus seguil siendu ricus en jongus, tenemus de cudialus. Porqu'en las tardis del tardíu, una de las mejoris cosas que se puedin jadel es salil al campu a paseal y vel qué jongus han salíu esti añu, y comelus a la nochi rebujáus con güevu, o en tortilla, o con salsa, o en una pizza, o de cualisquiel manera que se vos venga al celebru. Y no penséis qu'estu es algu de pocu valol. ¡Qué más quijieran en otrus lugaris tenel lo que tenemus n'El Rebollal!

Pos ná, dagalis. ¡A disfrutal de los jongus! ¡A disfrutal de la nuestra tierra!

SALÚS LIBERTÁ Y CULTURA TRADICIONAL.
Palra d'El Rebollal. ¡¡RESPETU Y OFICIALIDÁ!

AFOTUS: TXEBE (noviembri 2009)

Dos rayinus d'esperanza

2009-10-20T12:26:00.002+02:00

De tós es sabíu qu'el prencipal problema de tólus pueblus es que nacin pocus dagalis. La nuestra comarca d'El Rebollal no iba a sel menus, y tieni los mesmus problemas que los demás en esti sentíu.

Peru esti añu 2009 paici que naci la esperanza pa la nuestra tierra. Ya vos escribí, en esti mesmu rinconinu, que en Peñaparda teniamus un dagal nuevu, Christian. Peru no sólu esu: en Robrea y en Villarrubias tamién tenemus dagalis nuevus, que nacierun jadrá 10 diínas. Jonathan, que vivi con los sus padris en Robrea, y Lucas, que es el nuevu dagal de Villarrubias. Dos rayinus d'esperanza en lo escuru del futuru de la nuestra tierra.

Pos sí, héis leíu bien: en dos semaninas han nacíu tres dagalinus n'El Rebollal. Y lo mejol de tó es que vienin más en caminu, lo mesmu en Robrea qu'en Villarrubias. Si m'enteru cuandu nazan, vos tendré informáus aquí.

Pos ná, dal la noragüena a los nuevus padris, y la bienvenía a los dagalis. A vel si hai suerti y naci tamién anguna dagala. Lo dichu: NORAGÜENA y BIENVENÍUS.

Salús, libertá y cultura tradicional.

Palra d'El Rebollal.
¡¡RESPETU Y OFICIALIDÁ!!

Ofretoriu de Peñaparda

2009-10-01T23:29:00.003+02:00

¡Saludus, paisanus y demás amigus!

Esti domingu, 4 d’otubri, el pueblu de Peñaparda va a recuperal el Ofretoriu a la Virgin del Rosariu. Esti es el programa de lo que se va a jadel en Peñaparda pa honral a la Virgin del Rosariu:

• 9:00 ALBORÁ polas callis del lugal, jecha por José Benito y Raúl
• 10:45 SANTA MISA en honol a Ntra. Sra. la Virgin del Rosariu
• 16:00 OFRETORIU y BAILI DEL OFRETORIU a la Virgin del Rosariu
• 16:30 RIFA de los Rosconis del Ofretoriu

El Ofretoriu y la rifa serán ena Praza Mayol de Peñaparda. La misa, ena ilesia del lugal.

Pos ná, qu’estáis tós envitáus a venil a Peñaparda y vivil con nusotrus una de las tradicionis más polías de la nuestra tierra, estáis envitáus a honral con nusotrus a la Virgin del Rosariu. Acordalvus: el domingu 4 d'otubri.

Palra d’El Rebollal
¡¡RESPETU Y OFICIALIDÁ!!

Un dagal más

2009-09-27T22:35:00.002+02:00

Ya hai tiempu que no escribía ná en esti rinconinu de la redi, y es que hai vecis que no vaga ponelsi delantri el ordenaol a escribil anque ná más sea unas palabrinas. Peru güenu, a vel si mos ponemus otra vés con el asuntu.

Esta vés escribu pa dal una güena noticia. Y es que n'El Rebollal tenemus un dagal más. Güenu, de seguru que más de unu, porque me paici qu'en Robrea había más de unu en caminu. Peru comu no sé de ciertu si han nacíu ya o no, no tengu otra que palral alreol del dagal que sí que sé que ha nacíu.

Pues ná, que sepáis tós que Juliu el del "Güelvi" y la su mujel, Inmaculada (de Villarrubias) han teníu esta semana un dagal. A mi unu de la familia me ha dichu que le van a ponel comu nombri Christian. Los padris, los tíus, los primus, los agüelus y tóa la genti estamus locus de contentus, porque no hai ná más alegri que el que naza un dagal, y más en los tiempus que corrin y en la nuestra tierra.

Pos ná, dagalinu, bienveníu al mundu. Y a la su madri, bienvenía al lugal, pos ha dejáu Villarrubias pa venilsi a vivil a Peñaparda. Polu menus se quéa en drentru El Rebollal. Bienveníus dambus dos.

Palra d'El Rebollal.
¡¡RESPETU Y OFICIALIDÁ!!

El Día el Artista

2009-08-07T09:58:00.003+02:00

Esti sábadu 8 d'agostu se va a jadel en Peñaparda el Día el Artista. No es que el demás tiempu el añu no haiga artistas en Peñaparda, que los hay, sinu que aprovechandu que vienin al lugal los que vivin juera, se quieri jadel algu distintu de lo qu'estamus acostumbráus a vel. Asina, el sábadu, a las 10 y media de la nochi (22:30) se van a jadel unas actuacionis en la Praza el lugal.

Entri otras cosas va a habel:
- Sevillanas
- Hip-Hop
- Domingu "Rey" con la cuadrilla de Villarrubias y el curdión
- Sebastián Guerreru recitandu puemas
- Patri cantandu
- Txebe (o sea, yo) tocandu la concertina

Y tó'l que quiera sumalsi a la fiesta.

Pos ná, qu'estáis tós envitáus a venil. Y no vos preocupéis pola entrá, qu'es de baldi.

Ya sabéis, el "Día el Artista", el 8 d'agostu a las 10 y media de la nochi, en Peñaparda.

Palra d'El Rebollal.
¡¡RESPETU Y OFICIALIDÁ!!

Panderu Cuadráu 2009

2009-07-28T14:09:00.004+02:00

¡Saludus, paisanus!

Esti viernis y sábadu (31 de juliu y 1 d'agostu) se jadi en Peñaparda la X FIESTA EL PANDERU CUADRÁU. Comu no pué sel menus, tós estáis envitáu a venil y pasalu bien.

El programa pa dambus días es esti:

VIERNIS 31 DE JULIU
19:00 Muestra d'afotus: CHARRU
Chalra alreol de la Fiesta el Panderu. X aniversariu de la Fiesta el Panderu (Javier Ramos y J.antonio Sánchez)

SÁBADU 1 D'AGOSTU
12:00 Feria d'artesanía
19:00 Pasacallis
19:30 Festival de folclori
- Grupu de dagalis de Peñaparda
- Grupu "Calderón de la Barca de Barajas" (Madrís)
- Entrega del Panderu d'Honol a Gabriel Calvo
- Ofretoriu
- Grupu folcl´ricu de Peñaparda
23:00 Grupu "Calderón de la Barca de Barajas" (Madrís)
Baili al son el panderu, tamboril y dulzaina

Pos esu, qu'estáis tós envitáus a venil a Peñaparda a pasalu bien y echal unus bailis ena praza el lugal. No vos olviéis: viernis 31 de juliu y sábadu 1 d'agostu.

Palra d'El Rebollal.
¡¡RESPETU Y OFICIALIDÁ!!

Jornás d'El Rebollal 2009

2009-07-14T21:11:00.005+02:00

Esti fin de semana, dendi'l Viernis 17 jasta'l Domingu 19 de juliu, van a jadelsi las IV JORNÁS INTERNACIONALIS D'ESTUDIU D'EL REBOLLAL a las que, comu no pué sel menus, estáis tós envitáus a il.

VIERNIS 17. GUINALDU (Salón d'actus de la Mancomunidá Altu Águeda). "Historia Recienti y Testimonius"
--------------------------------------------------

SÁBADU 18. ROBREA (Gimnasiu). "Habla y Literatura Tradicional"
--------------------------------------------------

DOMINGU 19. CIARRODRIGU (Palaciu los Águila). "Folclori y otras formas de cultura tradicional"
--------------------------------------------------

El programa tieni un montonáu de chalras, tóas mú interesantis, en sesionis de mañana y tardi.

El domingu a la tardi, nel Palaciu los Águila, en Ciarrodrigu, va a habel un pequeñu festival de bailis y cancionis tradicionalis jechu polus grupus "El Fandangu" (Robrea), "El Charaíz" (Guinaldu) y "Chabarconis d'El Rebollal" (Peñaparda).

Pos ná, al que vaya el sábadu a la mañana (quiciás tamién a la tardi) y el domingu a la tardi, mos vemus allí.

Palra d'El Rebollal
¡¡RESPETU Y OFICIALIDÁ!!

Cincu añus

2009-07-01T19:01:00.004+02:00

El tiempu corri y corri, y no mos damus ni cuenta. ¡Cincu añus! ¡Paici mentira!

¿Que de qué estoi palrandu? Pos de que ya hai cincu añus que mos vinimus a vivil a Peñaparda, y ya hai cincu añus que ms pusimus a jadel panis, y perrunillas, y madalenas, y rosconis,...

Cincu añus paicin muchus. Comu no pué sel menus, himus teníu tiempus güenus y tiempus malus. Peru lo que no mos ha faltáu nunca es la ilusión y las ganas de jadel bien las cosas, de defendel la nuestra tierra y la nuestra cultura.

Quiciás esté equivocáu, peru me paici que la mi panadería, la "Tahona El Tamborileru", es el únicu negociu que hai en la comarca d'El Rebollal que tieni puestu el su nombri en la nuestra lengua. No sólu esu, sinu que los cartelis y papelis dl comerciu están escritus tamién en la palra d'El Rebollal, y lo mesmu con los sacus andi metemus los dulcis, además con la marca "JECHU N'EL REBOLLAL". Y es que hai que predical con el ejempru.

Pos sí, dagalis, ya han pasáu cincu añus. Muchus de los que leéis esti escritu héis pasáu anguna vés pola mi cassa de vesita, o a compral, o a salualmi. Y vos lo agraezu muchu. Agora, a pol otrus cincu añus.

Palra d'El Rebollal.
¡¡RESPETU Y OFICIALIDÁ!!

AFOTU: unu de los Rosconis de Reyis que jademus pal Día los Reyis

Sanjuanis 2009

2009-06-23T16:37:00.008+02:00

Peñaparda ya dejó p'atrás las sus fiestas de San Silveriu, peru ya mos ha entráu a tós el ansia de fiesta, así que ya no se puedi paral.

Las que vienin agora son los Sanjuanis, que celebran a la mesma vés los pueblus de Navafrías, Payu y Robrea. El programa de tólus pueblus es apaecíu, anque puedi cambial en anguna cosina. Comu ná más ha llegáu jasta las mis manus el programa de los Sanjuanis de Robrea (gracias, robreanus, por traelu), es del que voi a ponel el programa.

MIÉRCOLIS 24 DE JUNIU
-------------------------
12:00 Misa en honol a San Juan
14:00 Paella pa tóa la genti nel Pabellón del Lugal

VIERNIS 26 DE JUNIU
------------------------
20:00 Levantamientu del Pinu
23:30 Verbena jecha pol MARIANO DÍAZ

SÁBADU 27 DE JUNIU
----------------------
12:30 Incierru jasta la Praza el Cañu
18:00 Desincierru y Capea
23:30 Verbena pola orquesta PIRÁMIDE

DOMINGU 28 DE JUNIU
------------------------
13:00 Incierru a caballu polas callis del lugal
18:00 Desincierru y capea

De lo que m'acuerdu de los programas d'otrus pueblus, ná más idilvus qu'en Payu, además de ponel el pinu, jadin tamién el Capazu y tienin juegus tradicionalis, y en Navafrías jadin tamién el Capazu (anque no ponin el pinu) y tienin unas chalras (una d'ellas jecha por Carlos García Medina). Peru, al no tenel los programas, no puéu idilvus ni lugal ni hora.

Güenu, dagalis, sea comu sea, y sea nel pueblu que sea, que lo paséis bien abondu en los Sanjuanis. Y no vos olviéis que, antis del amanecel, hai que lavalsi con el agua de 7 juentis pa espantal tólus malis.

Palra d'El Rebollal.
¡¡RESPETU Y OFICIALIDÁ!!

San Silveriu 2009

2009-06-18T08:10:00.006+02:00

En llegandu la calol apencipian las fiestas de los nuestrus pueblus. Las primeras de tóas son las de San Silveriu, patrón de Peñaparda. Comu no pué sel menus, estáis tós envitáus a venil y pasalu bien. Esti es el programa de fiestas.

VIERNIS 19 DE JUNIU
----------------------
12:00 Juegus pa los dagalis
17:00 Siguin los juegus pa los dagalis
20:00 Levantamientu del Pinu polus quintus
23:00 Verbena con la orquesta "KARMÍN"

SÁBADU 20 DE JUNIU
----------------------
12:00 Misa en honol a San Silveriu
13:00 Incierru polas callis del lugal
18:30 Capea
23:00 Verbena con la orquesta "MAS MUSIC"

DOMINGU 21 DE JUNIU
-----------------------
13:00 Incierru polas callis del lugal
18:30 Capea
23:00 Verbena con la orquesta "TRÍO GALILEA"

Lo dichu, estáis tós envitáus a venil a Peñaparda.

NOTA: Afotu del San Silveriu vieju, jechu nel sigru XVII

Palra d'El Rebollal.
¡¡RESPETU Y OFICIALIDÁ!!

Los votus n'El Rebollal

2009-06-15T12:50:00.006+02:00

Comu tós sabemus (y el que no sepa, ya se lo digu yo), la pasáu 7 de juniu juerun las eleicionis uropeas, andi escogíamus a los deputáus que mos van a represental en Uropa.

Las eleicionis no tuvun ningún problema n'El Rebollal, jué un día tranquilu abondu. Y, pa'l que quiera sabel cómu quearun los votus ena nuestra tierra, allá van los resultáus:

NAV PAYU PEÑA ROB VIL TOTAL
PP 162 103 131 157 86 639
PSOE 131 102 86 139 65 523
IU 3 0 4 5 0 12
PREPAL 0 0 3 2 3 8
UPyD 2 4 1 1 0 8
POSI 0 1 2 1 0 4
LV 2 0 0 0 0 2
LV-GVE 0 1 0 0 0 1
MSR 0 0 0 1 0 1

Brancu 2 1 1 1 0 5
Nulus 1 1 6 4 0 12

TOTAL 303 213 234 311 154 1215

PP (Partíu Populal)
PSOE (Partíu Socialista Obreru Español)
IU (Izquierda Uñía)
PREPAL (Partíu Regionalista del País Leonés)
UPyD (Uñión, Progresu y Democracia)
POSI (Partíu Obreru Socialista Internacionalista)
LV (Los Verdis - Uropa de los Pueblus - Verdis)
LV-GVE (Los Verdis - Grupu Verdi Uropéu)
MSR (Movimientu Social Repubricanu)

Pos asina queárun los votus en la nuestra tierra. El que quiera sabel más: Eleicionis Uropeas 2009

P.D. Pos si angunu no lo sabi tamién se lo digu yo: en la lista del PREPAL (Partíu Regionalista del País Leonés) ibamus tres vecinus d'El Rebollal. Mº Isabel Rodríguez Mateos (de Villarrubias), Patricia Santamaría Hernández (de Peñaparda) y yo (José Benito Mateos Pascual). Craru está que no himus salíu comu deputáus. ¡Pa otra vés será!

Palra d'El Rebollal
¡¡RESPETU Y OFICIALIDÁ!!

Teatru en Peñaparda

2009-05-27T00:29:00.002+02:00

En la nuestra tierra, de siempri, gustaba muchu esu que los nuestrus padris y agüelus han llamáu siempri "jadel comedias". Anque de seguru qu'esi nombri vieni de que cuasi siempri lo que se jadían era esu, comedias pa reilsi la genti y pasalu bien.

Por esu, quiciás no tendríamus que dali esi nombri a o que vamus a tenel en Peñaparda esti viernis, pos la obra no es una comedia, sinu un teatru más seriu y comprometíu, un teatru con el tema de la igualdá entri hombris y mujeris. Un teatru que mereci la pena que la genti s'acerqui a vel.

La obra de teatru que vamus a jadel es una adaptación de "Casa de Muñecas", de Henrik Ibsen. Los que podáis, venilvus a Peñaparda, de seguru que vos va a gustal. A nusotrus mos jadrá mucha ilusión que mos vengáis a vel.

OBRA: Casa de Muñecas
ESCRITOL: Henrick Ibsen
LUGAL: Centru Cultural de Peñaparda (escuelas viejas)
PUEBLU: Peñaparda
DÍA Y HORA: Viernis 29 a las 9 y media de la nochi (21:30 horas)
ENTRÁ: De baldi

Palra d'El Rebollal
¡¡RESPETU Y OFICIALIDÁ!!

Tenemus un dagal más

2009-05-21T10:04:00.003+02:00

Pos sí, dendi'l lunis, en Villarrubias hai un dagal más, el que han teníu Milianín (el de la taberna de la carretera, que tieni el estancu de Villarrubias) y la su mujel (que me perdoni, que no m'acuerdu cómu se llama). Tampocu sé cómu se va a llamal el dagal, peru en cuantis m'enteri vos lo digu.

El casu es qu'estamus de noragüena. Ha nacíu esti dagal, y más que vienin en caminu, polu menus en Robrea y en Villarrubias.

Pos ná, lo dichu, noragüena a los padris del dagal, y noragüena a la genti d'El Rebollal, pos ya somus unu más.

Palra d'El Rebollal.
¡¡RESPETU Y OFICIALIDÁ!!

Agua

2009-05-11T18:31:00.004+02:00

Quiciás hogañu no mos demus cuenta, peru el agua es unu de los bienis más preciáus que tenemus. Peru la vía moderna jadi que, a las vecis, no mos demus cuenta de la suerti que tenemus, ni de lo emportantis que son angunas cosas pa vivil.

Una d'estas cosas es el agua. Agua ussamus pa bebel. Agua ussamus pa jadel la comía. Agua ussamus pa lavalmus. Tamién pa laval los cacharrus, el cochi, la cassa, la ropa,...

Antañu, tóas estas cosas se jadían menus. Cochis no había, asina que no había que lavalus. Pa comel quicián no había más que angunus pratus, teneoris, cucharis, escuíllas,... La ropa no se lavaba tólus días, ni se tenía una vestimienta pa cá día del mes. La limpieza de la cassa se jadía una vés al añu, quiciás dos... Bebel había que bebel, está craru, lo mesmu antañu que hogañu.

Peru no llegaba el agua a cassa comu pasa en esti sigru, que ná más dali al grifu sali el agua limpita y bien abondu. Que va, antañu no había agua corrienti en las cassas. El agua pa bebel había que il a buscala a la juenti, o al charaíl. Entová cuandu era chicu cogía el barril dendi ancá los mis agüelus y iba a buscal agua pa comel. ¡Y esu que ya había agua ancá los mis agüelus! Peru, quiciás por costumbri, quiciás por el recuerdu d'otrus tiempus, siempri bebiamus agua del charaíl.

¿Laval la ropa? Había que bajal a lavala al ríu, o al regatu. ¿Quién no ha vistu ancá los sus padris, o los sus agüelus, el jabón caseru, el lavaéru y la tajuela? ¿y los barriñonis? Pos sí, había que dalsi un güen paséu pa il a laval la ropa, algu que jadi hogañu la lavaóra ná más con dali a un botón.

La genti mayol entovía recordará lo que costaba aniantis tenel agua pa los oficius de cassa. Peru la genti nueva quiciás no sabi de lo que palru. Eran tiempus en qu'el agua era un bien quiciás no escasu, peru sí más trabajosu de tenel. Hogañu, ya lo diji aniantis, con abril el grifu la tenemus bien abondu...

Peru tó éstu puedi cambial, a pocu que mos descuidemus. Esti añu está siendu unu de los más secus que recuerdu. Los ríus, los regatus, las podas, las juentis,... tienin tós mú poquina agua. Los maniantalis entovía no se han ensecáu, peru no créas que les ha faltáu muchu. El agua que está cayendu hoi, y que cayó ayel, quiciás mejori un poquininu las cosas. Peru la cosa pinta mal, y no mos va a queal otra que aprendel a ajorral agua si no queremus velmus comu antañu.

¿Qué podemus jadel? Pequeñas cosinas que, anque quiciás pareza que son poca cosa, sí que puedin jadel muchu.
- No ussal el retreti (o bátel) de basuéru. Si no tiramus de la caéna a cá istanti, ajorraremus mucha agua.
- No dejal el grifu abiertu mientris mos lavamus los dientis (o dejalu con un jilinu d'agua).
- Nu ussal el lavavajillas o la lavaóra si no está llena (o, si se tienin aparatus de "media carga", jasta qu'esté la media carga).
- No regal las prantas tólus días (porque, además tampocu lo necesitan).
- El que puéa, cogel agua pa bebel y pa regal las prantas del charaíl que más cerquina tenga, pos va a seguil echandu agua la cojamus o no (el grifu sólu cuandu lo abrimus).

Y tó lo que se vos ocurra. Asina podemus ajorral mucha agua y no tenel problemas cuandu lleguin los caloris del veranu.

Agora, a disfrutal de las lluvias de primavera. Porque llovel, tieni que llovel, anque no mos gusti mojalmus. En esti tiempu, el "güen tiempu" es llovel, que es lo que tieni de jadel. Que jaga sol cuandu tieni de llovel nunca no va a sel "güen tiempu", por muchu que mos lo repitan en la teli o la arradiu.

NOTA: afotu del Caraíl del Rollu, en Peñaparda

Palra d'El Rebollal
¡¡RESPETU Y OFICIALIDÁ!!

Froris

2009-05-07T16:51:00.004+02:00

Ya estamus en primavera, anque por el calol que jadi más pareci qu'estamus ya nel veranu. Peru el casu es que ya ha llegáu mayu.

De siempri se ha oyíu idil a la genti que mayu es el mes de las froris y de verdá, cualisquiera que se ponga a paseal polus nuestrus campus y caminus puedi del que es verdá, pos andiquiera que se miri se puedin vel froris de tóas las crasis y coloris.

Da lo mesmu que vayas pola Cañá, por el caminu Los Bonalis, por el caminu Guinaldu, por el caminu Payu,... Si miras pa las cunetas, o al láu los regatus, o pa los práus, siempri ves anguna frol. Y hai muchas pa escogel: margaritas, gamonitus, candelillas, tijeritas, catalinas, sangri de nuestru señol, lechuguillas, joramagus, la frol de la escobera negral,...

Las coloris se ansoman a los nuestrus ojus, a las vecis paici qu'el arcu del Señol se ha caíu en angún práu y, rebujáu con el verdi de la yerba, podemus encontral froris de tóas las coloris: amarillas, colorás, brancas, azulis, morás,... Lo dichu, paici qu'el arcu el Señol ha veníu a jadel una vesita.

Pues ná, paisanus, a tó'l que le vagui, que no deji de dalsi un paséu por el campu, anque sólu sea a vel froris. Mereci la pena.

Palra d'El Rebollal
¡¡RESPETU Y OFICIALIDÁ!!

3.000

2009-04-23T18:10:00.002+02:00

Angunu dirá: ¡qué nombri más raru pa un escritu! Agora vos espricu, dagalis.

El númeru 3.000 es el númeru de vesitas que ya tieni el blog. Paici mentira, peru es verdá, ya himus llegáu a esi númeru tan reondu y tan grandi. La verdá, tieni el su méritu, pos comu ya sabéis tós esti blog está escritu en una de las lenguas minoritarias del nuestru país: la "Palra d'El Rebollal", una de las palras leonesas de la Península.

Mirandu los datus del contaol que le hi puestu al blog (que sali al final del tó), me hi fijáu de que, en siendu la mayoría de las vesitas dendi España (más de 1.200), hay otru país dendi el que se mos lei muchu: Francia (250). Peru tamién mos jadin vesitas dendi otrus paísis: Méjicu (35), los Estáus Uñíus (33), Venezuela (9), Colombia y la Argentina (6), Chili y el Reinu Uñíu (5), el Perú, Andorra, Portugal y el Ecuaol (4), y el Brasil (3). Ya sé que asina no llegan a las 3.000 ni cerquina. Peru es que cuandu entramus nel blog es una vesita, y si por cualisquiel cosa golvemus a cargal la güeb mos güelvi a contal otra vesita, anque sea la mesma persona. Asina, el contaol del blog cuenta tóas las vesitas, peru a la hora de vel de qué país vienin te cuenta comu una sola vesita en esi día. Es un líu, peru güenu. ¡Ah! ¡Además hai cuasi 600 vesitas dendi un país desconocíu! Esu sí que es curiosu.

La verdá es que me hi dejáu muchas horas delantri el ordenaol pa escribil unas rayinas. A lo primeru, tólus días. Dispués se me jidu que asina quiciás a mucha genti que no entraba tólus días al blog se le podían queal cosinas sin leel, asina que me pusi cá dos días. Dispués, por sel un poquinu magallán (tó hai que idilu) cuandu se terciaba.

Peru con tó y con esu, sois muchus los que tólus días vos héis puestu delantri el ordenaol a vel qué había puestu de nuevu, a vel que se me había ocurríu. Y tamién héis gastáu muchas horas asina, leyendu y escribiendu angú comentariu. Vusotrus sí que tenéis méritu. Por esu, dalvus las gracias esperandu que vos haiga gustáu lo que héis leíu jasta hogañu, y esperandu que vos gusti tó lo que váis a leel dis quí p'alantri.

Porque, craru está, la cosa sigui p'alantri. Luchal pola nuestra lengua, pola nuestra cultura y pola nuestra tierra no puedi tenel descansu si queremus que los nuestrus dagalis tengan nel futuru algu que defendel.

Esperu que sigáis jadiendu vesitas a esti rinconinu de la redi, y no olviéis dejal angún escritu.

3.000 vesitas ---> 3.000 millonis de gracias

Palra d'El Rebollal.
¡¡RESPETU Y OFICIALIDÁ!!

El Lunis d'Aguas

2009-04-21T10:53:00.003+02:00

En drentru la provincia de Salamanca, ¿quién no ha oyíu palral anguna vés del Lunis d'Aguas? Es cuandu, dispués de Semana Santa, la genti de Salamanca capital, s'ajuntaban nel campu a comel el jornazu (una "empaná" de coridu, lombu, jamón, panceta,...), a jinchalsi de comel carni dispués de cuarenta días de cuaresma. Es una tradición que ha llegáu jasta hogañu.

En los nuestrus pueblus tamién se jadi (o, polu menus, se jadía), pos tamién las nuestras gentis pasaban la cuaresma. Y las gentis de los nuestrus pueblus s'ajuntaban pa comel el jornazu en familia, o con amigus, y se jadía una güena fiesta pos Cristu había resucitáu, y era algu pa celebral.

Peru tenemus de tenel craru algu: en los nuestur pueblus NUNCA se ha celebráu el Lunis d'Aguas. Esu es pa los de la capital. Polu menus, en Villarrubias de siempri se ha comíu el jornazu el Domingu de Resurreción. En Peñaparda, el día la Crús Bindita (3 de mayu). En los demás pueblus d'El Rebollal no lo sé. Peru de lo qu'estoi seguru es de que nunca se comió cuandu en Salamanca capital.

Ya sé que ha pasáu, y que pa esti añu ya no se puedi jadel ná (o casi ná), peru no está de más que vos recuerdi que nusotrus no somus la capital, y que la tradición del Lunis d'Aguas es mú polía, peru NO ES NUESTRA. Tantu que presumimus de tradicionis en la nuestra tierra, lo que no podemus jadel es trael una de juera y escondel en un rincón las nuestras. Asina que la genti de Peñaparda a vel si se poni las pilas y pa'l 3 de mayu, pa la Crús Bindita, salimus tós a comel el jornazu a la Jessa, o al Mostajal, o pa las Majaíllas, o pal Riufríu, o p'andi quiera que queramus juntalmus. Porqu'esa es la nuestra tradición del comel el jornazu, nu otra. La genti de Villarrubias, que presumin menus que la mayoría de las sus tradicionis, sigui comiendu el jornazu el día qu'es: el Domingu de Resurreción. A vel si tomamus ejempru.

Palra d'El Rebollal.
¡¡RESPETU Y OFICIALIDÁ!!

Semana Santa

2009-04-08T21:59:00.005+02:00

Pa los que son cristianus, hai dos tiempus en tó'l añu que no se puedin dejal pasal sin más. La primera, la Navidá, el tiempu nel que los cristianus celebran el nacimientu de Cristu (y que, pa'l restu de la genti es el Solsticiu d'Inviernu). El otru tiempu es la Semana Santa, el recuerdu de la muerti y sufrimientu de Cristu, los jechus que son el centru de la religión cristiana.

Pos bien, estus días lo que se celebra es estu últimu, la muerti y sufrimientu de Cristu, lo que se conoci con el nombri de Semana Santa.

¿Cómu celebran los cristianus la su fe en estus días?

La Semana anta apencipia con el Domingu de Ramus, cuandu la genti va a la ilesia a por el aurel. Comu de éstu ya palré el otru día no voi a golvel a ponel lo mesmu asina que vos toca leelu más abaju.

Dispués apencipian las misas y las procesionis de Juevis Santu, Viernis Santu, Sábadu Santu y Domingu de Resurrección. Sí, sí, de resurrección, porque paici que la hestoria acaba con que Cristu güelvi a la vía dispués de muertu...

Las procesionis de los nuestrus pueblus no son ni vistosas ni famosas. Ni siquiera se jadi lo mesmu que se jadía antañu. Comu hogañu paici que lo que andan buscandu es la "pureza religiosa" (la hestoria se repiti cá ciertu tiempu y en tóas las religionis), me paici muchu más interesanti palral de cómu eran las cosas aniantis, de cuandu la religión salía de los sentimientus del pueblu.

Lo primeru, las cancionis que se cantaban en estus tiempus. Los cantaris de siempri d'esti tiempu eran (y tienin de sel) "El Aráu" y "La Baraja". Son cantaris tradicionalis, mú políus, y que salin del pueblu. Hogañu se cantan otrus, traíus de juera, y hai genti que comu quierin tantu al pueblu que siempri les paici mejol lo de juera, se han puestu a cantal los nuevus olviandu los que se han cantáu de siempri. Asina mos va... Peru güenu, esu es otro cantal.

Luegu está el tema de las procesionis. Además de que cá vés las jadin más cortas (dis quí a pocu las jadrán "virtualis" en drentru la ilesia), se ha perdíu muchu de lo que salía del pueblu. Lo primeru, las saetas que se la cantaban a la Virgin y al Cristu. En Peñaparda las cantaba (y mú bien) José Luis (D.E.P.), peru comu lo jadía tan bien que la genti le apraudía, los curas dijun que no se golviesin a cantal, qu'estu no era Andalucía. Y asina mos queamus sin saetas.

Tamién leemus nel libru de Casianu (1904) qu'en Peñaparda en las procesionis el Nazarenu iba vestíu de brancu, por pareceli a los del lugal mú cursi que juesi vestíu de moráu. Comu no pué sel menus, estu propiu de Peñaparda se ha perdíu. Hai que il de moráu pola pureza religiosa...

El Sábadu Santu se jadía la misa las velas, en cá pueblu la suya. Peru hogañu hai una misa pa tólus pueblus. Y craru, no va casi naidi, ná más los del pueblu andi se jadi la misa.

En resumías cuentas, antañu la Semana Santa de los nuestrus pueblus era una Semana Santa que, anque de seguru que tampocu era mú vistosa, sí que salía de la fe y los sentimientus de las gentis d'El Rebollal, pos lo mesmu las saetas que las cancionis y los ritus eran los propius de siempri de los nuestrus pueblus. Era una Semana Santa con personalidá, celebrá en unus pueblus con un mó y manera de sel propius, una cultura propia,...

Hogañu angunus quierin jadelu tó al rás, que tos seamus lo mesmu pa tó, que no tengamus personalidá. Nel tema los ritus religiosus, tó en nombri de la "pureza religiosa". Nel tema cultural, tó en nombri de la "una, grandi y libri".

Y no voi a escribil más, porque estoi apencipiandu a calentalmi.

Sólu una cosina más. ¿Sabéis qué es un pueblu que ha perdíu la su personalidá y lo que le jadi diferenti a los demás? NADA, un pueblu qu'es comu los demás NO ES NADA, es un PUEBLU MUERTU.

No dejemus moril los nuestrus pueblus. No dejemus moril la nuestra tierra.

Palra d'El Rebollal
¡¡RESPETU Y OFICIALIDÁ!!

Domingu de Ramus

2009-04-05T14:22:00.004+02:00

Pocus días hai nel añu que le gusti tantu a la genti comu es el día de hoi: Domingu de Ramus.

No sé si será oficial, peru de seguru qu'esti día es el que apencipia la Semana Santa, lo mesmu qu'el día la Lutería es el qu'apencipia la Navidá.

¿Y qué tieni d'especial esti día? Pos el mesmu nombri lo idi: los ramus. Y es que, anque no se vaya a misa en tó'l añu, es esti domingu de los pocus que está la ilesia llena. ¿Por qué? Porqu'es el únicu día que regalan algu en misa: un ramu d'aurel. Esu en los nuestrus pueblus, qu'enas ciudadis hai que pagal (y bien) pol un ramu jechu d'hojas de palma. Peru en los nuestrus pueblus la genti se poni las mejoris vestimientas que tenga nel armariu, se cogi y se va a misa a por el ramitu d'aurel, cuantis más grandi, mejol. Los devotus van porque créin en estu. Los no devotus, porque asina tienin pa guisal tó'l añu.

En lo que tieni de vel con lo propiu de las misas, el Domingu de Ramus quieri jadel mimoria del día en que Cristu entró en jerusalén, y las gentis de la ciudá salierun a recibilu alabándolu "armáus" con ramus, comu el liberaol del pueblu d'Israel del yugu de los invasoris romanus. La hestoria de dispués ya la sabemus tós (y el que no la sepa, que se ponga la teli estus días, que de seguru qu'echan anguna película alreol de Cristu).

Golviendu a los nuestrus pueblus, se créi qu'el ramu d'aurel, puestu enas ventanas y puertas, jadi que no entrin en cassa las brujas y los malis, que se quedin juera, lo que de seguru es un ecu de lo que poni en la Biblia alreol de la Pascua judía, de cuandu estaban esclavus en Egiptu y el su Señol mandó las famosus "sieti andancius", unu de ellus el matal al primel dagal de cá familia. Dios le diju a los judíus que pusiesin una ramina en la puerta la su cassa pa qu'esi castigu pasasi de largu pola su puerta. Es hestoria, contá en misa mil y una vecis, en tiempus además en los que a los qu'entovía guardaban la religión antigua se les llamaba brujus y brujas (y se les quemaba comu "enemigus de la fé") jadría qu'en los nuestrus pueblus (y en muchus pueblus de la Península los "creyentis" apencipiasin a ponel el aurel en las puertas y ventanas de la su cassa pa que las brujas saliesin ajuyendu. Y asina ha llegáu jasta hogañu.

Pos sí, paisanus, estu es lo que celebramus el Domingu de Ramus. Anqu, comu diji aniantis, tamién se ha jechu d'esti día algu pa presumil. Ya sabéis lo qu'idi el reflán: "El que nu estrena ná el Domingu de Ramus, no tieni ni pies ni manus".

Palra d'El Rebollal.
¡¡RESPETU Y OFICIALIDÁ!!

AFOTU: ramu d'aurel del Domingu de Ramus

Fuegu

2009-04-03T10:52:00.003+02:00

Ayel a la tardi estuvimus forasterus. Habíamus íu a Guinaldu a esprimental a cantal en un coru que tienin allí. Y la verdá, lo pasamus bien. Peru la sorpresa jué al golvel, y es que ya dendi Guinaldu se veía el jumu, y jasta el fuegu.

Entovía no sabiamus andi era el fuegu, peru al cogel el caminu de Payu a Peñaparda ya vimus qu'era en Peñaparda. Al acercalmus más al lugal, ya vimus que, además, el fuegu era cerquina del pueblu, nel sitiu que se llama La Picaraña (cerquinina de la Cantera y la Poda El Cesteru). Allí estaban los guardias de Payu, genti del lugal que había íu a apagal el fuegu porque tieni güertus p'allí, genti que quería ayual, cambionis de bomberus de los pueblus d'alreol (porque, anque sueni a cuentu, en Peñaparda no hai más que una carriña con un depositu chiquininu y que, además, esta mañana no furrulaba),... La foguera se veía dendi la carretera, así que vos podéis imaginal lo cerquina qu'estaba el fuegu del lugal.

Menus mal qu'el fuegu no jué grandi abondu. Sigún idin, se quemó alreol d'una hectárea de fusca: escobas, gatuñas,...

Peru lo peol es que los fuegus no nacin sólus. No jadía muchu calol comu en veranu. No había tormenta ninguna. No estaba al láu la carretera, asina que tampocu podía sel el descuidu d'un cigarru mal apagáu. Esi fuegu lo chiscarun adredi, ná más pensandu en jadel dañu.

Y es que, bien entráu nel sigru XXI, entovía hai genti falta. Porque hai qu'estal mú faltu pa chiscal un fuegu.

Esperemus qu'esti fuegu sea el últimu del sigru n'El Rebollal.

Palra d'El Rebollal.
¡¡RESPETU Y OFICIALIDÁ!!

NOTA: afotu jicha dendi El Castillu justu al llegal a Peñaparda. Serían alreol de las 10 de la nochi

El cambiu la hora

2009-03-30T22:15:00.004+02:00

Comu tólus añus por esti tiempu, a los mandamasis d'Europa les da pol cambial la hora. ¿Cuál es la escusa que ponin? Pos que asina se ajorra energía.

Peru estu del cambiu la hora (qu'es una cosa de no jadi tantu tiempu, alreol de 30 añus) cá vés más me paici una tontería, y cá vés estoi más convencíu de que no vali pa ná güenu.

Lo primeru de tó, porque esti cambiu la hora lo primeru que jadi es atontal a la genti. Y es que se mos cambian las horas de jadel tó: de levantalsi, de comel, de dormil,... Ya con el cambiu el cuerpu está atontáu unus cuantus de días. Peru de seguru que tó estu se acaba pagandu, porque estus descontrolis no son ná de güenus pa la salú.

Lo segundu, por el afrontu d'andal cambiandu la hora a tólus relojis de la casa: que si el relós de la parés, que si el relós de pulsera, que si los relojis los móviis,... Anda que no se pierdi tiempu ni ná con éstu.

Y lo terceru, que tampocu es güenu pa las máquinas el andal tocándula a cá istanti pa cumpril los caprichus de cuatru sabiondus. La prueba la tenemus nel relós de Peñaparda. El día el cambiu la hora el alguacil jué a alantralu una hora (que es lo que tocaba pa esti cambiu), asina que ya lo dejó con una hora más. Pos en cuantis llegarun las 12 la nochi y el relós jué a dal las 12 campanás, apencipió a tocal y no paraba. Total, que se tiró un cuartu d'hora dandu campanás. Esu, a 30 capanás pol minutu mos dá más de 400 campanás seguías. Peru esu no es tó. Al sotru día el relós se paró y tuvun que ponelu en hora otra vés. Y la mañana el lunis (o sea, esta mañana) se golvió a paral.

Pos sí, paisanus, pa esu es pa lo que vali el cambiu de hora. En vés de ajorral energía lo que jadi es derrotal los nuestrus cuerpus, la nuestra salús y el nuestru patrimoñu (porqu'el relós de Peñaparda es un patrimoñu d'El Rebollal, de lo pocu que mos va queandu). Más les vali alos mandamasis que se dejin de tantas pamprinas y de tantu jadeli judiás al personal y se dediquin a gobernal bien, que pa esu cobran... ¡¡NO AL CAMBIU LA HORA!!

Palra d'El Rebollal
¡¡RESPETU Y OFICIALIDÁ!!

NOTA: afotu del relós de Peñaparda (20 d'eneru de 2008)

Acidentis

2009-03-28T10:04:00.002+01:00

Ya llevaba muchu tiempu sin escribil ná nel blog. Quería habel chalráu de la primavera y esas cosas peru, comu idin los partis de la teli, "la actualidad manda".

Y es que menúa racha d'acidentis himus teníu en Villarrubias.

El primeru, el de Miguel (pa lus forerus, "El Viriu"). Y es que el miércolis estaba pintandu la chiminea la su cassa cuandu, al subil (u al bajal, qué sabemus) se le escachó unu de los peldañus de la escalera, y jué a dal con los sus güesus en la calli. Se jidu una pitera en la cabeza (quiciás se dió en la escalera al cael) y tenía un oju jincháu. Además, paici que se escachó tamién un brazu. Esa mesma mañana vinu la UVI del 112 pa llevalu a Ciarrodrigu (menúa pará inútil en metá el caminu, lo que tenía de habel es un HOSPITAL comu Dios manda y no el chicorzu que han jechu) y dispués a Salamanca al hospital.

El segundu, el de una cuñá de la ex-alcaldesa de Villarrubias, una hermana del su maríu. Paici qu'estaba limpiandu los canalis de la su cassa, en la Calli la Ilesia, cuandu al pisal la uralita se risbaló y cayó al suelu dendi 4 metrus lo menus. Esta vés tuvu de venil el helicópteru pa llevala ligiera a Salamanca, porque la cosa parecía gravi. Al final, sigún me diju la corréa, paici ue tieni derrotá una muñeca y anguna vértebra de la espalda. Y entovia puedi dal gracias porque esas caías son mú malas. Esti jasta salió en la arradiu y en los periódicus. Vos pongu el enlaci con la noticia:

Güenu, pos asina estamus n'El Rebollal. Dendi esti rinconinu de la redi un abrazu mú juerti pa dambus dos, y a vel si se ponin güenus prontu, que menudu sustu mos han dáu.

Palra d'El Rebollal
¡¡RESPETU Y OFICIALIDÁ!!

Carnavalis

2009-02-20T08:34:00.005+01:00

Ya estamus llegandu a finalis de jebreru, y ya se oyin pol tólus láus los soníus de los Carnavalis, y la propaganda de los Carnavalis de lugaris más lejanus (comu Tenerifi, o Cádis, o Brasil) y de Carnavalis más cerquina de nusotrus, comu los de Ciarrodrigu.

Peru en los nuestrus pueblus siempri ha habíu Carnvalis, tan auténticus y tan güenus comu tós esus tan famosus que hai por ahí. Quiciás, entovía más auténticus. Peru ya se sabi, muchu idil que hai que defendel a los pueblus, y luegu es de los primerus que se olvían. Peru esu es otru cantal...

A lo que ibamus. En lo nuestrus pueblus tamién se celebran los Carnavalis. ¿Quién no ha oyíu palral de "La Charrasona"? Es el cantal típicu de lo nuestrus Carnavalis. ¿Quién no la ha oyíu cantal anguna vés? ¿Quién no la ha cantáu anguna vés? Por si acasu, aquí vos pongu un poquinu de la letra, tal y comu la cantan nel discu "Cantaris Antigus de Roblea":

La Charrascona está mala
no es por falta de alimentu
que a la cabecera tieni
las zancas de un burru muertu.

Que andi, la Charrascona está mala,
que güelvi, la Charrascona se mueri.

Tamién nel discu de Peñaparda, "El pandero cuadrado de Peñaparda" hai otra versión, anque no en la nuestra lengua.

Peru además de la Charrascona, hai más personajis carnavalerus ena nuestra tierra. Por ejempru, la qu'en Peñaparda se llama "Vaca Romera" y en Villarrubias "Vaca Galana", un personaji disrazáu de vaca que se dedicaba a correl polas callis detrás de los dagalis pa asustalus (anque sin jadelis ná, craru). Quiciás los famosus incierrus carnavalerus d'otrus lugaris nacierun asina...

Peru no sólu esu. El Martis de Carnaval siempri salía la geni a correl las callis cantandu y pidiendi por el lugal, vestíus de "jorramachis", otra espresión mú típica de los nuestrus Carnavalis. Y mú bien que lo pasaba tó'l mundu.

En Peñaparda por segundu añu, la asociación el panderu va a jadel una comía el Domingu de Carnaval, con baili adispués. Y ya hai unus añus que la genti ha güeltu a salil, pola su cuenta y riesgu, el Martis de Carnaval vestíus de jorramachi con el tamboril, con sartenis, con tó lo que pillin, pa pasalu bien. El primel añu salimus ná más que 4; el segundu, ya salimus 8. El añu pasáu ya juimus 20. Y esti añu, si Dios quieri y el tiempu lo permiti, golveremus a salil.

Pos ná, paisanus. Dendi esti rinconinu de la redi vos animu a salil en Carnavalis, a salil y a pasalu bien enos nuestrus pueblus. Lo nuestrus Carnavalis son tan güenus comu los que más, quiciás muchu mejoris y más auténticus. Esti añu, salgamus a las callis d'El Rebollal y recuperemus el nuestru Antrueju, el nuestru Carnaval.

Palra d'El Rebollal.
¡¡RESPETU Y OFICIAIDÁ!!

Estoi nomináu

2009-02-03T07:47:00.004+01:00

Pos sí, paisanus. No es cosa de ningún programa de telivisión ni ná d'esu. Lo que pasa es qu'es istitutu "León Felipe", de Benaventi (Zamora) ha sacáu unus premius a la música tradicional, los Premios MT 2009 y, polu que se vé, estoi nomináu pal premiu "Joven Valor" por tocal la gaita y el tamboril. Asina vieni nel enlaci de la página de los premius:

Tamien me dijun esti fin de semana que había salíu pubricáu en un periódicu, nel Tribuna de Salamanca del lunis 26, idin que con un retratu y tó. Nel periódicu en interné tamién salió la noticia, anque sin afotu. El enlaci es:

La verdá, nunca pensé que me juesin a nominal a un premiu asina, muchu más cuandu los candidatus los poni otra genti. Y no creu que al final me vaya a lleval premiu ningunu, porque hai mucha genti mú güena nominá. Peru ya el que te mientin y sepan de ti pa tenelti en cuenta pa unus premius ya es un premiu de pol sí. A los que s'acordarun de mi pa éstu, muchas gracias.

Güenu, dagalis. A vel en qué para tó estu. Comu ya diji aniantis, no créu que saqui premiu ningunu. Peru ¿y si al final sacu algu? Soñal es gratis...

Palra d'El Rebollal.
¡¡RESPETU Y OFICIALIDÁ!!

Un inviernu comu los de antis

2009-02-02T01:37:00.006+01:00

D'un tiempu a esta parti siempri se había oyíu idil a la genti que los inviernus ya no son comu los de antis, que cuandu eran nuevus llovía y nevaba muchu, que caían unus yelus de miéu,... Pos bien, paici qu'esti inviernu es comu los que mos contaban los nuestrus padris y agüelus: un inviernu con fríu, agua, nievi y yelus. O, lo qu'es lo mesmu, un inviernu comu los de antis.

Y es qu'esti inviernu estamus teniendu de tó. Himus teníu agua. Bien es verdá que menus de la que necesita el campu, peru mucha más qu'otrus añus. Yelus han caíu muchus y bien grandis. El 9 d'eneru tuvimus n'El Rebollal alreol de los 15 gráus pol baju el ceru (-15ºC). Airi, tó'l que quieras y más. Y nievi, mucha nievi.

En lo que llevamus d'enverná ha neváu lo menus 5 u 6 días, y angunus días ha síu muchu lo que ha neváu. Sin il más lejus, hoi mesmu ha caíu una nevá de miéu, dendi la madrugá jasta'l meyudía. Y con unas dondeás d'airi de miéu.

Asina mos jué. anque de seguru que no ha salíu en ningún mediu de comunicación, n'El Rebollal himus estáu sin lús dendi las 7 de la mañana jasta la hora de comel, alreol de la una y media de la tardi. Las callis, lenitas de nievi estaban. Y el campu... ¡Madrita mía! anguna genti me ha dichu que había jasta 25 ó 30 cm de nievi.

La verdá, jadía muchu tiempu que no teníamus un inviernu comu ésti, un inviernu de los de antis.

Palra d'El Rebollal.
¡¡RESPETU Y OFICIALIDÁ!!

NOTA: Afotu de La Puenti de Peñaparda cona nievi caía ena mañana del 1 de jebreru

¡Menudus yelus que cáin!

2009-01-12T18:12:00.005+01:00

¡Pos sí, paisanus! ¡Menudu fríu está siendu esti inviernu!

Dendi las Naviadis están siendu los días más fríus que yo recuerdu dendi que vivu n'El Rebollal. Güenu, quiciás el primel añu que estuvi jidu el mesmu fríu, peru antoncis no tenía ná pa medil la temperatura.

Esta vés sí, porque dendi hai un par de añus tengu'n termómetru puestu ena terraza pa vel el fríu (o el calol) que jadi. Y estus días han síu fríus peru de verdá. Esta nochi la más baja han síu 5 gráus pol baju el ceru (-5ºC), peru antiel nochi el mi termómetru cogió la temperatura de ¡9'3 gráu pol baju el ceru! (-9'3ºC), y antisdantiel nochi de -8'2ºC. Y esu el mi termómetru, qu'está guardáu entri los tiestus de la terraza, que de seguru qu'ena calli había un par degráus menus, y pa'l Castillu y pa'l Ríu Fríu de seguru que llegarun jasta los -14 ó -15ºC. Normal que el ríu estuviesi heláu.

Ayel mañana estuvi a vel si s'había heláu el agua la pesquera y asina estaba, helaíta del tó. El ríu estaba heláy dendi la pesquera jasta la puenti.

Enos nuestrus pueblus mucha genti está sin agua porque se le han heláu los contaoris. Y muchus se han reventáu por el fríu.

Pos ná, lo dichu: esti añu está siendu fríu peru de verdá. ¡Menudus yelus que cáin!

Palra d'El Rebollal.
¡¡RESPETU Y OFICIALIDÁ!!

NOTA: esta es una de las afotus que saqué ayel de la Pesquera del Riufríu

104 añus

2009-01-04T18:40:00.003+01:00

¡Saludus, paisanus!

Lo primeru de tó, ¡¡FELÍS AÑU NUEVU!!. Y es que no escribía naíta nel blog dendi el añu pasáu. Ya iba siendu tiempu de ponel anguna cosina, y quería apencipial con una güena noticia.

Pos la güena noticia de hoi es que la Tia Gora, de Peñaparda, ha jechu hoi ¡¡104 añus!!. Pos sí, cientu cuatru ná más y ná menus. Y ahí la tenemus, comu si ná.

Anguién en Peñaparda llamó a los de la teli de Ciarrodrigu pa que la viniesin a grabal y allí estuvun, grabandu a la Tia Gora tocal el panderu (que le trujun pa que saliesi con él ena teli). ¡Y con qué saleru lo tocaba y cantaba! ¡Paici mentira qu'esa mujel tenga el tiempu que tieni!

¿Y cómu jadel pa llegal a esus añus? Pos de seguru que naidi de nusotrus va a llegal a los 104. Ni siquiera a los 100. Y muchu menos cona salú que tieni la Tia Gora. Ya lo despricaba nel editorial del númeru 13 de LA GURULLA, peru se puedi resumil con cuatru cosinas: trabaju, güena comía, güenus paséus y güen humol.

Güenu, dagalis, habrá qu'esprimental pa vel si llegamus anque sea a viejus.

Feliciadis, Tia Gora.

Palra d'El Rebollal.
¡¡RESPETU Y OFICIALIDÁ!!

NOTA: esta afotu de la Tia Gora la jidi la mesma tardi del su 104 cumpreañus

Tocandu en San Martín

2008-11-15T12:27:00.007+01:00

El pasáu martis, 11 de noviembri, era el día de San Martín de Tours, o sea, San Martín de tóa la vía. Ya sabéis el reflán: a tó cerdu le llega'l su San Martín. Además de sel una fecha señalá pa los cerdus, tamién es el patrón d'unu de los pueblus vecinus d'El Rebollal: San Martín de Treveju. Y, al sel al patrón del lugal, me llamarun pa tocal allí.

De siempri me ha gustáu muchu bajal a San Martín. Es unu de los mis pueblus preferíus. Anque esi día bajé a "trabajal", peru es un trabaju d'esus que, de verdá, jadin disfrutal abondu a tó el que tieni amol pola cultura tradicional.

Lo primeru que m'encontré al llegal allí a las 7 de la mañana a tocal la alborá jué al "señol de los cohetis" ("foguetis" ena palra mañega), y que qu'aniantis d'apencipial yo a tocal el tamboril ya estaban sonandu los cohetis. Dispués me pusi a tocal la alborá polas callis del lugal. A esas horas, y cona arquitectura tradicional de San Martín (casas altas con entramáu en callis estrechinas), la música tieni un soníu mú güenu o, comu idin los músicus, tieni mú güena "acústica". O sea, se me oyía "que te cagas" por tó'l lugal. Peru no sólu esu. acostumbráu comu estoy a il tocandu sólu polas callis, en San Martín tenía una compaña de ¡15 presonas! O sea, qu'ibamus jadiendu l'alborá lo menus una compaña de 16, con castañuelas y botella d'anís d'acompañamientu. Y la genti salía a ofrecelmus aguardienti pa que no se mos ensecasi'l gañoti.

Comu no pué sel menus, el tema de la lengua propia del lugal, el mañegu, jue otra cosa que me gustó muchu (siempri me gustó). Allí, del grupu qu'estaba conmigu, lo palraba el 90 por cientu de la genti. Y lo qu'es más emportanti: estaban orgullosus de palralu y de tenel esu nel su pueblu. Porque tienin mú presenti que la su lengua es algu que les jadi especialis. Y porque tienin mú presenti qu'es algu que han recebíu d'herencia de los sus padris y agüelus. ¡Y qué orgullosus estaban! "cuasi" comu ena nuestra tierra que, menus un grupinu de amantis d'esta tierra, los demás tienin vergüenza de palral la nuestra lengua, y jasta hai angunus vendíus que lo que quierin es acabal con ella...

Peru es qu'allí el tema de la lengua lo tienin mú presenti en tó: los nombris de las callis (lo mesmu que hogañu en Robrea, peru dendi jadi muchu más tiempu); los demás cartelis del lugal (los que te idin p'andi está el ayuntamientu, el conventu, la farmacia,...); los nombris de los negocius (por ejempru, el "bar Ángil", la "Boiga de cumías",...); el pregón del ayuntamientu lo mesmu en cstellanu qu'en mañegu; y lo que más me llamó l'atención: ena mesma misa el cura diju la homilía en mañegu. ¡Impensabri en cualisquiera de los nuestrus pueblus! Del tema de la lengua podría estal palrandu muchu más largu, peru dejaremus un poquinu pa otrus días.

Otra cosa que me llamó muchísimu la atención: la procesión. Primeru porque ¡la jidun antis de jadel la misa! No lo había vistu ena vía. Y dispués porque, abriendu pasu a "San Martiño" (comu lo llaman allí, mientris qu'aquí le cambian el nombri a Santu Ferinu y a San Silveriu) polas callis del lugal iban, además de la crús y los cirius, un montonáu de pendonis con imáginis de santus, cristus y vírginis. ¡Qué políu de vel, dagalis! Esty sí lo había vistu una vés nel pueblu de La Alberca el 15 d'agostu.

A lo que ya no me quedé jué a la otra procesión, la que lleva a la genti de "boiga en boiga" a probal el vinu nuevu del añu. Y es que dispués tenía de conducil. Ya se sabi, si bebis no conduzcas...

Pos asina jué el mi día de San Martín nel pueblu que, con más orgullu, lleva el nombri del santu: San Martín de Treveju. Estamus acostumbráus a qu'en los nuestrus pueblus se presumi muchu de la cultura tradicional y cómu se conserva. Peru ¡cuánt mos quéa por aprendel!

Palra d'El Rebollal
¡¡RESPETU Y OFICIALIDÁ!!

Otra dagala más

2008-11-08T20:29:00.002+01:00

Pos sí, paisanus. N'El Rebollal estamus de noragüena, pos eti mes mos ha nacíu otra dagala más.

Esta dagala tieni de nombri Alicia, y es metá payenga (por parti de madri) y metá peñapardera (por parti de padri), asina que somus dos pueblus de la comarca los qu'estamus contentus.

Que sepáis que la dagala nació'l 2 de noviembri, lo que pasa es que no me hi enteráu jasta esta mañana. Peru güenu, la alegría ha síu la mesma.

Dendi esti rinconinu de la redi, la mi noragüena a los padris, y la mi bienvenía a la dagala.

Esperamus dis quí a pocu dal la bienvenía a más dagalis ena nuestra tierra, pos hi oyíu que hai angunu más en caminu.

Peru, polu prontu, dal la bienvenía a los que ya están aquí. Esta vés, la reina eris tú, Alicia: BIENVENÍA.

Palra d'El Rebollal.
¡¡RESPETU Y OFICIALIDÁ!!

Castañas y froris

2008-11-06T23:30:00.006+01:00

Ya prontu jadi una semana dendi que en la nuestra tierra (y tamién juera d'ella) se celebró la "fiesta" de Tólus Santus.

Estus días de siempri juerun especialis, un tiempu pa acordalsi de los que ya nu están con nusotrus, de los que mos dejarun, de los que murierun.

Hogañu los cristianus celebran esta "fiesta" yendu a misa y jadiendu vesita a los muertus enos ciminterius. Estus lugaris, en algu que puedi parecel comu'n cuentu, s'enllenan de vía más que nunca, pos quien más quien menus le va a lleval a los sus familiaris froris pa que la su tumba esté polía. Y, anque mucha genti no pisa nel ciminteriu en tó'l añu, esi día va a recordal a los que ya nu están con nusotrus.

Anque no sólu de frotis vivi el hombri n'esti tiempu, anque bien verdá es que los que vendin froris es justu esti tiempu nel que más vendin en tó'l añu. Esti tiempu es tamién el tiempu las castañas. Y la fiesta de las castañas sí qu'es una fiesta de verdá, porque no es una fiesta tristi comu la de Tólus Santus, sinu una fiesta alegri de dal gracias polus frutus arrecogíus ena cosecha, de fiesta pola llegá el tardíu, d'alegría por uñilsi toa la genti alreol de la lumbri a comel castañas asás, cantal, bailal, contal hestorias,...

A esta fiesta se la conoci con muchus nombris: magostu, amagüestu, calbochá,... Y lo prencipal es siempri lo mesmu: pasalu bien comiendu castañas. ¿Que es una fiesta menus religiosa? Los cristianus dirían que sí. Anque a las vecis pasa comu los romanus: que pa ellus eran bárbarus tólus que nu eran romanus. Pos pa los cristianus lo mesmu: son profanus tólus ritus que no son cristianus. Anque es natural que tóas las religionis piensin que la su religión es la verdaéra.

Esu nu quieri idil que los ritus "profanus" sean menus religiosus que los que tienin de vel con los curas y las misas. El il a los ciminterius es un ritu de recordal y honral a los muertus. El comel castañas es un ritu de dal gracias polus frutus arrecogíus nel veranu y nel tardíu.

Y un ritu que tamién se jadi por esti tiempu es el que tóas las vísperas de Los Santus jadi Ángel Rufino de Haro, "El Mariquelo", a la Catedral de Salamanca pa dal gracias por qu'el terremotu de Lisboa del añu 1755 no jidu ningún mal en Salamanca.

Se jadin muchas más cosas n'esti tiempu. Angunas, que trujun de juera, s'están poniendu de móa hogañu. Anque, dendi esti rinconinu de la redi, apostamus por defendel lo nuestru. ¡Viva la fiesta de Tólus Santus! ¡Viva'l magostu! ¡Y viva'l Mariquelu!

El cambiu la hora

2008-10-28T18:37:00.002+01:00

Esti fin de semana, comu dendi jadi ya unus 30 añus, se ha jechu en tóa Uropa esu del cambiu de hora del tardíu, asina que a las 3 horas de la madrugá del domingu golvierun a sel las 2.

¿Por qué se jadi éstu? Idin que pol mé de qu'asina s'ajorra energía. Peru ¿quién y cómu s'ajorra energía?

Pos no sé. Polu prontu, enos nuestrus pueblus escureci aniantis, asina que tenemus d'arcendel las lucis aniantis pa no estal a escuras. Asina qu'esi "ajorru" no puedi sel pa la genti normal, que al escurecel una hora antis tieni d'arcendel las lucis una hora antis. Pa mi qu'esu no es ajorral, sinu tólu contrariu. Y aquí, n'El Rebollal, entovía tenemus suerti, porque escureci un cuartu d'hora más tardi que, pol ejempru, en Madrís, y de seguru que media hora más tardi qu'en Barcelona.

Enos pueblus tampocu se ajorrará muchu porque las lucis, anque s'apagan una hora antis a la mañana, hai qu'arcendelas tamién una hora antis a la nochi. Las horas de lús son las mesmas, anque cambien la hora.

Asina que no ajorramus lús en cassa, no s'ajorra lús nel alumbráu púbricu de los pueblus, ni enos ayuntamientus,... ¿Dóndi s'ajorra antoncis?

Nel mi parecel, no s'ajorra en ningún láu, polu menus la genti de la calli. Y, además de no ajorral, no tenemus más qu'afrontus y mal cuerpu pol mé del cambiu la hora. De seguru que ná más ganan con éstu cuatru, los cuatru de siempri que ganan con tólus cambius.

Y lo peol es qu'encima mos quierin jadel creel que es güenu. Pos señoris, no créu que el gastal más lús por tenel que arcendela una hora antis sea ná güenu. Ni los trastornus del sueñu y las comías que tenemus tós pol mé del cambiu la hora. Me da a mi qu'estu del cambiu la hora es otru cuentu y otra mentira comu tantas y tantas que mos cuentan cá día pa justificalsi ellus, y pa atontal a la genti y así podel manipulala mejol.

Que se dejin de tantus cuentus y dejin a la genti tranquila.

Palra d'El Rebollal
¡¡RESPETU Y OFICIALIDÁ!!

Moras

2008-10-09T23:27:00.004+02:00

Una de las cosas de las que más m'acuerdu de cuandu era un dagal es el salil a moras. Cogía un cubinu, o anguna cosa asina y me iba por el barriu El Jornitu de Peñaparda, andi antoncis había muchus zarzalis que daban güenas moras, y lo enllenaba.

Bien es verdá que hai que tenel cudiáu con las parés qu'estaban mediu esbarrungás, con los zarzalis,... ¡Peru qué güenas estaban las moras! No jadía más que llegal a cassa y polu menus un pratu de moras con azucal me jincaba. Y con las demás se jadía confitura, una confitura qu'es de lo más güenu que eníamus antoncis, y que me llevaba en tarrus pa merendal cuandu vivía en Madrís.

Hogañu ni vivu en Madrís ni soi un dagal, polu menus pol el tiempu que tengu. Peru me sigui gustandu esu de il a moras, anque ná más sea una vés, polu menus pa catalas. Asina qu'el otru día cogí un cubu y me recorrí toa Peñaparda pa cogel unas cuantas moras, dendi las Majaíllas, jasta'l Caminu Payu, pasandu polus Cotorrus y El Jornitu. La verdá es que no cogí muchas (este añu ha habíu pocas moras, y malatas), peru sí hi cogíu moras abondu pa golvel a sentilmi comu cuandu era un dagal.

Cuandu llegué a cassa, ¿que pensáis que jidi lo primeru? Cogel un pratu de moras, echali azúcal pol cima,.. ¡y p'adentru! Otras cuantas las metí en almíbal, pa tenel moras pa cuandu no las haiga. Y otras las himus jechu confitura. No es el ganal dineru, anque tólus añus las compran (polu menus en Villarrubias) y m'acuerdu que de dagal tamién cogiamus pa vendelas y sacal unas perras. Tampocu es enllenal la despensa, porque hogañu quien más quien menus tieni la cassa acomolgaíta de cosas pa comel, más de lo que tuvun nunca los nuestrus padris y agüelus.

Pa mi lo mejol de salil a moras es recordal viejus tiempus, golvel a sentil comu cuandu eramus unus dagalis. Y tamién el paseal por el campu y vel los zarzalis, los bruñus,... toas las prantas de las que tenemus bien abondu ena nuestra tierra. Y oyel a los pájarus, los burrus, las vaquis,...

La verdá, es algu que dendi aquí recomiendu a toa la genti. No dejéis moril al dagal que tós tenemus drentru. Quiciás, salil a moras puedi ayual a mantenelu vivu.

Virgin del Rosariu

2008-10-06T19:57:00.004+02:00

Ayel domingu, primel domingu d'otubri, jué la Virgin del Rosariu. No es que yo sea mú religiosu ni ná d'esu, peru esti día estaba antaú acomolgaítu de tradicionis.

La Virgin del Rosariu era ena nuestra tierra una fiesta con mayordomus y madrinas. Comu fiesta religiosa, se jadía misa (ayel hubu misa pol mé de qu'era domingu, que si no ná de ná). Peru lo mejol venía dispués de la misa.

Enos nustrus pueblus se jadía el Ofretoriu. Ya sé que se jadi en muchus pueblus de la comarca (no hai más que leel los periódicus del fin de semana). Lo que tienin d'especial los nuestrus ofretorius, tocáus con gaita y tamboril, que no tienin los d'otrus lugaris es que los ofretorius de los nuestrus pueblus se bailaban, polu menus los de Peñaparda, Robrea y Villarrubias, anque de seguru que el de Payu tamién. Con el baili las madrinas le ofrecían a la Virgin unas velas y unos rosconis. Dispués, los rosconis se subastaban y los que tenían "la obrigación" de compralus eran los novius de las madrinas.

Peru, ¿qué mos ha queáu de tó esu? Pos poca cosa. Hogaú ya no se jadi ni ofretoriu, ni misa, ni procesion, ni se subastan los rosconis ni ná de ná. El casu es que cuandu vinun de nuevus los curas que tenemus agora quitarun tó estu de los ofretorius en lo que yo piensu que es una mala manera d'entendel la "puerza religiosa" (´¿a qué me suena a mi estu de la pureza religiosa?). Asina, toas estas cosas que de siempri se jidun ena nuestra tierra las quitarun, y mos dejarun a velas venil. Angún día tendríamus que palral bien abondu de tóas las nuestras tradicionis que mos han quitáu "nel nombri de Dius"...

Por suerti, grupus comu "El Fandangu" de Robrea y el grupu de Peñaparda han conseguíu que nu se olví el baili del ofretoriu, y entovía se baila enas actuacionis que se tienin nel veranu anque, por desgracia, ya no se baila nel tiempu que se tenía de bailal, qu'es esti día de la Virgin del Rosariu.

Y agora vieni lo más curiosu. Pueblus que de siempri han síu menus ricus que los nuestrus en tradicionis resulta que conservan el Ofretoriu el día que siempri se ha jechu. Y los nuestrus pueblus, que de siempri han presumíu de guardal las tradicionis (en angunus pueblus se presumi d'estu más qu'en otrus), jadi 20 añus que no se jadi y lo qu'es peol, ni cuenta con ellu.

Idi el reflán esu de "dimi de qué presumis, y te diré de qué carecis". ¡Y qué verdá es! Vas mos vali que mos dejemus e tantu presumil y mos pongamus de verdá a defendel las tradicionis, TOAS LAS TRADICIONIS.

Al vel cuál es el primel pueblu d'El Rebollal en jadel el Ofretoriu el día que siempri jue: el día de la Virgin del Rosariu.

Bienvenía al lugal

2008-09-03T20:20:00.005+02:00

¡Güenas, paisanus!

Ya jadia tiempu que no escribía ná nel mi blog, y es que no me ha vagáu pol mé el trabaju. Peru en llegandu setiembri por aquí ya mos himus queáu los poquinus de siempri (por desgracia, porque siempri gusta más el vel los pueblus llenus de genti), asina que agora vaga más escribil.

Y p'apencipial con algu alegri, ná más idilvus qu'en Peñaparda somus unu más. El pasáu 20 d'agostu nació una dagala, Silvia, la única dagala que ha nacíu esti añu nel lugal. El añu pasáu nació un dagal, Rubén, peru se jue a vivil a Guinaldu, asina que Silvia está solina de los dagalis del su tiempu.

Dendi esti rinconinu del mundu quería dal la noragüena a los sus padris, agüelus y demás familia. Y dali la bienvenía a la dagalina.

Bienvenía al lugal, Silvia.

P.D. Noragüena tamién a Pablu y Tomás, de Robrea, que me paici que han teníu tamién dagalis esti añu. Me paici qu'esti añu ha nacíu otru angún dagal n'El Rebollal, peru no lo hi dichu aquí por que nu hi teníu noticia d'ellu. Si anguién sabi qué más dagalis han nacíu, que deji un comentariu a esti escritu. Por si se me olvía anguién, noragüena tamién.

Palra d'El Rebollal.
¡¡RESPETU Y OFICIALIDÁ!!

La nochi de San Juan

2008-06-24T20:25:00.007+02:00

Siempri se ha teníu a San Juan comu la nochi más corta y más mágica del añu. Anque no es verdá que sea la más corta (la más corta es la del 21 de juniu, justu cuandu entra el veranu) si que es verdá que es una nochi "mágica".

Los Sanjuanis, y la Nochi de San Juan, es una fiesta acomolgaíta de ritus religiosus. No me refieru a los ritus católicus, sinu a los que esta religión llama "paganus" (lo mesmu que los romanus llamaban "bárbarus" a los que nu eran romanus). Esus ritus "paganus" son restus de la religión más antigua de la Humanidá, la que amaba a la Madri Naturaleza, con tó'l conocimientu de qu'era la Madri la que les daba la vía, la que les daba de comel,... Y por esu los nuestrus antepasáus le daban las gracias al agua (jadiendu sagráus regatus, ríus y juentis), le daban gracias al sol (jadiendu sagráus los solsticius y equinocius),...

Peru güenu, agora no voi a chalral d'esta religión antigua, pos es largu y da pa escribil un libru. Lo que sí vamus a vel qué ritus de dal gracias a la Madri se jadin ena nuestra tierra. Ritus uñíus al solstitiu de veranu, el tiempu nel que la nochi es más corta de tó'l añu.

Por si angunu no se ha dáu cuenta, lo mesmu los Sanjuanis que San Silveriu son la misma fiesta, pos dambas dos se jadin pa celebral el solsticiu, na más qu'en días diferentis. Y en estas fiestas tenemus ritus muchu más antigus de lo que pensamus, que vienin dendi tiempus d'antis de Cristu y d'antis de los romanus. Vamus a vel angunus:

1. EL PINU. No estoi seguru de si se poni en Navafrías, peru sí es seguru de que los quintus de Peñaparda, Payu y Robrea ponin en linu en esti tiempu. En Villarrubias lo dejan pa finalis d'agostu, pa Santu Ferinu. ¿Y qués éstu del pinu? Pos es dos cosas a la vés. La primera, un ritu de fertilidá, pa que los campus, qu'en esti tiempu apencipian a dal los sus frutus, los den abondu pa que naidi pasi necesidá. Lo segundu, un ritu d'iniciación, del pasu de dagal a hombri.

2. EL CAPAZU. En Payu y en Navafrías entovía se jadi el Capazu, una foguera que, en metá la plaza, quieri dal un homenaji al Sol ena nochi más corta del añu. ¿Cómu? Pos jadiendu del capazu un trocinu del Sol ena Tierra, comu muestra de qu'el Sol (no olviemus, el que tieni que jadel que maduri el frutu) ha ganáu a la nochi. Es tamién un ritu de purifical. Lo malu y lo vieju se echa al fuegu.

3. EL AGUA. Hai un tercel ritu menus conocía: el ritu el agua. Mi madri siempri me contó que la mi agüela Benita siempri les tenía el agua de sieti juentis pa lavalsi antis del alba. Asina, idía, se quitaban los malis y no te queabas dormíu en tó'l añu. O sea, comu un ritu de purificación pol mé del agua.

Güenu, estus son los oríginis de los Sanjuanis y San Silveru. No hai que olvidal lo que de verdá se celebra: el solstitiu de veranu, el tiempu nel qu'el sol gana la batalla a la nochi, el tiempu nel que la nochi es más corta.

Jasta aquí lo religiosu. Pa'l que quiera vesital los nuestrus pueblus y venil de fiesta, vos digu que lo mesmu en Robrea qu'en Payu han atrasáu tó (menus la misa) jasta los días 27, 28 y 29 de juniu. Asina, vamus a tenel:

VIERNIS 27
A la tardi, el pinu (alreol de las 8)
A la nochi, verbena (alreol de las 11)

SÁBADU 28 y DOMINGU 29
A la mañana, incierru (alreol de las 12:30)
A la tarde, capea (lreol de las 6 y media)
El sábadu a la nochi, verbena

No pongu los programas de los dos pueblus porque son cuasi los mesmus. Ná más cambian dos cosinas:
El viernis a la nochi, antis de la verbena, se jadi el Capazu en Payu.
El viernis de madrugá (alreol de las 4) sueltan una vaquilla en Robrea (y dispués, chocolati nel bar "El Rebollar").

Pos ná, dagalis, a disfrutal de los Sanjuanis.

NOTA: la afotu es del Capazu de los sanjuanis de Payu del añu 2006

Palra d'El Rebollal ¡¡RESPETU Y OFICIALIDÁ!!

San Silveriu 208

2008-06-17T22:52:00.003+02:00

Güenu, dagalis, ya tenemus encima las fiestas de los nuestrus pueblus.

Las primeras que vienin son las de San Silveriu, en Peñaparda, que van a sel dendi'l juevis 19 jasta'l domingu 22 de juniu. Los programas están jechus y repartíus por ahí, y anque el programa ná más poni dendi'l 20, tamién hai cosas el 19. Vos pongu el programa aquí.

JUEVIS 19 DE JUNIU
19:30 Se poni el pinu
22:30 Baili ena praza con gaita y tamboril pol José Benito, tamborileru del lugal

VIERNIS 20 DE JUNIU
8:30 Alborá con gaita y tamboril jecha pol José Benito, tamborileru del lugal
12:00 Misa a San Silveriu
13:00 Incieru
18:30 Capea
23:00 Verbena cona orquesta MARENGA

SÁBADU 21 DE JUNIU
13:00 Incierru
18:30 Capea
23:00 Verbena cona orquesta PREFIJO

DOMINGU 22 DE JUNIU
Día los dagalis, con tren, castillu y Fiesta la Espuma

Pos ná, dagalis, que sepáis qu'estáis tós envitáus a venil a Peñaparda, y los que vengáis esperu que lo paséis mú bien. ¡VIVA SAN SILVERIU!

¿Cuándu va a paral éstu?

2008-06-09T18:35:00.006+02:00

¡Mú güenas, paisanus!

Ya estaríais idiendu que había dejáu d'escribil nel blog. La verdá es que lo hi eniu derrotáu muchus días y, jasta que nu ha güeltu a furrulal, no me hi puestu a escribil otra vés. Peru hi güeltu con más juerza que nunca a chalral alreol de la nuestra tierra, de la nuestra cultura y, comu no pué sel menus, a defendel la nuestra lengua y el nuestru patrimoñu.

Y alreol del nuestru patrimoñu es esti escritu de hoi lunis.

Áina si ha pasáu un mes dendi que pasó, peru a mi entovía me dueli comu si juesi d'ayel. Vos cuentu. El pasáu lunis, 12 de mayu de 2008, jadi agora 4 semanas, el nuestru patrimoñu tuvu una pérdida que es difícil que se puea recuperal angún día, más pol mé de la genti que tenía de movelsi pa recuperau que de lo que puedi costal recuperalu.

Ya estaréis idiendu: ¡deja de dali güeltas, dagal. ¡Dilu ya! Güenu, allá va. Resulta que esi tristi día, un día de lutu pa tólus que quierin, anque ná más sea un poquinu el nuestru patrimoñu, quitarun el retabru de la ilesia de Peñaparda. No es que lo robasin, sinu que tenían de quitalu pol mé la carcoma.

Jasta ahí pos güenu, si no había más remediu que quitalu, qué le vamus a jadel. Peru esi no es el problema. Lo malu es que van a dejal la ilesia asina, sin retablu ni ná. Yo ya las tuvi esi día con el cura, y le dije a las craras lo que piensu: que una ilesia sin retabru no es una ilesia, sinu una navi industrial. Pareci que quierin dejal la navi lo mesmu que la de Villarrubias.

A mi me dueli nel alma el idilu peru hogañu, dendi que la "arregrarun" (anque habría qu'idil que la DERROTARUN), la ilesia de Villarrubias tieni de sel la más fea de toa la provincia de Salamanca. Y hogañu, han jechu de la de Peñaparda si no la segunda más fea, quiciás la tercera. ¡Una ilesia sin retabru! ¡Esu ni es ilesia ni es ná!

Peru güenu, sigún el parecel del cura, los retabrus son cosa del pasáu, de otrus tiempus. O sea, qu'el retabru de la ilesia de Peñaparda, el de la ilesia de Villarrubias, los ofretorius de Robrea, Peñaparda y Villarrubias... estorbaban.

Y lo que es peol, naidi ha movíu un déu pa no perdel lo que tenemus. Mú al contrariu, arriman el hombru a echal una manu pa vel si lo perdemus más ligierus...

Güenu, lo voi a dejal aquí porque estoi apencipiandu a afrontalmi, y lo mesmu acabu insultandu a anguién, y esu tampocu puedi sel.

Peru esi día, el 12 de mayu de 2008, quedará ena mi mimoria comu un día de lutu, un día tristi, un día que tólus que queremus la nuestra tierra teníamus de recordal con vergüenza. Porque es una vergüenza cómu s'está tratandu el nuestru patrimoñu, lo mesmu el de las ilesias qu'el cultural. ¿Cuándu va a paral éstu? ¿Cuandu se va a respetal y defendel, de verdá, el nuestru patrimoñu?

Palra d'El Rebollal. ¡¡RESPETU Y OFICIALIDÁ!!

NOTA: afotu de cómu quea la navi industr... digu la ilesia de Peñaparda

Qué bonita está la sierra...

2008-04-26T12:03:00.003+02:00

Asina es comu apencipia unu de los nuestrus cantaris de boa.

Qué bonita está la sierra
con el beredu froríu
más bonita está la novia
al láu del su maríu...

Y es que la nuestra sierra está mú polía nesti tiempu. El agua, bendita agua, que ha caíu la última semana ha jechu que tó esté verdi... y de tólas coloris, pos agora con los caloris de la primavera toas las prantas estan echandu hojas y froris, y las nuestras sierras, cotorrus y demás s'enllenan de coloris lo mesmu qu'un arcu del señol.

El miércolis que pasó mucha genti de Peñaparda se jue d'escursión a Gata pola calzá, y lo que más vinun ididendu es esu, que qué bonita estaba la sierra. Y es que pocas cosas hai más polías que la sierra en primavera, con los beredus, las jaras, los chagüarzus, las escobas,... y las milis y milis de froris que salin estus días. A cualisquiel láu que miris se te van los ojus y se t'enllena el espíritu de belleza y alegría.

Asina, dagalis, pa esti fin de semana vos doi un conseju. Dispués de comel, id a dal un paséu pol el campu. Cogel un caminu, o una veréa y ponelvus a andal. Sin prisa, sin afrontus, disfrutandu de la naturaleza. Es la mejol medecina.

P.D. Consejus cuandu se va a paseal: siempri que se puea, paseal en compaña en vés de sólu; cuandu vayáis pol un caminu no vos salgáis de lo conocíu; dejal dichu a anguién p'andi se va a paseal; lleval un teléfonu pol si pasa algu; lleval algu pa bebel; lleval un gorru pa no cogel una insolación

Palra d'El Rebollal ¡¡RESPETU Y OFICIALIDÁ!!

En abril, aguas mil

2008-04-23T18:42:00.004+02:00

Polu menus, esu idi el reflán. Y esti añu paici que se va a cumpril lo que idi, pos ya hai añus que no llovía tantu comu n'esti mes d'abril. ¡Y no creáis que cuatru gotinas de ná! Unas güenas aguarrás. No es d'estrañal que los regatus güelvan a correl, las juentis a manal, los ríus s'enllenin de vía...

Peru craru, siempri vienin anguién a idil esu de "estamus jartus de tanta agua, ¡ya puía paral de llovel!". U otra genti qu'idi esu de que "los ganaerus estarán contentus". ¡Cómu puedi estal la genti tan equivocá!

Vamus a dejal las cosas bien craras, a vel si a la genti l'entra de una vés ena cabeza que el llovel tamién es "güen tiempu".
- El agua no es sólu pa los ganaerus: es pa tós, porque tós bebemus, mos lavamus y cocinamus con ella
- El llovel limpia el airi, y jadi que los microbius se vayan, y mos libra de muchus andancius
- El llovel jadi que tó esté verdi. Ná sería más tristi que vel la nuestra tierra sin esi verdi qu'es una de las sus señas d'identidá
- Si no lluevi y sigue le sequeá, no se puedin enllenal las piscinas, ni llevarán agua los ríus. Y dambas dos cosas jadin de los nuestrus pueblus unus lugaris mú interesantis nel veranu

El agua es la vía. A los que piensan que ná más el sol es "güen tiempu" les digu que del sol no se puedi bebel. Vivimus en un país con mucha sequeá, y pocas cosas son más emportantis qu'el agua. Y con esu del cambiu del tiempu, los añus van a sel cá vés más secus. Que se lo piensis dos vecis aniantis de deseal qu deji de llovel, porque quiciás nel futuru, y no mú lejotis, lo vamus a echal de menus.

P'acabal, otru reflán, que oyí un día a una mujel en Peñaparda: si el tiempu es nel su tiempu, no es mal tiempu. Y ya lo idi el reflán del títulu del escritu: "En abril, aguas mil". Disfrutemus del agua hogañu que podemus, sabi Dios pol cuántu tiempu podremus disfrutal d'ella.

Palra d'El RebollaL ¡¡RESPETU Y OFICIALIDÁ!!

Comel el jornazu

2008-03-30T19:49:00.003+02:00

Enos periódicus de Salamanca esti lunis van a palral de muchas cosas. Primeru, de la mujel que han matáu d'un tiru cona espingarda en Ciarrodrigu. Y pa los de Salamanca, de qu'es el día de comel el jornazu. Y es qu'esti lunis jadin en Salamanca lo que llaman el "Lunes de Aguas" (Lunis d'Aguas), y la genti se va al campu (el pocu que quea ena capital de la provincia) a pasa un día de fiesta y comel el jornazu (esa riquísima "empaná charra" rellena de choridu, jamón, panceta,...).

Peru craru, las modas son las modas, y anguna genti que tieni menus personalidá qu'una charra de vinu saldrán enos nuestrus pueblus a comel el jornazu esti lunis porque comu en Salamanca lo comin esti día... Pos no señoris, el Lunis d'Aguas sólu es típicu de la ciudá de salamanca, no de la provincia.

Enos nuestrus pueblus siempri himus teníu pol costumbri comelu otrus días. Pol ejempru, en Villarrubias siempri se ha comíu el jornazu el Domingu de Resurreción. En Peñaparda, el día de la Crús de Mayu. Enos demás pueblus d'El Rebollal no sé, peru de seguru que se jadi tamién esus días.

Asina que podemus escogel. O tenemus un pocu de personalidá y jademus la tradición de comel el jornazu enos nuestrus pueblus el día que se ha jechu de siempri, o le pegamus otra patá (una más) a las nuestras tradicionis y, mientris dejamus moril las nuestras, aplaudimus las de los demás.

Ya sé que lo digu siempri, peru son las nuestras tradicionis las que jadin de los nuestrus pueblus algu especial. Si las dejamus moril, si dejamus que los nuestrus pueblus pierdan la su personalidá lo habremus perdíu tó.

Porque no sólu son tradicionis los bailis y el panderu. Tamién lo es la nuestra lengua. Tamién lo son los nuestrus juegus. Y tamién lo es comel el jornazu el día que se ha comíu toa la vía.

Palra d'El Rebollal. ¡¡RESPETU Y OFICIALIDÁ!!

El Fandangu de Robrea

2008-03-27T18:45:00.004+01:00

Esti sábadu que pasó se jidu en Ciarrodrigu la Charrá, una Fiesta de folclori que tólus añus, el Sábadu Santu, se jadi ena ciudá.

Esti añu, pola parti d'El Rebollal, han estáu los del grupu "El Fandangu" de Robrea. Y lo jidun comu siempri, mú bien. Primeru, bailarun el Ofretoriu, dispués la Jota de dos Pasus, y pa acabal el Son. "El Fandangu" es un grupu que, a tólus lugaris que va, siempri cumpri y siempri deja a la nuestra tierra, al nuestru Rebollal, mú altu.

La verdá es que el grupu de Robrea mereci toas las alabancias y cumpríus que se le puedan dal.

Primeru, pol sacal p'alantri un grupu en esta tierra andi tan difícil es sacal p'alantri cualisquiera cosa. El grupu tieni ya muchus añus, y la genti qu'está en él de seguru que jadi las cosas cona mesma ilusión qu'el primel día.

Segundu, pol recuperal bailis que áina si estaban ya perdíus, comu pasa con El Son (que a mi es de los que más me gustan pol esi sabol a auténticu y esi señoríu que tienin los bailaoris al bailalu).

Terceru, pol lleval el nombri d'El Rebollal pol tólus rinconis de la provincia, cona cabeza bien alta y con tan güen arti.

Cuartu, pol defendel la nuestra lengua dendi el principiu. Ya dendi el mesmu nombri se ve esta defensa, pos está puestu ena palra d'El Rebollal: "El Fandangu". Además, hai ya unus añus (nel añu 2002) sacarun un discu con el nombri tamién ena nuestra palra: "Cantaris antigus de Roblea". Y, pol si juera pocu, nel discu cantan 3 cantaris ena nuestra lengua: "Que rompan la Jesa Arriba", "La Charrascona" y "La Joya los Caballus". Y entovía hai más. Otrus dos sonis del discu tienin el su nombri puestu ena palra d'El Rebollal: "El Fandangu" y "Pasacallis".

Asina es "El Fandangu". Siempri cona cabeza bien alta, siempri orgullosus de los nuestrus pueblus, los nuestrus bailis y la nuestra cultura. Y siempri teniendu mú craru que en drentru la nuestra cultura está la nuestra lengua. ¡Ay, cuantu tieni d'aprendel otra genti!

Noragüena, robreanus. No cambiéis nunca.

Palra d'El Rebollal. ¡¡RESPETU Y OFICIALIDÁ!!

¡Himus güeltu!

2008-03-15T19:13:00.004+01:00

Dispués d'esti líu de los votus, aquí estamus otra vés.

Esti mes que pasó hi estáu de campaña. Pos sí, amigus, yo tamién hi estáu de camapaña. Y es que, comu diji en otrus escritu, estaba pa'l Senáu por el PREPAL (Partíu Regionalista del País Leonés) y, anque era seguru que no iba a salil, a tó'l que se presenta le gusta que le votin, asina que hai que jadel un poquinu de campaña. Pa'l que tenga curiosidá, hi sacáu 534 votus (más los que haiga teníu nel votu emigranti, qu'entovía no lo sé).

Peru aquí estamus otra vés a lo que interesa: a defendel la nuestra tierra, a defendel la nuestra cultura y a defendel la nuestra lengua.

Asina que me váis a vel pol esti rinconinu de la redi muchu más de continu que estas últimas semanas. Y esperu velvus a vusotrus tamién.

Palra d'El Rebollal: RESPETU Y OFICIALIDÁ

Los votus

2008-03-05T01:02:00.002+01:00

¡Güenas, paisanus!

Como créu que tós sabéis, esti domingu es el día los votus.

Comu héis vistu, ya hai días que nu escribía ná n'esti rinconinu de la redi, y es que estu de los votus mos trai a tós locus. Y a los que estamus puestus comu candidatus pa angún partíu, más.

Pos sí, paisanus, yo tamién estoi enas eleicionis. No salgu pola teli, no salgu enos periódicus, peru soi candidatu al Senáu pol el PREPAL (Partido Regionalista del País Leonés).

No hi queríu escribil ná d'estu aniantis porque esti "blog" quieri sel, más que ná, dedicáu a la cultura y al Rebollal, no a la política. Peru comu cai que una persona d'El Rebollal, es esti casu yo, está de candidatu pa las eleicionis,´es de recibu dalu a conocel.

No quieru jadel estu más largu. Tengu otru "blog" ena redi, dedicáu ná más a estu de la política, y la su direición es: http://candidatojb.blogspot.com

Tamién, si anquién quieri vel la güeb del PREPAL, vos deju la sud ireición: http://www.gratisweb.com/prepal

Y ya sabéis, si queréis votal a anguién de la comarca, podéis ponel una crucina al láu el mi nombri. La verdá, a mi me jadi mucha ilusión que la genti de la mi tierra me dé el su votu.

Güenu, estu es tó lo que voi a palral de las eleicions nel "blog". Güenu, quiciás ponga los resultáus el lunis. Peru no más.

Lo dichu, que podéis votalmi, si anguién quieri.

Un saludu.

Tiempu de moruja

2008-02-23T23:13:00.004+01:00

En los nuestrus pueblus, en esti tiempu es cuandu apencipia a salil la moruja. Y angunu dirá, ¿y qué es esu de la moruja? Pos, pa'l que no lo sepa, es una yerbina que sali enos regatus, cona que se jadi una ensalá riquísima que se llama regaju.

Anque paici que hogañu tó está prohibíu, jasta il a cogel moruja, ena nuestra tierra siempri se ha íu a arrecogel a los regatus, y con esti aprovechamientu tradicional nunca se ha acabáu. Esu tenía de servil de lección pa aprendel aquellus que piensan que pa protegel hai que prohibil. Pos no: si de verdá entovía quea algu que protegel es porque duranti sigrus se ha aprovecháu lo que mos daba la naturaleza del mó y manera tradicional. Nunca de prohibil.

Esu sí, cuandu se va a moruja (o a jongus, o a moras, o a lo que sea) lo que no hai que jadel nunca es cogelu tó nel mesmu lugal y dejalu "limpiu". Porque asina es comu desaparecin las cosas. Hai que il y cogel un poquinu d'aquí, otru poquinu d'allí, dejandu siempri pa'l que venga detrás y pa que se recuperin las especies. Imaginalvus que salin los cazaoris a jabalinis y loa cazan tós el mesmu añu. ¿Qué iban a cazal al sotru añu? Pos con la moruja lo mesmu, hai que dejal enos lugaris andi hai pa que, al sotru añu, güelva a salil.

El mó y manera de cogala es con unas estijeras, pa que quedin las raícis nel regatu. Lo mesmu que cuandu se cogi toóa, si se cogi mal tampocu nu güelvi a salil. Asina que ya sabéis, hai que cogel poquinu de cá láu, y cuartala con unas estijeras. Si se arranca, no güelvi a salil. Y sería una pena quedalmus sin moruja pol no sbel cogela o pola avaricia d'anguna genti.

Lo mejol de la moruja, craru está, es jadel el regaju y comelu. Pa esu se jadi comu una ensalá normal: moruja, adeiti, vinagri, aju y sal. ¡Y güen provechu!

Los nombris de las callis

2008-02-18T01:10:00.004+01:00

Unu de los pueblus de la Sierra de Gata que más me gusta está juera d'El Rebollal. Es San Martín de Treveju, ena provincia de Cáciris. Los mañegus han sabíu conserval tres cosas mú emportantis:

Lo primeru, el regatu que pasa pol metá el lugal, que llama la atención sigún pisas nel centru del pueblu. Agua fría, agua crara, siempri corriendu. En otrus pueblus (comu en Peñaparda) enterrarun esi regatu que pasa pol metá. Lo qu'en San Martín es un orgullu aquí... güenu algu pa escuendel y tiral basura.

Lo segundu, la arquitectura tradicional. Las callis de San Martín están llenitas de cassas jechas al mó y manera tradicional. La genti que se pusu a arregral las sus cassas respetarun las tradicionis, y respetarun la jorma y los materialis de las qu'estaban jechas las cassas. Lo mesmu que en La Alberca. Asina, dambus dos pueblus puedin presumil d'arquitectura tradicional, y de tenel muchas vesitas pa vel las sus cassas. N'El Rebollal, se derrotan las cassas pa jadelas nuevas d'arriba a abaju, sin respetal las piedras, sin respetal los tejáus, sin respetal ná. Es que, lo mesmu que de los regatus, paici que tamién mos avergonzamus de las nuestras cassas...

Y lo terceru, quiciás lo más emportanti, es que las gentis de San Martín han sabíu guardal unu de los mayoris tesorus de la Península: la su lengua. Pos sí, lo mesmu que n'El Rebollal, en San Martín, Eljas y Valverdi tienin una lengua propia. En San Martín lo llaman mañegu; en Eljas, lagarteiru; en Valverdi, valverdeiru. Peru es la mesma lengua. Lo mesmu que cuandu n'El Rebollal en Robrea idin que palran "robreanu", en Villarrubias "mangurrinu" y en Peñaparda "peñaparderu", siendu la mesma lengua leonesa.

Peru lo mejol es vel la querencia que le tienin a la su lengua. Los dagalis la apriendin ena escuela, mientris que aquí jidun tólu posibri pa que no le aprendiesi la palra d'El Rebollal a los nuestrus dagalis. Los negocius tienin nombres en "la fala" mientris que los nuestrus (menus la "tahona El Tamborileru", en Peñaparda) ajuyin de la nuestra lengua comu de la pesti. Y lo más políu s il dandu un paséu polus pueblus y vel los nombris de las callis escritus lo mesmu ena palra del lugal comu ena lengua oficial del Estáu. Asina, comu ena afotu, se puedi leel "Calli a Fonti / Calle la Fuente". Igualitu que enos nuestrus pueblus. ¿Pa cuandu vamus a podel leel enos nuestrus pueblus nombris comu "Calli el Cristu", "Calli el Jornitu", "Calli la Juenti",...?

Esa es la gran diferencia entri esus lugaris y los nuestrus pueblus. Nel láu de Cáciris, la su cultura tradicional, incluída la lengua es un orgullu pa toas las gentis de esus pueblus. En pasandu a esti láu de la Sierra, vemus que enos nuestrus pueblus la genti se avergüenza de la su lengua.

Los tres pueblus del "Val de Xálima" son especialis. Los nuestrus cincu pueblus d'El Rebollal tamién. La diferencia es qu'ellus están orgullosus de lo ue les jadi especialis, y por esu serán especialis siempri. Y nusotrus mos avergonzamus de lo que mos jadi especialis, y cuandu éstu desapareza, dejaremus de sel especialis y seremus comu los demás. O peoris, pol dejal moril lo que mos jadía especialis.

A los señoris que mandan n'El Rebollal. No se puedi presumil de defendel la cultura tradicional estandu en contra d'una parti d'ella, quiciás de la parti más emportanti de la nuestra cultura: LA NUESTRA LENGUA. Si de verdá defiendin la cultura tradicional, es tiempu d'apencipial a dal pasus pa defendel la palra d'El Rebollal. Si no, no güelvan a presumil de defendel la cultura, porque será mentira.

Palra d'El Rebollal. ¡¡RESPETU Y OFICIALIDÁ!!

Escritus nel "blog"

2008-02-13T23:35:00.002+01:00

Güenas, paisanus.

Comu héis podíu vel, nu escribu tólus días nel blog. No es que se me haiga acabáu las ideas, que las tengu a cientus.

Lo que pasa es que me paici a mi que es poca la genti qu'entra tólus días a leel lo qu'escribu y, quiciás, esa genti que entra cá 2 ó 3 días se puedi dejal de leel cosas emportantis porque, si s'escribi tólus días, los escritus enseguía se quean m'atrás.

Por esu hi pensáu en no escribil tólus días, sinu cá 2 ó 3 días. Asina los que vesitáis esti pequeñu lugal de la redi qu'es el mi blog podéis leel las cosa con más tranquilidá, y tamién yo puéu escogel mejol los temas de los que chalral.

Créu que con esti cambiu salimus ganandu dambus dos: el qu'estu escribi y tú, qu'estás al otru láu del ordenaol leyendu lo qu'escribu.

Asina qu'es sotru esquitu va a sel pa'l viernis o el sábadu. Comu idin en angunus programas de la teli... ¡No faltéis, que pasu lista!

Recuperandu tradicionis

2008-02-10T22:56:00.000+01:00

Anque nu es comu pa tiral cohetis paici que, poquinu a pocu, se va recuperandu anguna tradición n'El Rebollal. Y es que ya iba siendu hora de que, en vés de jadel pol derrotal lo que tenemus, se jidiesi anguna cosa pa recuperal lo que s'está perdiendu.

Güenu, esta vés la alegría mos la han dáu los Carnavalis de Peñaparda. Y es que himus teníu tres días de Carnavalis nel lugal.

El Domingu de Carnaval, la asociación "El pandero cuadrado" (el panderu cuadráu) organizó una comía nel restauranti "El Castillo", seguía d'un pasacallis vestíus de jorramachi polas callis del lugal (que no se pudu jadel porque esi día llovió con muchu jostigu) y dispués, enas Escuelas Viejas, un baili al son del panderu y el tamboril, y un chocolati con biscochus.

El Martis de Carnaval, un grupu de vecinus de Peñaparda, sin estal organizáu pol ninguna asociación, salí a correl las callis del lugal cona música del tamboril. Comu no pué sel menus, toa la genti iba conus sus vestíus de jorramachi.

Y el Miércolis de Cenizaotru grupinu de presonas jidun el intierru de la sardina. Anque angunus d'estu de mantenel las tradicionis no s'enteran, y la misa del Miércolis de Ceniza la dan el juevis...

Jadi angunus añus, naidi daba un duru polus Carnavalis de Peñaparda. Peru jadi 3 añus salimus, el Martis de Carnaval, un grupinu de 4 presonas (contandu con el qu'estu escribi). Jadi 2 añus esi grupinu ya era de 8 ó 9 presonas. Y esti añu, eramus alreol de 50 nel baili del domingu, y más de 20 el Martis de Carnaval. Además, se siguin cantandu las dos tonás d'esti tiempu: "La Charrascona" y "Un Martis de Carnaval".

¿Que se puedin jadel mejol las cosas? Craru que sí. Yo hi echáu de menus que saliesi polas callis de Peñaparda la "Vaca Romera" (en Villarrubias, la "Vaca Galana"). O que se le diesi más pubricidá a la cosa (ná más se jidun unus cartelinus pa anuncial el baili que se pusun enos baris y comercius del lugal). Ni si quiera s'echó un pregón pa que la genti del lugal subiesi esa tardi a bailal a las escuelas. Peru güenu, esperemus que pa otru añu se jagan entovía mejol las cosas. Pa comu estaban los Carnavalis otrus añus, demasiáu.

Esu sí, dispués m'encargué yo de mandal las cosas que se jidun a los periódicus. Y además himus teníu la suerti de que han sacáu los nuestrus Carnavalis enos tres periódicus de Salamanca: Gaceta, Adelanto y Tribuna.

Güenu, esti añu podemus estal contentus. Los Carnavalis de Peñaparda han arrancáu. Y tienin pinta de seguil p'alantri. Ojalá güelvan a arrancal tamién enos demás pueblus d'El Rebollal.

Más de 1000 vesitas

2008-02-07T01:07:00.000+01:00

Pos sí, amigus. Esti "blog" ya tieni más de 1000 vesitas.

Quiciás sea porque es interesanti lo qu'escribu. Quiciás sea porque hai genti a la que le gusta leel cosas ena palra d'El Rebollal. Quiciás sea por sabel más alreol d'El Rebollal. Quiciás sea pa riilsi un ratinu. O quiciás, por qué no, porque le caigu bien.

El casu es que, entri unus y otrus héis jechu que esti humildi lugal, esti "blog" alreol d'El Rebollal, tenga ya más de 1000 vesitas.

Ya sé qu'estus últimus tiempus lu hi teníu más abandonáu que de costumbri peru voi a intental golvel a escribil más de continu, chalrandu de tó un pocu, peru siempri con El Rebollal y la nuestra palra bien presentis.

Muchas gracias a tólus que héis entráu a leel lo que hi escritu estus mesis. Muchas gracias a tólus que héis dejáu el vuestru parecel alreol de lo que hi escritu. Y muchas gracias, pol alantráu, a tólus que leáis los mis escritu dis quí p'alantri.

Yo, intentaré jadel las cosas tólu mejol que puéa.

Carnavalis o Antrueju

2008-01-30T20:48:00.000+01:00

Pos sí, ya tenemus aquí los Carnavalis (o el Antrueju), y anque paici que ná más jadin fiesta los de Ciarrodrigu, tamién enos demás lugaris se jadin cosas por el antrueju.

Antañu, la genti se vestía "de jorramachi", conas vestimientas más viejas que tenían. Polas callis salía la "Vaca Romera" (en Villarrubias, "Vaca Galana"), que era una presona disfrazá de vaca (cona calavera d'una vaca) que salía corriendu tras la genti. Y, comu no pué sel menus, se cantaban los cantus más propius d'esti tiempu: "El Martis de Carnaval" y "La Charrascona".

Peru güenu, hogañu, anque siempri se presumi de lo muchu que se defiendi la cultura enos nuestrus lugaris, se ha dejáu perdel cuasi tó lu del Antrueju, y se han cogíu las moas de juera (ya se sabi, lo que vieni de juera a angunus siempri le paici mejol que lo nuestru).

Con tó y con esu, enos nuestrus lugaris se van a jadel angunas cosinas. No sé si enos demás pueblus d'El Rebollal se va a jadel algu, peru en Peñaparda la asociación el panderu cuadráu ha preparán un par de cosinas pa'l Domingu de Carnaval, que vos deju en esti escritu:

DOMINGU 3 DE JEBRERU
-------------------------
14:30 COMÍA nel restauranti "El Castillo" (apuntalsi antis)
17:00 Si el tiempu acompaña, PASACALLIS vestíus de jorramachi con música
17:30 BAILI DE CARNAVAL nel Centru Cultural (enas escuelas viejas) con panderu, gaita y tamboril, rumbas, pasodobris, vas corríus,...
A toa la genti que vaya al baili, se le convidará a chocolati calienti con biscochus

Pos ya sabéis, estu es lo que se va a jadel en Peñaparda polus carnavalis. Estáis tós envitáus a venil.

Mal mes el d'eneru

2008-01-25T23:22:00.000+01:00

Anque no se puedi idil de ningún mes que sea malu por sí mesmu, n'estus últimus añus paici que los mesis d'eneru están siendu malus.

Yo no sé qu'es lu que tendrá esti mes, que paici que tólus añus se mueri un montonáu de genti. No sé en los otrus pueblus, peru en Peñaparda, en lo que llevamus del mes d'eneru, ya se han muertu tres mujeritas. La primera, la Tia Másima (que trujun hai pocus añus dendi Francia y estaba ena residencia), la segunda la Tia María "de las Patatas", y la tercera la Tia Caitana (madri de los "Piñas").

La verdá es que a la primera no la conocía, peru a las otras dos sí las había tratáu. Lo qu'es seguru es qu'eran tres mujeris mú querías nel lugal, tres mujeris que palraban la nuestra lengua y, polu menus las dos últimas, mujeris qu'entovía vestían al mó y manera tradicional, con las sayas y el pañuelu ena cabeza.

Siempri da pena que se muera anguién, anque sean presonas mayoris. Entovía dá más pena si es anguién a quien conocis, y cuantis más cerca esté de ti, más pena te da. Y, en estus casus, cona muerti d'estas presonas ha muertu tamién un pocu de la nuestra tierra y la nuestra cultura, anque n'estus casus no sea lo más emportanti.

El mes d'eneru de 2008 está siendu malu en esti sentíu. Mediu lugal está de lutu. Las familias de la Tia Másima, la Tia María y la Tia Caitana están de lutu. La nuestra cultura está de lutu.

Esperemus que jebreru sea mejol, muchu mejol.

La Tia María "de las patatas"

2008-01-21T23:26:00.000+01:00

Hai unus días mos dejó la Tia María "de las patatas", una de las mujeris que, enos últimus 15 ó 20 añus, más han sobresalíu ena defensa de la nuestra cultura tradicional y, en especial del panderu cuadráu de Peñaparda.

Nunca gusta chalral alreol d'estas cosas, peru qué menus que dedicali a la mujerita unas rayinas comu homenaji.

A la Tia María le gustaba muchu cantal y tocal el panderu, y jasta esti últimu añu siempri que pudu estuvu ena Fiesta el Panderu Cuadráu que tolus veranus se jadi en Peñaparda. La recuerdu esti veranu sentá ena praza, en una silla, viendu cómu tocaba y bailaba la genti encima el tabráu, tabráu qu'otrus añus había pisáu ella pa tocal el panderu. Y es qu'esta mujel llevaba la música ena sangri.

Con tó y con esu, lo más emportanti de la Tia María, además de sabel cantal y tocal, era que sabía jadel panderus. ¡Cuántus panderus habrán jechu las sus manus pa la genti del lugal y la genti forastera! Pos muchus, la verdá. M'acuerdu que una vés jidu con los mis padris un panderu abaju, ena cassa El Castillu, momentu del que saqué una afotu que tengu puesta nel mi libru y ena mi güeb de Peñaparda (afotu que tamién es el acompañamientu d'esti escritu). Tamién recuerdu que le jidun un reportaji de cómu se jadía el panderu pa una coleición de vídeus alreol de los "oficius perdíus" o "oficius d'antañu" (agora mesmu no m'acuerdu cómu se llama la coleición).

La Tia María siempri repartió a los demás la su música, la su alegría y los sus saberis. Y tólus que himus tratáu con ella mos queamus con un güen recuerdu.

Sirva esti escritu pa jadeli un pequeñu homenaji a la Tia María "de las patatas". Jasta siempri, Tia María.

Luminaria de San Sebastián

2008-01-18T20:41:00.000+01:00

En los nuestrus pueblus, San Sebastián siempri jué una fiesta grandi, una de las prencipalis del añu. San Sebastián siempri ha síu unu de los que, n'El rebollal, himus llamáu "Santus del Gorru", pol sel enos mesis del fríu.

Tó estu vieni a cuentu por dos cosas. La primera, porque esti fin de semana es San Sebastián. Y segundu, porque pol una vés se va a jadel algu enos nuestrus pueblus pa honral al santu.

Hogañu, lo pencipal (y cuasi lo únicu que se ha jechu jasta esti añu) ha síu la Luminaria, que es una gran lumbri, foguera o capazu, apaecía a las que se jadin polus Sanjuanis, y alreol d'ella s'ajunta la genti del lugal a chalral, calentalsi, comel choridu y patatis asás, bebel y, si se tercia (y hai anguién que ponga música), bailial. En Peñaparda es la última fiesta que los quintus del lugal celebran comu quintus.

Antañu se jadían más cosas. Sigún José Alonso Pascual, nel su libru de Robrea, nel lugal San Sebastián era una fiesta con Mayordomus. El día antis se jadía al Capazu ena praza, y el día el Santu había misa mayol, y se corrían los gallus. Al final del día se jadían las subastas del istiercul de las jessas, las marrás y la yerba los Vallis La Laguna y Las Zorreras.

Güenu, comu diji aniantis, tó estu vieni a cuentu de qu'esti añu en Peñaparda se va a jadel en peñaparda anguna cosina más que la Luminaria de costumbri. A mi me parecía que, es cayendu en fin de semana la fiesta de San Sebastián, se podía jadel nel lugal algu más, asina que pensé un programa pa dambus dos días (sábadu y domingu) y se lo di a la alcaldesa pa que lo dijiera nel plenu del ayuntamientu. Y paici sel que la cosa gustó, anque lo que tenía pensáu pa'l sábadu a la tardi no se va a podel jadel (peru lo tendré en cuenta pa otra vés). Asina, el programa e San Sebastián en Peñaparda va a queal asina:

SÁBADU 19 D'ENERU
Luminaria (nochi y madrugá)

DOMINGU 20 D'ENERU
9:30 Alborá, por José Benito, tamborileru del lugal
10:45 Misa
17:00 Baili al son del panderu y el tamboril ena praza

Anque el programa no es mú grandi, polu menus sí que esperamus pasalu bien. Y, comu no pué sel menus, toa la genti está envitá a venil a Peñaparda.

Ésto demuestra tamién una cosa: pa jadel cosas no jadi falta muchu dineru, sólu ilusión, ganas de jadel cosas y anguién que tenga las ideas.

Esta vés la idea la tuvi yo, peru la puedi tenel cualisquiera de la genti d'El Rebollal. A los que tengáis ideas, no tengáis miéu de idilselas a anguién. a vecis, jaste vos puedin jadel casu.

Quería acabal el escritu con una puesía-conjuru que jidi pa la nochi de la Luminaria (tamién le pusi música). Idi asina:

Luminaria de San sebastián
que ya ardis nel lugal.

Ardi bien juerti, ardi bien altu,
lleva lejotis todu lo malu. (BIS)

Luminaria de San Sebastián,
que ardistis, ardis y arderás.

Ardi bien juerti, damus calol,
lo vieju, lo malu, ya s'acabó.(BIS)

NOTA: afotu arrecogía de http://weblogs.clarin.com

Dagalis

2008-01-13T22:39:00.000+01:00

Anque la noticia ya es del añu pasáu, créu que tenemus d'apencipial el nuevu añu con güenas noticias.

El otru día chalré alreol de la presona más vieja de Peñaparda (y de seguru que d'El Rebollal): la Tia Gora, que jidu 103 añus el 4 d'eneru.

Peru agora voi a palral de la más nueva. Y es que a últimus de diciembri (me paici qu'el 27 de diciembri) vinu al mundu un dagal (créu qu'es un dagal, si no pidu perdón a los sus padris). Qué mejol noticia pa terminal el 2007 y apencipial el 2008 qu'el nacimientu d'un dagal. Porque, pol desgracia, es algu de lo que no tenemus abondu ena nuestra tierra.

En Peñaparda jadía lo menus 2 añus que no nacía ningún dagal. Y me paici qu'enos otrus pueblus d'El Rebollal pasa algu apaecíu. Peru esti nuevu dagal, la presona más nueva de la nuestra comarca, ha íu a nacel nel sestu pueblu d'El Rebollal: Perosín (que, anque hogañu está en drentru de Peñaparda, antañu jue el más emportanti).

Los dagalis son el futuru de la nuestra tierra, de los nuestrus pueblus. No hai cosa más tristi qu'un pueblu que no tieni dagalis corriendu y juegandu polas sus callis, o pueblus conas sus escuelas cerrás. N'El Rebollal entovía tenemus la suerti de tenel las nuestras escuelas abiertas y con dagalis. Peru comu no nacin dagalis tólus días, es noticia el que naza unu.

Dendi esti escritu quería dali la noragüena a los sus padris. Esperu que criéis al dagal polu menus igual de bien qu'estáis criandu a la su hermana. Y que la felicidá que ha entráu ena vuestra cassa esté con vusotrus y los vuestrus dagalis muchu, muchu tiempu.

Receta pa llegal a los 103 añus

2008-01-10T23:52:00.000+01:00

Esti escritu lo escribí cuandu la Tia Gora, de Peñaparda, jidu 102 añus. Lo mandé a los periódicus con toa la güena intención de que lo sacasin tal y comu lo escribí yo. Peru lo cogió un "periodista", lo cambió de lengua (el mi original estaba ena palra d'El Rebollal) y lo firmó con el su nombri. Peru güenu, esu ya pasó. Aquí vos deju lo qu'escribí antoncis (cambiandu los 102 añus del añu pasáu polus 103 d'esti añu).

El día 4 d’eneru la Tia Gora de Peñaparda jidu 103 añus. Llegal a 103 añus es difícil, peru es muchu más difícil llegal jasta esus añus con esa juerza, esa salús y esi saleru que tieni la Tia Gora. Es verdá que tieni los malis de la genti vieja, el no oyel ni vel comu la genti nueva, peru muchus quijiéramus tenel esa salús comu un robri que tieni la Tia Gora.

No soi ningún sabiu que tenga toas las respuestas, ni muchu menus el amu de la verdá. Peru sí podemus cogel comu ejempru a la Tia Giora pa, polu menus, vel un mó y manera de llegal a viejus con güena salús.

No lo hi dichu aniantis, peru la Tia Gora nació en Peñaparda nel añu 1905. De nueva estuvu trabajandu en Francia y golvió al lugal justu el añu qu’apencipió la Guerra, en 1936.

Dispués estuvu muchus añus trabajandu nel campu, y llevandu traviesas y patatis a vendelas a Ciarrodrigu, en aquellus tiempus en que se tardaban alreol de 2 días en llegal con el carru y los bués. Y otrus dos días de güelta. Una vés jasta tuvu un dgal nel caminu. Asina ya tenemus una de las cosas pa echali al nuestru guisu de llegal a viejus: el trabaju. Idin qu’el trabaju es salús y, en viendu a la Tia Gora, tieni de sel verdá.

Palrandu de guisus. ¿Qué comi una mujel que ha pasáu de los cientu? Yo se lo preguntu tós los días y podemus jadel un resumin. Pa desayunal: café con lechi y azúcal (más lechi que café), y algu pa mojal (pan, biscochus, galletas,...). Pa comel y pa cenal: frejonis, berzas, garbanzus, patatis,... Tó jechu a la lumbri en un pucherinu y con un cachinu de tocinu o de chorizu. De postir: un “golosu” (asina llama la Tia Gora a los yoguris). Y antis de ilsi a echal, una tila, pa dormil tranquilu.

Peru la receta entovía sigui. Los paséus son güenus a toas las edadis, peru cuandu se llega a vieju lo son más, pos jadin que los brazus y piernas no se quedin entumíus. La Tia Gora sali tolus días a paseal, cuandu no es pa’l Caminu Payu es a jadel anguna vesita a los sus dagalis, o a los vecinus, o a compral los golosus que tantu le gusta comel.

Y entovía tenemus otra cosina: el güen humol. Pocas vecis hi vistu a la Tia Gora renegá. Al contrariu, siempri anda con ganas de riilsi, o de bailal, o de cantal. Anque ya no baila, porque 103 aus son muchus, jasta pa la Tia Gora. Esti añu no se le ha jechu homenaji, peru sí se le jidu cuandu llegó a los cientu, y esi día echó un baili al son de la gaita y el tamboril del tamborileru del lugal. Y muchas vecis se le puedi oyel cantal nel su corral. Asina es el güen humol de la Tia Gora.

Y asina podemus vel hogañu a la Tia Gora. Siempri vestía de negru dendi la cabeza jasta los pies, con el su pañuelu, la chambra, la rebeca, las sayas, el mandil, las medias y las alpargatas. Siempri andandu p’allá y p’acá con la su cachera ena manu. Siempri contandu anguna cosina de cuandu era más nueva. Y siempri cantandu.

¿Cómu llegal a esus añus asina? Lo podemus idil con cuatru cosinas: trabaju, güena comía, güenus paséus y güen humol. Habrá que esprimentalu a vel si llegamus a viejus.

Añu Nuevu, escritus nuevus

2008-01-08T21:19:00.000+01:00

¡Saludos, paisanus!

Diréis que ya jadi tiempu que nu escribu ná en esti lugal. Pos es verdá. Peru tamién es verdá que nel tiempu las vacancias naidi se poni a leel cosas ena redi. Y esu d'escribil pa no lo lea la genti, pos no es del gustu de naidi. Asina que me hi tomáu unas vacancias d'unus días en estu de dejal los mis escritus nel "blog".

Peru dendi hoi mesmu güelvu a lo mesmu, a intental contalvus cosas d'El Rebollal, a intental que tós sepamus un poquinu más alreol de la nuestra tierra y a seguil defendiendu la nuestra palra.

Pos esu, bienveníus a nuevu añu. Qu'esti añu 2008 venga llenu de cosas güenas pa tós nusotrus, pa la nuestra tierra y la nuestra genti.

Y qu'sti añu 2008 la nuestr palra tenga el respetu y la proteición que se mereci y a la que, sigún el artículu 3.3 de la Costitución, tieni derechu.

FELÍS AÑU 2008

Felicis Fiestas

2007-12-25T22:47:00.000+01:00

Pos esu, que toa la genti d'El Rebollal pasi unas Felicis Fiestas. Tenéd muchu cudiáiu cona comía, cona bebía y, más que ná, con los cochis, no sea cuentu que tengamus angún disgustu.

FELÍS NAVIDÁ A TÓS

Villancicus

2007-12-23T23:47:00.000+01:00

La Navidá ya está aquí. Primeru, con el sortéu de la Lutería (del que ya dijimus ayel que no mos había tocáu ná). Dispués, con el partíu del sigru d'esti mes, el Barça-Madrís (que no tieni ná que vel cona Navidá, peru ha síu esta tardi). Y mañana ya es Nochigüena, y pasáu la Navidá.

En toas las casas habrúa más o menus comía, más o menus carni, más o menus pescáu, mariscus, dulcis, postris, vinus, bebías, genti,... Y villancicus.

Algu de lo que me hi dáu cuenta enos últimus tiempus (güenu, enos últimus añus) es que cá vés somus más probis. No ya de dinerus, sinu de cultura. Y es que, con esu de ponelsi modorru en desprecial lo nuestru y siempri idil que lo de juera es mejol, toa la riqueza cultural que himus teníu siempri s'está perdiendu. Esu está pasandu cona nuestra lengua, con los bailis, con los trajis, con los cuentus, con las recetas de codina, con los juegus,... Y tamién conas cancionis. Y, en drentru d'estas cancionis, con las típicas d'esti tiempu: los villancicus.

Si vos paráis a yoel a los dagalis y le idís que vos canti un villancicu, de seguru que vos canta esi que sali en toas las películas americanas, el de "Navidá, Navidá, dulci Navidá...". Y es que toa la cantidá de villancicus que se han cantáu de siempri ena nuestra tierra al final se van a queal en esu, en que los nuestrus dagalis ná más van a sabel cantal esi, y sólu esa frasi que hi puestu yo, porque lo continúan cantandu "na na na, na na na,...".

¿Qué ha síu de tólus nuestrus villancicus? Pos comu está de moda (peru ná más n'El Rebollal) preseguil la nuestra cultura y jadeli reverencias a la cultura forastera, los nuestrus villancicus s'están perdiendu. Lo mesmu qu'el restu de la nuestra cultura. Esu son parti de los beneficius de la "globalización" (tamién hai otrus comu la subía del gasóil, el tribu,... Beneficius mú grandis... pa los grandis).

Una cosa tenemus de tenel mú crara: la nuestra tierra, sin la nuestra cultura, no es más que cincu pueblus con cincu árbolis y cuatru gatus. Asina de craru, y asina de duru. Si dejamus perdel la nuestra cultura, dejamus perdel la nuestra tierra.

Lo qu'es ena mi cassa, los villancicus que van a oyelsi no son los típicus de tólus láus, sinu otrus que, anque se oyin menus, son más nuestrus. Dejémonus ya de adoral tantu la cultura forastera. ¡Tengamus un pocu de cariñu pola nuestra, carallu!

Igual de probis que ayel

2007-12-23T00:15:00.000+01:00

Pos sí, dagalis. Llegó el 22 de diciembri, el día de la Lutería y, comu la costumbri, no mos ha tocáu ná. Esti añu, ni la pedrea. Asina qu'estamus igual de probis que siempri.

¡Y esu que llevaba númerus de Peñaparda, de Villarrubias y de Robrea! Güenu, y de Madrís, y del País Vascu,... Peru ni un duru, oyi, ni un real. El casu es que ya llevu muchus añus acumulandu, asina qu'el día que me toqui algu va a sel gordu...

Pa jadel los honoris en esti Día de la Salús (se le llama asina porque, comu no mos toca la lutería, siempri se idi "lo emportanti es la salús"), esperu que tós estemus bien, y que lleguemus a otru añu con salús.

Y mañana más y mejol. Lo de la Lutería... pa otra vés será.

¡Cómu ha cambiáu el tiempu!

2007-12-18T23:34:00.000+01:00

MARTIS, 18 DE DICIEMBRI. Aguanievi y nievi a la mañana, lluvia juerti a la tardi. Mín: -5'2ºC Máx: 4'1ºC

Pos sí, prendas. Lo que ha cambiáu el tiempu d'ayel p'acá. Estus días d'atrás himus estáu n'El Rebollal rejilandu de fríu a las nochis, con el termómetru mú pol baju los ceru gráus. La nochi del lunis apencìpió a helal mú prontu (a las 8 de la tardi ya estabamus pol baju el ceru) y, en un verbu, apencipió a subil la temperatura jasta ponelsi pol cima el ceru. Lo justitu pa que llegasin a la nuestra tierra las primeras nievis de la temporá.

Y llegarun, en Payu y Navafrías. De Payu p'allá, nevó y paici que ha queáu yelu ena pista, asina que si anguién tieni de cogel el cochi mañana que tenga muchu cudiáu, que la carretera está mú mala.

De Payu p'acá cayó aguanievi. No llegó a cael nievi. Peru las carreteras están igual de malas, porque el fríu lo jadi igual, y el yelu se quea enas callis, carreteras y caminus. Asina, sigún ha dichu la teli de Ciarrodrigu esta nochi, nel Riufríu se han salíu tres cochis hoi. Si ya se salin sin que pasi ná otrus días, imaginalvus con estus días de perrus qu'están.

En estus momentus en qu'estoi escribiendu estas palabrinas, en Peñaparda está lloviendu juerti, con unas güenas dondeás d'airi. Comu pa no ansomal la narís a la puerta de cassa en toa la semana, porque pa mañana miércolis dan mucha agua y muchu airi, lo mesmu qu'está jadiendu agora mesmu.

Asina que mañana va a estal, lo mesmu que hoi, un día pa estalsi en cassa bien agustitu alreol de la lumbri. Aprovechal a assal coridus, castañas, patatis,... y a recordal los viejus tiempus, los viejus ssonis, las viejas historias,... De seranu, comu antañu.

Y si anguién stá obrigáu a salil de cassa, que tenga muchu cudiáu, lo mesmu si va andandu comu si cogi el cochi. Comu idían en una serie de telivisión de los añus ochenta, "Canción triste de Hill Street", TENGAN MUCHU CUDIÁU AHÍ JUERA.

II Día de la Lengua Leonesa

2007-12-18T00:07:00.000+01:00

DOMINGU, 16 DE DICIEMBRI. Día de sol. Mín: -6'0ºC Máx: 6'1ºC

LUNIS, 17 DE DICIEMBRI. Día de sol. Mín: -6'2ºC Máx: 6'2ºC

Que la lengua leonesa (nel leonés del norti, "llingua llïonesa") es una lengua viva ná más lo ponin en duda los que no tienin respetu pola cultura de los demás. Que la lingüe leonesa está en peligru, tampocu lo poni naidi en duda, y los que no respetan la cultura de los demás se alegran de qu'esté en peligru.

Tó estu vieni a qu'esti domingu se celebró, nel salón del Cuartu de León, el II Día de la Lengua Leonesa, día pa reivindical que la lengua lionesa entovía está viva, y que se tieni de defendel comu parti del nuestru patrimoñu cultural, y comu parti de la herencia que mos dejarun los nuestrus padris y agüelus.

El casu es que, anque la lengua leonesa está reconocía pola UNESCO, y anque la nuestra Costitución idi que toas las palras son un patrimoñu que mereci especial respetu y proteición, jasta hogañu la lengua leonesa, en vés de sel defendía, le ha pasáu tó lu contrariu. Y esu es algu que dendi muchas asociacionis y, dendi esti día de la Lengua Leonesa se ha veníu denunciandu.

La jorná apencipió cona música de Sara González. Dispues pusun un documental, primeru jechu en leonés, con el nombri de "Asina falamos". El grupu "Txaciana", de Villablinu, jidu una obrina de teatru llamá "Fuei a corteixar a Robles". Pa acabal, la Banda de Gaitas de León pusu el postri musical al día.

Dendi esti pequeñu escritu quería felicital a los que han jechu que se güelva a palral de la nuestra lengua leonesa (porque la palra d'El Rebollal es el "leonés del sul") y felicitalus pol el trabaju qu'están jadiendu pa recuperal el leonés.

Aquí, n'El Rebollal, también estamus un puñaínu de genti que lucha por que nu se pierda la nuestra palra leonesa, la palra d'El Rebollal. Y angunus tamién tenemus en menti el jadel un "Día de la Palra d'El Rebollal" o algu apaecíu. Porqu'es tiempu de "salil del armariu", de dejal de avergonzalsi de la nuestra lengua, y de grital bien altu que la palra d'El rebollal esisti y que tieni tó'l derechu del mundu a sel defendeía y ussá, le pesi a quien le pesi. Porque hai genti que le jiedi qu'esista la nuestra lengua. Peru güenu, esu es otra hestoria...

Vamua a apencipial a trabajal en ellu, a trabajal para jadel pa'l sotru añu, pa'l añu 2008, el I Día de la Palra d'El Rebollal. Porque trabajal para defendela y que no se muera (o que no la dejin moril, qu'es muchu peol), ya lo jademus tólus días. ¡¡VIVA LA NUESTRA PALRA D'EL REBOLLAL!! ¡¡VIVA LA NUESTRA LENGUA LEONESA!!

El vagal jadi cuchal

2007-12-16T00:21:00.000+01:00

SÁBADU, 15 DE DICIEMBRI. Día de sol. Mín: -7'1ºC Máx: 7'7ºC

"El vagal jadi cuchal". Esti refrán me lo diju esta mañana la Tia Gora (102 añus, en eneru 103) al velmi juegandu con los mis perrus ena puerta de cassa.

El refrán tieni ná más que cuatru palabrinas, peru se puedi escribil muchu alreol d'ellas.

La primera, el, es el artículu, lo mesmu qu'en castellanu, asina que no voi a idil más.

Vagal es un verbu mú d'aquí. No sé si en otrus lugaris de Salamanca o de Cáciris se ussa el verbu "vagal" (o la su castellanización "vagar"). N'El Rebollal s'ussa pa idil si se tieni tiempu (o no se tieni tiempu) pa jadel algu. Asina, cuandu anguién no tieni tiempu de jadel anguna cosa, se la puedi oyel idil: no me vaga. La terminación en -l es la propia de la palra d'El Rebollal.

Jadi es la tercera persona del prural del presenti del verbu jadel, unu de los que más s'ussan ena comarca d'El Rebollal. Podemus el dos cosas ena palabra "jadi". Primeru, la j- no es la "j castellana" (que n'El Rebollal no esisti), sinu que es el resultáu d'aspiral la f- latina. N'el Rebollal s'ussa esta aspiración en un montonáu bien grandi de palabras. Angunus ejemprus, además de los tiempus el verbu jadel, son: jelechu, juenti, Jelipi, jorramachi, jornu, jierru, jebreru,... Peru con tó y con esu, la f- aspirá no es lo más curiosu de la palabra "jadi". Y es que lo que está escritu comu -d- ena palabra, tampocu es la "d castellana", sinu qu'el su soníu es el de la antigua "z sonora". Un preciosismu, un tesoru qu'entovía guarda la nuestra palra, y que tamién se oyi en un montonáu de palabras: dagal, jadel, codina, codel, bederru, dodi, dodena, calabodu,...

Y, pa acabal, tenemus la que, nel mi parecel, quiciás sea la palabra más curiosa de las cuatru: cuchal. Cuchal es lo qu'en castellanu se llama "cuchara". Esi cambiu entri el leonés d'El Rebollal y el castellanu podría valel, pol si mesmu, pa tenel comu mú curiosa esta palabra. Peru entovía hai más. El prural de cuchal es cucharis, con el prural femeninu en -es (, típicu de la lengua leonesa, que n'El Rebollal se cierra en -is). Esti prural entovía s'ussa hogañu en Peñaparda (anque hai estudiosus que idin que esi tipu de prural ná más s'ussaba en Payu, peru los datus idin que, polu menus, tamién s'ussaba en Peñaparda). Esta curiosa característica típica de la lengua leonesa entovía se conserva en Peñaparda en un puñaínu de palabras: cuchal/cucharis; llaris; gallina/gallinis; patata/patatis; vaca/vaquis; ristri/ristris. Bien es verdá que poca genti s'acuerda ya, peru ussalsi, s'ussa. Y a la hora d'escribil ena palra d'El Rebollal, aconseju ussal esti tipu de prural qu'está documentáu que se ha ussáu ena nuestra palra (mientris yo viva, s'ussará lo mesmu ena lengua oral comu ena escrita).

Pos ná, dagalas y dagalis. No quieru jadel esti escritu más grandi, peru piensu que, con lo que hi escritu hoi, podéis barruntal angunus de los tesorus qu'entovía guardan la nuestra lengua y la nuestra tierra. De seguru que nunca pensásteis que se pudiesi chalral tantu alreol d'un refrán tan chicu.¡Lo que arrejundin cuatru palabrinas!

La Navidá que vieni

2007-12-14T20:15:00.000+01:00

VIERNIS, 14 DE DICIEMBRI. Día de sol. Mín: -5'8ºC Máx: 8'7ºC

No créu que haiga falta que vos acuerdi que ya tenemus encima la Navidá. Las lucis se ven pols callis de las ciudadis, los adornus ya están puestus en muchas casas, las telivisionis mos ponin horas y horas de anuncius de colonias y jueguetis,... ¡Es Navidá!

Y si h algu que no falta nunca ena Navidá son los regalus. Ya vos diji en otru escritu que el mejol mó y manera de "jadel patria" es regalal cosas jechas n'El Rebollal, y vos pusi una lista de librus y discus jechus pola genti d'El Rebollal. Peru esti escritu d'hoi, anque va de regalus, va pol utra veréa.

¿Qué personaji tieni de trael los regalus? La tradición d'España, dendi jadi muchus añus (y arrecogía de la tradición católica) es que los regalus los traigan los Reyis Magus d'Orienti. Pol esu se jadin en muchus lugaris (la nochi del 5 d'eneru) cabalgatas de Reyis, o polu menus anguién se poni las vestimientas de los Reyis y le da los regalus a los dagalis del lugal. Es una bonita tradición, s'esté d'acuerdu o no cona ilesia católica.

En estus últimus tiempus está cogiendu juerz un señol gordu y vestíu de coloráu, llamáu Papá Noel (o Santa Claus) que vieni dendi Yankilandia, y qu'ena Nochigüena entra polas chimineas (el que las tenga) y deja los regalus. Y es qu'entri las películas americanas de Navidá (andi siempri, siempri, siempri sali el señol de coloráu), los anuncius de la Coca-cola y el del turrón de Suchard, paici que juesi nuestrus, anque nunca nu lo jué. Asina es el nuestru país, siempri arrecogiendu las tradicionis que mos vendin dendi Yankilandia y dejandu moril las de aquí. A angunus siempri le parecin mejoris las de juera...

Porque pa la mesma Nochigüena, en otras partis de la Península tienin al su propiu repartiol de regalus. El más famosu de tós es el "Olentzero" vascu, un hombritu con el oficiu de carboneru que siempri apaeci sentáu n'un barril, conas vestimientas tradicionalis de los agüelus que vivin pa los caseríus vascus, jumandu en pipa, cona botellina de vinu, una callá y una gallina picandu alreol suyu. Peru craru, el qu'esti hombritu traiga los regalus al restu de los españolis es comu la película, "Misión Imposibri", muchu más si se tieni en cuenta que a muchus españolis se les está aprendiendu a tenel arregañu a tólu que venga dendi'l País Vascu...

¿Y con cuál mos queamus? Yo, la verdá, prefieru cualisquiera al señol de coloráu que trujun d'América. Los Reyis están bien, anque los que no sean religiosus, o los que sean repubricanus, dirán que no quierin sabel ná de Reyis. El Olentzero vascu de seguru qu'está prohibíu pola "religión política" de muchus españolis.

Y si no, ¿por qué no cogel un personaji d'aquí, de la tierra, pa que mos traiga los regalus? Yo votu por qu'en Salamanca (o, polu menus, n'El Rebollal) mos traiga los regalus el tamborileru, porque pocus personajis hay más charrus qu'un tamborileru. Pos ná, esti añu, ena mi cassa, los regalus no los van a trael ni los Reyis, ni el Papá Noel. Esti añu los regalus los trai El Tamborileru.

NOTA: afotu d'un tamborileru, anque no m'acuerdu d'andi la arrecogí (créu que de http://www.tamborileros.com peru no estoi seguru, ya hai añus d'esu).

P.D.: Pa otru día chalraré alreol de los villancicus

Vesita al Rebollal

2007-12-13T23:44:00.000+01:00

JUEVIS, 13 DE DICIEMBRI. Día de sol. Mín: -5'8ºC

Esti juevis himus teníu n'El Rebollal una vesita emportanti. El señol Jesús Málaga, subdelegáu del Gobiernu en Salamanca (un cargu apaecíu a lo que aniantis era el Gobernaol Civil) ha estáu de vesita en Villarrubias, Peñaparda y Payu, paseandu polus pueblus y chalrandu con los sus alcaldis.

Sigún han dichu ena teli, los alcaldis le han estáu pidiendu al "gobernaol" cosas pa los pueblus comu, pol ejempru, que la A-62 tenga una salía pa estus lugaris (agora tenemus que pasal pol metá de Ciarrodrigu pa cogel la autovía), o que se pongan bandas sonoras pa que los cochis y cambionis no vayan tan ligierus al pasal pol metá de Villarrubias, o que se arregri el Riufríu, o que pongan "banda ancha" en los pueblus porqu'el inerné va mú lentu,... S'echa de menus que pidiesin ayúa pa defendel la cultura tradicional (y muchu más pa la nuestra palra, que es la parti de la nuestra cultura más olvidá). Se ha echáu de menus tamién que la vesita juesi ná más con los alcaldis y justicialis, sin qu'el pueblu s'enterasi de ná ni pudiesi vel y saludal al señol "gobernaol".

La vesita ha síu emportanti. Ena telivisión de Ciarrodrigu han jechu tó'l programa de "Plaza Mayor" (Praza Mayol) alreol d'esta vesita, y han chalráu con los alcaldis de Villarrubias y Payu (¿por qué no han chalráu tamién cona alcaldesa de Peñaparda?). Y de seguru que mañana los periódicus de Salamanca van a escribil abondu alreol d'esta vesita.

Está mú bien esu de que los políticus emportantis jagan asina vesitas a los pueblus chicus, comu los nuestrus lugaris. Esperemus qu'esta vesita sirva pa algu, y que nu haiga síu pol mé de qu'en marzu hai eleicionis... ´Peru a tólus que vengan os recibiremus conus brazus abiertus. Asina que ¿a qué esperan os pecis gordus? Anque pa prometel y no cumpril... cuasi mejol que mos dejin de jaléus, pa otras vés será.

NOTA: afotu de la vesita de Jesús Málaga a Peñaparda. D'izquierda a derecha: José y Luisa (justicialis), Jesús Málaga (subdelegáu del Gobiernu), Camila (alcaldesa), Toño (justicial) y Javi (secretariu)

Güelvi el fríu

2007-12-13T00:38:00.000+01:00

Estus días, entri unas cosas y otras, hi teníu estu d'escribil un poquinu abandonáu, peru golvemus aquí seguil chalrandu alreol de la nuestra tierra y a seguil defendiendu la nuestra lengua.

Pos sí, paisanus, ha güeltu el fríu. Pa los que vivimus n'El Rebollal, esu no es noticia. No tenemus más de ansomal la narís a la calli pa que se mus yeli. Peru pa los qu'estáis juera, güenu es que sepáis que estas Navidadis van a venil frías, asina que traelvus p'acá gorru, bufandas, guantis,... Porque va a habel qu'abrigalsi bien.

Y es qu'estas son las temperaturas mínimas que hi medíu estus dos últimus días.
Martis, 11 de diciembri: -4'1ºC
Miércolis, 12 de diciembri: -5'6ºC
Agora mesmu tenemus, nel centru de Peñaparda -3'4ºC

Comu ya hi dichu anguna vés, el térmometru que tengu pa medil los gráus que jadin en la calli está nel balcón de la mi cassa, nel centru d Peñaparda, lo que jadi que esté algu a la abrigá. En lugaris comu El Castilu, el Ríu la Puenti o Riufríu puedi jadel jasta 5 gráus menus, asina qu'echá cuentas.

Esta mañana un hombritu mos diju que, montáu nel su cochi, pa Los Cotorrus jadía -1ºC, pal centru de Peñaparda -3ºC, pa'l Castillu -7ºC y en Robrea -10ºC.

Pos ná, dagalis. A arcendel la lumbri, a ponel el braseru, a ponel mantas ena cama, a ponelsi güena ropa d'inviernu porque, anque estamus a finalis del tardíu, el inviernu está llamandu a la nuestra puerta. ¡Y llama bien juerti!

La palra d'El Rebollal y la Costitución

2007-12-06T22:59:00.000+01:00

MIÉRCOLIS, 5 DE DICIEMBRI. Niebra a la mañana, sol a la tardi. Mín: -0'5ºC Máx: 14'4ºC

JUEVIS, 6 DE DICIEMBRI. Niebra alta. Mín: 6'5ºC Máx: 12'5ºC

Hoi día 6 de diciembri la nuestra Costitución, la prencipal de las leyis d'esti país que llamamus España, jadi 29 añus. En éstus añus han pasáu muchas cosas, muchas güenas y otras tantas malas, y la vía política d'España ha estáu alreol d'esi librinu que, anque chicu, es el libru más emportanti de los escritus n'esti país (dispués de "El corral los mis agüelus", craru, jejeje).

Ena Costitución se palran de muchas cosas: derechus, deberis,... Y tamién de las lenguas y palras d'España. Anque idi qu'el casstellanu es la lengua oficial (art. 3.1), no se olvía de las demás lenguas.

Y aquí es andi entra la nuestra palra.

Ya nel PREÁMBULU idi: La Nación española (...) proclama la su voluntá de:
(...) Protegel a tólus españolis y pueblus d'España (...) las sus culturas, tradicionis, lenguas e istitucionis.

Peru no quea ahí la cosa. Veamus lo qu'idi el artículu 3.3 de la Costitución: La riqueza de las diferentis palras d'España es un patrimoñu cultural que será ojetu d'especial RESPETU Y PROTECIÓN.

¿Se cumpri la Costitución nel casu de la palra d'El Rebollal? Nel mi parecel no. Las alcaldis, justicialis,... d'El Rebollal no sólu no jadin ná (o cuasi ná) pol defendel la nuestra lengua sinu que, además de no teneli ningún respetu, se jadi tólu que se puedi para que desapareza.

Lo que voi a idil agora está craru. Señoris (y señoras) alcaldis y justicialis d'El Rebollal. La palra d'El Rebollal mereci RESPETU Y PROTECIÓN. No lo digu yo, lo idi la nuestra Costitución de 1978. Me paici que ya es tiempu de que apencipie a cumprilsi.

PALRA D'EL REBOLLAL, ¡¡RESPETU Y OFICIALIDÁ!!

NOTA: afotu del Morumentu a la Costitución ena ciudá de Leganés (Madrís)

El plenu el ayuntamientu

2007-12-05T00:14:00.000+01:00

MARTIS, 4 DE DICIEMBRI. Niebra meona a la mañana, sol a la tardi. Mín: 2'4ºC Máx: 14'2ºC

Esta tardi-nochi ha habíu plenu del Ayuntamientu de Peñaparda. El alcaldi (en Peñaparda, alcaldesa) y los justicialis del lugal se han reuníu nel cuartu de Peñaparda pa chalral y jadel cosas por el pueblu.

¿De qué han palráu? De muchas cosas: de dinerus que se pidin a otrus organismus, de cosas que pidin las gentis del lugal,... De tó un pocu. Peru güenu, no es a esu a lo que yo iba.

Andi de verdá quería yo llegal es al asuntu de il a los plenus. No sé si la genti lo sabi, peru los vecinus d'un pueblu tenemus derechu a il, sin palral y sin votu, a los plenus del ayuntamientu. O sea, a il a un plenu a oyel lo que palran los nuestrus alcaldis y justicialis, a vel cómu decidin qué jadel (o qué no jadel) en el pueblu. Y lo mesmu que pasa en esti pueblu, pasa en tólus pueblus d'El Rebollal, y debería sel asina en tólus pueblus d'España. El il a los plenus es libri pa toas las gentis, siempri que se guardin silenciu.

Anque haiga genti qu'estu le pareza raru, es unu de los derechus que tenemus la genti en Democracia, y es un mó y manera más de participal en asuntus públicus. Otrus mós y maneras son, pol ejempru: el votal, el presentalsi a las eleicionis,...

Peru que sepáis qu'el il a los plenus es un derechu que tenemus tós, y es un derechu que vos animu a ussal, pos me paici interesanti abondu vel cómu las gentis que himus escogíu enas eleicionis pa que mos representis y mos gobiernin jadin esu pa lo que los himus votáu: representalmus y gobernalmus.

Sólu pongu una pega: la mayoría las vecis, la genti de los nuestrus pueblus no sabin cuándu son los plenus. Normalmenti se pregonan nel tablón d'anuncius del Cuartu, peru nel de dentru. Lo mesmu si el plenu lo pregonasin nel tablón de juera, o echasin un pregón comu cuandu se va a cuertal el agua, a lo mejol iba más genti, pos de seguru que hai más genti que yo a la que l'interesa estu ve vel cómu llevan los nuestrus representantis el pueblu.

Güenu, lo dichu: il a oyel a los plenus es algu que recomiendu, ussal esi derechu que tós tenemus d'il a oyel.

Reunión de la asociación el panderu cuadráu

2007-12-04T00:40:00.000+01:00

LUNIS, 3 DE NOVIEMBRI. Nubráu a la mañana, sol a la tardi. Mín: 3'4ºC máx: 13'3ºC

Esti blog quieri, además de defendel la nuestra lengua y la nuestra cultura tradicional, tenel un pocu de serviciu a los demás. Pol esu, hoi el escritu del blog va a sel un anunciu d'una reunión d'una de las asociacionis culturalis d'El Rebollal. Si anguna otra asociación quieri que dendi aquí le dé un pocu de pubricidá a las cosas que jadin, no tienin más que mandalmi las sus cosas a cualisquiera de las mis direicionis de corréu.

Güenu, vamus cona reunión de la asocaición el panderu cuadráu de Peñaparda.

DÍA: juevis, 6 de diciembri de 2007
HORA: 6 de la tardi (18:00)
LUGAL: Biblioteca nel Cuartu de Peñaparda
TEMAS A TRATAL:
- Chalral alreol de cómu salió la Fiesta los 200 Añus
- Cambiu de presidenta

Güenu, si angunu de la asociación el panderu cuadráu lei esti escritu, ya sabi que tieni reunión esti juevis.

Regalus de Navidá

2007-12-03T00:12:00.000+01:00

VIERNIS, 30 DE NOVIEMBRI. Niebra a la mañana, sol a la tardi. Mín: -2'8ºC Máx: 9'4ºC

SÁBADU, 1 DE DICIEMBRI. Muelli-muelli. Mín: -1'6ºC Máx: 10'1ºC

DOMINGU, 2 DE DICIEMBRI: Nubráu. Mín: 5'8ºC Máx: 9'7ºC

Pos sí. Ya tenemus al laítu las Navidadis. Ya se sabi, esi tiempu del añu en que tós jademus pol sel un poquinu mejoris, y en que tós mos rascamus los bolsillus y gastamus unas perrinas de más enas comías y las cenas.

Y tamién enos regalus que jademus a los demás. Y d'estu quieru palral un poquinu. Porque podemus "jadel patria" regalandu cosas jechas n'El Rebollal: librus, discus, estrumentus,... Vos pongu una lista, pa que vos jagáis una idea.

DISCUS
- Cantaris Antigus de Roblea (2002)
- El pandero cuadrado de Peñaparda (2002)

LIBRUS
- El habla de El Rebollar. Descripción (1982)
- El habla de El Rebollar. Léxico (1990)
- Romances y coplas del Rebollar (1998)
- Robleda. Crónica y descripción del lugar (2002)
- Breve descripción de Peñaparda (2002)
- El obispo robledado Fr. Antonio Sánchez-Matas (2004)
- El corral los mis agüelus (2004)

ARTESANÍA
- Panderus cuadráus de Peñaparda
- Gorras de paja de Robrea
- Carrinus de maera
- Miel de Payu y Navafrías

Y no olviémus qu'en la nuestra tierra se jadin muchas cosas que podemus ponel ena mesa pa las comías o las cenas, comu choridus, jamonis, salchichonis, dulcis, carni,...

Güenu, las ideas están ahí. Porque en la nuestra tierra tamién hai cosas güenas pa regalal y pa comel. Quiciás, muchas vecis, mejoris que la de juera. ¿Por qué no presumil de las cosas jechas n'El Rebollal?

Me gusta miral afotus

2007-11-29T23:38:00.000+01:00

JUEVIS, 29 DE NOVIEMBRI. Niebra a la mañana, sol a la tardi. Mín: -3'1ºC Máx: 9'4ºC

Toa la genti tieni en la su cassa afotus. Unas son afotus de la familia. Otras afotus de viajis. Otras afotus de boas, comunionis, de cuandu éramus chicus,... Peru una cosa es bien segura: a tós mos gusta paralmus anguna vés a miral las afotus.

Pos sí, a mi tamién me gusta miralas. Y es ue las afotus te train muchus recuerdus. Las de la familia, recuerdus de genti que ya no stá, o de genti qu'está lejus. Las de boas y comunionis, recuerdus de tiempus felicis. Las de viajis, recuerdus de lugaris qu'están lejotis y a los que, quiciás, nunca más golvamus a il.

Peru toas las afotus tienin una cosa igual, sean las que sean: son recuerdus. Dendi'l sigru XX, en toas las cassas hai afotus. En unas más, en otras menus. Peru siempri hai anguna. Y siempri vemus enos mueblis afotus, y ¿quién no tieni en la su cassa un álbum d'afotus que saca del cajón pa enseñalu a las vesitas? Pos sí, esa ha síu la nustra vía nel sigru XX.

Peru llega el sigru XXI y, con él, las cámaras digitalis. Y las afotus qu'aniantis eran de papel y guardabamus en álbunis y colgabamus de las parés, agora están metías en discus y pa velas tienis que tenel un deuvedé o un ordenaol. Bien seguru que jadel las afotus con una cámara digital es muchu más baratu, pos ni tienis que compral el carreti, ni tienis que pagal pol revelalas. Peru no es menus verdá que ya no son comu antañu, pos ni puedes velas cuandu quieris, ni son lo mesmu.´Qué queréis que vos diga, anque jagu milis y milis d'afotus cona mi cámara digital (que me regaló el mi hermanu pal mi cumpreañus), estaba muchu más contentu cuandu jadía las afotus cona cámara normal, con el su carreti y tó esu. Las afotus me parecían comu más de verdá.

Y las afotus que más me gustan son las antiguas, esas qu'estaban jechas en brancu y negru, las afotus de los nuestrus agüelus, con las sus vestimientas d'antañu, unas afotus qu'en sí mesmas eran toa una hestoria. Y me paici que esas afotus le gustan a más genti que a mi.

No es casualidá que, cuandu en los nuestrus pueblus se jadi una muestra d'afotus, la genti vaya a velas con alegría y se quedi crisá mirandu las afotus, mirandu quién sali, cómu iba vestíu, qu'estaba jadiendu. A la genti le gusta recordal, y las afotus ayúan muchu al recuerdu. Sería mú tristi que, pol mé de los adelantus, dejásemus de tenel afotus en papel, dejásemus de tenel los nuestrus recuerdus a manu. Porque tengu de decilvus la verdá: a mi me gusta miral las afotus, y cuantis más antiguas, mejol.

NOTA: afotu (sacá del su carné) de una de las mis bisagüelas, María Hernández Asensio, que murió nel añu 1966

Las nuevas telivisionis llegan al Rebollal

2007-11-28T20:28:00.001+01:00

MIÉRCOLIS, 28 DE NOVIEMBRI. Sol. Mín: -2'7ºC Máx: 9'4ºC

El escritu d'hoi va a sel mú cortinu. Ná más idilvus que dendi esta semana (anque no sé dendi qué dia, quiciás dendi ayel martis) se puedin vel n'El Rebollal las nuevas telivisionis con güena señal. Cuatro (Cuatru)ya hai tiempu que se veía, anque en muchus lugaris d'El Rebollal se veía mú mal. Agora ya se ve bien en tós (buscal nel canal 56). La Sexta (La Sesta) ha apencipiáu a velsi esta semana (buscal nel canal 54). Además, tenemus una nueva telivisión "regional", Canal 4 (buscala nel canal 24).

Al contrariu, dendi ayel en la mi cassa (y, comu en la mi cassa, en muchas) no se ve Telecinco (Telicincu).

Güenu, dagalis (y dagalas). A disfrutal d'estus nuevus canalis que han llegáu a la nuestra tierra. Comu a tó forasteru que vieni pol primera vés a los nuestrus lugaris, la nuestra bienvenía.

¿Tenemus menus derechus que los demás?

2007-11-27T23:24:00.000+01:00

MARTIS, 27 DE NOVIEMBRI. Sol Mín: 0'3ºC Máx: 9'5ºC

La cosa vieni polu que sigui. El otru domingu leí nel Diariu de León a un hombri que idía que sobraban lenguas nel mundu, y que toas las lenguas tenían de desaparecel menus las más grandis.

La verdá es qu'en esi momentu me vinun a la menti un montonáu d'insultus, insultus que de verdá se mereci peru que, además de no cabel nel periódicu, jadrían qu'el verdugu se pusiesi comu víctima.

El casu es que paici que los pequeñus no tenemus derechu (sigún él). ¿Acasu tenemus menus derechus que los demás los que palramus otra lengua? ¿Cuálus son, según él, las lenguas que tienin de queal? ¿Cuális deben desaparecel? ¿Qué jadría él pa que desaparecieran? ¿Qué jadría con os que palramus y defendemus otras lenguas? La verdá es que esi escritu cheira pol tólus láus a imperialismu desfrazáu de "progresu".

Igual a esi señol se le ha olviáu esu que poni el artículu 3.3 de la nuestra Costitución del 1978: "La riqueza de las distintas modalidades lingüísticas de España ES UN PATRIMONIO CULTURAL que será objeto de ESPECIAL RESPETO Y PROTECCIÓN".

Diga lo que diga esi "señol" y otra genti comu él, los que palramus y defendemus la nuestra lengua tenemus tólus derechus del mundu. Tenemus derechu a palrala, tenemus derechu a escribila, tenemus derechu a defendela, y tenemus derechu a que la nuestra lengua siga viva.

Y, gracias a las barbariadis que esti "señol" escribió nel periódicu, voi a defendel con más juerza entovía la nuestra lengua. Porque, anque a él y a otra genti le jieda, tengu tó'l derechu del mundu. Porque, anque a él le jieda, la nuestra lengua está viva. Y, anque a él le jieda, estará viva mientris yo viva, porque seguiré palrándola y defendiéndola.

Si anguién quieri sabel lo que escribió esi "señol", aquí vos pongu el enlaci: http://www.diariodeleon.es/se_opinion/noticia.jsp?CAT=108&TEXTO=6349393

Y pol si anguién quieri poneli las cosas craras, tamién vos pongu la direición de corréu del periódicu: cart.director@diariodeleon.com

¡VIVA LA PALRA D'EL REBOLLAL! ¡VIVA LA LENGUA LEONESA! ¡VIVAN TOAS LAS LENGUAS!

Matancias

2007-11-26T22:26:00.000+01:00

SÁBADU, 24 DE NOVIEMBRI. Dia de sol. Mín: 0'3ºC Máx: 9'6ºC

DOMINGU, 25 DE NOVIEMBRI. Díad e sol. Min: -1'1ºC Máx: 11'4ºC

LUNIS, 26 DE NOVIEMBRI. Día de sol. Min: 3'4ºC Máx: 11'1ºC

En cuantis llega el fríu, en los nuestrus pueblus siempri apencipiaban a jadelsi las matancias. Antañu se jadían más qu'hogañu peru, pro suerti, entovía podemus vel, jadel y disfrutal de las matancias que se jadin n'El Rebollal.

La matancia siempri jue comu una fiesta allá andi se jadía. Lo primeru, porque s'ajuntaba mucha genti, cuasi toa de la familia (y sin il d'intierru) lo que ya jadía qu'esu juesi una fiesta. Lo segundu, pola propia matancia del cerdu, que iba a dali a la familia carni pa tó'l añu. Lo terceru, porqu'esus días se comin cosas que normalmenti no se comían en tól añu (barbá, asaúras, prebi,...). Y lo cuartu, porque siempri había lugal y tiempu pa cantal y bailal.

Es curiosu, peru siempri hi oyíu que, al final de la matancia, en Peñaparda se bailaba el corríu y el brincáu "pa que no se cayesi al suelu la matancia". Esu le da al baili otru valol más, comu es el de sel un ritu mágicu. Aogra de seguru qu'anguién se ríi d'estas cosas, peru pa los nuestrus padris y agüelus la matancia y los sus ritus eran algu mú seriu.

No voi a esprical aquí cómu se jadi una matancia. Espricalu bien llevaría muchu tiempu y espaciu, y quiciás habría qu'escribil un libru alreol del tema. Lo que sí se puedi idil es que la matancia tieni un vocabulariu propiu qu'es grandi abondu: matancia, cerdu, gorrinu, cebón, choridu, choridu de la tripa el culu, jamón, salchicón, morcilla de sangri, morcilla rinconera, banduju, bofi, prebi, asaúras, barbá, enfusiqui, enfusal, varalis,... De seguru que vusotrus conocéis muchas más de las que hi puestu aquí.

El casu es que la matancia, comu hi dichu aniantis, siempri ha síu algu especial. Lo mesmu hai genti que piensa que no. Total, si hogañu no hai más qu'il al mercáu y ya s'encuentra tólu que quieras compral. Peru no es lo mesu. Lo compráu, ni es igual de buenu que lo jechu en cassa, ni tieni esu d'especial de habelu jechu conas etus manus, y en familia. Y es que las cossas jechas en familia, sabin mejol.

La nuestra lengua está viva

2007-11-23T23:43:00.000+01:00

23 DE NOVIEMBRI. Niebra a la mañana, sol a la tardi. Mín: 0'3ºC Máx: 9'6ºC

Pos sí, le pesi a quien le pesi, la palra d'El Rebollal sigui vivita y coleandu. No quieru jadel esti escritu d'hoi mú largu, asina que vamus a lo que vamus.

Primeru, sigui viva porque hai escritus nuevus enas nuestra palra. El más emportanti (y no es porque lu haiga escritu yo) es el libru "El corral los mis agüelus" que, hogañu, es el únicu libru escritu ena palra d'El Rebollal. Esu, además de cuentus que han escritu angunas presonas. La nuestra lengua tieni LITERATURA.

Segundu, la nuestra palra tamién s'ussa nel interné. Ena redi tenemus, además d'esti blog andi escribu anguna cosina tólus días, la rivista LA GURULLA (que, anque nu sacu númeru dendi el 13, no vos afrontéis, el 14 está de caminu). Y nu se puedi olvial a esi grupu de paisanus qu'escribimus tamién tólus días nel Foru de Robrea, que damus el nuestru parecel ena nuestra palra. Asina, la nuestra palra s'ussa tamién ena REDI.

Terceru, porque la nuestra palra l'interesa a mucha genti. No hai más que vel que cualisquiel cosina que jademus pa defendela enseguía sali enos periódicus. Asina ha pasáu con esti blog (nel Tribuna de Salamanca del día 11 de noviembri), pasó con LA GURULLA (le jidun en reportaji nel Tribuna hai unus añus; el númeru 1 salió comu noticia n'El Adelanto; los dos añus de LA GURULLA juerun noticia en La Voz de Miróbriga, y dos entrevistas ena arradiu), pasó cuandu ena Fiesta el Panderu Cuadráu defendí la nuestra palra delantri toa la genti (La Gaceta y La Voz de Miróbriga), y pasó cuandu, pol primera vés se jidu la presentación de la fiesta ena palra d'El Rebollal. La nuestra palra está mu presenti y tieni mú güena PRENSA.

Y cuartu, peru no menus emportanti, la nuestra lengua tieni mucha genti qu'entovía la palran (mal que le pesi a angunus sabiondus). Entri las gentis d'El Rebollal que vivimus aquí, la genti d'El Rebollal que vivi pa la Francia, y la genti d'El Rebollal que defiendi y ussa la palra tólus dían, echandu númerus puedi qu'entovía palremus rebollanu alreol de 4.000 presonas. La nuestra palra tieni GENTI QUE USSA LA PALRA.

Asina la cosa está mú crara. La nuestra palra está viva, mú viva. Y dendi aquí (y dendi se puéa) la vamus a seguil defendiendu. Le pesi a quien le pesi. Caiga quien caiga.

Jumu enos tejáus

2007-11-23T00:04:00.000+01:00

JUEVIS, 22 DE NOVIEMBRI. Muelli-muelli ala mañana, nubráu a la tardi. Mín: 2'1ºC Máx: 9'7ºC

En estus días en que ya jadi fríu estaréi d'acuerdu conmigu que lo mejol es sentalsi a la lumbri pa estal calentitus, asal unas castañas, unas patatis, choridu, contal hestorias, cantal unus ssonis,... Peru lo prencipal es estal calentitus.

Y craru, pa tenel lumbri hai qu'arcendel el fuegu. Lo primeru, tenel leña. Ena nuestra tierra la que más s'ussa es la de robri porque es la que más hai. Tamién tenemus que arrecogel escobas y arcendajas pa arcendel la lumbri. Tamién, a las vecis, anguna piña seca. Y unas cerillas o un chisqueru pa chiscali. Hai que tenel a manu el fuelli pa soprali y que prenda bien. Y dispués, ¡a disfrutal de la lumbri!

Comu idi el reflrán, "pol el jumu se sabi andi está el fuegu". Y andi hai fuegu, os hai jumu. No sé a vusotrus, peru a mi me gusta llegal pola carretera d'un lugl juera d'El Rebollal y vel las chimineas de los nuestrus pueblus echandu jumu. Esu es señal de que hai genti, de que los nuestrus pueblus están vivus entovía.

Y el jumu de las chimineas le da a los nuestrus pueblus otru aspectu, comu si saliesin d'un documental, o del cuadru d'un pintol, o d'una película, o d'una pstal. Asina, conas chimineas echandu jumu, paicin pueblus de cuentu d'hadas. Áina si te paici que detrás d'una casa, o un robri, o pol cualisquiel callejina te va a aparecel un personaji d'un cuentu de Navidá. Y esu, dagalis, no se paga con dineru.

Mientris escribu estu las chimineas sigui echandu jumu. Güena señal. Ojalá enos nuestrus pueblus las chimineas sigan echandu jumu muchus añus, y que nusotrus lo veamus. Será señal de que lo mesmu los nuestrus pueblus y nusotrus estamus vivus.